ಪತ್ನಿಯನ್ನು ಕೊಂದಿದ್ದು ನಾನೇ! ಆದರದು ಕೊಲೆಯಲ್ಲ; ಕೋರ್ಟ್​ನಲ್ಲಿ ಆರೋಪಿಯ ವಿಚಿತ್ರ ಹೇಳಿಕೆ, ಏನಿದು ಪ್ರಕರಣ?

ಆಸ್ಟ್ರೇಲಿಯಾ: ಇಲ್ಲಿನ ಅಡಿಲೇಡ್ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯದಲ್ಲಿ 42 ವರ್ಷದ ಭಾರತೀಯ ಮೂಲದ ವ್ಯಕ್ತಿಯೊಬ್ಬ ತನ್ನ ಹೆಂಡತಿಯನ್ನು ಕೊಂದಿದ್ದಾಗಿ ಒಪ್ಪಿಕೊಂಡಿದ್ದೇ ಆದರೂ ಅದು ಕೊಲೆಯಲ್ಲ ಎಂದು ಹೇಳಿರುವುದು ಸದ್ಯ ಹಲವರ ಗೊಂದಲಕ್ಕೆ ಕಾರಣವಾಗಿದೆ.

ಕೊಲೆ ಆರೋಪದಲ್ಲಿ ತಾನು ತಪ್ಪಿತಸ್ಥನಲ್ಲ ಎಂದು ಆತ ಹೇಳಿರುವುದಾಗಿ ವರದಿ ಉಲ್ಲೇಖಿಸಿದೆ. ಕಳೆದ ವರ್ಷ ಡಿಸೆಂಬರ್‌ನಲ್ಲಿ ತನ್ನ ಪತ್ನಿ ಸುಪ್ರಿಯಾ ಠಾಕೂರ್ ಕೊಂದ ಪ್ರಕರಣದಲ್ಲಿ ಜನವರಿ 14ರಂದು ಆರೋಪಿ ವಿಕ್ರಾಂತ್ ಠಾಕೂರ್ ಎರಡನೇ ಬಾರಿಗೆ ನ್ಯಾಯಾಲಯಕ್ಕೆ ಹಾಜರಾದ. ಈ ವೇಳೆ ನ್ಯಾಯಾಲಯದ ಪೀಠವು ಕೇಳಿದ ಪ್ರಶ್ನೆಗೆ, 'ನಾನು ಆಕೆಯನ್ನು ಕೊಲೆ ಮಾಡಿದ್ದು ಹೌದು. ಆದರದು ಕೊಲೆಯಲ್ಲ' ಎಂದು ತಮ್ಮ ವಕೀಲರ ಸಲಹೆಯಂತೆ ಹೇಳಿದ್ದಾನೆ. 

ಕಳೆದ ವರ್ಷ ಡಿ.21ರಂದು ಅಡಿಲೇಡ್‌ನ ಉತ್ತರ ಉಪನಗರದಲ್ಲಿರುವ ನಿವಾಸಕ್ಕೆ ಪೊಲೀಸರು ಫೋನ್​ ಕರೆಯ ಮೇರೆಗೆ ಸ್ಥಳಕ್ಕೆ ಭೇಟಿ ನೀಡಿದಾಗ, ಅಲ್ಲಿ ಮೃತ ಸುಪ್ರಿಯಾ (36) ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆಯಾಗಿದಳು. ಈ ವೇಳೆ ಸಿಪಿಆರ್ ಮಾಡಿದ್ದೇ ಆದರೂ ಆಕೆಯನ್ನು ಜೀವಂತವಾಗಿ ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಬದಲಿಗೆ ಮಹಿಳೆಯ ಉಸಿರು ಅದಾಗಲೇ ನಿಂತುಹೋಗಿತ್ತು ಎನ್ನಲಾಗಿದೆ. ಆ ದಿನ ರಾತ್ರಿ ಸುಪ್ರಿಯಾ ನಿವಾಸದಲ್ಲಿ ಕೌಟುಂಬಿಕ ಕಲಹ ವಿಪರೀತಗೊಂಡ ಕಾರಣವೋ ಏನೋ ತುರ್ತು ಸಹಾಯವಾಣಿಗೆ ಮನೆಗೆ ಧಾವಿಸುವಂತೆ ಕರೆ ಬಂದಿತ್ತು ಎಂದು ಆಸ್ಟ್ರೇಲಿಯಾ ಟುಡೇ ವರದಿಯಲ್ಲಿ ಉಲ್ಲೇಖವಾಗಿದೆ.    

ಸುಪ್ರಿಯಾ ಮೃತಪಟ್ಟ ಕಾರಣ ಆಕೆಯ ಪುತ್ರ ಇದೀಗ ಅನಾಥವಾಗಿದ್ದಾನೆ. ಈ ಹಿನ್ನೆಲೆ ಅವರ ಸ್ನೇಹಿತರು ಮತ್ತು ಅಲ್ಲಿನ ಸದಸ್ಯರು ಒಗ್ಗೂಡಿ, ಮಹಿಳೆಯ ಮಗನನ್ನು ಬೆಳೆಸಲು ಹಾಗೂ ಪೋಷಿಸಲು ಹಣದ ಸಹಾಯದ ಅಗತ್ಯವಿದೆ ಎಂದು ಇತರರಲ್ಲಿ ಕೋರಿದ್ದಾರೆ. ಇದಕ್ಕಾಗಿ ಹಣಸಂಗ್ರಹವನ್ನು ಪ್ರಾರಂಭಿಸಿದ್ದಾರೆ ಎಂದು ವರದಿಯಾಗಿದೆ,(ಏಜೆನ್ಸೀಸ್).