ಅಮೆರಿಕ-ಇರಾನ್ ಶಾಂತಿ ಒಪ್ಪಂದದ ಎಫೆಕ್ಟ್: ಜಾಗತಿಕ ಮಾರುಕಟ್ಟೆಯಲ್ಲಿ ದಿಢೀರ್ ಕುಸಿದ ತೈಲ ಬೆಲೆ! ನಿರಾಳವಾದ ಇಂಧನ ವಲಯ! Oil Prices Drop

ಸಿಎನ್‌ಎನ್ ವರದಿಯ ಪ್ರಕಾರ, ಭಾನುವಾರ ಜಾಗತಿಕ ಮಾನದಂಡವಾದ ಬ್ರೆಂಟ್ ಕಚ್ಚಾ ತೈಲದ ಬೆಲೆ ಶೇ. 3.9 ರಷ್ಟು ಕುಸಿದು ಪ್ರತಿ ಬ್ಯಾರೆಲ್‌ಗೆ 84 ಡಾಲರ್‌ಗೆ ತಲುಪಿದೆ. ಇತ್ತ ಅಮೆರಿಕದ ಕಚ್ಚಾ ತೈಲದ ಬೆಲೆಯೂ ಶೇ. 4.8 ರಷ್ಟು ಭಾರಿ ಕುಸಿತ ಕಂಡು ಪ್ರತಿ ಬ್ಯಾರೆಲ್‌ಗೆ ಸುಮಾರು 81 ಡಾಲರ್‌ಗೆ ಬಂದು ನಿಂತಿದೆ. ಒಪ್ಪಂದದ ಸಣ್ಣ ಸುಳಿವು ಸಿಗುತ್ತಿದ್ದಂತೆ ಕಳೆದ ಶುಕ್ರವಾರವೇ ತೈಲ ಬೆಲೆಯಲ್ಲಿ ಶೇ. 3 ಕ್ಕೂ ಹೆಚ್ಚು ಕುಸಿತ ಕಂಡುಬಂದಿತ್ತು.

ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತಮ್ಮ 'ಟ್ರುತ್ ಸೋಷಿಯಲ್' ಜಾಲತಾಣದಲ್ಲಿ ಇರಾನ್ ಜೊತೆಗಿನ ಒಪ್ಪಂದ ಪೂರ್ಣಗೊಂಡಿದೆ ಎಂದು ಅಧಿಕೃತವಾಗಿ ಪ್ರಕಟಿಸಿದ ಕೆಲವೇ ಗಂಟೆಗಳಲ್ಲಿ ಮಾರುಕಟ್ಟೆಯಲ್ಲಿ ಈ ದೊಡ್ಡ ಬದಲಾವಣೆ ನಡೆದಿದೆ. ಇರಾನ್ ಬಂದರುಗಳ ಮೇಲಿನ ನೌಕಾ ದಿಗ್ಬಂಧನವನ್ನು ತಕ್ಷಣವೇ ಹಿಂಪಡೆಯಲು ಆದೇಶಿಸಿರುವ ಟ್ರಂಪ್, ವಿಶ್ವದ ಅತ್ಯಂತ ಪ್ರಮುಖ ಸಮುದ್ರ ಮಾರ್ಗವಾದ ಹೊರ್ಮುಜ್ ಜಲಸಂಧಿಯನ್ನು ಯಾವುದೇ ಶುಲ್ಕವಿಲ್ಲದೆ ಮುಕ್ತಗೊಳಿಸಲಾಗಿದೆ ಎಂದು ಸಾರಿದ್ದಾರೆ.

ಜಗತ್ತಿನ ಹಡಗುಗಳೇ, ನಿಮ್ಮ ಎಂಜಿನ್ ಸ್ಟಾರ್ಟ್ ಮಾಡಿ. ತೈಲ ಮುಕ್ತವಾಗಿ ಹರಿಯಲಿ ಎಂದು ಟ್ರಂಪ್ ಬರೆದಿದ್ದಾರೆ. ಮತ್ತೊಂದು ಪೋಸ್ಟ್‌ನಲ್ಲಿ ಅವರು, ಹಲವಾರು ಮಾಜಿ ಅಧ್ಯಕ್ಷರು ಇರಾನ್ ಜೊತೆ ಶಾಂತಿ ಒಪ್ಪಂದ ಮಾಡಿಕೊಳ್ಳಲು ಯತ್ನಿಸಿ ಸೋತಿದ್ದರು. ಆದರೆ ಮುಂಬರುವ ಶುಕ್ರವಾರದಿಂದ ಜಲಸಂಧಿ ಮುಕ್ತವಾಗಲಿದ್ದು, ಜಗತ್ತಿನಾದ್ಯಂತ ತೈಲ ಸರಬರಾಜು ಸುಗಮವಾಗಲಿದೆ ಎಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ. ಇತ್ತ ಇರಾನ್‌ನ ಉಪ ವಿದೇಶಾಂಗ ಸಚಿವರೂ ಸಹ ಒಪ್ಪಂದದ ಕರಡು ಅಂತಿಮಗೊಂಡಿರುವುದನ್ನು ಖಚಿತಪಡಿಸಿದ್ದಾರೆ.

ಕಳೆದ ಫೆಬ್ರವರಿ ಕೊನೆಯಲ್ಲಿ ಯುದ್ಧ ಆರಂಭವಾದಾಗಿನಿಂದ ಹೊರ್ಮುಜ್ ಜಲಸಂಧಿಯನ್ನು ಸಂಪೂರ್ಣವಾಗಿ ಮುಚ್ಚಲಾಗಿತ್ತು. ಇದರಿಂದಾಗಿ ಜಾಗತಿಕ ಹಡಗು ಸಾರಿಗೆ ವಲಯ ಭಾರಿ ನಷ್ಟ ಅನುಭವಿಸಿತ್ತು. ಇರಾನ್ ಸಂಸತ್ತಿನ ಸದಸ್ಯರೊಬ್ಬರ ಪ್ರಕಾರ, ಈ ಮಾರ್ಗದಲ್ಲಿ ಸಂಚರಿಸಲು ಇಚ್ಛಿಸುವ ಪ್ರತಿಯೊಂದು ವಾಣಿಜ್ಯ ಹಡಗಿನಿಂದ ಸರಾಸರಿ 20 ಲಕ್ಷ ಡಾಲರ್ (ಸುಮಾರು 16 ಕೋಟಿ ರೂಪಾಯಿ) ವರೆಗೆ ಭಾರಿ ಮೊತ್ತದ ಹಣವನ್ನು ವಸೂಲಿ ಮಾಡಲಾಗುತ್ತಿತ್ತು.

ಒಂದು ವೇಳೆ ಈ ಶಾಂತಿ ಒಪ್ಪಂದ ನಡೆಯದೇ ಹೋಗಿದ್ದರೆ ಜಾಗತಿಕವಾಗಿ ತೈಲ ಬೆಲೆ ಪ್ರತಿ ಬ್ಯಾರೆಲ್‌ಗೆ 150 ರಿಂದ 190 ಡಾಲರ್ ದಾಟುವ ಭೀತಿ ಇತ್ತು ಎಂದು 'ರಪಿಡಾನ್ ಎನರ್ಜಿ' ಸಂಸ್ಥೆಯ ಅಧ್ಯಕ್ಷ ಬಾಬ್ ಮೆಕ್‌ನಲ್ಲಿ ಆತಂಕ ವ್ಯಕ್ತಪಡಿಸಿದ್ದರು. ಹಾಗಾಗಿದ್ದರೆ ಅಮೆರಿಕದಲ್ಲೇ ಪೆಟ್ರೋಲ್ ಬೆಲೆ ಸಾರ್ವಕಾಲಿಕ ದಾಖಲೆಯಾಗಿ ಪ್ರತಿ ಗ್ಯಾಲನ್‌ಗೆ 5 ಡಾಲರ್ ತಲುಪುತ್ತಿತ್ತು. ಸದ್ಯ ಈ ಒಪ್ಪಂದದಿಂದಾಗಿ ಜಾಗತಿಕ ಇಂಧನ ಸರಬರಾಜು ಜಾಲದ ಮೇಲಿದ್ದ ಒತ್ತಡ ಸಂಪೂರ್ಣ ನಿವಾರಣೆಯಾದಂತಾಗಿದೆ.

ಮುಂಬರುವ ಶುಕ್ರವಾರ ಸ್ವಿಟ್ಜರ್ಲೆಂಡ್‌ನ ಜಿನೀವಾದಲ್ಲಿ ಈ ಐತಿಹಾಸಿಕ ತಿಳಿವಳಿಕೆ ಪತ್ರಕ್ಕೆ (MoU) ಅಧಿಕೃತವಾಗಿ ಸಹಿ ಹಾಕಲಾಗುವುದು. ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಈ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದು, ಅಧ್ಯಕ್ಷ ಟ್ರಂಪ್ ಕೂಡ ಉಪಸ್ಥಿತರಿರುವ ಸಾಧ್ಯತೆ ಇದೆ. ಇರಾನ್ ಪರವಾಗಿ ಆ ದೇಶದ ಮುಖ್ಯ ಸಂಧಾನಕಾರ ಜನರಲ್ ಮೊಹಮ್ಮದ್ ಬಾಘೆರ್ ಗಾಲಿಬಾಫ್ ಮತ್ತು ವಿದೇಶಾಂಗ ಸಚಿವ ಅಬ್ಬಾಸ್ ಅರಾಗ್ಚಿ ಜಿನೀವಾಗೆ ಪ್ರಯಾಣ ಬೆಳೆಸಲಿದ್ದಾರೆ.

ನ್ಯೂಯಾರ್ಕ್ ಟೈಮ್ಸ್' ಪತ್ರಿಕೆಯ ಪ್ರಕಾರ, ಇದು ನಡೆದರೆ 1979 ರ ಇಸ್ಲಾಮಿಕ್ ಕ್ರಾಂತಿ ಮತ್ತು ಅಮೆರಿಕ ರಾಯಭಾರ ಕಚೇರಿಯ ಒತ್ತೆಯಾಳು ಬಿಕ್ಕಟ್ಟಿನ ನಂತರ, ಅಂದರೆ ಕಳೆದ 47 ವರ್ಷಗಳ ಇತಿಹಾಸದಲ್ಲೇ ಅಮೆರಿಕ ಮತ್ತು ಇರಾನ್ ಸರ್ಕಾರಗಳ ನಡುವೆ ನಡೆಯುತ್ತಿರುವ ಅತ್ಯುನ್ನತ ಮಟ್ಟದ ನೇರ ಮಾತುಕತೆ ಇದಾಗಲಿದೆ.

ಪ್ರಸ್ತುತ ಸಹಿಯಾಗುತ್ತಿರುವುದು ಕೇವಲ ಪ್ರಾಥಮಿಕ ತಿಳಿವಳಿಕೆ ಪತ್ರವಾಗಿದ್ದು, ಮುಂದಿನ 60 ದಿನಗಳ ಕಾಲ ಉಭಯ ದೇಶಗಳ ನಡುವೆ ಇರಾನ್‌ನ ಪರಮಾಣು ಯೋಜನೆ ಹಾಗೂ ಆರ್ಥಿಕ ನಿರ್ಬಂಧಗಳ ತೆರವು ಕುರಿತು ಮತ್ತಷ್ಟು ಆಳವಾದ ಮಾತುಕತೆಗಳು ನಡೆಯಲಿವೆ. ಪರಸ್ಪರ ಸಾರ್ವಭೌಮತ್ವವನ್ನು ಗೌರವಿಸುವುದು ಮತ್ತು ಒಬ್ಬರ ಆಂತರಿಕ ವಿಷಯಗಳಲ್ಲಿ ಮತ್ತೊಬ್ಬರು ಹಸ್ತಕ್ಷೇಪ ಮಾಡದಿರಲು ಉಭಯ ದೇಶಗಳು ಸಮ್ಮತಿಸಿರುವುದು ಜಾಗತಿಕ ಶಾಂತಿಗೆ ಹೊಸ ಮುನ್ನುಡಿ ಬರೆದಿದೆ,(ಏಜೆನ್ಸೀಸ್​).