ಆ 10 ನಿಮಿಷದ ಗ್ಯಾಪ್​ನಲ್ಲಿ ಬಂದು ಬಿಡುತ್ತಿದ್ದೆವು... ಭಾರತದೊಳಗೆ ನುಸುಳಿದ ಕತೆ ಬಿಚ್ಚಿಟ್ಟ ಬಾಂಗ್ಲಾದೇಶಿಗರು! Bangladeshis

Bangladeshis : ಭಾರತದಲ್ಲಿ ಅಕ್ರಮ ವಲಸಿಗರ ವಿರುದ್ಧ ಕಾರ್ಯಾಚರಣೆ ತೀವ್ರಗೊಂಡ ಬೆನ್ನಲ್ಲೇ, ಹೋಲ್ಡಿಂಗ್ ಸೆಂಟರ್‌ಗಳಲ್ಲಿ ಬಂಧನಕ್ಕೊಳಗಾಗುವ ಭೀತಿಯಿಂದ ನೂರಾರು ಬಾಂಗ್ಲಾದೇಶಿ ಅಕ್ರಮ ವಲಸಿಗರು ಈಗ ಪಶ್ಚಿಮ ಬಂಗಾಳದ ಗಡಿ ಪ್ರದೇಶಗಳು ಮತ್ತು ಸಾರಿಗೆ ನಿಲ್ದಾಣಗಳತ್ತ ಮುಖ ಮಾಡುತ್ತಿದ್ದಾರೆ. ದಶಕಗಳಿಂದ, ಕೆಲವರಂತೂ ತಮ್ಮ ಇಡೀ ಜೀವನವನ್ನೇ ಭಾರತದಲ್ಲಿ ಕಳೆದು ಗಡಿ ದಾಟುವ ಬಗ್ಗೆ ಸದ್ಯಕ್ಕೆ ಗೊಂದಲದಲ್ಲಿದ್ದರೂ, ತಾವು ಹೇಗೆ ಅಕ್ರಮವಾಗಿ ಭಾರತದೊಳಗೆ ನುಸುಳಿದ್ದೆವು ಮತ್ತು ಇಲ್ಲಿನ ನಕಲಿ ದಾಖಲೆಗಳನ್ನು ಹೇಗೆ ಪಡೆದುಕೊಂಡಿದ್ದೆವು ಎಂಬ ಆಘಾತಕಾರಿ ಸತ್ಯಗಳನ್ನು ಈಗ ಸ್ವತಃ ಬಿಚ್ಚಿಡುತ್ತಿದ್ದಾರೆ.

ಭಾರತದೊಳಗೆ ನುಸುಳಿದ ತಮ್ಮ ರೋಚಕ ಕತೆಗಳನ್ನು ಬಿಚ್ಚಿಟ್ಟಿರುವ ಕೆಲವು ವಲಸಿಗರು, ತಾವು ನದಿಗಳನ್ನು ದಾಟಿ ಬಂದಿದ್ದಾಗಿ ನೆನೆದರೆ, ಇನ್ನು ಕೆಲವರು ಮಧ್ಯವರ್ತಿಗಳು (ದಲ್ಲಾಳಿಗಳು) ಕತ್ತಲೆಯ ಮರೆಯನ್ನು ಬಳಸಿಕೊಂಡು ಹೇಗೆ ಗಡಿ ದಾಟಿಸುತ್ತಿದ್ದರು ಎಂಬುದನ್ನು ವಿವರಿಸಿದ್ದಾರೆ. ಭದ್ರತಾ ಸಿಬ್ಬಂದಿಯ ಗಸ್ತು ತಿರುಗುವಿಕೆಯಲ್ಲಿ ಸಣ್ಣ ಬಿಡುವು ಸಿಕ್ಕರೂ ಸಾಕು, ಕೇವಲ 10 ನಿಮಿಷಗಳಲ್ಲಿ ಭಾರತದೊಳಗೆ ನುಸುಳಬಹುದು ಎಂದು ವ್ಯಕ್ತಿಯೊಬ್ಬರು ಬಹಿರಂಗಪಡಿಸಿದ್ದಾರೆ. ಅಷ್ಟೇ ಅಲ್ಲದೆ, ಪಶ್ಚಿಮ ಬಂಗಾಳದ ಆಡಳಿತಾರೂಢ ತೃಣಮೂಲ ಕಾಂಗ್ರೆಸ್ (TMC) ಕಾರ್ಯಕರ್ತರನ್ನೊಳಗೊಂಡ ಜಾಲವೊಂದು ತಮಗೆ ಭಾರತೀಯ ಗುರುತಿನ ಚೀಟಿ ಹಾಗೂ ದಾಖಲೆಗಳನ್ನು ಮಾಡಿಸಿಕೊಡಲು ಸಹಾಯ ಮಾಡಿತು ಎಂದು ಹಲವರು ಗಂಭೀರ ಆರೋಪ ಮಾಡಿದ್ದಾರೆ. ಇದರ ಮೂಲಕ ತಾವು ವಿವಿಧ ಸರ್ಕಾರಿ ಯೋಜನೆಗಳ ನಗದು ಪ್ರಯೋಜನಗಳನ್ನು ಪಡೆದಿದ್ದಲ್ಲದೆ, ಭಾರತದ ಚುನಾವಣೆಗಳಲ್ಲಿ ಮತದಾನವನ್ನೂ ಮಾಡಿದ್ದೇವೆ ಎಂದು ಅವರು ಒಪ್ಪಿಕೊಂಡಿದ್ದಾರೆ.

ಪಶ್ಚಿಮ ಬಂಗಾಳದಲ್ಲಿ ಅಕ್ರಮ ವಲಸಿಗರ ವಿರುದ್ಧ ಬಿಗಿ ಕ್ರಮ ಜರುಗಿಸುತ್ತಿರುವ ಬೆನ್ನಲ್ಲೇ ಈ ಆಘಾತಕಾರಿ ಸತ್ಯಗಳು ಹೊರಬಿದ್ದಿದ್ದು, ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ಅಕ್ರಮ ಬಾಂಗ್ಲಾದೇಶಿ ವಲಸಿಗರಿಗೆ ಯಾವುದೇ ಆಶ್ರಯ ನೀಡಬಾರದು ಮತ್ತು ಅವರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸುವ ಬದಲಿಗೆ ನೇರವಾಗಿ ಗಡಿಯಲ್ಲಿರುವ ಬಿಎಸ್‌ಎಫ್‌ಗೆ (BSF) ಒಪ್ಪಿಸಬೇಕು ಎಂದು ಘೋಷಿಸಿದ್ದಾರೆ. ಇದರ ಬೆನ್ನಲ್ಲೇ, ಬಂಗಾಳದಲ್ಲಿ ಅಕ್ರಮ ವಲಸಿಗರು ಪಡೆಯುತ್ತಿರುವ ಸರ್ಕಾರಿ ಕಲ್ಯಾಣ ಯೋಜನೆಗಳ ಸೌಲಭ್ಯಗಳನ್ನು ಗುರುತಿಸಿ, ಅವುಗಳನ್ನು ಕಡಿತಗೊಳಿಸಲಾಗುತ್ತಿದೆ ಎಂದು ಬಿಜೆಪಿ ಸರ್ಕಾರ ಸ್ಪಷ್ಟಪಡಿಸಿದೆ.

ಪಶ್ಚಿಮ ಬಂಗಾಳದ ಗಡಿ ಜಿಲ್ಲೆಗಳಲ್ಲಿ ಇತ್ತೀಚಿನ ವಾರಗಳಲ್ಲಿ ತಪಾಸಣೆ ಮತ್ತು ಕಣ್ಗಾವಲನ್ನು ತೀವ್ರಗೊಳಿಸಲಾಗಿದ್ದು, ಈ ಹಿನ್ನೆಲೆಯಲ್ಲಿ ಹೋಲ್ಡಿಂಗ್ ಸೆಂಟರ್‌ಗಳ ಬಂಧನ ಹಾಗೂ ಗಡಿಪಾರು ಪ್ರಕ್ರಿಯೆಯಿಂದ ತಪ್ಪಿಸಿಕೊಳ್ಳಲು ನೂರಾರು ಅಕ್ರಮ ವಲಸಿಗರು ಸ್ವಯಂಪ್ರೇರಿತರಾಗಿ ಬಾಂಗ್ಲಾದೇಶಕ್ಕೆ ಮರಳಲು ಮುಂದಾಗುತ್ತಿದ್ದಾರೆ ಎಂಬ ವರದಿಗಳು ಹೊರಬಂದಿವೆ. ಈ ಬೆಳವಣಿಗೆಯ ಕುರಿತು ಗುರುವಾರ ಪ್ರತಿಕ್ರಿಯಿಸಿರುವ ಕೇಂದ್ರ ಗೃಹ ಸಚಿವ ಅಮಿತ್ ಷಾ ಅವರು, "ನುಸುಳುಕೋರರು ತಾವಾಗಿಯೇ ಸ್ವದೇಶಕ್ಕೆ ಮರಳುತ್ತಿರುವುದರಿಂದ ಸರ್ಕಾರ ಅವರ ವಿರುದ್ಧ ಯಾವುದೇ ಕಾನೂನು ಕ್ರಮ ಜರುಗಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಇದೇ ವೇಳೆ ಚಿಕನ್ಸ್ ನೆಕ್ (Chicken's Neck) ಪ್ರದೇಶ ಸೇರಿದಂತೆ ಗಡಿಯುದ್ದಕ್ಕೂ ಸುಮಾರು 600 ಹೆಕ್ಟೇರ್ ಭೂಮಿಯನ್ನು ಬಿಎಸ್‌ಎಫ್‌ಗೆ (BSF) ಹಸ್ತಾಂತರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ ಸುವೇಂದು ಅಧಿಕಾರಿ ಅವರನ್ನು ಗೃಹ ಸಚಿವರು ಶ್ಲಾಘಿಸಿದ್ದಾರೆ.

ಅಂದಹಾಗೆ, ಬಾಂಗ್ಲಾದೇಶದ ಕುಷ್ಟಿಯಾ ಜಿಲ್ಲೆಯ ಬಡಗಿ ಮೂಲದ ವ್ಯಕ್ತಿಯೊಬ್ಬರು ತಾವು ಮಧ್ಯವರ್ತಿಯೊಬ್ಬನಿಗೆ 7,000 ದಿಂದ 8,000 ರೂಪಾಯಿ ನೀಡಿದ್ದಾಗಿ ತಿಳಿಸಿದ್ದು, ಆ ಮಧ್ಯವರ್ತಿ ರಾತ್ರಿಯಿಡೀ ಬಿಎಸ್‌ಎಫ್ ಸಿಬ್ಬಂದಿಯ ಚಲನವಲನಗಳನ್ನು ಸೂಕ್ಷ್ಮವಾಗಿ ಗಮನಿಸಿ, ಗಸ್ತು ತಿರುಗುವಿಕೆಯಲ್ಲಿ ಬಿಡುವು ಸಿಕ್ಕಾಗಲೆಲ್ಲಾ ಇವರ ಗುಂಪುಗಳನ್ನು ಗಡಿ ದಾಟಿಸುತ್ತಿದ್ದ ಎಂದು ಒಪ್ಪಿಕೊಂಡಿದ್ದಾರೆ. ಹಾಗೆಯೇ, ಬೆಂಗಳೂರಿನಲ್ಲಿ ನೆಲೆಸಿರುವ ಮತ್ತೊಬ್ಬ ಬಾಂಗ್ಲಾದೇಶಿ ಅಕ್ರಮ ವಲಸಿಗ, ತಾನು ಏಜೆಂಟ್‌ಗೆ 20,000 ರೂಪಾಯಿ ನೀಡಿದ ನಂತರ ಗಡಿಯಲ್ಲಿ ಮಿಲಿಟರಿ ಕಾವಲು ಇದ್ದಾಗಲೂ ಅತ್ಯಂತ ಸುಲಭವಾಗಿ ಭಾರತದೊಳಗೆ ನುಸುಳಿ ಬಂದಿದ್ದಾಗಿ ಗಂಭೀರ ಸತ್ಯವನ್ನು ಬಿಚ್ಚಿಟ್ಟಿದ್ದಾನೆ.

ಸ್ಥಳೀಯ ಯೂಟ್ಯೂಬ್ ಚಾನೆಲ್ 'ಹಲ್ದಿಯಾ ಲೈವ್' ಜೊತೆ ಮಾತನಾಡಿರುವ ಬಾಂಗ್ಲಾದೇಶದ ಕುಷ್ಟಿಯಾ ಜಿಲ್ಲೆಯ ಅಕ್ರಮ ವಲಸಿಗನೊಬ್ಬ, ತಾನು ತನ್ನ ಸಹೋದರರೊಂದಿಗೆ ಮಧ್ಯವರ್ತಿಗಳ ನೆಟ್‌ವರ್ಕ್ ಮೂಲಕ ಭಾರತದೊಳಗೆ ನುಸುಳಿ ಬಂದಿದ್ದಾಗಿ ಬಹಿರಂಗಪಡಿಸಿದ್ದಾನೆ. ನಾನು ಈ ಹಿಂದೆ ಕೇರಳದಲ್ಲಿ ಕೆಲಸ ಮಾಡುತ್ತಿದ್ದೆ. ಆದರೆ ಈಗ ಭಾರತದಲ್ಲಿ ರೂಮ್ ಬಾಡಿಗೆಗೆ ಪಡೆಯಬೇಕಾದರೂ ಕಡ್ಡಾಯವಾಗಿ ವೋಟರ್ ಐಡಿ ಮತ್ತು ಇತರ ಪ್ರಮುಖ ಗುರುತಿನ ದಾಖಲೆಗಳನ್ನು ಕೇಳುತ್ತಿದ್ದಾರೆ. ನನ್ನ ಬಳಿ ಆ ದಾಖಲೆಗಳಿಲ್ಲ ಎಂದು ಅಸಹಾಯಕತೆ ವ್ಯಕ್ತಪಡಿಸಿರುವ ಆತ, ಗಡಿ ದಾಟಿಸುವ ಸಂಘಟಿತ ಜಾಲದ ಕಾರ್ಯಾಚರಣೆಯನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾನೆ. ಮಧ್ಯವರ್ತಿಗಳ ತಂಡವು ರಾತ್ರಿಯಿಡೀ ಬಿಎಸ್‌ಎಫ್ ಸಿಬ್ಬಂದಿ ಇಲ್ಲದ ಜಾಗಗಳಿಗಾಗಿ ಕಾಯುತ್ತಿರುತ್ತದೆ ಮತ್ತು ಕಾವಲು ಇಲ್ಲದ ಸಣ್ಣ ಬಿಡುವು ಸಿಕ್ಕ ತಕ್ಷಣ ಜನರನ್ನು ಗಡಿ ದಾಟಿಸುತ್ತದೆ ಎಂದಿರುವ ಆತ, ಇದಕ್ಕಾಗಿ ತಲಾ 7,000 ದಿಂದ 8,000 ರೂಪಾಯಿ ಪಡೆದುಕೊಳ್ಳುತ್ತಾರೆ ಎಂದು ಒಪ್ಪಿಕೊಂಡಿದ್ದಾನೆ.

ಇದೇ ರೀತಿಯ ಮತ್ತೊಂದು ಆಘಾತಕಾರಿ ಸತ್ಯವನ್ನು ಬೆಂಗಳೂರಿನಲ್ಲಿ ನೆಲೆಸಿರುವ ಬಾಂಗ್ಲಾದೇಶದ ಅಕ್ರಮ ವಲಸಿಗನೊಬ್ಬ ಹಂಚಿಕೊಂಡಿದ್ದು, ಗಡಿಯಲ್ಲಿ ಕಠಿಣ ಮಿಲಿಟರಿ ಕಾವಲು ಇದ್ದಾಗಲೂ ಕೇವಲ 2,000 ರೂಪಾಯಿ ನೀಡಿ ತಾನು ಗಡಿ ದಾಟಿ ಬಂದಿದ್ದಾಗಿ ಹೇಳಿದ್ದಾನೆ. ಅಷ್ಟೇ ಅಲ್ಲದೆ, ಭಾರತದೊಳಗೆ ಬಂದ ಬಳಿಕ ಕೇವಲ 2,000 ದಿಂದ 3,000 ರೂಪಾಯಿ ಖರ್ಚು ಮಾಡಿ ಭಾರತೀಯ ಗುರುತಿನ ಚೀಟಿಯಾದ ನಕಲಿ ಕಾರ್ಡ್‌ ಒಂದನ್ನು ವ್ಯವಸ್ಥೆ ಮಾಡಿಕೊಳ್ಳಲಾಗಿತ್ತು ಮತ್ತು ಅದರ ಸಹಾಯದಿಂದಲೇ ರೈಲಿನ ಮೂಲಕ ಬೆಂಗಳೂರಿಗೆ ಪ್ರಯಾಣ ಬೆಳೆಸಿದ್ದಾಗಿ ಆತ ತಿಳಿಸಿದ್ದಾನೆ. ಭಾರತ ಮತ್ತು ಬಾಂಗ್ಲಾದೇಶದ ನಡುವಿನ 4,096 ಕಿಲೋಮೀಟರ್ ಉದ್ದದ ಗಡಿಯು ನದಿ ಪಾತ್ರಗಳು, ಕೃಷಿ ಭೂಮಿ ಹಾಗೂ ದಟ್ಟ ಜನವಸತಿ ಪ್ರದೇಶಗಳನ್ನು ಒಳಗೊಂಡಿರುವುದರಿಂದ, ಮಾನವ ಕಳ್ಳಸಾಗಣೆದಾರರು ಇಂತಹ ಭದ್ರತಾ ಲೋಪದೋಷಗಳನ್ನು ಬಳಸಿಕೊಂಡು ಬಾಂಗ್ಲಾದೇಶಿಯರನ್ನು ಭಾರತದೊಳಗೆ ಅಕ್ರಮವಾಗಿ ನುಸುಳಿಸುತ್ತಿದ್ದಾರೆ.

ಈ ಅಕ್ರಮ ವಲಸೆಗೆ ಬ್ರೇಕ್ ಹಾಕಲು ಗಡಿ ಬೇಲಿ ನಿರ್ಮಾಣ ಕಾರ್ಯ ತೀವ್ರಗತಿಯಲ್ಲಿ ಸಾಗುತ್ತಿದ್ದು, ಮೇಘಾಲಯದ ಮುಖ್ಯಮಂತ್ರಿ ಕಾನ್ರಾಡ್ ಸಂಗ್ಮಾ ಅವರು ಬುಧವಾರ ಮಾತನಾಡಿ, ಮೇಘಾಲಯದ ಗಡಿಯಲ್ಲಿ ಕೇವಲ 40 ರಿಂದ 45 ಕಿಲೋಮೀಟರ್ ಬೇಲಿ ನಿರ್ಮಾಣ ಮಾತ್ರ ಬಾಕಿ ಉಳಿದಿದ್ದು, ಶೀಘ್ರದಲ್ಲೇ ಕಾಮಗಾರಿ ಪೂರ್ಣಗೊಳ್ಳಲಿದೆ ಎಂದು ತಿಳಿಸಿದ್ದಾರೆ. ಭಾರತೀಯ ಗೃಹ ಸಚಿವಾಲಯದ ವರದಿಯ ಪ್ರಕಾರ, ಒಟ್ಟು 4,096.7 ಕಿಲೋಮೀಟರ್ ಉದ್ದದ ಭಾರತ-ಬಾಂಗ್ಲಾದೇಶ ಗಡಿಯ ಪೈಕಿ ಈಗಾಗಲೇ 3,232.218 ಕಿಲೋಮೀಟರ್ (ಸುಮಾರು ಶೇಕಡಾ 79 ರಷ್ಟು) ಪ್ರದೇಶದಲ್ಲಿ ಬೇಲಿ ನಿರ್ಮಾಣ ಕಾರ್ಯವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಲಾಗಿದೆ.

ಮಾಧ್ಯಮಗಳ ಮುಂದೆ ಸತ್ಯ ಬಿಚ್ಚಿಟ್ಟಿರುವ ಬಾಂಗ್ಲಾದೇಶದ ಮಹಿಳಾ ವಲಸಿಗಳೊಬ್ಬರು, ಪಶ್ಚಿಮ ಬಂಗಾಳದಲ್ಲಿ ಮಮತಾ ಬ್ಯಾನರ್ಜಿ ಅವರ ತೃಣಮೂಲ ಕಾಂಗ್ರೆಸ್ (TMC) ಆಡಳಿತದಲ್ಲಿದ್ದಾಗ ಅಲ್ಲಿನ ಸ್ಥಳೀಯ ರಾಜಕೀಯ ಕಾರ್ಯಕರ್ತರು ತಮಗೆ ವೋಟರ್ ಐಡಿ ಮತ್ತು ರೇಷನ್ ಕಾರ್ಡ್ ಮಾಡಿಸಿಕೊಡಲು ಸಹಾಯ ಮಾಡಿದ್ದರು ಹಾಗೂ ತಾವು ಕಳೆದ ಎರಡು-ಮೂರು ವರ್ಷಗಳಿಂದ ಅಲ್ಲಿನ 'ಲಕ್ಷ್ಮೀರ್ ಭಂಡಾರ್' ಯೋಜನೆಯ ಆರ್ಥಿಕ ಸೌಲಭ್ಯವನ್ನೂ ಪಡೆದಿದ್ದಾಗಿ ಒಪ್ಪಿಕೊಂಡಿದ್ದಾರೆ. ಆದರೆ ಇತ್ತೀಚೆಗೆ ಪಶ್ಚಿಮ ಬಂಗಾಳದಲ್ಲಿ ಅಕ್ರಮ ವಲಸಿಗರ ವಿರುದ್ಧ ಬಿಗಿ ಕ್ರಮಗಳು ಆರಂಭವಾದ ಬಳಿಕ ಪರಿಸ್ಥಿತಿ ಸಂಪೂರ್ಣ ಬದಲಾಗಿದ್ದು, ಅಕ್ರಮ ವಲಸಿಗರಿಗೆ ಆಶ್ರಯ ನೀಡಿದರೆ 2 ಲಕ್ಷ ರೂಪಾಯಿ ದಂಡ ಮತ್ತು ಎರಡು ವರ್ಷ ಜೈಲು ಶಿಕ್ಷೆಯಾಗುವ ಭೀತಿಯಿಂದ ಮನೆ ಮಾಲೀಕರು ಬಾಡಿಗೆ ನೀಡಲು ನಿರಾಕರಿಸುತ್ತಿದ್ದಾರೆ ಎಂದು ಮತ್ತೊಬ್ಬ ವಲಸಿಗ ಅಳಲು ತೋಡಿಕೊಂಡಿದ್ದಾನೆ. ಈ ನಡುವೆ ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ಬುಧವಾರ ಮಹತ್ವದ ಹೇಳಿಕೆ ನೀಡಿದ್ದು, ಮಮತಾ ಬ್ಯಾನರ್ಜಿ ಸರ್ಕಾರದ ಅವಧಿಯಲ್ಲಿ ಭಾರತೀಯರಲ್ಲದವರು ಸೇರಿದಂತೆ ಸುಮಾರು 30 ಲಕ್ಷ ಅನರ್ಹರು 'ಲಕ್ಷ್ಮೀರ್ ಭಂಡಾರ್' ಯೋಜನೆಯಡಿ ನಗದು ಸೌಲಭ್ಯ ಪಡೆಯುತ್ತಿದ್ದರು ಎಂದು ಆರೋಪಿಸಿದ್ದು, ಸದ್ಯ ಇಂತಹ ಎಲ್ಲಾ ನಕಲಿ ಫಲಾನುಭವಿಗಳನ್ನು ಪಟ್ಟಿಯಿಂದ ಹೊರಹಾಕಲಾಗಿದ್ದು, ಹೊಸದಾಗಿ ಜಾರಿಗೆ ಬರಲಿರುವ 'ಅನ್ನಪೂರ್ಣ ಭಂಡಾರ್' ಯೋಜನೆಯಡಿ ಇವರಿಗೆ ಯಾವುದೇ ಸೌಲಭ್ಯ ಸಿಗುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಭಾರತದಿಂದ ಬಾಂಗ್ಲಾದೇಶಕ್ಕೆ ಮರಳಲು ಪಶ್ಚಿಮ ಬಂಗಾಳದ ಗಡಿ ಪ್ರದೇಶಗಳಲ್ಲಿ ಕಾಯುತ್ತಿರುವ ಹಲವು ಅಕ್ರಮ ವಲಸಿಗರು ತಾವು ದಶಕಗಳಿಂದ ಅಥವಾ ಹಲವು ವರ್ಷಗಳಿಂದ ಭಾರತದಲ್ಲೇ ನೆಲೆಸಿದ್ದಾಗಿ ಮಾಧ್ಯಮಗಳ ಮುಂದೆ ಒಪ್ಪಿಕೊಂಡಿದ್ದಾರೆ. ಉದಾಹರಣೆಗೆ, ಖುಲ್ನಾ ಜಿಲ್ಲೆಯ ಬಡಗಿ ಸಲಾಮ್ ಡಾಲಿ ಎಂಬುವವರು ಐದು ವರ್ಷಗಳ ಹಿಂದೆ ಮಧ್ಯವರ್ತಿಗೆ 8,000 ದಿಂದ 10,000 ರೂಪಾಯಿ ನೀಡಿ ಭಾರತಕ್ಕೆ ಬಂದಿದ್ದಾಗಿ ತಿಳಿಸಿದರೆ, ಬಾಲ್ಯದಲ್ಲೇ ಪೋಷಕರೊಂದಿಗೆ ಭಾರತಕ್ಕೆ ಬಂದು ನೆಲೆಸಿದ್ದ ಮತ್ತೊಬ್ಬ ವಲಸಿಗ, ತಮಗೆ ಯಾವುದೇ ತೊಂದರೆಯಿಲ್ಲದೆ ಇಷ್ಟು ವರ್ಷ ಕೆಲಸ ಮಾಡಿಕೊಂಡಿದ್ದಾಗಿ ಹೇಳಿದ್ದಾನೆ. ಹಾಗೆಯೇ, ಜೈಲು ಶಿಕ್ಷೆ ಹಾಗೂ ಬಲವಂತದ ಗಡಿಪಾರು ಪ್ರಕ್ರಿಯೆಗೆ ಹೆದರಿ ಸ್ವಯಂಪ್ರೇರಿತರಾಗಿ ತಾಯ್ನಾಡಿಗೆ ಮರಳಲು ಗಡಿಯಲ್ಲಿ ಕಾಯುತ್ತಿರುವ ತಕ್ಲಿಮಾ ಖಾತುನ್ ಮತ್ತು ಶಾಹಿದುಲ್ ಗಾಜಿ ಎಂಬುವವರು, ಭಾರತೀಯ ಪೌರತ್ವದ ಅಧಿಕೃತ ದಾಖಲೆಗಳು ಇಲ್ಲದೇ ಇರುವುದರಿಂದ ತಮಗೆ ದೇಶ ತೊರೆಯುವುದನ್ನು ಬಿಟ್ಟು ಬೇರೆ ದಾರಿಯಿಲ್ಲ ಎಂದು ತಮ್ಮ ಅಸಹಾಯಕತೆಯನ್ನು ಹಂಚಿಕೊಂಡಿದ್ದಾರೆ.

ಬಾಂಗ್ಲಾದೇಶಿ ಅಕ್ರಮ ವಲಸಿಗರ ಈ ಸಾಕ್ಷ್ಯಗಳು, ಇದು ಕೇವಲ ಗಡಿ ಭದ್ರತೆಯ ಸಮಸ್ಯೆಯಷ್ಟೇ ಅಲ್ಲ, ಬದಲಿಗೆ ಇದರ ಹಿಂದೆ ಮಧ್ಯವರ್ತಿಗಳು, ನಕಲಿ ದಾಖಲೆ ಸೃಷ್ಟಿಸುವವರು ಮತ್ತು ದೇಶದ ವಿವಿಧ ರಾಜ್ಯಗಳವರೆಗೆ ಹರಡಿರುವ ಒಂದು ಬಲಿಷ್ಠ ಸಂಘಟಿತ ಜಾಲ (Ecosystem) ಕೆಲಸ ಮಾಡುತ್ತಿದೆ ಎಂಬುದನ್ನು ಸ್ಪಷ್ಟಪಡಿಸುತ್ತವೆ. ಕೇವಲ ರಾಜಕೀಯ ವಿವಾದಗಳನ್ನಷ್ಟೇ ಬದಿಗಿಟ್ಟು ನೋಡುವುದಾದರೆ, ಈ ಅಕ್ರಮ ನುಸುಳುವಿಕೆಯು ಭಾರತದ ಆಡಳಿತ ಮತ್ತು ಆರ್ಥಿಕತೆಯ ಮೇಲೆ ಭಾರಿ ಪರಿಣಾಮ ಬೀರಿದೆ. ಯಾವುದೇ ಅಧಿಕೃತ ದಾಖಲೆಗಳಿಲ್ಲದೆ ಭಾರತದೊಳಗೆ ನೆಲೆಸಿದ್ದ ಈ ವಲಸಿಗರು ಇಲ್ಲಿನ ಸಾರ್ವಜನಿಕ ಕಲ್ಯಾಣ ಯೋಜನೆಗಳ ಸಂಪನ್ಮೂಲಗಳನ್ನು ಬಳಸಿಕೊಳ್ಳುತ್ತಿದ್ದುದರಿಂದ, ಇದು ಭಾರತದ ಬೊಕ್ಕಸಕ್ಕೆ ಹಾಗೂ ದೇಶದ ಭದ್ರತಾ ವ್ಯವಸ್ಥೆಗೆ ಭಾರಿ ಆಡಳಿತಾತ್ಮಕ ಮತ್ತು ಆರ್ಥಿಕ ಹೊರೆಯನ್ನು ಉಂಟುಮಾಡಿದೆ ಎಂಬ ಸತ್ಯ ಈ ವರದಿಗಳಿಂದ ಬಹಿರಂಗವಾಗಿದೆ, (ಏಜೆನ್ಸೀಸ್​).