ಪೆಂಟಗನ್‌ನಲ್ಲಿ ಸ್ಯಾಮ್ಯುಯೆಲ್ ಜಾಕ್ಸನ್ ಅವತಾರ ಎತ್ತಿದ ಹೆಗ್ಸೆತ್! ಬೈಬಲ್ ವಾಕ್ಯ ಎಂದು ಸಿನಿಮಾ ಡೈಲಾಗ್ ಪಠಿಸಿದ ಅಮೆರಿಕ ರಕ್ಷಣಾ ಕಾರ್ಯದರ್ಶಿ | Pete Hegseth Fake Bible Verse

ಪೆಂಟಗನ್‌ನಲ್ಲಿ ನಡೆದ ಆರಾಧನಾ ಸೇವೆಯ ಸಂದರ್ಭದಲ್ಲಿ ಸೈನಿಕರನ್ನು ಉದ್ದೇಶಿಸಿ ಮಾತನಾಡಿದ ಪೀಟ್ ಹೆಗ್ಸೆತ್, ಇರಾನ್‌ನಲ್ಲಿ ನಡೆದ ಅಮೆರಿಕದ ವಾಯುಪಡೆಯ ಸಿಬ್ಬಂದಿಯ ರಕ್ಷಣಾ ಕಾರ್ಯಾಚರಣೆಯ (CSAR) ಬಗ್ಗೆ ಪ್ರಸ್ತಾಪಿಸಿದ್ದಾರೆ. ಈ ವೇಳೆ ಅವರು, ದಿ ಪಾತ್ ಆಫ್ ದಿ ಡೌನ್ಡ್ ಏವಿಯೇಟರ್ ಎಂಬ ಸಾಲುಗಳಿಂದ ಆರಂಭವಾಗುವ ಪ್ರಾರ್ಥನೆಯನ್ನು ಪಠಿಸಿದ್ದಾರೆ.

ದಬ್ಬಾಳಿಕೆಗಾರರ ದೌರ್ಜನ್ಯದಿಂದಾಗಿ ಕೆಳಗಿಳಿದ ವಿಮಾನ ಚಾಲಕನ ಹಾದಿಯು ಅಡೆತಡೆಗಳಿಂದ ಕೂಡಿದೆ. ಯಾರು ಈ ಕತ್ತಲೆಯ ಕಣಿವೆಯಲ್ಲಿ ಕಳೆದುಹೋದವರನ್ನು ರಕ್ಷಿಸುತ್ತಾರೋ ಅವರು ಆಶೀರ್ವದಿಸಲ್ಪಟ್ಟವರು. ನನ್ನ ಸಹೋದರನನ್ನು ನಾಶಪಡಿಸಲು ಯತ್ನಿಸುವವರ ಮೇಲೆ ನಾನು ತೀವ್ರ ಸೇಡಿನೊಂದಿಗೆ ಮುಗಿಬೀಳುತ್ತೇನೆ ಎಂದು ಹೆಗ್ಸನ್​ ಹೇಳಿದ್ದಾರೆ.

ಪೀಟ್ ಹೆಗ್ಸೆತ್ ಅವರು ಹೇಳಿದ ಈ ಮಾತುಗಳು 1994ರ ಬ್ಲಾಕ್‌ಬಸ್ಟರ್ ಸಿನಿಮಾ ಪಲ್ಪ್ ಫಿಕ್ಷನ್​ನಲ್ಲಿ ಹಿಟ್‌ಮ್ಯಾನ್ ಜೂಲ್ಸ್ ವಿನ್‌ಫೀಲ್ಡ್ ಎಂಬ ಪಾತ್ರವು ಹತ್ಯೆ ಮಾಡುವ ಮುನ್ನ ಹೇಳುವ ಡೈಲಾಗ್‌ಗಳಾಗಿವೆ. ಕುತೂಹಲದ ವಿಷಯವೆಂದರೆ, ಸಿನಿಮಾದಲ್ಲಿಯೂ ಆ ಪಾತ್ರವು ಇದನ್ನು ಬೈಬಲ್ ವಾಕ್ಯ ಎಂದೇ ಹೇಳುತ್ತದೆ. ಆದರೆ ವಾಸ್ತವದಲ್ಲಿ ಬೈಬಲ್‌ನ ಎಜೆಕಿಯಲ್ 25:17 ರಲ್ಲಿ ಅಂತಹ ಯಾವುದೇ ಸುದೀರ್ಘ ಸಾಲುಗಳಿಲ್ಲ. ಟ್ಯಾರಂಟಿನೋ ಅವರು ಸಿನಿಮಾದ ಪ್ರಭಾವಕ್ಕಾಗಿ ಈ ಸಾಲುಗಳನ್ನು ತಾವೇ ಸೃಷ್ಟಿಸಿದ್ದರು.

ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಮತ್ತು ರಾಜಕೀಯ ವಿರೋಧಿಗಳು ಹೆಗ್ಸೆತ್ ಅವರನ್ನು ತೀವ್ರವಾಗಿ ಹಾಸ್ಯ ಮಾಡುತ್ತಿದ್ದಾರೆ.

ಅಜ್ಞಾನದ ಪರಮಾವಧಿ: ಪೆಂಟಗನ್‌ನಂತಹ ಜವಾಬ್ದಾರಿಯುತ ಸ್ಥಾನದಲ್ಲಿರುವ ವ್ಯಕ್ತಿಗೆ ಅಸಲಿ ಬೈಬಲ್ ವಾಕ್ಯ ಮತ್ತು ಸಿನಿಮಾ ಡೈಲಾಗ್ ನಡುವಿನ ವ್ಯತ್ಯಾಸ ತಿಳಿಯದಿರುವುದು ವಿಷಾದನೀಯ ಎಂದು ಡೆಮೋಕ್ರಾಟ್ ನಾಯಕರು ಟೀಕಿಸಿದ್ದಾರೆ.

ಸೈನಿಕ ವ್ಯವಸ್ಥೆಯ ಮೇಲೆ ಪ್ರಭಾವ: ಯುದ್ಧದ ಸನ್ನಿವೇಶದಲ್ಲಿ ಬಳಸುವ ಕಾಲ್ ಸೈನ್ ಅನ್ನು ಈ ಪ್ರಾರ್ಥನೆಯೊಳಗೆ ಸೇರಿಸಿ ಹೆಗ್ಸೆತ್ ಓದಿದ್ದು, ಇದು ಸೈನಿಕ ಸಂಸ್ಕೃತಿಯಲ್ಲಿ ಸಿನಿಮಾ ಸಂಭಾಷಣೆಗಳು ಎಷ್ಟು ಆಳವಾಗಿ ಬೇರೂರಿವೆ ಎಂಬುದನ್ನು ತೋರಿಸುತ್ತದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಈಗಾಗಲೇ ಪೀಟ್ ಹೆಗ್ಸೆತ್ ವಿರುದ್ಧ ದೋಷಾರೋಪಣೆ ಪ್ರಕ್ರಿಯೆ ನಡೆಯುತ್ತಿರುವ ಬೆನ್ನಲ್ಲೇ ಈ ಹೊಸ ವಿವಾದವು ಟ್ರಂಪ್ ಸರ್ಕಾರಕ್ಕೆ ಮುಜುಗರ ತಂದಿದೆ,(ಏಜೆನ್ಸೀಸ್).