ತೈಲ ಬೇಕಿದ್ರೆ ಚೀನಾ-ರಷ್ಯಾವನ್ನು ಹೊರದಬ್ಬಿ; ವೆನೆಜುವೆಲಾ ಮಧ್ಯಂತರ ಸರ್ಕಾರಕ್ಕೆ ಅಮೆರಿಕದ ಖಡಕ್ ವಾರ್ನಿಂಗ್ | US warns Venezuela

2026ರ ಜನವರಿ 3 ರಂದು ನಡೆದ ಅಮೆರಿಕದ ಮಿಲಿಟರಿ ಕಾರ್ಯಾಚರಣೆಯಲ್ಲಿ ಅಧ್ಯಕ್ಷ ನಿಕೋಲಸ್ ಮಡುರೊರನ್ನು ಸೆರೆಹಿಡಿದು ಮಾದಕವಸ್ತು ಭಯೋತ್ಪಾದನಾ ಆರೋಪಗಳನ್ನು ಎದುರಿಸಲು ನ್ಯೂಯಾರ್ಕ್‌ಗೆ ವರ್ಗಾಯಿಸಲಾಯಿತು.

ವರದಿಗಳ ಪ್ರಕಾರ, ಯುಎಸ್ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ ಮತ್ತು ಅಧ್ಯಕ್ಷ ಟ್ರಂಪ್ ಅವರು ಡೆಲ್ಸಿ ರೊಡ್ರಿಗಸ್ ನೇತೃತ್ವದ ಮಧ್ಯಂತರ ವೆನೆಜುವೆಲಾದ ಅಧಿಕಾರಿಗಳಿಗೆ ತೈಲ ರಫ್ತು ಪುನರಾರಂಭಕ್ಕೆ ಎರಡು ಮಾತುಕತೆಗೆ ಒಳಪಡದ ಷರತ್ತುಗಳನ್ನು ಮಂಡಿಸಿದ್ದಾರೆ ಎಂದು ತಿಳಿದು ಬಂದಿದೆ.

ಅಲ್ಲದೆ, ವೆನೆಜುವೆಲಾ ತಕ್ಷಣವೇ ಚೀನಾ, ರಷ್ಯಾ, ಇರಾನ್ ಮತ್ತು ಕ್ಯೂಬಾದಿಂದ ಎಲ್ಲಾ ಮಿಲಿಟರಿ, ಗುಪ್ತಚರ ಮತ್ತು ಆರ್ಥಿಕ ಸಿಬ್ಬಂದಿಯನ್ನು ನಿಮ್ಮ ದೇಶದಿಂದ ಹೊರಹಾಕಬೇಕು ಎಂದು ಟ್ರಂಪ್​ ಆಡಳಿತ ಹೇಳಿದೆ.

ವೆನೆಜುವೆಲಾ ತೈಲ ಉತ್ಪಾದನೆಯಲ್ಲಿ ಅಮೆರಿಕದೊಂದಿಗೆ ಪ್ರತ್ಯೇಕವಾಗಿ ಪಾಲುದಾರಿಕೆ ಹೊಂದಲು ಒಪ್ಪಿಕೊಳ್ಳಬೇಕು. ಅಲ್ಲದೆ, ತನ್ನ ಭಾರೀ ಕಚ್ಚಾ ತೈಲವನ್ನು ಅಮೆರಿಕದ ಸಂಸ್ಕರಣಾಗಾರಗಳಿಗೆ ಮಾರಾಟ ಮಾಡಲು ಆದ್ಯತೆ ನೀಡಬೇಕು ಎಂದು ತಿಳಿಸಿದೆ.

ಟ್ರಂಪ್ ಆಡಳಿತವು ವೆನೆಜುವೆಲಾದ ಪ್ರಸ್ತುತ ಆರ್ಥಿಕ ಬಿಕ್ಕಟ್ಟನ್ನು ಬಳಸಿಕೊಳ್ಳುತ್ತಿದೆ ಎಂದು ವರದಿಯಾಗಿದೆ. ಪ್ರಸ್ತುತ ತೈಲ ಟ್ಯಾಂಕರ್‌ಗಳು ತುಂಬಿದ್ದು, ಅಮೆರಿಕದ ದಿಗ್ಬಂಧನದಿಂದಾಗಿ ಕಚ್ಚಾ ತೈಲವನ್ನು ಕಳುಹಿಸಲು ಎಲ್ಲಿಯೂ ಇಲ್ಲ, ಅದು ಪಾಲಿಸದಿದ್ದರೆ ವಾರಗಳಲ್ಲಿ ದೇಶವು ಸಂಪೂರ್ಣ ದಿವಾಳಿತನವನ್ನು ಎದುರಿಸಬೇಕಾಗುತ್ತದೆ ಎಂದು ಅಮೆರಿಕ ಹೇಳಿದೆ.

ಈ ಬಗ್ಗೆ ಮಾತನಾಡಿರುವ ಟ್ರಂಪ್​, ಈಗಾಗಲೇ 30 ರಿಂದ 50 ಮಿಲಿಯನ್ ಬ್ಯಾರೆಲ್‌ಗಳಷ್ಟು ಉತ್ತಮ ಗುಣಮಟ್ಟದ ತೈಲವನ್ನು ಅಮೆರಿಕಕ್ಕೆ ವರ್ಗಾಯಿಸುತ್ತಿದ್ದಾರೆ ಎಂದು ದೃಢಪಡಿಸಿದ್ದಾರೆ.

ಈ ತೈಲವನ್ನು ಮಾರುಕಟ್ಟೆ ಬೆಲೆಗೆ ಮಾರಾಟ ಮಾಡಲಾಗುವುದು. ಆ ಹಣವನ್ನು ವೆನೆಜುವೆಲಾ ಮತ್ತು ಯುನೈಟೆಡ್ ಸ್ಟೇಟ್ಸ್‌ನ ಜನರಿಗೆ ಪ್ರಯೋಜನವಾಗುವಂತೆ ಬಳಸುವುದನ್ನು ಖಚಿತಪಡಿಸಿಕೊಳ್ಳಲು ಅಮೆರಿಕದ ಅಧ್ಯಕ್ಷನಾಗಿ ನಾನು ನಿಯಂತ್ರಿಸುತ್ತೇನೆ ಎಂದು ಟ್ರಂಪ್ ಹೇಳಿದ್ದಾರೆ. ಅಲ್ಲದೆ, ಮಡುರೊ ಯುಗದಲ್ಲಿ ಅಮೆರಿಕದ ತೈಲ ಕಂಪನಿಗಳು ಅನುಭವಿಸಿದ ನಷ್ಟವನ್ನು ಸರಿದೂಗಿಸಲು ಮತ್ತು ಅಮೆರಿಕದ ಮೇಲ್ವಿಚಾರಣೆಯಲ್ಲಿ ವೆನೆಜುವೆಲಾದ ಕ್ಷೀಣಿಸಿದ ಮೂಲಸೌಕರ್ಯವನ್ನು ಪುನರ್ನಿರ್ಮಿಸಲು ಆಡಳಿತವು ಈ ಹಣವನ್ನು ಬಳಸಲು ಯೋಜಿಸಿದೆ ಎಂದು ಅಮೆರಿಕ ಅಧ್ಯಕ್ಷ ತಿಳಿಸಿದ್ದಾರೆ.

ಈ ಕ್ರಮವು ಜಗತ್ತಿನಾದ್ಯಂತ ರಾಜಕೀಯ ಬಿರುಗಾಳಿಯನ್ನು ಹುಟ್ಟುಹಾಕಿದೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಚೀನಾ, ಅಮೆರಿಕದ ಕ್ರಮಗಳನ್ನು ಅಂತರಾಷ್ಟ್ರೀಯ ಕಾನೂನಿನ ಉಲ್ಲಂಘನೆ ಎಂದು ಕಿಡಿಕಾರಿದೆ. ಅಲ್ಲದೆ, ಮಡುರೊ ಅಪಹರಣ ಮತ್ತು ವಾಷಿಂಗ್ಟನ್ ಪ್ರದರ್ಶಿಸುತ್ತಿರುವ 19 ನೇ ಶತಮಾನದ ಸಾಮ್ರಾಜ್ಯಶಾಹಿ ಧೋರಣೆಯು ವಿನಾಶಕಾರಿ ಮತ್ತು ದೀರ್ಘಕಾಲದ ಸಂಘರ್ಷಕ್ಕೆ ಕಾರಣವಾಗಬಹುದು ಎಂದು ರಷ್ಯಾ ಎಚ್ಚರಿಸಿದೆ,(ಏಜೆನ್ಸೀಸ್).