ಇನ್ಮುಂದೆ ಒಂಟೆಗಳಿಗೂ ಬೇಕು ಪಾಸ್‌ಪೋರ್ಟ್! ಸೌದಿ ಅರೇಬಿಯಾದ ಈ ವಿಚಿತ್ರ ನಿಯಮದ ಹಿಂದಿನ ಅಸಲಿ ಕಾರಣವೇನು? Passport

ಸೌದಿ ಅರೇಬಿಯಾ: ನಾವು ವಿದೇಶ ಪ್ರಯಾಣ ಮಾಡಬೇಕಾದರೆ ಪಾಸ್​ಪೋರ್ಟ್​ (Passport) ಅತ್ಯಗತ್ಯ ಎನ್ನುವುದು ಸಾಮಾನ್ಯ ಸಂಗತಿಯಾಗಿದೆ. ಆದರೆ ನಾವು ಇಂದು ತಿಳಿಯಲು ಹೊರಟಿರುವ ದೇಶವು ತನ್ನ ನಾಡಿನಲ್ಲಿರುವ ಒಂಟೆಗಳಿಗೆ ಪಾಸ್‌ಪೋರ್ಟ್‌ಗಳನ್ನು ನೀಡಲು ಮುಂದಾಗಿದೆ.

ಅಂದಹಾಗೆ ಈ ವಿಚಿತ್ರ ಕೆಲಸಕ್ಕೆ ಮುಂದಾದ ದೇಶ ಯಾವುದೆಂದರೆ ಸೌದಿ ಅರೇಬಿಯಾ. ಹೌದು, ಸೌದಿ ಅರೇಬಿಯಾ ದೇಶವು ಒಂಟೆಗಳಿಗೆ ಅಧಿಕೃತ ಪಾಸ್‌ಪೋರ್ಟ್‌ಗಳನ್ನು ನೀಡುವ ಯೋಜನೆಯನ್ನು ಘೋಷಿಸಿದ್ದು, ದೇಶದಲ್ಲಿರುವ ಒಟ್ಟು ಒಂಟೆಗಳ ಸಂಖ್ಯೆಯ ಡೇಟಾಬೇಸ್​ ರಚಿಸಿ, ಒಂಟೆಗಳ ಉತ್ಪಾದನೆ ಮತ್ತು ದಕ್ಷತೆಯನ್ನು ಸುಧಾರಿಸಲು ಈ ಯೋಜನೆಯನ್ನು ಕೈಗೊಳ್ಳಲಾಗಿದೆ ಎಂದು ಸೌದಿ ಅರೇಬಿಯಾದ ಪರಿಸರ, ನೀರು ಮತ್ತು ಕೃಷಿ ಸಚಿವಾಲಯ ತಿಳಿಸಿದೆ. ಸಾಮಾಜಿಕ ಮಾಧ್ಯಮದಲ್ಲಿ ಸಚಿವಾಲಯವು ಹಂಚಿಕೊಂಡ ಚಿತ್ರಗಳು ಸೌದಿ ಅರೇಬಿಯಾದ ಕೋಟ್ ಆಫ್ ಆರ್ಮ್ಸ್ ಮತ್ತು ಒಂಟೆಯ ಚಿನ್ನದ ಚಿತ್ರಣವನ್ನು ಹೊಂದಿರುವ ಹಸಿರು ಪಾಸ್‌ಪೋರ್ಟ್​ನ್ನು ಒಂಟೆಗಳಿಗೆ ನೀಡಲಾಗುತ್ತದೆ ಎಂದು ತಿಳಿಸಿದೆ.

ವರದಿಗಳ ಪ್ರಕಾರ, ಈ ದಾಖಲೆಯು ಒಂಟೆ ವ್ಯಾಪಾರ ಮತ್ತು ಸಾಗಣೆಯನ್ನು ನಿಯಂತ್ರಿಸಲು, ಮಾಲೀಕರ ಹಕ್ಕುಗಳನ್ನು ರಕ್ಷಿಸಲು ಮತ್ತು ಮಾಲೀಕತ್ವವನ್ನು ಸಾಬೀತುಪಡಿಸಲು ಸುಲಭವಾಗುವಂತೆ ಮಾಡುತ್ತದೆ ಎಂದು ನಂಬಲಾಗಿದೆ. 2024 ರ ಹೊತ್ತಿಗೆ ಸೌದಿ ಅರೇಬಿಯಾದಲ್ಲಿ ಸುಮಾರು 2.2 (22 ಲಕ್ಷ) ಮಿಲಿಯನ್ ಒಂಟೆಗಳಿಗೆ ಎಂದು ಸರ್ಕಾರ ಅಂದಾಜಿಸಿತ್ತು.

ಶತಮಾನಗಳಿಂದ ಅರೇಬಿಯನ್ ದೇಶಕ್ಕೂ ಮತ್ತು ಒಂಟೆಗಳಿಗೂ ಅವಿನಾಭಾವ ಸಂಬಂಧವನ್ನು ಹೊಂದಿದ್ದು, ಮಾನವನನ್ನು ಮತ್ತು ಅವನ ಸಂಪತ್ತನ್ನು ಹೊತ್ತೊಯ್ಯುವ ಸಾರಿಗೆ ವ್ಯವಸ್ಥೆ ಭಾಗವಾಗಿದ್ದ ಒಂಟೆಗಳು ಈಗ ಶ್ರೀಮಂತಿಕೆಯ ಮತ್ತು ಮಾಂಸ ಉದ್ಯಮದ ಪ್ರಮುಖ ಭಾಗವಾಗಿದೆ. 2021 ರಲ್ಲಿ ಪ್ರಕಟವಾದ ಸಂಶೋಧನೆಯು ದೇಶದಲ್ಲಿ ಕಂಡುಬರುವ ಪ್ರಾಚೀನ ಒಂಟೆ ಕೆತ್ತನೆಗಳು ಸುಮಾರು 7,000 ವರ್ಷಗಳಷ್ಟು ಹಳೆಯದಾಗಿರಬಹುದು ಎಂದು ಸೂಚಿಸಿದ್ದವು. ಅರೇಬಿಯಾ ದೇಶದಲ್ಲಿ ಉತ್ಸವಗಳ ಸಮಯದಲ್ಲಿ ಒಂಟೆಗಳ ಸೌಂದರ್ಯ ಸ್ಪರ್ಧೆಯನ್ನು ಸಹ ಆಯೋಜಿಸಲಾಗುತ್ತದೆ ಮತ್ತು ಅಲ್ಲಿ ವಿಜೇತವಾಗುವ ಒಂಟೆಗಳು ಲಕ್ಷಾಂತರ ಡಾಲರ್‌ಗಳಿಗೆ ಮಾರಾಟವಾಗುತ್ತವೆ.

ಅನಧಿಕೃತ ಅಂಕಿಅಂಶಗಳ ಪ್ರಕಾರ, ಸೌದಿ ಅರೇಬಿಯಾ ವಿಶ್ವದ ಅಗ್ರ ಒಂಟೆ ಮಾಲೀಕತ್ವದ ದೇಶಗಳಲ್ಲಿ ಒಂದಾಗಿದ್ದು, ಅಂದಾಜು 80,000 ಒಂಟೆ ಮಾಲೀಕರಿದ್ದಾರೆ ಎಂದು ಹೇಳಲಾಗುತ್ತಿದೆ.

ಮಾಹಿತಿ ಪ್ರಕಾರ, ಒಂಟೆ ಪಾಸ್‌ಪೋರ್ಟ್ ಸಮಗ್ರ ಗುರುತಿನ ದಾಖಲೆಯಾಗಿ ಕಾರ್ಯನಿರ್ವಹಿಸುತ್ತದೆ, ಇದರಲ್ಲಿ ಮೈಕ್ರೋಚಿಪ್ ಸಂಖ್ಯೆ, ಪಾಸ್‌ಪೋರ್ಟ್ ಸಂಖ್ಯೆ, ಒಂಟೆಯ ಹೆಸರು, ಹುಟ್ಟಿದ ದಿನಾಂಕ, ತಳಿ, ಲಿಂಗ, ಬಣ್ಣ, ಹುಟ್ಟಿದ ಸ್ಥಳ ಮತ್ತು ವಿತರಣೆಯ ದಿನಾಂಕ ಮತ್ತು ಸ್ಥಳ, ಜೊತೆಗೆ ನಿಖರವಾದ ಗುರುತನ್ನು ಖಚಿತಪಡಿಸಿಕೊಳ್ಳಲು ಎರಡೂ ಕಡೆಯ ಪ್ರಾಣಿಗಳ ಛಾಯಾಚಿತ್ರಗಳು ಇರಲಿದೆ ಎಂದು ಅರೇಬಿಯಾದ ಉನ್ನತ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ಪಶುವೈದ್ಯರ ಹೆಸರು, ಸಹಿ ಮತ್ತು ಮುದ್ರೆಯಿಂದ ಪ್ರಮಾಣೀಕರಿಸಲ್ಪಟ್ಟ ಪಶುವೈದ್ಯಕೀಯ ರೋಗನಿರೋಧಕ ದಾಖಲೆಗಳನ್ನು ಮತ್ತು ವ್ಯಾಕ್ಸಿನೇಷನ್ ವಿವಿರಗಳನ್ನು ಸಹ ಇದು ಹೊಂದಿರಲಿದೆ ಎಂದು ಹೇಳಲಾಗುತ್ತಿದೆ,(ಏಜನ್ಸೀಸ್​).