ಗೆಲುವಿನ ಮಾತು ಬಿಡಿ, ಹಸಿವಿನ ಲೆಕ್ಕ ನೋಡಿ! ಅಧಿಕೃತ ಅಂಕಿ-ಅಂಶ ಮುಂದಿಟ್ಟು ಟ್ರಂಪ್​ಗೆ ಇರಾನ್ ಸ್ಪೀಕರ್ ಚಾಟಿ | US Iran

US Iran: ಅಮೆರಿಕದ ಗೆಲುವಿನ ಶ್ರೇಯಸ್ಸು ಮತ್ತು ಆರ್ಥಿಕತೆಯ ಬಡಾಯಿ ಕೊಚ್ಚಿಕೊಳ್ಳುವ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಕುರಿತು ಇರಾನ್​ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಾಗೇರ್ ಗಾಲಿಬಾಫ್ ಖಡಕ್ ತಿರುಗೇಟು ನೀಡಿದ್ದಾರೆ.

ಅಮೆರಿಕದಲ್ಲಿರುವ ಹಸಿವು ಮತ್ತು ಬಡತನದ ಅಧಿಕೃತ ಅಂಕಿ-ಅಂಶಗಳನ್ನು ಮುಂದಿಟ್ಟು, ನಿಮ್ಮ ಮಾತುಗಳು ಎಷ್ಟು ಸುಳ್ಳುಗಳಿಂದ ಕೂಡಿರುತ್ತೆ, ಅಷ್ಟೇ ಸುಳ್ಳು ಈ ಡೇಟಾದಲ್ಲಿ ಇಲ್ಲ. ಸದಾ ಗೆಲುವಿನ ಮಾತಾಡುವ ನೀವು, ಮೊದಲು ಇದನ್ನು ಸರಿಯಾಗಿ ನೋಡಿ ಎಂದು ಡೊನಾಲ್ಡ್ ಟ್ರಂಪ್‌ಗೆ ಟಾಂಗ್ ಕೊಟ್ಟಿದ್ದಾರೆ.

ತಮ್ಮ ಎಕ್ಸ್ (ಟ್ವಿಟರ್​) ಖಾತೆಯಲ್ಲಿ ಟ್ರಂಪ್ ಅವರ ಹೆಸರಾಂತ 'MAGA' ಘೋಷಣೆಯನ್ನು ಉಲ್ಲೇಖಿಸಿ, ಅಮೆರಿಕವನ್ನು ಮತ್ತೆ ಹಸಿಯುವಂತೆ ಮಾಡಿ. ನೋಡಿ ಇಲ್ಲಿ, ನಿಮ್ಮದೇ ಸರ್ಕಾರದ ವರದಿಗಳನ್ನು ಉಲ್ಲೇಖಿಸಿರುವ ಅಧಿಕೃತ ಅಂಕಿ-ಅಂಶಗಳಿವು. ಅಮೆರಿಕದಲ್ಲಿ ಬಡತನಕ್ಕಿಂತ ಹಸಿವಿನಿಂದ ಬಳಲುತ್ತಿರುವವರ ಸಂಖ್ಯೆ ಎಷ್ಟಿದೆ ನೀವೇ ನೋಡಿ ಎಂದು ಮುಖಕ್ಕೆ ಹೊಡೆದಂತೆ ಓಪನ್ ಆಗಿ ಪ್ರಶ್ನಿಸಿದ್ದಾರೆ.

ಅಮೆರಿಕದಲ್ಲಿ ಪ್ರತಿನಿತ್ಯ 47 ಮಿಲಿಯನ್ ಅಂದರೆ 4.7 ಕೋಟಿ ಜನರು ಹಸಿವಿನಿಂದ ಬಳಲುತ್ತಿದ್ದಾರೆ. ನಿಮ್ಮ ದೇಶದ ಪ್ರತಿ 8 ಜನರಲ್ಲಿ ಒಬ್ಬರಿಗೆ ಸರಿಯಾದ ಆಹಾರ ಸಿಗುತ್ತಿಲ್ಲ. 1.6 ಕೋಟಿ (16 ಮಿಲಿಯನ್) ಮಕ್ಕಳು ಹಸಿವಿನಿಂದ ನರಳಿ ನರಳಿ ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಈ ಅಂಕಿ-ಅಂಶಗಳು ನಿಮ್ಮ ಮಾತುಗಳಷ್ಟು ಸುಳ್ಳೇನಲ್ಲ ಎಂದು ಗಾಲಿಬಾಫ್ ನೇರವಾಗಿ ದಾಳಿ ನಡೆಸಿದ್ದಾರೆ.

ಇನ್ನೊಂದೆಡೆ, ಅಮೆರಿಕ ವಿಧಿಸಲಿರುವ ಕಠಿಣ ನಿರ್ಬಂಧಗಳ ಭೀತಿಯಿಂದ ಇರಾನಿನ ಕರೆನ್ಸಿ ರಿಯಾಲ್ (Rial) ಮೌಲ್ಯ ಸಾರ್ವಕಾಲಿಕ ಕುಸಿತ ಕಂಡಿದೆ. ಸೋಮವಾರ (ಆ.24) ಕಪ್ಪು ಮಾರುಕಟ್ಟೆಯಲ್ಲಿ 1 ಅಮೆರಿಕನ್ ಡಾಲರ್‌ಗೆ 20.2 ಲಕ್ಷ (2.02 ಮಿಲಿಯನ್) ರಿಯಾಲ್ ತಲುಪುವ ಮೂಲಕ ಇರಾನ್ ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದೆ,(ಏಜೆನ್ಸೀಸ್).