ಲಕ್ಷ ಲಕ್ಷ ಸುರಿದರೂ ಸಿಗುತ್ತಿಲ್ಲ ಹಾಲು-ಅನ್ನ! ಕ್ಷಿಪಣಿ ದಾಳಿಗಿಂತಲೂ ವೇಗವಾಗಿ ಏರುತ್ತಿದೆ ತರಕಾರಿ ಬೆಲೆ? ಇರಾನ್​ನಲ್ಲಿ ವಸ್ತುಗಳ ಬೆಲೆ ಕೇಳಿದ್ರೆ ಬೆಚ್ಚಿಬೀಳ್ತಿರಾ..? Iran Crisis

ಇರಾನ್‌ನ ಮಾರುಕಟ್ಟೆಯಲ್ಲಿ ಹಣದ ಚೀಲ ಹಿಡಿದು ಹೋದರೂ ಕೈಗೆ ಸಿಗುತ್ತಿರುವುದು ಮಾತ್ರ ಅತ್ಯಲ್ಪ ಪ್ರಮಾಣದ ಆಹಾರ. ಮಧ್ಯಮ ಮತ್ತು ಬಡ ವರ್ಗದ ಜನರ ಜೇಬಿಗೆ ಕತ್ತರಿ ಬಿದ್ದಿದ್ದು, ಅಗತ್ಯ ವಸ್ತುಗಳ ಬೆಲೆ ಹೀಗಿದೆ.

ಹಾಲು: ಒಂದು ಲೀಟರ್ ಹಾಲಿನ ಬೆಲೆ ಬರೋಬ್ಬರಿ 8.2 ಲಕ್ಷ ರಿಯಾಲ್ ತಲುಪಿದೆ. (ಭಾರತೀಯ ರೂಪಾಯಿಯಲ್ಲಿ ಸುಮಾರು ₹57).

ಬ್ರೆಡ್/ರೊಟ್ಟಿ: 500 ಗ್ರಾಂ ತೂಕದ ಒಂದು ಬ್ರೆಡ್ ಪ್ಯಾಕೆಟ್ ಬೆಲೆ 6.6 ಲಕ್ಷ ರಿಯಾಲ್ ದಾಟಿದೆ (ಭಾರತೀಯ ರೂಪಾಯಿಯಲ್ಲಿ ₹46).

ಅಕ್ಕಿ: ಒಂದು ಕೆಜಿ ಅಕ್ಕಿ ಖರೀದಿಸಲು ಜನ 32 ಲಕ್ಷ ರಿಯಾಲ್ ನೀಡಬೇಕಿದೆ (ಸುಮಾರು ₹224).

ಮೊಟ್ಟೆ: 12 ಮೊಟ್ಟೆಗಳ ಬೆಲೆ 14.54 ಲಕ್ಷ ರಿಯಾಲ್ ಆಗಿದೆ (ಸುಮಾರು ₹101).

ಚೀಸ್: ಒಂದು ಕೆಜಿ ಲೋಕಲ್ ಚೀಸ್ ಬೆಲೆ ಈಗ 52 ಲಕ್ಷ ರಿಯಾಲ್ (ಸುಮಾರು ₹361).

ಹಾಲು ಮತ್ತು ಬ್ರೆಡ್‌ನಂತಹ ಮೂಲಭೂತ ಆಹಾರಗಳ ಬೆಲೆಯೇ ಲಕ್ಷಗಳಲ್ಲಿರುವುದು ಅಲ್ಲಿನ ಜನಸಾಮಾನ್ಯರ ಬವಣೆಯನ್ನು ಎತ್ತಿ ತೋರಿಸುತ್ತಿದೆ.

ಇರಾನ್‌ನ ಕರೆನ್ಸಿ ರಿಯಾಲ್ ಎಷ್ಟು ದುರ್ಬಲವಾಗಿದೆ ಎಂದರೆ, ಮುಕ್ತ ಮಾರುಕಟ್ಟೆಯಲ್ಲಿ ಒಂದು ಅಮೆರಿಕನ್ ಡಾಲರ್ ಪಡೆಯಲು ಇರಾನಿಯನ್ನರು 13.50 ಲಕ್ಷ ರಿಯಾಲ್ ನೀಡಬೇಕಿದೆ. ಇನ್ನು ಭಾರತೀಯ ರೂಪಾಯಿಯೊಂದಿಗೆ ಹೋಲಿಸಿದರೆ, ನಮ್ಮ ಒಂದು ರೂಪಾಯಿ ಇರಾನ್‌ನ 14,000 ರಿಯಾಲ್‌ಗಿಂತಲೂ ಹೆಚ್ಚಿದೆ.

ಯುದ್ಧ ಆರಂಭವಾಗುವ ಮೊದಲೇ ಇರಾನ್ ಸರ್ಕಾರ ತನ್ನ ಕರೆನ್ಸಿಯಿಂದ ನಾಲ್ಕು ಶೂನ್ಯಗಳನ್ನು ತೆಗೆದುಹಾಕಲು ನಿರ್ಧರಿಸಿತ್ತು (ಅಂದರೆ 10,000 ರಿಯಾಲ್ ಈಗಿನ 1 ರಿಯಾಲ್‌ಗೆ ಸಮಾನ). ಆದರೆ, ಫೆಬ್ರವರಿ 28 ರ ದಾಳಿಯ ನಂತರ ಪರಿಸ್ಥಿತಿ ಕೈಮೀರಿ ಹೋಗಿದೆ.

ಅಂತರಾಷ್ಟ್ರೀಯ ಹಣಕಾಸು ನಿಧಿ (IMF) ವರದಿಯ ಪ್ರಕಾರ, ಇರಾನ್ ಆರ್ಥಿಕತೆಯು ಕೇವಲ ಶೇ. 0.6 ರಷ್ಟು ಮಾತ್ರ ಪ್ರಗತಿ ಕಾಣುವ ಸಾಧ್ಯತೆಯಿದೆ. ಅಂದರೆ ಆರ್ಥಿಕ ಸ್ಥಿತಿ ಸಂಪೂರ್ಣವಾಗಿ ಸ್ಥಗಿತಗೊಂಡಿದೆ ಎಂದೇ ಅರ್ಥವಾಗಿದೆ.

ಯುದ್ಧದಿಂದ ಮನೆ-ಮಠ ಕಳೆದುಕೊಂಡಿರುವ ಇರಾನ್ ನಾಗರಿಕರು ಈಗ ಹಸಿವಿನ ವಿರುದ್ಧವೂ ಹೋರಾಡುವಂತಾಗಿದೆ. ನಮಗೆ ಯುದ್ಧಕ್ಕಿಂತಲೂ ಹಸಿವು ದೊಡ್ಡ ಶತ್ರುವಾಗಿದೆ. ಮಕ್ಕಳಿಗೆ ಒಂದು ಗ್ಲಾಸ್ ಹಾಲು ನೀಡಲು ಸಾಧ್ಯವಾಗದ ಪರಿಸ್ಥಿತಿಯಲ್ಲಿದ್ದೇವೆ ಎಂದು ಟೆಹ್ರಾನ್‌ನ ಬೀದಿಗಳಲ್ಲಿ ಜನರು ಅಳಲು ತೋಡಿಕೊಳ್ಳುತ್ತಿದ್ದಾರೆ.

ದಕ್ಷಿಣ ಇರಾನ್‌ನ ಮಿನಾಬ್ ಶಾಲೆಯ ಮೇಲೆ ನಡೆದ ದಾಳಿಯ ನಂತರ ಉಂಟಾದ ಆತಂಕವು ಪೂರೈಕೆ ಸರಪಳಿಯನ್ನು ಕಡಿದು ಹಾಕಿದೆ. ಪರಿಣಾಮವಾಗಿ, ಕಾಳಸಂತೆಕೋರರು ವಸ್ತುಗಳನ್ನು ಅಡಗಿಸಿಟ್ಟು ಮತ್ತಷ್ಟು ಬೆಲೆ ಏರಿಸುತ್ತಿದ್ದಾರೆ ಎಂದು ವರದಿಯಾಗಿದೆ.

ಇರಾನ್ ಸರ್ಕಾರವು ತನ್ನ ಆರ್ಥಿಕತೆಯನ್ನು ಉಳಿಸಿಕೊಳ್ಳಲು ವಿದೇಶಿ ಬ್ಯಾಂಕುಗಳ ಮೊರೆ ಹೋಗುತ್ತಿದ್ದರೂ, ಅಮೆರಿಕ ಹೇರಿರುವ ಕಠಿಣ ನಿರ್ಬಂಧಗಳು ಸಹಾಯ ಹಸ್ತವನ್ನು ತಡೆಯುತ್ತಿವೆ. ಯುದ್ಧ ನಿಲ್ಲದಿದ್ದರೆ, ಇರಾನ್‌ನಲ್ಲಿ ಹಸಿವಿನಿಂದ ಸಾಯುವವರ ಸಂಖ್ಯೆ ಯುದ್ಧದಲ್ಲಿ ಸಾಯುವವರಿಗಿಂತ ಹೆಚ್ಚಾಗುವ ಆತಂಕವಿದೆ,(ಏಜೆನ್ಸೀಸ್).