Expensive Ice Cream: ಚಿಕ್ಕ ಮಕ್ಕಳಿನಿಂದ ಹಿಡಿದು ವಯಸ್ಸಾದ ಹಿರಿಯ ಜೀವಗಳಿಗೂ ಈ ಐಸ್ಕ್ರೀಮ್ ಎಂದರೆ ಅದೇನೋ ಪಂಚಪ್ರಾಣ. ಅದರಲ್ಲೂ, ಈ ಚಾಕೊಲೇಟ್, ಬಟರ್ಸ್ಕಾಚ್, ಸ್ಟ್ರಾಬೆರಿಯಂತಹ ವಿವಿಧ ಪ್ಲೇವರ್ಗಳು ನಾಲಿಗೆಗೆ ತಂಪು ಮಾತ್ರವಲದೇ, ರುಚಿಯನ್ನು ಹೆಚ್ಚಿಸುತ್ತದೆ. ಇದನ್ನು ಸವಿಯಲು ಬಿರು ಬಿಸಿಲೇ ಇರಬೇಕು ಎಂತನೇನಿಲ್ಲ. ಮಳೆ ಬರುತ್ತಿದ್ದರೂ, ಚಳಿ ಅನಿಸಿದರೂ 200-300 ರೂ. ಕೊಟ್ಟಾದರೂ ತಮ್ಮ ಇಷ್ಟದ ಐಸ್ಕ್ರೀಮ್ ತಿನ್ನುತ್ತಾರೆ. ಆದರೆ, ಇಲ್ಲೊಂದು ವಿಚಾರ ಸದ್ಯ ಐಸ್ಕ್ರೀಮ್ ಪ್ರಿಯರನ್ನು ಅಕ್ಷರಶಃ ಅಚ್ಚರಿಗೆ ದೂಡಿದೆ.
ನಮ್ಮ ಕಾಲಘಟ್ಟಗಳಲ್ಲಿ ಒಂದು ಐಸ್ಕ್ರೀಮ್ ಅಥವಾ ಐಸ್ ಕ್ಯಾಂಡಿಗಳು 2ರಿಂದ 3 ರೂ. ಇತ್ತು. ಆದರೆ, ಅದೇ ಇಂದಿನ ಕಾಲಕ್ಕೆ 50 ರೂ. ನಿಂದ 1000 ರೂ. ಮೌಲ್ಯದ ಐಸ್ಕ್ರೀಮ್ಗಳು ಮಾರುಕಟ್ಟೆಗೆ ಲಗ್ಗೆಯಿಟ್ಟಿವೆ. ಬ್ರ್ಯಾಂಡ್ ಮೌಲ್ಯಗಳ ಮೇಲೆ ಆಧಾರಿಸಿದರೆ, ಇದರ ಬೆಲೆಯು ಸಾವಿರಾರು ರೂ.ಗೂ ಅಧಿಕ ಎಂಬುದು ಇನ್ನೊಂದು ವಿಷಯ. ಆದರೆ, ಇಲ್ಲೊಂದು ಐಸ್ಕ್ರೀಮ್ಗೆ 5.5 ಲಕ್ಷ ರೂ. ಎಂದರೆ ನಂಬುತ್ತೀರಾ? ಖಂಡಿತ ನಂಬಲೇಬೇಕು ಬಿಡಿ. ಕಾರಣ, ಇದು ಅದಾಗಲೇ ಗಿನ್ನೆಸ್ ವಿಶ್ವ ದಾಖಲೆ ಪುಸ್ತಕ ಕೂಡ ಸೇರಿದೆ.
ಜಪಾನಿನ ಸೆಲ್ಟೋ ಕಂಪನಿ ತಯಾರಿಸಿದ 'ಬೈಕುಯಾ' ಐಸ್ ಕ್ರೀಂ ಗಿನ್ನೆಸ್ ವಿಶ್ವ ದಾಖಲೆಯಲ್ಲಿ ವಿಶ್ವದ ಅತ್ಯಂತ ದುಬಾರಿ ಐಸ್ ಕ್ರೀಂ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ನವೀನ 'ಫ್ಯೂಷನ್' ಅಡುಗೆ ಶೈಲಿಗೆ ಹೆಸರುವಾಸಿಯಾದ ರಿವಿ ಎಂಬ ರೆಸ್ಟೋರೆಂಟ್ನ ಮುಖ್ಯ ಶೆಫ್ ತಡಯೋಶಿ ಯಮಡಾ ಇದನ್ನು ಮಾಡಿದ್ದಾರೆ. ಇದು ಇಟಲಿಯ ಆಲ್ಬಾ ಪ್ರದೇಶದ ಬೆಲೆಬಾಳುವ ಬಿಳಿ ಟ್ರಫಲ್ಸ್, ಖಾದ್ಯ ಚಿನ್ನದ ಎಲೆಗಳು, ಪಾರ್ಮಿಜಿಯಾನೊ ರೆಗ್ಗಿಯಾನೊ ಚೀಸ್ ಮತ್ತು 'ಸೇಕ್ ಲೀಸ್' ನಂತಹ ಅಪರೂಪದ ಪದಾರ್ಥಗಳನ್ನು ಬಳಸಿಕೊಂಡು ಮಾಡಲಾಗಿದೆ ಎಂದು ವಿವರಿಸಿಲಾಗಿದೆ.
