ಇಸ್ಲಾಮಿಕ್ ರಾಷ್ಟ್ರಗಳ ಮಹಾಮೈತ್ರಿ! ಖಮೇನಿ ಹತ್ಯೆಗೆ ಪಾಕ್ ಪ್ರಧಾನಿ ಕೆಂಡ! ಅಮೆರಿಕ ವಿರುದ್ಧ ತಿರುಗಿಬೀಳುತ್ತಾ ಪಾಕ್​..? Shehbaz Sharif

ಪ್ರಧಾನಿ ಶೆಹಬಾಜ್ ಷರೀಫ್​ಯು ತಮ್ಮ ಅಧಿಕೃತ ಹೇಳಿಕೆಯಲ್ಲಿ, ಯಾವುದೇ ದೇಶದ ಮುಖ್ಯಸ್ಥರನ್ನು ಅಥವಾ ಸರ್ಕಾರದ ಉನ್ನತ ನಾಯಕರನ್ನು ಗುರಿಯಾಗಿಸಿ ಹತ್ಯೆ ಮಾಡುವುದು ಅಂತಾರಾಷ್ಟ್ರೀಯ ಕಾನೂನುಗಳ ಮತ್ತು ನಿಯಮಗಳ ಸ್ಪಷ್ಟ ಉಲ್ಲಂಘನೆಯಾಗಿದೆ ಎಂದು ಪ್ರತಿಪಾದಿಸಿದ್ದಾರೆ. ಅಲ್ಲದೆ, ರಾಷ್ಟ್ರದ ಮುಖ್ಯಸ್ಥರನ್ನು ಗುರಿಯಾಗಿಸಬಾರದು ಎಂಬುದು ಹಳೆಯ ಸಂಪ್ರದಾಯ ಮತ್ತು ಶಿಷ್ಟಾಚಾರವಾಗಿದೆ. ಇದನ್ನು ಅಮೆರಿಕ ಮತ್ತು ಇಸ್ರೇಲ್ ಮುರಿದಿರುವುದು ಅಪಾಯಕಾರಿ ಬೆಳವಣಿಗೆ ಎಂದು ಗುಡುಗಿದ್ದಾರೆ.

ಇರಾನ್‌ನಲ್ಲಿ ಸಂಭವಿಸಿರುವ ಈ ಭಾರಿ ಸಾವು-ನೋವುಗಳ ಬಗ್ಗೆ ಸಂತಾಪ ಸೂಚಿಸಿರುವ ಪಾಕ್ ಪ್ರಧಾನಿ, ಇರಾನ್ ದೇಶದ ಈ ಶೋಕದ ಸಮಯದಲ್ಲಿ ಪಾಕಿಸ್ತಾನದ ಜನತೆಯೂ ಅವರ ಜೊತೆ ಕೈಜೋಡಿಸುತ್ತಿದ್ದಾರೆ. ನಮ್ಮ ನೆರೆಯ ರಾಷ್ಟ್ರದ ಮೇಲೆ ನಡೆದ ಈ ದಾಳಿಯು ಇಡೀ ಪ್ರದೇಶದ ಶಾಂತಿಯನ್ನು ಕದಡಿದೆ ಎಂದು ಹೇಳಿದ್ದಾರೆ.

ಇರಾನ್ ಮತ್ತು ಪಾಕಿಸ್ತಾನದ ನಡುವೆ ಇತ್ತೀಚಿನ ದಿನಗಳಲ್ಲಿ ಗಡಿ ಸಂಘರ್ಷಗಳು ನಡೆದಿದ್ದರೂ, ಖಮೇನಿ ಅವರಂತಹ ಧಾರ್ಮಿಕ ಮತ್ತು ರಾಜಕೀಯ ನಾಯಕನ ಹತ್ಯೆಯ ವಿಷಯದಲ್ಲಿ ಪಾಕಿಸ್ತಾನವು ಇಸ್ಲಾಮಿಕ್ ರಾಷ್ಟ್ರಗಳ ಒಕ್ಕೂಟದ ಭಾಗವಾಗಿ ಇರಾನ್ ಪರವಾಗಿ ನಿಂತಿದೆ. ಇರಾನ್‌ನ ಮೇಲೆ ನಡೆಯುತ್ತಿರುವ ಸರಣಿ ದಾಳಿಗಳು ಪಾಕಿಸ್ತಾನದ ಮೇಲೆ ಆರ್ಥಿಕ ಮತ್ತು ಭದ್ರತಾ ಪರಿಣಾಮಗಳನ್ನು ಬೀರಬಹುದು ಎಂಬ ಆತಂಕವೂ ಇಸ್ಲಾಮಾಬಾದ್‌ನಲ್ಲಿದೆ.

ಡೊನಾಲ್ಡ್ ಟ್ರಂಪ್ ನೇತೃತ್ವದ ಅಮೆರಿಕ ಸರ್ಕಾರವು ಇರಾನ್‌ನ 48ಕ್ಕೂ ಹೆಚ್ಚು ಉನ್ನತ ನಾಯಕರನ್ನು ಹೊಡೆದುರುಳಿಸಿರುವುದಾಗಿ ಘೋಷಿಸಿರುವುದು ಜಗತ್ತಿನಾದ್ಯಂತ ಸಂಚಲನ ಮೂಡಿಸಿದೆ. ಪಾಕಿಸ್ತಾನ ಮಾತ್ರವಲ್ಲದೆ, ಚೀನಾ ಮತ್ತು ರಷ್ಯಾ ಕೂಡ ಅಮೆರಿಕದ ಈ ಏಕಪಕ್ಷೀಯ ದಾಳಿಯನ್ನು ಗಮನಿಸುತ್ತಿವೆ. ಅಮೆರಿಕದ ಈ ಆಡಳಿತ ಬದಲಾವಣೆ ತಂತ್ರವು ಇತರ ದೇಶಗಳ ಸಾರ್ವಭೌಮತ್ವಕ್ಕೆ ಧಕ್ಕೆ ತರಬಹುದು ಎಂಬುದು ಪಾಕಿಸ್ತಾನದ ವಾದವಾಗಿದೆ.

ಇರಾನ್ ಈಗ ತನ್ನ ಪಾತಾಳ ಸೈನ್ಯದ ಮೂಲಕ ಅಮೆರಿಕದ ನೆಲೆಗಳ ಮೇಲೆ ಕ್ಷಿಪಣಿ ಮಳೆಯನ್ನು ಸುರಿಸುತ್ತಿದೆ. ಕುವೈತ್, ಬಹ್ರೇನ್ ಮತ್ತು ಯುಎಇ ಮೇಲಿನ ದಾಳಿಗಳು ಮುಂದುವರಿದಿವೆ. ಈ ಮಧ್ಯೆ ಪಾಕಿಸ್ತಾನದ ಈ ಹೇಳಿಕೆಯು ಮುಸ್ಲಿಂ ರಾಷ್ಟ್ರಗಳ ನಡುವಿನ ಒಗ್ಗಟ್ಟನ್ನು ಪ್ರದರ್ಶಿಸುವ ಪ್ರಯತ್ನವಾಗಿದೆ. ಆದರೆ, ಅಮೆರಿಕದ ಆಪ್ತ ಮಿತ್ರ ರಾಷ್ಟ್ರವಾಗಿರುವ ಪಾಕಿಸ್ತಾನಕ್ಕೆ ಇದು ಅಗ್ನಿಪರೀಕ್ಷೆಯೂ ಹೌದು,(ಏಜೆನ್ಸೀಸ್).