ಅರ್ಧ ಕೆಲಸ ಮುಗಿದಿದೆ, ಇನ್ನುಳಿದ ಅರ್ಧಕ್ಕೆ ಕಾದಿದೆ ದೊಡ್ಡ ಸ್ಕೆಚ್! ಇರಾನ್ ನಾಶದ ಬಗ್ಗೆ ನೆತನ್ಯಾಹು ನೀಡಿದ ಆ ಶಾಕಿಂಗ್ ಹೇಳಿಕೆ ಏನು? Benjamin Netanyahu

ಈ ಬಗ್ಗೆ ಅಮೆರಿಕದ ನ್ಯೂಸ್‌ಮ್ಯಾಕ್ಸ್ ವಾಹಿನಿಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿರುವ ನೆತನ್ಯಾಹು, ಇರಾನ್‌ನ ಮಿಲಿಟರಿ ಮತ್ತು ಪರಮಾಣು ಸಾಮರ್ಥ್ಯವನ್ನು ಅಕ್ಷರಶಃ ಧೂಳೀಪಟ ಮಾಡಲಾಗುತ್ತಿದೆ ಎಂದು ಗುಡುಗಿದ್ದಾರೆ.

ಯುದ್ಧ ಎಷ್ಟು ದಿನ ನಡೆಯಲಿದೆ ಎಂಬ ಪ್ರಶ್ನೆಗೆ ಉತ್ತರಿಸಿದ ನೆತನ್ಯಾಹು, ನಾವು ಯುದ್ಧದ ಅರ್ಧ ಹಾದಿಯನ್ನು ದಾಟಿದ್ದೇವೆ. ಇದು ಸಮಯದ ಲೆಕ್ಕಾಚಾರವಲ್ಲ, ಬದಲಿಗೆ ನಾವು ಹಾಕಿಕೊಂಡಿದ್ದ ಗುರಿಗಳ ಸಾಧನೆಯ ಲೆಕ್ಕಾಚಾರವಾಗಿದೆ. ಇರಾನ್‌ನ ಕ್ರಾಂತಿಕಾರಿ ಗಾರ್ಡ್‌ಗಳ ಸಾವಿರಾರು ಸೈನಿಕರನ್ನು ಈಗಾಗಲೇ ಹತ್ಯೆ ಮಾಡಲಾಗಿದೆ. ಅವರ ಶಸ್ತ್ರಾಸ್ತ್ರ ಉದ್ಯಮ ಮತ್ತು ಕೈಗಾರಿಕಾ ನೆಲೆಗಳನ್ನು ನಾವು ಸಂಪೂರ್ಣವಾಗಿ ನಾಶಪಡಿಸಿದ್ದೇವೆ ಎಂದು ತಿಳಿಸಿದ್ದಾರೆ.

ಇರಾನ್‌ನ ಪರಮಾಣು ಕಾರ್ಯಕ್ರಮದ ಬಗ್ಗೆ ಮಾತನಾಡುತ್ತಾ, ನೆತನ್ಯಾಹು, ಇರಾನ್ ಅಣುಬಾಂಬ್ ತಯಾರಿಕೆಗೆ ತೀರಾ ಹತ್ತಿರದಲ್ಲಿದೆ ಎಂದು ಪುನರುಚ್ಚರಿಸಿದರು. ನಾವು ಇರಾನ್‌ನ ಇಡೀ ಕೈಗಾರಿಕಾ ಮೂಲವನ್ನು ಗುರಿಯಾಗಿಸಿಕೊಂಡಿದ್ದೇವೆ. ಅವರ ಪರಮಾಣು ಸ್ಥಾವರಗಳು ಮತ್ತು ಬೃಹತ್ ಕಾರ್ಖಾನೆಗಳನ್ನು ನೆಲಸಮಗೊಳಿಸಲಾಗುತ್ತಿದೆ ಎಂದು ಹೇಳಿದ್ದಾರೆ. ವಿಶೇಷವೆಂದರೆ, ಕಳೆದ ವರ್ಷವೇ ಟ್ರಂಪ್ ಅವರು ಇರಾನ್‌ನ ಪ್ರಮುಖ ಪರಮಾಣು ಕೇಂದ್ರಗಳನ್ನು ಧ್ವಂಸಗೊಳಿಸಿದ್ದಾರೆ ಎಂದು ಹೇಳಿದ್ದರೂ, ಇಸ್ರೇಲ್ ಮಾತ್ರ ಈಗಲೂ ಅಲ್ಲಿ ದಾಳಿ ಮುಂದುವರಿಸಿದೆ.

ಇರಾನ್‌ನ ಇಸ್ಲಾಮಿಕ್ ಆಡಳಿತವು ಆಂತರಿಕವಾಗಿ ಕುಸಿಯಲಿದೆ ಎಂದು ನೆತನ್ಯಾಹು ಭವಿಷ್ಯ ನುಡಿದಿದ್ದಾರೆ. ನಮ್ಮ ಗುರಿ ಆಡಳಿತ ಬದಲಾವಣೆಯಲ್ಲ, ಆದರೆ ಇರಾನ್‌ನ ಮಿಲಿಟರಿ ಶಕ್ತಿ, ಕ್ಷಿಪಣಿ ಸಾಮರ್ಥ್ಯ ಮತ್ತು ಪರಮಾಣು ಶಕ್ತಿಯನ್ನು ಸಂಪೂರ್ಣವಾಗಿ ಕುಗ್ಗಿಸುವುದು. ಈ ಪ್ರಕ್ರಿಯೆಯಲ್ಲಿ ಇರಾನ್ ಆಂತರಿಕವಾಗಿ ದುರ್ಬಲಗೊಳ್ಳುತ್ತಿದೆ ಮತ್ತು ಶೀಘ್ರದಲ್ಲೇ ಈ ಆಡಳಿತ ಪತನಗೊಳ್ಳಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಫೆಬ್ರವರಿ 28 ರಂದು ಯುದ್ಧ ಘೋಷಿಸಿದ್ದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಈ ಕಾರ್ಯಾಚರಣೆ 4 ರಿಂದ 6 ವಾರಗಳ ಕಾಲ ನಡೆಯಬಹುದು ಎಂದು ಅಂದಾಜಿಸಿದ್ದರು. ಆದರೆ ಈಗ ಅಮೆರಿಕದಲ್ಲಿ ಯುದ್ಧದ ವಿರುದ್ಧ ಸಾರ್ವಜನಿಕ ಆಕ್ರೋಶ ವ್ಯಕ್ತವಾಗುತ್ತಿದೆ. ತೈಲ ಬೆಲೆ ಗಗನಕ್ಕೇರಿರುವುದು ಅಮೆರಿಕನ್ನರನ್ನು ಕಂಗಾಲಾಗಿಸಿದೆ. ಈ ನಡುವೆ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೋ, ಯುದ್ಧವು ಇನ್ನು ಕೆಲವೇ ವಾರಗಳಲ್ಲಿ ಅಂತ್ಯಗೊಳ್ಳಲಿದೆ, ತಿಂಗಳುಗಟ್ಟಲೆ ಮುಂದುವರಿಯುವುದಿಲ್ಲ ಎಂದು ಸಮಜಾಯಿಷಿ ನೀಡಿದ್ದಾರೆ.

ಟ್ರಂಪ್ ಪ್ರಕಾರ, ಈಗಾಗಲೇ ಇರಾನ್‌ನ ಆಡಳಿತದಲ್ಲಿ ಬದಲಾವಣೆಯ ಗಾಳಿ ಬೀಸುತ್ತಿದೆ. ಮಂದಗಾಮಿ ನಾಯಕರು ಮಾತುಕತೆಗೆ ಸಿದ್ಧರಾಗುತ್ತಿದ್ದಾರೆ ಎಂಬುದು ಅವರ ವಾದವಾಗಿದೆ.

ಕೆಲವು ವಾರಗಳ ಹಿಂದಷ್ಟೇ ಇರಾನ್ ಸರ್ಕಾರ ತನ್ನ ದೇಶದ ಜನಸಾಮಾನ್ಯರ ಪ್ರತಿಭಟನೆಯನ್ನು ಹತ್ತಿಕ್ಕಲು ಸಾವಿರಾರು ಜನರನ್ನು ಕೊಂದಿತ್ತು. ಈ ಆಂತರಿಕ ಅಸ್ಥಿರತೆಯ ಲಾಭ ಪಡೆದ ಅಮೆರಿಕ ಮತ್ತು ಇಸ್ರೇಲ್, ಇರಾನ್ ಮೇಲೆ ನೇರ ದಾಳಿ ಆರಂಭಿಸಿದ್ದವು. ಇರಾಕ್‌ನ ಕತೈಬ್ ಹಿಜ್ಬುಲ್ಲಾ ಪಡೆಗಳು ಹೌತಿ ಬಂಡುಕೋರರು ಈ ಯುದ್ಧಕ್ಕೆ ಎಂಟ್ರಿ ಕೊಟ್ಟಿರುವುದನ್ನು ಸ್ವಾಗತಿಸಿರುವುದು ಸಂಘರ್ಷ ಮತ್ತಷ್ಟು ಜಟಿಲವಾಗುವ ಮುನ್ಸೂಚನೆ ನೀಡಿದೆ.

ಒಟ್ಟಾರೆಯಾಗಿ, ನೆತನ್ಯಾಹು ಅವರ ಹೇಳಿಕೆಯು ಇರಾನ್ ಮೇಲೆ ಇನ್ನೂ ಭೀಕರ ದಾಳಿಗಳು ನಡೆಯಲಿವೆ ಎಂಬುದನ್ನು ಸ್ಪಷ್ಟಪಡಿಸಿದೆ. ಯುದ್ಧವು ಅರ್ಧ ಹಾದಿ ಮುಗಿಸಿದೆ ಎಂದರೆ, ಇನ್ನುಳಿದ ಅರ್ಧ ಹಾದಿಯು ಇರಾನ್‌ನ ಅಳಿದುಳಿದ ಮಿಲಿಟರಿ ಶಕ್ತಿಯನ್ನು ಸಂಪೂರ್ಣವಾಗಿ ನಾಶಪಡಿಸುವ ಗುರಿಯನ್ನು ಹೊಂದಿದೆ ಎಂಬುದು ರಕ್ಷಣಾ ತಜ್ಞರ ವಿಶ್ಲೇಷಣೆ ಆಗಿದೆ,(ಏಜೆನ್ಸೀಸ್​).