14 ವರ್ಷಗಳ ಬಳಿಕ ಆಸೀಸ್ ನೆಲದಲ್ಲಿ ಇಂಗ್ಲೆಂಡ್‌ಗೆ ಜಯ; ಮೆಲ್ಬೋರ್ನ್‌ನಲ್ಲಿ ಇತಿಹಾಸ ಬರೆದ ಬೆನ್ ಸ್ಟೋಕ್ಸ್ ಪಡೆ! England wins

ಟಾಸ್ ಗೆದ್ದ ಮೊದಲು ಬೌಲಿಂಗ್ ಆಯ್ದುಕೊಂಡ ಇಂಗ್ಲೆಂಡ್​ಗೆ ಪಿಚ್ ವೇಗಿಗಳಿಗೆ ಸ್ವರ್ಗದಂತಿದ್ದ ಕಾರಣ, ಆಂಗ್ಲ ವೇಗಿ ಜೋಶ್ ಟಂಗ್ (5/45) ದಾಳಿಗೆ ತತ್ತರಿಸಿದ ಆಸ್ಟ್ರೇಲಿಯಾ ಕೇವಲ 152 ರನ್‌ಗಳಿಗೆ ಆಲೌಟ್ ಆಯಿತು. ಆದರೆ, ಇಂಗ್ಲೆಂಡ್‌ನ ಬ್ಯಾಟಿಂಗ್ ಕೂಡ ಕಳಪೆಯಾಗಿತ್ತು. ಆಸೀಸ್ ವೇಗಿಗಳಾದ ಮೈಕಲ್ ನೇಸರ್ ಮತ್ತು ಸ್ಕಾಟ್ ಬೋಲ್ಯಾಂಡ್ ದಾಳಿಗೆ ಸಿಲುಕಿ ಇಂಗ್ಲೆಂಡ್ ಕೇವಲ 110 ರನ್‌ಗಳಿಗೆ ತನ್ನೆಲ್ಲ ವಿಕೆಟ್ ಕಳೆದುಕೊಂಡಿತು. ಮೊದಲ ದಿನವೇ ದಾಖಲೆಯ 20 ವಿಕೆಟ್‌ಗಳು ಪತನಗೊಂಡವು.

42 ರನ್‌ಗಳ ಮುನ್ನಡೆಯೊಂದಿಗೆ ಎರಡನೇ ಇನಿಂಗ್ಸ್ ಆರಂಭಿಸಿದ ಆಸ್ಟ್ರೇಲಿಯಾ, ಇಂಗ್ಲೆಂಡ್‌ನ ಸಂಘಟಿತ ಬೌಲಿಂಗ್ ದಾಳಿಗೆ ಮತ್ತೆ ಮಣಿಯಿತು. ಟ್ರಾವಿಸ್ ಹೆಡ್ (46) ಹೊರತುಪಡಿಸಿ ಉಳಿದ ಬ್ಯಾಟರ್‌ಗಳು ವಿಫಲರಾದರು. ಆಂಗ್ಲರ ಪರ ಬ್ರೈಡನ್ ಕಾರ್ಸೆ (4/34) ಮತ್ತು ನಾಯಕ ಬೆನ್ ಸ್ಟೋಕ್ಸ್ (3/24) ಮೂಲಕ ಆಸೀಸ್ ಪಡೆಯನ್ನು 132 ರನ್‌ಗಳಿಗೆ ಕಟ್ಟಿಹಾಕಿದರು.

ಇದನ್ನೂ ಓದಿ: ನರೇಗಾ ಅಂತ್ಯಗೊಳಿಸುವುದು ಬಡವರ ಮೇಲಿನ ನೇರ ದಾಳಿ: ಮೋದಿ ಸರ್ಕಾರದ ವಿರುದ್ಧ ಮಲ್ಲಿಕಾರ್ಜುನ ಖರ್ಗೆ ವಾಗ್ದಾಳಿ | Mallikarjun Kharge

ಗೆಲುವಿಗೆ 175 ರನ್‌ಗಳ ಸಾಧಾರಣ ಗುರಿ ಪಡೆದ ಇಂಗ್ಲೆಂಡ್, ಆರಂಭದಲ್ಲಿ ಅಬ್ಬರಿಸಿತು. ಜಾಕ್ ಕ್ರಾಲಿ (37) ಮತ್ತು ಬೆನ್ ಡಕೆಟ್ (34) ಮೊದಲ ವಿಕೆಟ್‌ಗೆ 50 ರನ್ ಸೇರಿಸಿ ಭದ್ರ ಬುನಾದಿ ಹಾಕಿದರು. ಮಧ್ಯದಲ್ಲಿ ಕೆಲವು ವಿಕೆಟ್‌ಗಳು ಬಿದ್ದರೂ, ಯುವ ಆಟಗಾರ ಜಾಕೋಬ್ ಬೆಥೆಲ್ (40) ಮತ್ತು ಹ್ಯಾರಿ ಬ್ರೂಕ್ ಜವಾಬ್ದಾರಿಯುತ ಆಟವಾಡಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.

2011ರ ನಂತರ ಮೊದಲ ಬಾರಿಗೆ ಆಸ್ಟ್ರೇಲಿಯಾ ನೆಲದಲ್ಲಿ ಇಂಗ್ಲೆಂಡ್ ಟೆಸ್ಟ್ ಪಂದ್ಯವೊಂದನ್ನು ಗೆದ್ದಿದೆ. ಸತತ 15 ಟೆಸ್ಟ್ ಪಂದ್ಯಗಳಲ್ಲಿ ಗೆಲುವಿಲ್ಲದೆ ಪರದಾಡಿದ್ದ ಇಂಗ್ಲೆಂಡ್, ಕೊನೆಗೂ ಆಸೀಸ್ ಕೋಟೆಯನ್ನು ಭೇದಿಸುವಲ್ಲಿ ಯಶಸ್ವಿಯಾಗಿದೆ.

ಈ ಗೆಲುವು ಇಂಗ್ಲೆಂಡ್‌ಗೆ ಹೆಮ್ಮೆಯನ್ನು ಮರಳಿ ತಂದಿದ್ದು ಮಾತ್ರವಲ್ಲದೆ, WTC (ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್) ಪಾಯಿಂಟ್‌ಗಳ ಪಟ್ಟಿಯ ಮೇಲೆಯೂ ತೀವ್ರ ಪರಿಣಾಮ ಬೀರಿದೆ. ಈ ಸೋಲಿನೊಂದಿಗೆ ಆಸ್ಟ್ರೇಲಿಯಾವನ್ನು 3 ನೇ ಸ್ಥಾನಕ್ಕೆ ತಳ್ಳಿದೆ ಮತ್ತು ಭಾರತವು 2 ನೇ ಸ್ಥಾನಕ್ಕೆ ಏರಲು ಸಹಾಯ ಮಾಡಿದೆ.

ಈ ಸರಣಿಯ 5ನೇ ಮತ್ತು ಅಂತಿಮ ಟೆಸ್ಟ್ ಪಂದ್ಯವು ಜನವರಿ 4 ರಿಂದ ಸಿಡ್ನಿಯಲ್ಲಿ ಪ್ರಾರಂಭವಾಗಲಿದೆ. ಈ ಗೆಲುವು ಇಂಗ್ಲೆಂಡ್ ತಂಡದ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ.(ಏಜೆನ್ಸೀಸ್​).