ಇರಾನ್ ನಂಬಿಕೆಗೆ ಅರ್ಹವಲ್ಲ! ಇಸ್ಲಾಮಾಬಾದ್ ಶಾಂತಿ ಮಾತುಕತೆ ವಿಫಲದತ್ತ? ಟ್ರಂಪ್ ಆಕ್ರೋಶದ ಹಿಂದಿದೆ ಭಯಾನಕ ಎಚ್ಚರಿಕೆ! Donald Trump

ತಮ್ಮ ನೆಚ್ಚಿನ ಸೋಶಿಯಲ್ ಮೀಡಿಯಾ ವೇದಿಕೆ 'ಟ್ರೂತ್ ಸೋಶಿಯಲ್​ನಲ್ಲಿ ಸುದೀರ್ಘ ಪೋಸ್ಟ್ ಹಾಕಿರುವ ಡೊನಾಲ್ಡ್ ಟ್ರಂಪ್, ಇರಾನ್ ಹಲವಾರು ಬಾರಿ ಕದನ ವಿರಾಮವನ್ನು ಗಾಳಿಗೆ ತೂರಿದೆ. ನಾವು ಶಾಂತಿಗಾಗಿ ಪ್ರಾಮಾಣಿಕ ಪ್ರಯತ್ನ ಮಾಡುತ್ತಿದ್ದರೆ, ಟೆಹ್ರಾನ್ ಬೆನ್ನಿಗೆ ಚೂರಿ ಹಾಕುವ ಕೆಲಸ ಮಾಡುತ್ತಿದೆ ಎಂದು ಕಿಡಿಕಾರಿದ್ದಾರೆ. ಪಶ್ಚಿಮ ಏಷ್ಯಾದಲ್ಲಿ ಸಂಘರ್ಷಕ್ಕೆ ವಿರಾಮ ನೀಡಿದ್ದ ತಾತ್ಕಾಲಿಕ ಒಪ್ಪಂದವನ್ನು ಇರಾನ್ ಉಲ್ಲಂಘಿಸಿದೆ ಎಂಬುದು ಟ್ರಂಪ್ ನೇರ ಆರೋಪವಾಗಿದೆ.

ಪಾಕಿಸ್ತಾನದ ರಾಜಧಾನಿ ಇಸ್ಲಾಮಾಬಾದ್‌ನಲ್ಲಿ ಎರಡನೇ ಸುತ್ತಿನ ಶಾಂತಿ ಮಾತುಕತೆ ನಡೆಯಬೇಕಿದೆ. ಅಮೆರಿಕದ ಪರವಾಗಿ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ನಿಯೋಗವನ್ನು ಮುನ್ನಡೆಸಲಿದ್ದಾರೆ. ಒಂದು ವೇಳೆ ಐತಿಹಾಸಿಕ ಒಪ್ಪಂದವೊಂದು ಸಿದ್ಧವಾದರೆ, ಸ್ವತಃ ಡೊನಾಲ್ಡ್ ಟ್ರಂಪ್ ಅವರೇ ವರ್ಚುವಲ್ ಆಗಿ ಅಥವಾ ಖುದ್ದಾಗಿ ಹಾಜರಾಗುವ ಸಾಧ್ಯತೆ ಇದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.

ಆದರೆ, ಇರಾನ್ ಈ ಮಾತುಕತೆಗೆ ಬರಲು ಹಿಂದೇಟು ಹಾಕುತ್ತಿದೆ. ಇದಕ್ಕೆ ಪ್ರಮುಖ ಕಾರಣಗಳು ಇಲ್ಲಿವೆ.

ದಿಗ್ಬಂಧನ ತೆರವುಗೊಳಿಸದ ಅಮೆರಿಕ: ಇರಾನ್‌ನ ಬಂದರುಗಳ ಮೇಲಿನ ದಿಗ್ಬಂಧನವನ್ನು ತೆರವುಗೊಳಿಸಲು ವಾಷಿಂಗ್ಟನ್ ನಿರಾಕರಿಸಿದೆ.

ಹಡಗು ವಶ: ಇತ್ತೀಚೆಗಷ್ಟೇ ಇರಾನ್‌ನ ಸರಕು ಸಾಗಣೆ ಹಡಗನ್ನು ಅಮೆರಿಕ ವಶಪಡಿಸಿಕೊಂಡಿರುವುದು ಟೆಹ್ರಾನ್ ಕೆರಳಲು ಕಾರಣವಾಗಿದೆ.

ಯುರೇನಿಯಂ ಹಕ್ಕು: ಯುರೇನಿಯಂ ಸಮೃದ್ಧಗೊಳಿಸುವ ತನ್ನ ಹಕ್ಕನ್ನು ಅಮೆರಿಕ ಅಂಗೀಕರಿಸಬೇಕು ಎಂಬುದು ಇರಾನ್ ಪಟ್ಟು.

ವೈಟ್ ಹೌಸ್ ಪ್ರೆಸ್ ಸೆಕ್ರೆಟರಿ ಕ್ಯಾರೋಲಿನ್ ಲೀವಿಟ್ ಮಾತನಾಡಿ, ಅಧ್ಯಕ್ಷ ಟ್ರಂಪ್ ಅವರ ಕಠಿಣ ಮಿಲಿಟರಿ ಒತ್ತಡದಿಂದಾಗಿ ಇರಾನ್ ಇಂದು ಮಾತುಕತೆಯ ಮೇಜಿನ ಬಳಿ ಬರುವಂತಾಗಿದೆ. ಒಪ್ಪಂದಕ್ಕೆ ನಾವು ಹತ್ತಿರವಿದ್ದೇವೆ, ಆದರೆ ಇರಾನ್ ಉದ್ಧಟತನ ಮುಂದುವರಿಸಿದರೆ ಅಧ್ಯಕ್ಷರ ಬಳಿ ಬೇರೆ ಆಯ್ಕೆಗಳೂ ಮುಕ್ತವಾಗಿವೆ ಎಂದು ಪರೋಕ್ಷವಾಗಿ ಯುದ್ಧದ ಎಚ್ಚರಿಕೆ ನೀಡಿದ್ದಾರೆ.

ಇರಾನ್ ಒಪ್ಪಂದಕ್ಕೆ ಬರಲೇಬೇಕು. ಅವರಿಗೆ ದೇಶವನ್ನು ಪುನರ್ನಿರ್ಮಿಸಲು ನಾವು ಅವಕಾಶ ನೀಡುತ್ತೇವೆ, ಆದರೆ ಪರಮಾಣು ಬಾಂಬ್ ತಯಾರಿಸಲು ಮಾತ್ರ ಯಾವುದೇ ಕಾರಣಕ್ಕೂ ಬಿಡುವುದಿಲ್ಲ ಎಂದು ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ.

ಈ ಮಾತುಕತೆ ವಿಫಲವಾದರೆ ಜಾಗತಿಕ ತೈಲ ಪೂರೈಕೆಯ ಮೇಲೆ ಭೀಕರ ಪರಿಣಾಮ ಬೀರಲಿದೆ. ಭಾರತದಂತಹ ದೇಶಗಳಿಗೆ ಪೆಟ್ರೋಲ್ ಮತ್ತು ಡೀಸೆಲ್ ದರ ಏರಿಕೆಯ ಬಿಸಿ ತಟ್ಟುವ ಸಾಧ್ಯತೆ ದಟ್ಟವಾಗಿದೆ. ಹೀಗಾಗಿ, ಇಡೀ ಜಗತ್ತು ಇಸ್ಲಾಮಾಬಾದ್‌ನಿಂದ ಬರುವ ಸುದ್ದಿಗಾಗಿ ಕಾತರದಿಂದ ಕಾಯುತ್ತಿದೆ,(ಏಜೆನ್ಸೀಸ್).