ಹಾರ್ಮುಜ್ ಜಲಸಂಧಿ ಮುಕ್ತಗೊಳಿಸಿದ ಇರಾನ್; ಭಾರತ ಸೇರಿದಂತೆ 'ಮಿತ್ರ ರಾಷ್ಟ್ರಗಳ' ಹಡಗುಗಳಿಗೆ ಮಾತ್ರ ಪ್ರವೇಶ! | Strait of Hormuz

ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರೆಸ್ ಅವರ ಕಳಕಳಿಯ ಮನವಿಯ ಬೆನ್ನಲ್ಲೇ ಇರಾನ್ ಈ ಮಹತ್ವದ ನಿರ್ಧಾರವನ್ನು ಪ್ರಕಟಿಸಿದೆ.

ಮುಂಬೈನಲ್ಲಿರುವ ಇರಾನ್ ರಾಯಭಾರ ಕಚೇರಿಯು ಸಾಮಾಜಿಕ ಜಾಲತಾಣದಲ್ಲಿ ಈ ಬಗ್ಗೆ ಮಾಹಿತಿ ನೀಡಿದ್ದು, "ಚೀನಾ, ರಷ್ಯಾ, ಭಾರತ, ಇರಾಕ್ ಮತ್ತು ಪಾಕಿಸ್ತಾನದಂತಹ ಸ್ನೇಹಿ ರಾಷ್ಟ್ರಗಳಿಗೆ ಹಾರ್ಮುಜ್ ಜಲಸಂಧಿಯ ಮೂಲಕ ಸಂಚರಿಸಲು ನಾವು ಅನುಮತಿ ನೀಡಿದ್ದೇವೆ" ಎಂದು ಇರಾನ್ ವಿದೇಶಾಂಗ ಸಚಿವರ ಹೇಳಿಕೆಯನ್ನು ಉಲ್ಲೇಖಿಸಿದೆ.

ಹಾರ್ಮುಜ್ ಜಲಸಂಧಿಯ ಸುದೀರ್ಘ ಮುಚ್ಚುವಿಕೆಯಿಂದಾಗಿ ಜಾಗತಿಕವಾಗಿ ತೈಲ, ಅನಿಲ ಮತ್ತು ರಸಗೊಬ್ಬರ ಪೂರೈಕೆಯಲ್ಲಿ ಭಾರಿ ವ್ಯತ್ಯಯ ಉಂಟಾಗಿತ್ತು. ಇದು ಕೃಷಿ ಹಂಗಾಮಿನ ಮೇಲೆ ಕೆಟ್ಟ ಪರಿಣಾಮ ಬೀರುತ್ತಿರುವ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದ ಆಂಟೋನಿಯೊ ಗುಟೆರೆಸ್, "ಯುದ್ಧವನ್ನು ತಕ್ಷಣವೇ ಕೊನೆಗೊಳಿಸಿ. ಇರಾನ್ ತನ್ನ ನೆರೆಯ ರಾಷ್ಟ್ರಗಳ ಮೇಲೆ ದಾಳಿ ಮಾಡುವುದನ್ನು ನಿಲ್ಲಿಸಬೇಕು ಮತ್ತು ಅಮೆರಿಕ-ಇಸ್ರೇಲ್ ಈ ರಕ್ತಪಾತಕ್ಕೆ ವಿರಾಮ ಹಾಡಬೇಕು" ಎಂದು ಖಡಕ್ ಸಂದೇಶ ರವಾನಿಸಿದ್ದರು.

ನ್ಯೂಯಾರ್ಕ್‌ನಲ್ಲಿರುವ ಇರಾನ್ ಮಿಷನ್ ಸ್ಪಷ್ಟಪಡಿಸಿರುವಂತೆ, ಹಾರ್ಮುಜ್ ಜಲಸಂಧಿಯ ಮೂಲಕ ಹಾದುಹೋಗುವ ಹಡಗುಗಳು ಕೆಳಗಿನ ನಿಯಮಗಳನ್ನು ಪಾಲಿಸಬೇಕು. ಶತ್ರು ರಾಷ್ಟ್ರಗಳೊಂದಿಗೆ ನಂಟು ಇರಬಾರದು: ಇರಾನ್ ವಿರುದ್ಧ ಹಗೆತನ ಸಾಧಿಸುವ ರಾಷ್ಟ್ರಗಳಿಗೆ (ಅಮೆರಿಕ, ಇಸ್ರೇಲ್) ಯಾವುದೇ ರೀತಿಯಲ್ಲಿ ಬೆಂಬಲ ನೀಡುವ ಹಡಗುಗಳಿಗೆ ಪ್ರವೇಶವಿಲ್ಲ. ಪೂರ್ವಾನುಮತಿ ಕಡ್ಡಾಯ: 'ಬಂಧುತ್ವ' ಹೊಂದಿರುವ ಹಡಗುಗಳಾದರೂ ಸಹ, ಜಲಸಂಧಿ ಪ್ರವೇಶಿಸುವ ಮೊದಲು ಇರಾನ್ ರಕ್ಷಣಾ ಮಂಡಳಿ ಮತ್ತು ಅಧಿಕಾರಿಗಳೊಂದಿಗೆ ಸಮನ್ವಯ ಸಾಧಿಸಿ ಅನುಮತಿ ಪಡೆಯುವುದು ಕಡ್ಡಾಯ. ಸುರಕ್ಷತಾ ನಿಯಮಗಳು: ಇರಾನ್ ಘೋಷಿಸಿರುವ ಎಲ್ಲಾ ಭದ್ರತಾ ಮತ್ತು ಸುರಕ್ಷತಾ ಮಾನದಂಡಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು.

ವಿಶ್ವದ ಐದನೇ ಒಂದು ಭಾಗದಷ್ಟು ತೈಲ ಪೂರೈಕೆಯಾಗುವ ಈ ಮಾರ್ಗವು ಭಾಗಶಃ ಮುಕ್ತವಾಗಿರುವುದು ಭಾರತದಂತಹ ದೇಶಗಳಿಗೆ ದೊಡ್ಡ ಸಮಾಧಾನ ತಂದಿದೆ. ಭಾರತವು ತನ್ನ ತೈಲ ಆಮದಿಗಾಗಿ ಈ ಮಾರ್ಗವನ್ನೇ ಅತಿಯಾಗಿ ಅವಲಂಬಿಸಿದೆ. ಆದರೆ, ಅಮೆರಿಕ ಮತ್ತು ಇಸ್ರೇಲ್ ಲಿಂಕ್ ಇರುವ ಹಡಗುಗಳಿಗೆ ಇನ್ನೂ ನಿಷೇಧವಿರುವುದು ಜಾಗತಿಕ ಮಾರುಕಟ್ಟೆಯಲ್ಲಿ ಆತಂಕವನ್ನು ಹಾಗೆಯೇ ಉಳಿಸಿದೆ,(ಏಜೆನ್ಸೀಸ್).