Hormuz Tolls: ಇರಾನ್ ಜೊತೆ 'ಜಂಟಿ ಉದ್ಯಮ'ಕ್ಕೆ ಅಮೆರಿಕ ಒಲವು; ಏನಿದು 'ಬ್ಯೂಟಿಫುಲ್' ಡೀಲ್?

ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಟ್ರಂಪ್, ಹಾರ್ಮುಜ್ ಜಲಸಂಧಿಯಲ್ಲಿ ಸುಂಕ ವಿಧಿಸುವ ಮೂಲಕ ಆ ಪ್ರದೇಶವನ್ನು ಸುರಕ್ಷಿತವಾಗಿರಿಸಬಹುದು ಎಂದು ಪ್ರತಿಪಾದಿಸಿದರು. "ನಾವು ಇದನ್ನು ಇರಾನ್ ಜೊತೆಗಿನ ಜಂಟಿ ಉದ್ಯಮವಾಗಿ ಮಾಡಲು ಯೋಚಿಸುತ್ತಿದ್ದೇವೆ. ಇದು ಜಲಸಂಧಿಯನ್ನು ಇತರರಿಂದ ರಕ್ಷಿಸಲು ಮತ್ತು ಭದ್ರತೆ ಒದಗಿಸಲು ಇರುವ ಅತ್ಯುತ್ತಮ ದಾರಿ. ಇದು ನಿಜಕ್ಕೂ ಒಂದು ಸುಂದರವಾದ ವಿಷಯ (Beautiful thing)" ಎಂದು ಟ್ರಂಪ್ ವರ್ಣಿಸಿದ್ದಾರೆ.

ಹಾರ್ಮುಜ್ ಜಲಸಂಧಿಯು ಪರ್ಷಿಯನ್ ಕೊಲ್ಲಿಯನ್ನು ಹಿಂದೂ ಮಹಾಸಾಗರಕ್ಕೆ ಸಂಪರ್ಕಿಸುವ ಪ್ರಮುಖ ಮಾರ್ಗವಾಗಿದೆ.ಪ್ರತಿದಿನ ಸರಾಸರಿ 120 ಹಡಗುಗಳು ಇಲ್ಲಿ ಸಂಚರಿಸುತ್ತವೆ ಎಂದು 'ಲಾಯ್ಡ್ಸ್ ಲಿಸ್ಟ್' ವರದಿ ಮಾಡಿದೆ. ಇರಾನ್ ಈಗಾಗಲೇ ಕೆಲವು ಹಡಗುಗಳಿಂದ 2 ಮಿಲಿಯನ್ ಡಾಲರ್ (ಸುಮಾರು 16 ಕೋಟಿ ರೂ.) ಸುಂಕ ವಸೂಲಿ ಮಾಡುತ್ತಿದೆ ಎಂಬ ಸುದ್ದಿಗಳಿವೆ. ಒಂದು ವೇಳೆ ಅಮೆರಿಕ ಇದೇ ಮಾದರಿಯ ಸುಂಕ ವಿಧಿಸಿದರೆ, ದಿನವೊಂದಕ್ಕೆ ಅಮೆರಿಕಕ್ಕೆ ಅಂದಾಜು 240 ಮಿಲಿಯನ್ ಡಾಲರ್ (ಸುಮಾರು 2,000 ಕೋಟಿ ರೂ.) ಆದಾಯ ಹರಿದುಬರಲಿದೆ!

ಇರಾನ್‌ನ ಡ್ರೋನ್ ಮತ್ತು ಮಿಸೈಲ್ ದಾಳಿಗಳು ಮುಂದುವರಿದಿದ್ದರೂ, ತಾವು ಯುದ್ಧದಲ್ಲಿ ಜಯಶಾಲಿಯಾಗಿದ್ದೇವೆ ಎಂದು ಟ್ರಂಪ್ ಘೋಷಿಸಿಕೊಂಡಿದ್ದಾರೆ. "ನಾವು ವಿಜೇತರು. ಇರಾನ್ ಸೇನಾತ್ಮಕವಾಗಿ ಸೋತಿದೆ. ಅವರ ಬಳಿ ಈಗ ಕೇವಲ ಮಾನಸಿಕ ತಂತ್ರಗಳು ಮಾತ್ರ ಬಾಕಿ ಇವೆ. ನೀರಿನಲ್ಲಿ ಒಂದೆರಡು ಮೈನ್‌ಗಳನ್ನು ಹಾಕಿ ಬೆದರಿಸುವುದನ್ನು ಬಿಟ್ಟರೆ ಅವರಿಗೆ ಬೇರೇನೂ ಮಾಡಲು ಸಾಧ್ಯವಿಲ್ಲ" ಎಂದು ಅವರು ವ್ಯಂಗ್ಯವಾಡಿದ್ದಾರೆ.

ಒಂದು ವೇಳೆ ಟ್ರಂಪ್ ಅವರ ಈ ಟೋಲ್ ಪ್ಲಾನ್ ಜಾರಿಗೆ ಬಂದರೆ, ಹಾರ್ಮುಜ್ ಜಲಸಂಧಿಯ ಮೇಲೆ ಅಮೆರಿಕದ ಸೇನೆ ನೇರ ನಿಯಂತ್ರಣ ಸಾಧಿಸಬೇಕಾಗುತ್ತದೆ. ಇದು ಓಮನ್ ಮತ್ತು ಇರಾನ್‌ನ ಪ್ರಾದೇಶಿಕ ಸಮುದ್ರ ವ್ಯಾಪ್ತಿಗೆ ಬರುವುದರಿಂದ ಭವಿಷ್ಯದಲ್ಲಿ ಮತ್ತೆ ಕಾನೂನಾತ್ಮಕ ಮತ್ತು ರಾಜತಾಂತ್ರಿಕ ಸಂಘರ್ಷಗಳಿಗೆ ದಾರಿ ಮಾಡಿಕೊಡುವ ಸಾಧ್ಯತೆ ಇದೆ,(ಏಜೆನ್ಸೀಸ್​​).