ಶಾಪಿಂಗ್​ ಮೂಡ್​ಗೆ ಬಂದ ಗಜರಾಜ: ಅಂಗಡಿಗೆ ನುಗ್ಗಿ ತನ್ನಿಷ್ಟದ ತಿಂಡಿ ಸವಿದ ಆನೆ; ವಿಡಿಯೋ ವೈರಲ್​! Elephant Viral Video

ಥೈಲ್ಯಾಂಡ್: ಸಾಮಾನ್ಯವಾಗಿ ನಾವು ಅಂಗಡಿಗೆ ಹೋಗಿ ದಿನಸಿ ಸಾಮಾನು ತರುತ್ತೇವೆ. ಆದರೆ, ಇಲ್ಲೊಂದು ಆನೆ ತಾನೇ ಸ್ವತಃ ಸ್ಟೋರ್ ಒಳಗೆ ನುಗ್ಗಿ, ತನಗಿಷ್ಟ ಬಂದ ತಿಂಡಿಗಳನ್ನು ಆಯ್ದುಕೊಂಡು ತಿನ್ನುತ್ತಿರುವ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ಸಖತ್​ ವೈರಲ್ (Elephant Viral Video) ​ಆಗುತ್ತಿದೆ.

ಥೈಲ್ಯಾಂಡ್‌ನ ರಾಷ್ಟ್ರೀಯ ಉದ್ಯಾನವನದ ಸಮೀಪವಿರುವ ಒಂದು ಸಣ್ಣ ಕನ್ವೀನಿಯನ್ಸ್ ಸ್ಟೋರ್‌ಗೆ ಈ ಬೃಹತ್ ಕಾಡು ಆನೆ ಎಂಟ್ರಿ ಕೊಟ್ಟಿದೆ. ಬಾಗಿಲು ತೆರೆದಿರುವುದನ್ನು ಕಂಡ ಆನೆ, ಮಾರುಕಟ್ಟೆಗೆ ಬಂದ ಗಿರಾಕಿಯಂತೆ ಒಳಗೆ ಬಂದಿದೆ.

ಸ್ಥಳೀಯರ ಪ್ರಕಾರ, ಈ ಆನೆಯ ಹೆಸರು ಪ್ಲೈ ಬಿಯಾಂಗ್ ಲೆಕ್. ಈತ ಆ ಭಾಗದಲ್ಲಿ ದೊಡ್ಡ ಸೆಲೆಬ್ರಿಟಿಯಾಗಿದ್ದು, ಹೊಟ್ಟೆ ಹಸಿದಾಗಲೆಲ್ಲಾ ಕಾಡಿನಿಂದ ನಾಡಿಗೆ ಬಂದು ಜನವಸತಿ ಪ್ರದೇಶಗಳಲ್ಲಿ ಅಲೆದಾಡುವುದು ಇವನಿಗೆ ಹವ್ಯಾಸವಂತೆ.

ಈ ಬಾರಿಯ ಅವನ ಈ ಶಾಪಿಂಗ್ ಮೋಜಿನಿಂದ ಸುಮಾರು 2,000 ರೂಪಾಯಿಗಳಿಗೂ ಅಧಿಕ ಮೌಲ್ಯದ ಹಾನಿಯಾಗಿದೆ. ಆದರೆ, ಅಂಗಡಿ ಮಾಲೀಕರು ಗಾಬರಿಯಾಗಲಿಲ್ಲ. ವನ್ಯಜೀವಿ ಸಂರಕ್ಷಣಾ ಸಂಸ್ಥೆಯು ಮಧ್ಯಪ್ರವೇಶಿಸಿ ಆನೆ ತಿಂದ ತಿಂಡಿಗಳ ಬಿಲ್ ಅನ್ನು ಪಾವತಿಸಿ ಎಲ್ಲವನ್ನೂ ಸುಸೂತ್ರವಾಗಿ ಬಗೆಹರಿಸಿದೆ.

ಸ್ಥಳೀಯರೊಬ್ಬರು ಹೇಳುವಂತೆ, ಬಿಯಾಂಗ್ ಲೆಕ್ ತುಂಬಾ ಶಾಂತ ಪ್ರಭಾವದ ಆನೆ. ಅವನಿಗೆ ತಿಂಡಿಗಳು ಎಲ್ಲಿರುತ್ತವೆ ಎಂಬುದು ಚೆನ್ನಾಗಿ ಗೊತ್ತು. ಅವನಿಗೆ ಶಾಪಿಂಗ್ ಮಾಡಲು ಯಾವುದೇ ಬಂಡಿ (Cart) ಅಥವಾ ಲೈನ್ ಬೇಕಾಗಿಲ್ಲ. ತನಗೆ ಬೇಕಾದ್ದನ್ನು ತೆಗೆದುಕೊಂಡು ಸೌಮ್ಯವಾಗಿ ಹೊರಬರುತ್ತಾನೆ ಎನ್ನುವುದು ಅಲ್ಲಿಯ ಜನರ ಅಭಿಪ್ರಾಯವಾಗಿದೆ,(ಏಜನ್ಸೀಸ್​).