ಭೂಕಂಪಕ್ಕೂ ಮೊದಲೇ ಎಚ್ಚರಿಸಿತ್ತು ಗೂಗಲ್​! ಮುನ್ನೆಚ್ಚರಿಕೆ ಅರಿತರೆ ಉಳಿಯುತ್ತಾ ಪ್ರಾಣ? ಹೀಗಿದೆ ಅಸಲಿ ಸಂಗತಿ

Google Alert: ವೆನೆಜುವೆಲಾದಲ್ಲಿ ಸಂಭವಿಸಿರುವ ಎರಡು ಪ್ರತ್ಯೇಕ ಪ್ರಬಲ ಭೂಕಂಪಗಳು ಸದ್ಯ ಜನರನ್ನು ಅಕ್ಷರಶಃ ಕಣ್ಣೀರಿನಲ್ಲಿ ಕೈತೊಳೆಯುವಂತೆ ಮಾಡಿದೆ. 39 ಸೆಕೆಂಡ್​ಗಳಲ್ಲಿ ಬಿರುಕು ಬಿಟ್ಟ ಭೂಮಿ, 30ಕ್ಕೂ ಹೆಚ್ಚು ಮಂದಿಯ ಪ್ರಾಣವನ್ನು ಕಸಿದುಕೊಂಡಿದೆ. ಈ ಸಾವಿನ ಸಂಖ್ಯೆ ಇನ್ನೂ ಹೆಚ್ಚಾಗುವ ಸಾಧ್ಯತೆಗಳಿವೆ ಎಂದು ವರದಿಯಾಗಿದ್ದು, ಮೃತರ ಸಂಖ್ಯೆ 10 ಸಾವಿರ ಗಡಿಯನ್ನು ದಾಟಬಹುದು ಎನ್ನಲಾಗಿದೆ. ಈ ಮಧ್ಯೆ, ಗೂಗಲ್​ ಕೊಟ್ಟ ಮುನ್ನೆಚ್ಚರಿಕೆ ಏಕೆ ಯಾರೊಬ್ಬರಿಗೂ ತಿಳಿಯಲಿಲ್ಲ ಎಂಬ ಪ್ರಶ್ನೆ ಸದ್ಯ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಭೀಕರ ದುರಂತದ ಬಗ್ಗೆ ಆಧುನಿಕ ಟೆಕ್ನಾಲಜಿಯು ಪವಾಡದಂತೆ ಮುನ್ನೆಚ್ಚರಿಕೆ ನೀಡಿದ್ದರೂ ಎಚ್ಚರಗೊಳ್ಳದ ಜನರು, ಈಗ ಮೃತ್ಯುಕೂಪಕ್ಕೆ ಬಲಿಯಾಗಿರುವುದು ನಿಜಕ್ಕೂ ಎಂಥವರ ಮನವನ್ನು ಕಲಕುತ್ತೆ. ವಿಶ್ವದ ಯಾವ ಭಾಗಗಳಲ್ಲಿ ಭೂಮಿ ಕಂಪಿಸಲಿದೆ ಎಂದು ನಿಖರವಾಗಿ ಹೇಳಲು ಸಾಧ್ಯವಾಗದೆ ಹೋದರೂ, ಅಪ್ಪಳಿಸುವ ಕೆಲವೇ ನಿಮಿಷಗಳಿಗೂ ಮುನ್ನ ಗೂಗಲ್ ತನ್ನ ಆ್ಯಂಡ್ರಾಯ್ಡ್ ಬಳಕೆದಾರರಿಗೆ ಅರ್ಥ್‌ಕ್ವೇಕ್ ಅಲರ್ಟ್ ಕಳುಹಿಸುವ ಮೂಲಕ ಪ್ರಾಣ ಉಳಿಸಿಕೊಳ್ಳಲು ಎಚ್ಚರಿಸಿತು. ಇದು ಕೆಲವೇ ಕೆಲವರಿಗೆ ತಿಳಿಯಿತು ಬಿಟ್ಟರೆ ಉಳಿದವರಿಗೆ ಅರ್ಥವಾಗೋದು ಬಹಳ ತಡವಾಯಿತು.

ವೆನೆಜುವೆಲಾದಲ್ಲಿ ಭೂಕಂಪ ಸಂಭವಿಸಿದ ಕೆಲವೇ ಗಂಟೆಗಳಲ್ಲಿ ಅನೇಕ ನೆಟ್ಟಿಗರು, ಸೋಶಿಯಲ್ ಮೀಡಿಯಾದಲ್ಲಿ ಗೂಗಲ್ ಕಳುಹಿಸಿದ ಮುನ್ನೆಚ್ಚರಿಕೆ ಸಂದೇಶದ ಸ್ಕ್ರೀನ್‌ಶಾಟ್‌ಗಳು ಹಂಚಿಕೊಂಡಿದ್ದಾರೆ. ಇದು ಭೂಕಂಪದ ಮುನ್ಸೂಚನೆಯನ್ನು ಮಿಂಚಿನ ವೇಗದಲ್ಲಿ ದುರಂತ ಸಂಭವಿಸುವ ಸುತ್ತಮುತ್ತಲಿನ ಪ್ರದೇಶದ ಜನರಿಗೆ ಅಲರ್ಟ್​ ನೀಡಿದೆ. ಗೂಗಲ್ ತನ್ನ ವಿಶೇಷ ಟೆಕ್ನಾಲಜಿ ಮತ್ತು ವಿಶ್ವದಾದ್ಯಂತ ಆ್ಯಂಡ್ರಾಯ್ಡ್​ ಸ್ಮಾರ್ಟ್‌ಫೋನ್ ಬಳಕೆದಾರರ ನೆಟ್‌ವರ್ಕ್ ಬಳಸಿ ಭೂಕಂಪದ ಚಲನವಲನಗಳನ್ನು ಪತ್ತೆ ಹಚ್ಚುತ್ತದೆ. ಮತ್ತು ಕೂಡಲೇ ಪೀಡಿತ ಪ್ರದೇಶದಲ್ಲಿರುವ ಆ್ಯಂಡ್ರಾಯ್ಡ್​ ಯೂಸರ್ಸ್​ಗೆ ಮುನ್ನೆಚ್ಚರಿಕೆ ನೀಡುತ್ತದೆ ಎಂದು ವಿವರಿಸಲಾಗಿದೆ.

ಸ್ಮಾರ್ಟ್‌ಫೋನ್‌ಗಳಲ್ಲಿರುವ 'ಅಕ್ಸೆಲೆರೊಮೀಟರ್' (Accelerometer) ಎಂಬ ಸಣ್ಣ ಸೆನ್ಸರ್​ವೊಂದು ಈ ಇಡೀ ವ್ಯವಸ್ಥೆಯ ಹಿಂದಿರುವ ಅದ್ಭುತ ಶಕ್ತಿ ಎನ್ನಲಾಗಿದೆ. ಅಸಲಿಗೆ ಇದು, ನಾವು ಫೋನ್ ತಿರುಗಿಸಿದಾಗ ಸ್ಕ್ರೀನ್ ಲ್ಯಾಂಡ್‌ಸ್ಕೇಪ್ ಅಥವಾ ನಾರ್ಮಲ್ ಮೋಡ್‌ಗೆ ಬದಲಾಗಲು ಬಳಸುವ ಸೆನ್ಸಾರ್​ ಆಗಿದೆ. ಭೂಮಿಯ ಒಳಗಾಗುವ ಅತ್ಯಂತ ಸೂಕ್ಷ್ಮ ವೈಬ್ರೆಷನ್​ಗಳನ್ನು ಪತ್ತೆಹಚ್ಚುವ ಸಾಮರ್ಥ್ಯವನ್ನು ಹೊಂದಿರುವುದಾಗಿ ವರದಿ ತಿಳಿಸಿದೆ.

ಭೂಮಿಯೊಳಗೆ ಕಂಪನ ಆರಂಭವಾದ ಕೆಲವೇ ಸೆಕೆಂಡ್​ಗಳಲ್ಲಿ, ಗೂಗಲ್ ವ್ಯವಸ್ಥೆಯು ಅಲರ್ಟ್ ಆಗುತ್ತದೆ. ಒಂದೇ ಪ್ರದೇಶದ ಸಾವಿರಾರು ಸ್ಮಾರ್ಟ್‌ಫೋನ್‌ಗಳಿಂದ ಬರುವ ಡೇಟಾವನ್ನು ಗೂಗಲ್ ನೆಟ್‌ವರ್ಕ್ ಕೇವಲ ಸೆಕೆಂಡುಗಳಲ್ಲಿ ಸಂಗ್ರಹಿಸುತ್ತದೆ. ಅದರಲ್ಲೂ, ಅತಿ ಮುಖ್ಯವಾಗಿ. ಕಂಪನವು ಕೇವಲ ಫೋನ್ ಚಲನೆಯಿಂದಾಗಿದೆಯೇ ಅಥವಾ ನಿಜವಾದ ಭೂಕಂಪವೇ ಎಂಬುದನ್ನು ಮೊದಲು ಖಚಿತಪಡಿಸಿಕೊಂಡು, ಆ ನಂತರ ಆ್ಯಂಡ್ರಾಯ್ಡ್ ಫೋನ್‌ಗಳಿಗೆ ನೋಟಿಫಿಕೇಶನ್​ಗಳನ್ನು ಕಳುಹಿಸುತ್ತದೆ.

ಪ್ರಸ್ತುತ ಜಾಗತಿಕವಾಗಿ ಸುಮಾರು 2 ಬಿಲಿಯನ್​ (ಅಂದರೆ 200 ಕೋಟಿ) ಆ್ಯಂಡ್ರಾಯ್ಡ್ ಫೋನ್‌ಗಳು ಗೂಗಲ್‌ನ ಈ ಕಂಪನ ಮುನ್ನೆಚ್ಚರಿಕೆ ನೆಟ್‌ವರ್ಕ್​​ಗೆ ಒಳಪಟ್ಟಿವೆ. ಭೂಕಂಪದ ತೀವ್ರತೆಗೆ ಅನುಗುಣವಾಗಿ ಗೂಗಲ್ ಮೈಲ್ಡ್ (ಲೋ)​ ಮತ್ತು ಭಾರಿ ಪ್ರಮಾಣ (ಹೈ) ಎಂಬ ಎರಡು ರೀತಿಯ ಅಲರ್ಟ್‌ಗಳನ್ನು ನೀಡುತ್ತದೆ. ಬೋಟ್ಸ್ ಐ ಸಂಸ್ಥೆಯ ನಿರ್ದೇಶಕರಾದ ನಿಖರ್ ಅರೋರಾ ಪ್ರತಿಕ್ರಿಯಿಸಿ, ಈ ಘಟನೆಯು ವಿಶ್ವದಲ್ಲಿ ಭೂಕಂಪ ಮುನ್ನೆಚ್ಚರಿಕೆ ವ್ಯವಸ್ಥೆ ಎಷ್ಟು ಅತ್ಯಾಧುನಿಕವಾಗಿ ಬೆಳೆದಿದೆ ಎಂಬುದಕ್ಕೆ ಸಾಕ್ಷಿ ಎಂದರು.

ಬಹಳಷ್ಟು ಮಂದಿ ಗೂಗಲ್ ಟೆಕ್ನಾಲಜಿಯು ಭೂಮಿ ಕಂಪಿಸುವುದನ್ನು ಮೊದಲೇ ಊಹಿಸಿ ಭವಿಷ್ಯ ಹೇಳುತ್ತದೆ ಎಂದು ಅಂದುಕೊಂಡಿದ್ದಾರೆ. ಆದರೆ, ಅದೇ ನಿಜವಲ್ಲ. ಗೂಗಲ್ ಭೂಕಂಪ ಸಂಭವಿಸುವುದನ್ನು ಮುಂಚಿತವಾಗಿ ಭವಿಷ್ಯ ನುಡಿದಿಲ್ಲ. ಪ್ರಕೃತಿಯಲ್ಲಿ ವಿಕೋಪ ಯಾವ ಕ್ಷಣದಲ್ಲಿ ಸಂಭವಿಸುತ್ತೆ ಅನ್ನೋದನ್ನು ಮೊದಲೇ ಊಹಿಸುವುದು ಯಾರಿಗೂ ಸಾಧ್ಯವಿಲ್ಲ. ಅಷ್ಟಕ್ಕೂ ಗೂಗಲ್​ ಮಾಡಿದ್ದಿಷ್ಟೆ. ಭೂಮಿಯ ಆಳದಲ್ಲಿ ಕಂಪನದ ಸಣ್ಣ ಸೂಚನೆಗಳು ಸಿಕ್ಕರೆ, ಅವುಗಳನ್ನು ಪತ್ತೆಹಚ್ಚಿ ನೆಟ್​ವರ್ಕ್​ ಮೂಲಕ ಅಲರ್ಟ್​ ಮಾಡಿವೆ ಎಂದು ಸ್ಪಷ್ಟಪಡಿಸಿದರು.