ಮಧ್ಯಪ್ರಾಚ್ಯ ಯುದ್ಧಕ್ಕೆ 100 ದಿನ! ಇದೊಂದು ನಡೆಯದಿದ್ರೆ ಖಂಡಿತ ಇಡೀ ಜಗತ್ತಿಗೆ ಕಾದಿದೆ ಭಾರಿ ಸಂಕಷ್ಟ

ನವದೆಹಲಿ: ಈ ವರ್ಷದ ಫೆ.28ರಂದು ಇಸ್ರೇಲ್​-ಅಮೆರಿಕ ಜಂಟಿಯಾಗಿ ಇರಾನ್ ಮೇಲೆ ಕ್ಷಿಪಣಿ ದಾಳಿ ನಡೆಸುವ ಮೂಲಕ ಭೀಕರ ಯುದ್ಧಕ್ಕೆ ಸಾಕ್ಷಿಯಾಯಿತು. ಅಂದಿನಿಂದ ಇಂದಿನವರೆಗೂ ಎಲ್ಲಿಯೂ ಸಮರ ನಿಲ್ಲಿಸಿದ ರಾಷ್ಟ್ರಗಳು, ಕೇವಲ ನೆಪಕ್ಕಷ್ಟೇ ಕದನ ವಿರಾಮ ಎಂಬ ಪದವನ್ನು ಘೋಷಿಸಿವೆ. ಈ ಯುದ್ಧದಿಂದ ಜಗತ್ತಿನಲ್ಲಿ ಸಾಕಷ್ಟು ಸಮಸ್ಯೆಗಳು ಉಲ್ಬಣಿಸಿದ್ದು, ಬಹುತೇಕ ದೇಶಗಳು ಅಕ್ಷರಶಃ ತತ್ತರಿಸಿವೆ.

100 ದಿನಗಳ ನಂತರವೂ ಪರಿಸ್ಥಿತಿ ಮಾತ್ರ ಸುಧಾರಣೆ ಕಂಡಿಲ್ಲ. ಈಗಲೂ, ಅದೇ ಉದ್ವಿಗ್ನತೆ ಮುಂದುವರೆದಿದೆ. ಇರಾನ್​ನ ಸುಪ್ರೀಂ ಲೀಡರ್​ ಅನ್ನು ಕೊಂದ ಅಮೆರಿಕದ ವಿರುದ್ಧ ಪ್ರತೀಕಾರ ತೀರಿಸಿಕೊಳ್ಳಲು ಮುಗಿಬಿದ್ದ ಇರಾನ್, ಗಲ್ಫ್ ರಾಷ್ಟ್ರಗಳ ಮೇಲೆ ದಾಳಿ ಮಾಡುವುದರ ಜೊತೆಗೆ ಹೊರ್ಮುಜ್ ಜಲಸಂಧಿಯನ್ನು ಮುಚ್ಚಿತು. ಇಲ್ಲಿಂದಲೇ ಇಡೀ ಜಗತ್ತಿಗೆ ಶುರುವಾಗಿದ್ದು ತೈಲ, ಅನಿಲ, ಇಂಧನ ಬಿಕ್ಕಟ್ಟಿನಂತ ಅನೇಕ ಸಮಸ್ಯೆಗಳು.

ಗೃಹಬಳಕೆ ಮತ್ತು ವಾಣಿಜ್ಯ ಎಲ್​ಪಿಜಿ ಸಿಲಿಂಡರ್​ಗಳ ಬೆಲೆ, ಪೆಟ್ರೋಲ್​-ಡಿಸೇಲ್​ ಸೇರಿ ಕೆಲವು ಅತ್ಯಗತ್ಯ ಹಾಗೂ ದಿನಬಳಕೆ ವಸ್ತುಗಳ ಬೆಲೆಗಳು ದಿಢೀರ್​ ದುಪ್ಪಟ್ಟಾಗಿರುವುದು ಸದ್ಯ ಭಾರತದ ಜೊತೆಗೆ ಅನೇಕ ದೇಶಗಳ ಜನತೆಗೆ ಭಾರೀ ಸಂಕಷ್ಟ ತಂದೊಡ್ಡಿದೆ. ಇದು ಬಡವರು ಮತ್ತು ಮಧ್ಯವರ್ಗದ ಜನರಿಗಂತು ನುಂಗಲಾರದ ಬಿಸಿ ತುಪ್ಪವಾಗಿದೆ. ಪ್ರಸ್ತುತ ಕದನ ವಿರಾಮ ಒಪ್ಪಂದ ಜಾರಿಯಲ್ಲಿದ್ದರೂ, ಮೂರು ದೇಶಗಳ ನಡುವಿನ ಉದ್ವಿಗ್ನತೆ ಮಾತ್ರ ಕಿಂಚಿತ್ತು ಕಡಿಮೆಯಾಗಿಲ್ಲ.

ಹೊರ್ಮುಜ್ ಜಲಸಂಧಿಯನ್ನು ಮುಚ್ಚಿ 100 ದಿನಗಳೇ ಕಳೆದಿವೆ. ಇದರಿಂದಾಗಿ, ಜಾಗತಿಕವಾಗಿ ತೈಲ ಮತ್ತು ಅನಿಲ ತೊಂದರೆಗಳು ಮುಂದುವರೆದಿವೆ. ಹಲವಾರು ದೇಶಗಳು ತೀರ ಹೆಣಗಾಡುತ್ತಿವೆ. ಅಮೆರಿಕ-ಇರಾನ್​ ಸಂಘರ್ಷದಿಂದ ಹೊರ್ಮುಜ್ ದಿಗ್ಬಂಧನ ಏನಾದರೂ ಹೀಗೆ ಮುಂದುವರಿದರೆ, ಜಗತ್ತಿನ ಅನೇಕ ದೇಶಗಳು ತೀವ್ರ ಸಂಕಷ್ಟಗಳನ್ನು ಎದುರಿಸಬೇಕಾಗುತ್ತದೆ. ಅಮೆರಿಕ ಮತ್ತು ಇರಾನ್ ನಡುವೆ ಇನ್ನೂ ಶಾಂತಿ ಒಪ್ಪಂದವಾಗಿಲ್ಲ ಎಂಬುದೂ ಇಲ್ಲಿ ಗಮನಾರ್ಹ.

ಮತ್ತೊಂದೆಡೆ, ಶಾಂತಿ ಒಪ್ಪಂದದ ಮಧ್ಯಸ್ಥಿಕೆ ವಹಿಸುವ ಪಾಕಿಸ್ತಾನದ ಪ್ರಯತ್ನಗಳು ಸತತವಾಗಿ ವಿಫಲವಾಗುತ್ತಿವೆ. ಇಸ್ಲಾಮಾಬಾದ್‌ನಲ್ಲಿ ಈಗಾಗಲೇ ಮಾತುಕತೆಗಳು ನಡೆಯುತ್ತಿದ್ದರೂ ಸಹ, ಅದ್ಯಾವುದು ಯುದ್ಧ ನಿಲ್ಲಿಸಲು ಸಹಾಯ ಮಾಡುವಂತೆ ತೋರುತ್ತಿಲ್ಲ. ಮುಂದಿನ ದಿನಗಳಲ್ಲಿ ಯುದ್ಧ ಹೀಗೆಯೇ ಮುಂದುವರಿದರೆ, ತೈಲ ಮತ್ತು ಅನಿಲ ಸಮಸ್ಯೆಗಳು ಇನ್ನಷ್ಟು ಹದಗೆಡುವ ಎಲ್ಲ ಲಕ್ಷಣಗಳು ಸ್ಪಷ್ಟವಾಗಿ ಕಾಣುತ್ತಿವೆ,(ಏಜೆನ್ಸೀಸ್).