ಬಿಳಿ ಚರ್ಮ, ಐಕಾನಿಕ್ ಹೇರ್‌ಸ್ಟೈಲ್!... ಬಾಂಗ್ಲಾದ ಫಾರ್ಮ್‌ನಲ್ಲಿ ಅಮೆರಿಕ ಅಧ್ಯಕ್ಷರನ್ನೇ ಹೋಲುವ ಎಮ್ಮೆ ಪತ್ತೆ; ವಿಡಿಯೋ ವೈರಲ್​ | Donald Trump Buffalo

ದಿ ಇಂಡಿಪೆಂಡೆಂಟ್ ವರದಿಯ ಪ್ರಕಾರ, ಸುಮಾರು 700 ಕೆಜಿ ತೂಕವಿರುವ ಒಂದು ಎಮ್ಮೆಗೆ ಡೊನಾಲ್ಡ್ ಟ್ರಂಪ್ ಎಂದು ಹೆಸರಿಡಲಾಗಿದೆ. ಇದರ ಬಿಳಿ ಚರ್ಮ ಮತ್ತು ತಿಳಿ ಬಣ್ಣದ ಕೂದಲು ಅಮೆರಿಕ ಅಧ್ಯಕ್ಷರ ಐಕಾನಿಕ್ ಹೇರ್‌ಸ್ಟೈಲ್ ಅನ್ನು ನೆನಪಿಸುತ್ತದೆ ಎಂದು ಭೇಟಿ ನೀಡುವ ಪ್ರವಾಸಿಗರು ಹೇಳುತ್ತಿದ್ದಾರೆ. ಬಾಂಗ್ಲಾದೇಶದ ಪ್ರಥಮ್ ಅಲೋ ಪತ್ರಿಕೆಯೊಂದಿಗೆ ಮಾತನಾಡಿದ ಸಂದರ್ಶಕರೊಬ್ಬರು, ಈ ಎಮ್ಮೆ ನೋಡಲು ಟ್ರಂಪ್ ತರಹವೇ ಇದ್ದರೂ, ಇದರ ಸ್ವಭಾವ ಮಾತ್ರ ತುಂಬಾ ಶಾಂತ ಮತ್ತು ಸೌಮ್ಯವಾಗಿದೆ ಎಂದು ತಮಾಷೆ ಮಾಡಿದ್ದಾರೆ.

ಎಮ್ಮೆಯ ಮಾಲೀಕ ಜಿಯಾವುದ್ದೀನ್ ಮೃಧಾ ಸ್ಥಳೀಯ ಮಾಧ್ಯಮ ದಿ ಬಿಸಿನೆಸ್ ಸ್ಟ್ಯಾಂಡರ್ಡ್ ಜೊತೆ ಮಾತನಾಡಿದ್ದು, ಈ ಎಮ್ಮೆಯ ವಿಭಿನ್ನ ರೂಪವನ್ನು ನೋಡಿ ತಮ್ಮ ಕಿರಿಯ ಸಹೋದರ ಈ ಹೆಸರನ್ನು ಇಟ್ಟಿದ್ದಾಗಿ ತಿಳಿಸಿದ್ದಾರೆ. ಅಲ್ಲದೆ, ಇಂತಹ ಅಲ್ಬಿನೋ (ಬಿಳಿ) ಎಮ್ಮೆಗಳು ಕೆಣಕದ ಹೊರತು ಸಾಮಾನ್ಯವಾಗಿ ಶಾಂತವಾಗಿರುತ್ತವೆ ಎಂದು ಹೇಳಿದ್ದಾರೆ. ಹಬ್ಬದ ಹಿನ್ನೆಲೆಯಲ್ಲಿ ಈ ಎಮ್ಮೆ ಈಗಾಗಲೇ ಮಾರಾಟವಾಗಿದೆ ಎಂದು ವರದಿಗಳು ಉಲ್ಲೇಖಿಸಿವೆ.