ಇರಾನ್ ಮಾಜಿ ಸರ್ವೋಚ್ಚ ನಾಯಕ ಅಲಿ ಖಮೇನಿ ಅಂತ್ಯಸಂಸ್ಕಾರ ಜುಲೈ 9 ಕ್ಕೆ ನಿಗದಿ: ಸ್ವಗ್ರಾಮ ಮಶ್ಹಾದ್‌ನಲ್ಲಿ ಅಂತಿಮ ವಿಧಿವಿಧಾನ! Ali Khamenei Funeral

ಸುಮಾರು 37 ವರ್ಷಗಳ ಕಾಲ ಇರಾನ್ ದೇಶವನ್ನು ಸರ್ವಾಧಿಕಾರಿಯಾಗಿ ಆಳಿದ್ದ ಅಲಿ ಖಮೇನಿ ಅವರ ಅಂತ್ಯಕ್ರಿಯೆಯನ್ನು ಮಾರ್ಚ್ ತಿಂಗಳಿನಲ್ಲೇ ನಡೆಸಲು ಯೋಜಿಸಲಾಗಿತ್ತು. ಆದರೆ, ಅಮೆರಿಕ ಮತ್ತು ಇರಾನ್ ನಡುವೆ ಭುಗಿಲೆದ್ದಿದ್ದ ಭೀಕರ ಯುದ್ಧದ ಕಾರಣದಿಂದಾಗಿ ಈ ಪ್ರಕ್ರಿಯೆಯನ್ನು ಮುಂದೂಡಲಾಗಿತ್ತು. ಈಗ ಉಭಯ ದೇಶಗಳ ನಡುವೆ ಶಾಂತಿ ಒಪ್ಪಂದ ಏರ್ಪಡುತ್ತಿರುವ ಬೆನ್ನಲ್ಲೇ ಈ ಮಹತ್ವದ ಪ್ರಕಟಣೆ ಹೊರಬಿದ್ದಿದೆ.

ಸರ್ಕಾರದ ಪ್ರಕಟಣೆಯ ಪ್ರಕಾರ, ಜುಲೈ 4 ರಿಂದ ರಾಜಧಾನಿ ಟೆಹ್ರಾನ್‌ನಲ್ಲಿ ಮೂರು ದಿನಗಳ ಕಾಲ ಭಾರಿ ಸಾರ್ವಜನಿಕ ಅಂತಿಮ ದರ್ಶನ ಹಾಗೂ ಶೋಕಸಭೆಗಳು ಆರಂಭವಾಗಲಿವೆ. ಕಾಕತಾಳೀಯ ಎಂದರೆ, ಇರಾನ್‌ನಲ್ಲಿ ರಾಷ್ಟ್ರೀಯ ಶೋಕಸಭೆ ಆರಂಭವಾಗುವ ಜುಲೈ 4 ನೇ ತಾರೀಖು ಅಮೆರಿಕದ ಪಾಲಿಗೆ ಅತ್ಯಂತ ಮಹತ್ವದ ದಿನವಾಗಿದೆ. ಅಂದು ಅಮೆರಿಕ ತನ್ನ 250 ನೇ ಸ್ವಾತಂತ್ರ್ಯ ದಿನಾಚರಣೆಯ ಸಂಭ್ರಮದಲ್ಲಿದ್ದರೆ, ಅತ್ತ ಇರಾನ್ ತನ್ನ ಪರಮ ವೈರಿಯಾಗಿದ್ದ ಅಲಿ ಖಮೇನಿ ಸಾವಿನ ಶೋಕ ಆಚರಿಸುತ್ತಿರುತ್ತದೆ.

ಟೆಹ್ರಾನ್‌ನ ಕಾರ್ಯಕ್ರಮಗಳ ಬಳಿಕ, ಜುಲೈ 7 ರಂದು ಮತ್ತೊಂದು ಪವಿತ್ರ ನಗರವಾದ ಕೋಮ್​ನಲ್ಲಿ ಧಾರ್ಮಿಕ ವಿಧಿವಿಧಾನಗಳು ನಡೆಯಲಿವೆ. ಅಂತಿಮವಾಗಿ ಜುಲೈ 9 ರಂದು ಮಶ್ಹಾದ್ ನಗರದಲ್ಲಿ ಖಮೇನಿ ಅವರ ಪಾರ್ಥಿವ ಶರೀರವನ್ನು ಮಣ್ಣು ಮಾಡಲಾಗುವುದು.

ಅಲಿ ಖಮೇನಿ ಅವರ ಮರಣದ ನಂತರ, ಮಾರ್ಚ್ ಆರಂಭದಲ್ಲಿ ಅವರ ಪುತ್ರ ‘ಮೊಜ್ತಬಾ ಖಮೇನಿ’ ಅವರನ್ನು ಇರಾನ್‌ನ ನೂತನ ಸರ್ವೋಚ್ಚ ನಾಯಕನನ್ನಾಗಿ ನೇಮಿಸಲಾಗಿತ್ತು. 1979 ರಲ್ಲಿ ಇಸ್ಲಾಮಿಕ್ ಗಣರಾಜ್ಯ ಸ್ಥಾಪನೆಯಾದ ನಂತರ ಇರಾನ್ ಅಧಿಕಾರ ಹಿಡಿದ ಮೂರನೇ ಸರ್ವೋಚ್ಚ ನಾಯಕ ಇವರಾಗಿದ್ದಾರೆ.

ಆದರೆ, ತಂದೆಯನ್ನು ಬಲಿ ಪಡೆದ ಅದೇ ಭೀಕರ ಅಮೆರಿಕ ವೈಮಾನಿಕ ದಾಳಿಯಲ್ಲಿ ಮೊಜ್ತಬಾ ಖಮೇನಿ ಕೂಡ ತೀವ್ರವಾಗಿ ಗಾಯಗೊಂಡಿದ್ದರು. ಅಧಿಕಾರ ವಹಿಸಿಕೊಂಡ ದಿನದಿಂದ ಇಂದಿನವರೆಗೂ ಅವರು ಒಮ್ಮೆಯೂ ಸಾರ್ವಜನಿಕವಾಗಿ ಎಲ್ಲಿಯೂ ಕಾಣಿಸಿಕೊಂಡಿಲ್ಲ. ಅವರು ಕೇವಲ ತಮ್ಮ ಹೆಸರಿನಲ್ಲಿ ಹೊರಡಿಸಲಾಗುವ ಲಿಖಿತ ಹೇಳಿಕೆಗಳ ಮೂಲಕವೇ ಇಡೀ ದೇಶದ ಆಡಳಿತ ಮತ್ತು ಸೇನೆಯನ್ನು ನಿಯಂತ್ರಿಸುತ್ತಿದ್ದಾರೆ. ಸದ್ಯ ಇರಾನ್‌ನಲ್ಲಿ ಯುದ್ಧದ ವಾತಾವರಣ ತಿಳಿಯಾಗುತ್ತಿರುವುದರಿಂದ, ಖಮೇನಿ ಅಂತ್ಯಸಂಸ್ಕಾರದ ವೇಳೆಗಾದರೂ ನೂತನ ನಾಯಕ ಜಗತ್ತಿನೆದುರು ಬರುತ್ತಾರಾ ಎಂಬ ಕುತೂಹಲ ಮೂಡಿದೆ,(ಏಜೆನ್ಸೀಸ್​).