ಇರಾನ್ ಬೆನ್ನಿಗೆ ನಿಲ್ಲುತ್ತಾ ಡ್ರ್ಯಾಗನ್ ರಾಷ್ಟ್ರ? ಹೋರ್ಮುಜ್ ಬಂದ್‌ಗೆ ಯುಎಸ್​ ಕಾರಣ! ದೊಡ್ಡಣ್ಣನ ವಿರುದ್ಧ ಹರಿಹಾಯ್ದ ಚೀನಾ! ChinaVsUSA

ಈ ಬಗ್ಗೆ ಮಾತನಾಡಿದ ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರೆ ಮಾವೊ ನಿಂಗ್, ಸೇನಾ ಕಾರ್ಯಾಚರಣೆಗಳನ್ನು ತಕ್ಷಣವೇ ನಿಲ್ಲಿಸಿ. ಸಂಘರ್ಷದ ಉಲ್ಬಣವು ಯಾರಿಗೂ ಹಿತವಲ್ಲ ಎಂದು ಕರೆ ನೀಡಿದ್ದಾರೆ.

ಹೋರ್ಮುಜ್ ಜಲಸಂಧಿಯ ಬಿಕ್ಕಟ್ಟಿನ ಬಗ್ಗೆ ಟ್ರಂಪ್ ನೀಡಿದ್ದ ಹೇಳಿಕೆಗೆ ಚೀನಾ ಕಟುವಾಗಿ ಪ್ರತಿಕ್ರಿಯಿಸಿದೆ. ಟ್ರಂಪ್ ಅವರು ಜಲಸಂಧಿಯು ತನ್ನಷ್ಟಕ್ಕೆ ತಾನೇ ತೆರೆದುಕೊಳ್ಳುತ್ತದೆ ಎಂದು ಹೇಳಿದ್ದರು. ಆದರೆ, ಚೀನಾ ಇದನ್ನು ತಿರಸ್ಕರಿಸಿದ್ದು, ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ಆಕ್ರಮಣಕಾರಿ ದಾಳಿಗಳೇ ಈ ಜಲಮಾರ್ಗ ಬಂದ್ ಆಗಲು ಮೂಲ ಕಾರಣ ಎಂದು ನೇರವಾಗಿ ಹೊಣೆ ಮಾಡಿದೆ.

ಬುಧವಾರ ದೇಶವನ್ನುದ್ದೇಶಿಸಿ ಮಾತನಾಡಿದ್ದ ಅಧ್ಯಕ್ಷ ಟ್ರಂಪ್, ಮುಂದಿನ ಎರಡು ಮೂರು ವಾರಗಳಲ್ಲಿ ಇರಾನ್ ಮೇಲಿನ ದಾಳಿಯನ್ನು ಅಮೆರಿಕ ಸೇನೆಯು ಹತ್ತು ಪಟ್ಟು ಹೆಚ್ಚಿಸಲಿದೆ ಎಂದು ಘೋಷಿಸಿದ್ದರು. 

ಶಸ್ತ್ರಾಸ್ತ್ರ ಕಾರ್ಖಾನೆಗಳ ಧ್ವಂಸ: ಇರಾನ್‌ನ ಪ್ರತಿಯೊಂದು ಪ್ರಮುಖ ಶಸ್ತ್ರಾಸ್ತ್ರ ತಯಾರಿಕಾ ಘಟಕಗಳನ್ನು ನಾಶಪಡಿಸುವುದು.

ನೌಕಾ ಮತ್ತು ವಾಯುಪಡೆ ನಾಶ: ಇರಾನ್‌ನ ಸಮರ ನೌಕೆಗಳು ಮತ್ತು ಯುದ್ಧ ವಿಮಾನಗಳನ್ನು ಸಂಪೂರ್ಣವಾಗಿ ಹಳಿ ತಪ್ಪಿಸುವುದು.

ಅಣ್ವಸ್ತ್ರ ತಡೆ: ಇರಾನ್ ಯಾವುದೇ ಕಾರಣಕ್ಕೂ ಪರಮಾಣು ಶಸ್ತ್ರಾಸ್ತ್ರ ಹೊಂದದಂತೆ ಶಾಶ್ವತವಾಗಿ ತಡೆಯುವುದು.

ನಮ್ಮ ಗುರಿ ಇರಾನ್‌ನ ಆಡಳಿತ ಬದಲಾವಣೆಯಲ್ಲ, ಬದಲಿಗೆ ಅವರ ಮಾರಕ ಶಕ್ತಿಯನ್ನು ಕಿತ್ತುಹಾಕುವುದು ಎಂದು ಟ್ರಂಪ್ ಸ್ಪಷ್ಟಪಡಿಸಿದ್ದರು.

ತಮ್ಮ ಭಾಷಣದಲ್ಲಿ ಟ್ರಂಪ್ ಅವರು ಮಧ್ಯಪ್ರಾಚ್ಯದ ಮಿತ್ರರಾಷ್ಟ್ರಗಳಾದ ಇಸ್ರೇಲ್, ಸೌದಿ ಅರೇಬಿಯಾ, ಕತಾರ್, ಯುಎಇ, ಕುವೈತ್ ಮತ್ತು ಬಹ್ರೇನ್ ರಾಷ್ಟ್ರಗಳಿಗೆ ಧನ್ಯವಾದ ಅರ್ಪಿಸಿದ್ದಾರೆ. ಈ ಯುದ್ಧದ ಕಾರಣದಿಂದಾಗಿ ಈ ಯಾವುದೇ ಮಿತ್ರರಾಷ್ಟ್ರಗಳಿಗೆ ತೊಂದರೆಯಾಗಲು ಅಥವಾ ಅವರು ಸೋಲಲು ಅಮೆರಿಕ ಬಿಡುವುದಿಲ್ಲ ಎಂದು ಅವರು ಭರವಸೆ ನೀಡಿದ್ದಾರೆ. ನಾವು ನಿಮ್ಮ ಬೆನ್ನಿಗೆ ಕಲ್ಲಿನಂತೆ ನಿಲ್ಲುತ್ತೇವೆ ಎಂದು ಹೇಳುವ ಮೂಲಕ ಅರಬ್ ರಾಷ್ಟ್ರಗಳ ವಿಶ್ವಾಸ ಗಳಿಸಲು ಟ್ರಂಪ್ ಪ್ರಯತ್ನಿಸಿದ್ದಾರೆ.

ಅಮೆರಿಕದ 'ಎಪಿಕ್ ಫ್ಯೂರಿ' ಕಾರ್ಯಾಚರಣೆ ಮತ್ತು ಅದಕ್ಕೆ ಚೀನಾದ ರಾಜತಾಂತ್ರಿಕ ವಿರೋಧವು ಜಗತ್ತನ್ನು ಎರಡು ಬಣಗಳನ್ನಾಗಿ ವಿಂಗಡಿಸುತ್ತಿದೆ. ಒಂದೆಡೆ ಅಮೆರಿಕ ತನ್ನ ಮಿತ್ರರೊಂದಿಗೆ ಇರಾನ್ ಅನ್ನು ಅಣಗಿಸಲು ಮುಂದಾಗಿದ್ದರೆ, ಇನ್ನೊಂದೆಡೆ ಚೀನಾ ಅಮೆರಿಕದ ನಡೆಯನ್ನು ಖಂಡಿಸುತ್ತಿದೆ. ಹೋರ್ಮುಜ್ ಜಲಸಂಧಿಯು ಶೀಘ್ರವೇ ತೆರೆಯದಿದ್ದರೆ ಜಾಗತಿಕ ಆರ್ಥಿಕತೆ ಕುಸಿಯುವ ಭೀತಿ ಎದುರಾಗಿದೆ.

ಟ್ರಂಪ್ ಅವರ 21 ದಿನಗಳ ಡೆಡ್‌ಲೈನ್ ಮುಗಿಯುವ ವೇಳೆಗೆ ಇರಾನ್‌ನ ಸ್ಥಿತಿ ಏನಾಗಲಿದೆ ಮತ್ತು ಚೀನಾ ಈ ಸಂಘರ್ಷದಲ್ಲಿ ಸಕ್ರಿಯವಾಗಿ ಭಾಗವಹಿಸಲಿದೆಯೇ ಎಂಬುದು ಈಗ ಇಡೀ ಜಗತ್ತಿನ ಕುತೂಹಲವಾಗಿದೆ,(ಏಜೆನ್ಸೀಸ್).