ಟ್ರಂಪ್​ ಗೋಲ್ಡ್ ಕಾರ್ಡ್​ ಹವಾ! ಇದರ ಬೆಲೆ ಎಷ್ಟು? ಯಾರಿಗೆಲ್ಲ ಪ್ರಯೋಜನ? ಇಲ್ಲಿದೆ ಪೂರ್ಣ ಮಾಹಿತಿ

ಯುಎಸ್​: ಸದಾ ಒಂದಲ್ಲ, ಒಂದು ವಿಚಾರಗಳಿಂದ ಸುದ್ದಿ ಮಾಧ್ಯಮಗಳಲ್ಲಿ ಹಾಗೂ ಜಾಲತಾಣಗಳಲ್ಲಿ ಸದ್ದು ಮಾಡುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್​, ಇದೀಗ ತಮ್ಮ ಹೆಸರಿನಲ್ಲಿ ಲಭ್ಯವಿರುವ ಗೋಲ್ಡ್ ಕಾರ್ಡ್ ಮೂಲಕ ಚರ್ಚೆಯಲ್ಲಿದ್ದಾರೆ. 

ಅಷ್ಟಕ್ಕೂ ಏನಿದು ಟ್ರಂಪ್​ ಗೋಲ್ಡ್ ಕಾರ್ಡ್​? ಎಂಬ ಪ್ರಶ್ನೆ ಸದ್ಯ ಹಲವರಲ್ಲಿ ಕಾಡುತ್ತಿದೆ. ಅಮೆರಿಕದ ನಾಗರಿಕರಾಗಲು ಬಯಸುವವರು ಈ​ ಕಾರ್ಡ್ ಖರೀದಿಸುವ ಮೂಲಕ ಪೌರತ್ವ ಪಡೆಯಬಹುದು ಎಂದು ಟ್ರಂಪ್ ಆರಂಭದಲ್ಲಿ ಸ್ಪಷ್ಟಪಡಿಸಿದರು. ಅಮೆರಿಕದಲ್ಲಿ ನೆಲೆಸುವ ಹೆಬ್ಬಯಕೆ ಹೊಂದಿರುವವರಿಗೆ ಇದು ನಿಜಕ್ಕೂ ಒಳ್ಳೆಯ ಸುದ್ದಿ ಎಂದೇ ಹೇಳಬಹುದು.

ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೆಸರಿನಲ್ಲಿ ಈ 'ಟ್ರಂಪ್ ಗೋಲ್ಡ್ ಕಾರ್ಡ್' ಎಂಬ ಹೊಸ ವೀಸಾ ಯೋಜನೆಯನ್ನು ಅಧಿಕೃತವಾಗಿ ಜಾರಿಗೊಳಿಸಲಾಗಿದೆ. ಈ ವೀಸಾ ಕಾರ್ಡ್ ಮೂಲಕ, ಆಯಾ ವ್ಯಕ್ತಿಗಳು ನೇರವಾಗಿ ಯುಎಸ್​ನ ಪೌರತ್ವವನ್ನು ಪಡೆಯಬಹುದಾಗಿದೆ. ಈಗ, ಅರ್ಹ ಪರಿಶೀಲಿಸಿದ ವೀಸಾ ಹೊಂದಿರುವವರು ನೇರವಾಗಿ ಯುಎಸ್ ಪೌರತ್ವವನ್ನು ಪಡೆಯಬಹುದು ಎಂದು ಟ್ರಂಪ್​ ತಮ್ಮ ಅಧಿಕೃತ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿದ್ದರು.

ಈ ವರ್ಷದ ಸೆಪ್ಟೆಂಬರ್‌ನಲ್ಲಿ ಹೊರಡಿಸಲಾದ ಯೋಜನೆ ಈಗ ಅಧಿಕೃತವಾಗಿ ಜಾರಿಗೆ ಬಂದಿದೆ. ಇದರಲ್ಲಿ, ಪ್ರಸ್ತುತ ಎರಡು ಕಾರ್ಡ್​ ಲಭ್ಯವಿದೆ. ಅಮೆರಿಕಕ್ಕೆ ಪ್ರಯಾಣಿಸಲು ಬಯಸುವ ಆಯಾ ವ್ಯಕ್ತಿಗಳಿಗೆ ಗೋಲ್ಡ್ ಕಾರ್ಡ್ ಇದ್ದರೆ, ತಮ್ಮ ಉದ್ಯೋಗಿಗಳನ್ನು ಅಮೆರಿಕಕ್ಕೆ ಕಳುಹಿಸಲು ಬಯಸುವ ಯಾವುದೇ ಕಂಪನಿಗೆ ಕಾರ್ಪೊರೇಟ್ ಗೋಲ್ಡ್ ಕಾರ್ಡ್ ನೀಡಲಾಗಿದೆ. ಪ್ಲಾಟಿನಂ ಕಾರ್ಡ್ ಕೂಡ ಶೀಘ್ರದಲ್ಲೇ ಲಭ್ಯವಿರಲಿದೆ. ಈ ಕಾರ್ಡ್ 270 ದಿನಗಳ ಕಾಲ ಅಮೆರಿಕದಲ್ಲಿ ಉಳಿಯಲು ಅನುವು ಮಾಡಿಕೊಡುತ್ತದೆ ಎಂಬುದು ಗಮನಾರ್ಹ. 

ಪ್ರಕ್ರಿಯೆಗೆ ತಗುಲುವ ಶುಲ್ಕವನ್ನು ಹೊರತುಪಡಿಸಿ ಗೋಲ್ಡ್ ಕಾರ್ಡ್‌ನ ಬೆಲೆಯನ್ನು 1 ಮಿಲಿಯನ್‌ ಡಾಲರ್​ಗೆ ನಿಗದಿಪಡಿಸಿರುವ ಟ್ರಂಪ್​, ಅದನ್ನೇ ಕಂಪನಿಗಳಿಗೆ 2 ಮಿಲಿಯನ್ ಆಗಿರುತ್ತದೆ ಎಂದು ಈ ಹಿಂದೆ ತಿಳಿಸಿದ್ದರು. ಈ ಸಮಯದಲ್ಲಿ, ಪ್ಲಾಟಿನಂ ಕಾರ್ಡ್ ಅನ್ನು ಸಹ ಪರಿಚಯಿಸಲಾಗಿದೆ. ಇದರ ಮೌಲ್ಯ 5 ಮಿಲಿಯನ್ ಡಾಲರ್​ ಎಂದು ಹೇಳಲಾಗಿದೆ. ವಿದೇಶಿಯರು ಈ ಮೊತ್ತವನ್ನು ಪಾವತಿಸಬಹುದು ಮತ್ತು ಯಾವುದೇ ತೆರಿಗೆಗಳಿಲ್ಲದೆ 270 ದಿನಗಳವರೆಗೆ ಯುಎಸ್‌ನಲ್ಲಿ ಉಳಿಯಬಹುದು ಎಂದು ತಿಳಿಸಲಾಗಿದೆ. 

ಆದಾಗ್ಯೂ, ಯುಎಸ್‌ನಲ್ಲಿ ಗಳಿಸಿದ ಹಣದ ಮೇಲೆ ತೆರಿಗೆಗಳನ್ನು ಪಾವತಿಸಬೇಕಾಗುತ್ತದೆ ಎಂಬುದನ್ನೂ ಹೇಳಲಾಗಿದೆ. ಟ್ರಂಪ್ ಈ ವರ್ಷದ ಫೆಬ್ರವರಿಯಲ್ಲಿ ಫಲಾನುಭವಿಗಳಿಗೆ ಐದು ಮಿಲಿಯನ್ ಡಾಲರ್‌ ಮೌಲ್ಯದ ಪ್ಲಾಟಿನಮ್​ ಕಾರ್ಡ್ ಪರಿಚಯಿಸಿದರು. ಪ್ಲಾಟಿನಂ ಕಾರ್ಡ್‌ಗೆ ಯುಎಸ್ ಕಾಂಗ್ರೆಸ್‌ನ ಅನುಮೋದನೆ ಕಡ್ಡಾಯವಾಗಿದೆ. ಗೋಲ್ಡ್ ಕಾರ್ಡ್ ಅಮೆರಿಕಕ್ಕೆ 100 ಬಿಲಿಯನ್ ಡಾಲರ್ ಗಳಿಸುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ಟ್ರಂಪ್ ಹೇಳಿದ್ದು, ಗೋಲ್ಡ್ ಕಾರ್ಡ್ ನಿಧಿಯನ್ನು ತೆರಿಗೆ ಕಡಿತ, ಅಭಿವೃದ್ಧಿ ಯೋಜನೆಗಳು ಮತ್ತು ಸಾಲ ಮರುಪಾವತಿಗೆ ಬಳಸಲಾಗುವುದು ಎಂದಿದ್ದಾರೆ.

ಗೋಲ್ಡ್ ಕಾರ್ಡ್ ವೆಬ್‌ಸೈಟ್ ಇನ್ನೂ ಅರ್ಜಿ ಸಲ್ಲಿಸುವ ಅಂತಿಮ ದಿನಾಂಕವನ್ನು ಉಲ್ಲೇಖಿಸಿಲ್ಲ. ಅರ್ಜಿಗಳನ್ನು ಪ್ರಸ್ತುತ ಪ್ರಕ್ರಿಯೆಗೊಳಿಸಬಹುದು ಎಂದು ತಿಳಿಸಿದೆ. ಇದು ವರ್ಷವಿಡೀ ಲಭ್ಯವಿರಲಿದೆಯೋ ಅಥವಾ ಸೀಮಿತ ಅವಧಿಗೆ ಮಾತ್ರವೋ ಎಂಬುದು ಇನ್ನೂ ಸ್ಪಷ್ಟವಾಗಿ ತಿಳಿದುಬಂದಿಲ್ಲ.