ಶೋಕಸಾಗರದಲ್ಲಿ ಹಾಲಿವುಡ್‌: ಖ್ಯಾತ ನಟ ಮಾರ್ಟಿನ್ ಶಾರ್ಟ್ ಪುತ್ರಿ ಆತ್ಮಹತ್ಯೆಗೆ ಶರಣು | Katherine Short

ಕ್ಯಾಥರಿನ್ ಅವರ ನಿವಾಸದಲ್ಲಿ ಈ ದುರ್ಘಟನೆ ನಡೆದಿದ್ದು, ವಿಷಯ ತಿಳಿಯುತ್ತಿದ್ದಂತೆಯೇ ಸ್ಥಳಕ್ಕೆ ಆಗಮಿಸಿದ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. ಮಾರ್ಟಿನ್ ಶಾರ್ಟ್ ಅವರ ಕುಟುಂಬದ ಪ್ರತಿನಿಧಿಯೊಬ್ಬರು ಈ ಸುದ್ದಿಯನ್ನು ಅಧಿಕೃತವಾಗಿ ಖಚಿತಪಡಿಸಿದ್ದಾರೆ. ಶಾರ್ಟ್ ಕುಟುಂಬವು ಈ ತುಂಬಲಾರದ ನಷ್ಟದಿಂದ ಕಂಗಾಲಾಗಿದೆ ಮತ್ತು ಈ ದುಃಖದ ಸಮಯದಲ್ಲಿ ಪ್ರೈವೆಸಿ ನೀಡುವಂತೆ ವಿನಂತಿಸಿದೆ. ಕ್ಯಾಥರಿನ್ ಎಲ್ಲರಿಗೂ ಪ್ರೀತಿಪಾತ್ರರಾಗಿದ್ದರು, ಅವರು ಜಗತ್ತಿಗೆ ನೀಡಿದ ಬೆಳಕು ಮತ್ತು ಸಂತೋಷಕ್ಕಾಗಿ ಅವರನ್ನು ಯಾವಾಗಲೂ ನೆನಪಿಸಿಕೊಳ್ಳಲಾಗುತ್ತದೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಮಾರ್ಟಿನ್ ಶಾರ್ಟ್ ಮತ್ತು ಅವರ ದಿವಂಗತ ಪತ್ನಿ ನ್ಯಾನ್ಸಿ ಡೋಲ್ಮನ್ ಅವರು ಕ್ಯಾಥರಿನ್ ಅವರನ್ನು ದತ್ತು ಪಡೆದಿದ್ದರು. ನ್ಯಾನ್ಸಿ ಅವರು 2010 ರಲ್ಲಿ ಕ್ಯಾನ್ಸರ್‌ನಿಂದ ನಿಧನರಾದ ನಂತರ, ಮಾರ್ಟಿನ್ ಅವರು ತಮ್ಮ ಮಕ್ಕಳನ್ನು ಅತ್ಯಂತ ಪ್ರೀತಿಯಿಂದ ಬೆಳೆಸಿದ್ದರು. ಕ್ಯಾಥರಿನ್ ಕೇವಲ ನಟನ ಮಗಳಾಗಿರದೆ, ಸಾಮಾಜಿಕ ಕಾರ್ಯಗಳಲ್ಲಿ ಹಾಗೂ ಚಿತ್ರರಂಗದ ತೆರೆಯ ಹಿಂದಿನ ಕೆಲಸಗಳಲ್ಲಿ ಆಸಕ್ತಿ ಹೊಂದಿದ್ದರು.

ಈ ಸುದ್ದಿಯು ಹೊರಬೀಳುತ್ತಿದ್ದಂತೆಯೇ ಸೋಶಿಯಲ್ ಮೀಡಿಯಾದಲ್ಲಿ ಸಂತಾಪದ ಮಹಾಪೂರವೇ ಹರಿಯುತ್ತಿದೆ. ಮಾರ್ಟಿನ್ ಶಾರ್ಟ್ ಅವರ ಆಪ್ತ ಗೆಳೆಯರಾದ ಸ್ಟೀವ್ ಮಾರ್ಟಿನ್ ಮತ್ತು ಸೆಲೆನಾ ಗೋಮೆಜ್ ಸೇರಿದಂತೆ ಅನೇಕ ಗಣ್ಯರು ಈ ಕಷ್ಟದ ಸಮಯದಲ್ಲಿ ಕುಟುಂಬಕ್ಕೆ ಬೆಂಬಲ ಸೂಚಿಸಿದ್ದಾರೆ. ಮಾನಸಿಕ ಆರೋಗ್ಯದ ಮಹತ್ವದ ಬಗ್ಗೆ ಮತ್ತೆ ಚರ್ಚೆಗಳು ಮುನ್ನೆಲೆಗೆ ಬಂದಿದ್ದು, ಬಣ್ಣದ ಲೋಕದ ಹಿಂದಿನ ನೋವಿನ ಬಗ್ಗೆ ಅನೇಕರು ಕಳವಳ ವ್ಯಕ್ತಪಡಿಸಿದ್ದಾರೆ.

ಒಬ್ಬ ನಟನಾಗಿ ಕೋಟ್ಯಂತರ ಜನರನ್ನು ನಗಿಸಿದ ಮಾರ್ಟಿನ್ ಶಾರ್ಟ್ ಅವರಿಗೆ ಇಂದು ತಮ್ಮ ಮಗಳನ್ನು ಕಳೆದುಕೊಂಡ ನೋವು ಜೀರ್ಣಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಈ ಘಟನೆಯು ಶ್ರೀಮಂತಿಕೆ ಮತ್ತು ಖ್ಯಾತಿಯ ನಡುವೆಯೂ ಮನುಷ್ಯ ಅನುಭವಿಸುವ ಮಾನಸಿಕ ಒತ್ತಡದ ಬಗ್ಗೆ ಗಂಭೀರ ಎಚ್ಚರಿಕೆಯನ್ನು ನೀಡಿದೆ,(ಏಜೆನ್ಸೀಸ್).