ಟರ್ಕಿ ಮೇಲೆ ಮೂರನೇ ಬಾರಿ ದಾಳಿಗೆ ಯತ್ನಿಸಿದ ಇರಾನ್! ಅಮೆರಿಕದ ಪೇಟ್ರಿಯಟ್ ಕ್ಷಿಪಣಿಗಳು ಟೆಹ್ರಾನ್​ ಸಂಚನ್ನು ಧೂಳೀಪಟ ಮಾಡಿದ್ದೇಗೆ..? TurkeyVsIran

ಮಾರ್ಚ್ 4 ಮತ್ತು ಮಾರ್ಚ್ 9 ರಂದು ನಡೆದ ಎರಡು ಕ್ಷಿಪಣಿ ದಾಳಿಗಳ ನಂತರ, ಇದೀಗ ಶುಕ್ರವಾರದಂದು ಇರಾನ್‌ನಿಂದ ಹಾರಿಸಲಾದ ಮೂರನೇ ಕ್ಷಿಪಣಿಯನ್ನು ಪೂರ್ವ ಮೆಡಿಟರೇನಿಯನ್ ಸಮುದ್ರದಲ್ಲಿರುವ ನ್ಯಾಟೋ ರಕ್ಷಣಾ ಪಡೆಗಳು ಹೊಡೆದುರುಳಿಸಿವೆ.

ಗುರಿ ಯಾವುದು: ಟರ್ಕಿ ತನ್ನ ಅಧಿಕೃತ ಹೇಳಿಕೆಯಲ್ಲಿ ಈ ಕ್ಷಿಪಣಿಯ ನಿಖರವಾದ ಗುರಿಯನ್ನು ಬಹಿರಂಗಪಡಿಸಿಲ್ಲ. ಆದರೆ, ದಕ್ಷಿಣ ಟರ್ಕಿಯ ಅದಾನ ಪ್ರಾಂತ್ಯದಲ್ಲಿರುವ ಇನ್ಸಿರ್ಲಿಕ್ ವಾಯುನೆಲೆ ಸಮೀಪ ಭೀಕರ ಸ್ಫೋಟದ ಶಬ್ದ ಕೇಳಿಬಂದಿದೆ ಎಂದು ವರದಿಯಾಗಿದೆ.

ಈ ವಾಯುನೆಲೆಯಲ್ಲಿ ಅಮೆರಿಕದ ವಾಯುಪಡೆ ಮತ್ತು ಇತರ ನ್ಯಾಟೋ ರಾಷ್ಟ್ರಗಳ ಸೈನಿಕರು ನಿಯೋಜನೆಗೊಂಡಿದ್ದಾರೆ. ಇರಾನ್ ವಿರುದ್ಧದ ದಾಳಿಗೆ ಅಮೆರಿಕ ಈ ನೆಲೆಯನ್ನು ಬಳಸುತ್ತಿಲ್ಲ ಎಂದು ಟರ್ಕಿ ಹೇಳಿದ್ದರೂ, ಇರಾನ್‌ನ ಕ್ಷಿಪಣಿಗಳು ಈ ನೆಲೆಯನ್ನೇ ಗುರಿಯಾಗಿಸಿಕೊಂಡಿವೆ ಎಂಬ ಶಂಕೆ ಬಲವಾಗಿದೆ.

ನ್ಯಾಟೋದ ಎರಡನೇ ಅತಿದೊಡ್ಡ ಸೈನ್ಯವನ್ನು ಹೊಂದಿರುವ ಟರ್ಕಿ, ತಾನು ಇರಾನ್-ಇಸ್ರೇಲ್ ಮತ್ತು ಅಮೆರಿಕದ ನಡುವಿನ ಯುದ್ಧದಲ್ಲಿ ಭಾಗಿಯಾಗಲು ಇಚ್ಛಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.

ನಮ್ಮ ದೇಶದ ಭೂಪ್ರದೇಶ ಮತ್ತು ವಾಯುಪ್ರದೇಶದ ಮೇಲೆ ಬರುವ ಯಾವುದೇ ಬೆದರಿಕೆಯ ವಿರುದ್ಧ ನಿರ್ಣಾಯಕ ಕ್ರಮ ಕೈಗೊಳ್ಳಲಾಗುವುದು. ಈ ಘಟನೆಯ ಎಲ್ಲಾ ಆಯಾಮಗಳನ್ನು ಸ್ಪಷ್ಟಪಡಿಸಲು ಸಂಬಂಧಿತ ದೇಶದೊಂದಿಗೆ ಸಮಾಲೋಚನೆ ನಡೆಸಲಾಗುತ್ತಿದೆ ಎಂದು ಟರ್ಕಿ ರಕ್ಷಣಾ ಸಚಿವಾಲಯ ತಿಳಿಸಿದೆ.

ಇರಾನ್ ಈವರೆಗೂ ತಾನು ಬೇಕೆಂದೇ ಟರ್ಕಿಯನ್ನು ಗುರಿಯಾಗಿಸಿಕೊಂಡಿಲ್ಲ ಎಂದು ಹೇಳುತ್ತಾ ಬಂದಿದ್ದರೂ, ಪದೇ ಪದೇ ಕ್ಷಿಪಣಿಗಳು ಟರ್ಕಿ ವಾಯುಪ್ರದೇಶಕ್ಕೆ ನುಗ್ಗುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ.

ಟರ್ಕಿ ತನ್ನದೇ ಆದ ಪೂರ್ಣ ಪ್ರಮಾಣದ ವಾಯು ರಕ್ಷಣಾ ವ್ಯವಸ್ಥೆಯನ್ನು ಹೊಂದಿಲ್ಲದ ಕಾರಣ, ಅದು ಸಂಪೂರ್ಣವಾಗಿ ನ್ಯಾಟೋದ ರಕ್ಷಣಾ ಕವಚವನ್ನು ಅವಲಂಬಿಸಿದೆ.

ಕುರೆಸಿಕ್ ರೇಡಾರ್ ಬೇಸ್: ಈ ರೇಡಾರ್ ವ್ಯವಸ್ಥೆಯು ಇರಾನ್‌ನಿಂದ ಬರುವ ಕ್ಷಿಪಣಿಗಳನ್ನು ಕ್ಷಣಾರ್ಧದಲ್ಲಿ ಪತ್ತೆಹಚ್ಚುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ.

ಅಮೆರಿಕದ ಪೇಟ್ರಿಯಟ್ ಸಿಸ್ಟಮ್: ಹೆಚ್ಚುತ್ತಿರುವ ಭೀತಿಯ ಹಿನ್ನೆಲೆಯಲ್ಲಿ ನ್ಯಾಟೋ ಈಗ ಅಮೆರಿಕದ ಅತ್ಯಾಧುನಿಕ ಪೇಟ್ರಿಯಟ್ ವಾಯು ರಕ್ಷಣಾ ವ್ಯವಸ್ಥೆಯನ್ನು ಈ ಭಾಗದಲ್ಲಿ ನಿಯೋಜಿಸಿದೆ.

ವಿಶೇಷವೆಂದರೆ, ಟರ್ಕಿ 2019 ರಲ್ಲಿ ರಷ್ಯಾದಿಂದ ಖರೀದಿಸಿದ್ದ S-400 ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯನ್ನು ಈ ಕಾರ್ಯಾಚರಣೆಯಲ್ಲಿ ಬಳಸಿಲ್ಲ. ನ್ಯಾಟೋದ ಸಮಗ್ರ ರಕ್ಷಣಾ ವ್ಯವಸ್ಥೆಯು ಹೆಚ್ಚು ಪರಿಣಾಮಕಾರಿಯಾಗಿರುವ ಕಾರಣ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಸಚಿವಾಲಯ ತಿಳಿಸಿದೆ.

ಇರಾನ್‌ನ ಕ್ಷಿಪಣಿ ದಾಳಿಗಳು ಜಾಗತಿಕವಾಗಿ ತೈಲ ಪೂರೈಕೆ ಮತ್ತು ಅಂತಾರಾಷ್ಟ್ರೀಯ ಪ್ರಯಾಣದ ಮೇಲೆ ಈಗಾಗಲೇ ಪರಿಣಾಮ ಬೀರಿದೆ. ಟರ್ಕಿ ಗಡಿಯಲ್ಲಿ ನಡೆಯುತ್ತಿರುವ ಈ ಬೆಳವಣಿಗೆಗಳು ನ್ಯಾಟೋ ಮತ್ತು ಇರಾನ್ ನಡುವೆ ನೇರ ಸಂಘರ್ಷಕ್ಕೆ ದಾರಿಯಾಗುತ್ತವೆಯೇ ಎಂಬ ಭಯ ಹುಟ್ಟಿಸಿದೆ. ಅಂತಾರಾಷ್ಟ್ರೀಯ ಸಮುದಾಯವು ತೀವ್ರ ಉದ್ವಿಗ್ನತೆಯನ್ನು ತಗ್ಗಿಸಲು ಪ್ರಯತ್ನಿಸುತ್ತಿದ್ದರೂ, ಕಣ್ಮರೆಯಾಗದ ಕ್ಷಿಪಣಿಗಳ ಆರ್ಭಟ ಮಾತ್ರ ಮುಂದುವರಿಯುತ್ತಲೇ ಇದೆ,(ಏಜೆನ್ಸೀಸ್).