ಆಪರೇಷನ್ ಸಿಂಧೂರ ವೇಳೆ ನಿಜಕ್ಕೂ ಆಗಿದ್ದೇನು..? ಪಾಕಿಸ್ತಾನದ ಕಿರಾನಾ ಹಿಲ್ಸ್ ಮೇಲಿನ ದಾಳಿಯ ರಹಸ್ಯ ಬಿಚ್ಚಿಟ್ಟ ಮಾಜಿ ಸಿಡಿಎಸ್!​ | Anil Chauhan

ನವದೆಹಲಿಯ ವಿವೇಕಾನಂದ ಕೇಂದ್ರದಲ್ಲಿ ಮಾತನಾಡಿದ ಜನರಲ್ ಅನಿಲ್ ಚೌಹಾಣ್, ನಾವು ಕಿರಾನಾ ಹಿಲ್ಸ್ ಅನ್ನು ಗುರಿಯಾಗಿಸಿಕೊಂಡಿಲ್ಲ ಎಂದು ಭಾರ್ತಿ (ಎ ಕೆ ಭಾರ್ತಿ) ಸ್ಪಷ್ಟಪಡಿಸಿದ್ದರು ಎಂದರು.

ಭಾರತದ ಲೋಟರಿಂಗ್ ಮ್ಯುನಿಷನ್ (ಅಂದರೆ ಇಸ್ರೇಲ್ ನಿರ್ಮಿತ ಹ್ಯಾರೋಪ್ ಡ್ರೋನ್) ಪಾಕಿಸ್ತಾನದ ರಾಡಾರ್‌ಗಳನ್ನು ಹುಡುಕಿ ನಾಶಮಾಡಲು ತೆರಳಿತ್ತು. ಆದರೆ, ನಿಗದಿತ ಸಮಯದೊಳಗೆ ಗುರಿ ಸಿಗದ ಕಾರಣ ಮತ್ತು ಇಂಧನ ಖಾಲಿಯಾದ ಹಿನ್ನೆಲೆಯಲ್ಲಿ, ಅದು ಕಿರಾನಾ ಹಿಲ್ಸ್ ಗುಡ್ಡಗಳ ಮೇಲೆ ಬಿದ್ದು ಆಕಸ್ಮಿಕವಾಗಿ ಸ್ಫೋಟಗೊಂಡಿತೇ ಹೊರತು, ಅಲ್ಲಿನ ಪರಮಾಣು ಕೇಂದ್ರದ ಮೇಲೆ ಯಾವುದೇ ಉದ್ದೇಶಪೂರ್ವಕ ದಾಳಿ ನಡೆಸಿರಲಿಲ್ಲ ಎಂದು ಚೌಹಾಣ್ ಅವರು ತಿಳಿಸಿದ್ದಾರೆ.

ನಾನು ವಿವರಣೆ ನೀಡಬಲ್ಲೆ ಎಂದ ಜನರಲ್ ಚೌಹಾಣ್, ಆ ದಾಳಿಗಳಿಗೂ ಮುನ್ನ, ನಾವು ಸರ್ಗೋಧಾ ಮತ್ತು ಸರ್ಗೋಧಾದಿಂದ 10 ಕಿ.ಮೀ ಉತ್ತರಕ್ಕೆ ಇರುವ ಕಿರಾನಾ ಹಿಲ್ಸ್ ಕಡೆಗೆ ಸಾಕಷ್ಟು ಲೋಟರ್ ಮ್ಯುನಿಷನ್‌ಗಳನ್ನು ಕಳುಹಿಸಿದ್ದೇವೆ. ಹೀಗಾಗಿ ಲೋಟರ್ ಮ್ಯುನಿಷನ್ ಸರ್ಗೋಧಾ ಸುತ್ತಮುತ್ತಲಿದ್ದ ರಾಡಾರ್‌ಗಳಿಗಾಗಿ ಹುಡುಕಾಟ ನಡೆಸುತ್ತಿತ್ತು ಮತ್ತು ಅದಕ್ಕೊಂದು ಜೀವಿತಾವಧಿ ಇರುತ್ತದೆ. ಅದು ಸುಮಾರು ಎರಡು ಗಂಟೆಗಳ ಕಾಲ ತಿರುಗಾಡುತ್ತದೆ ಮತ್ತು ಅದಕ್ಕೆ ಗುರಿ ಸಿಗದಿದ್ದರೆ, ಅದು ಬಂದು ಎಲ್ಲಾದರೂ ಅಪ್ಪಳಿಸುತ್ತದೆ. ಅದು ಬಂದು ಆ ಗುಡ್ಡಗಳಲ್ಲಿ ಒಂದಕ್ಕೆ ಅಪ್ಪಳಿಸಿರಬೇಕು ಎಂದು ಹೇಳಿದರು.

ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದಲ್ಲಿರುವ ಸ್ಕಾರ್ಡು ಮೇಲೆ ದಾಳಿ ಮಾಡಲು ಭಾರತೀಯ ವಾಯುಪಡೆಗೆ ಅನುಮತಿ ನೀಡಲಾಗಿತ್ತು ಎಂಬುದನ್ನು ಜನರಲ್ ದೃಢಪಡಿಸಿದರು, ಆದರೆ ಪ್ರತಿಕೂಲ ಹವಾಮಾನದಿಂದಾಗಿ ಆ ಕಾರ್ಯಾಚರಣೆಯನ್ನು ಕೈಬಿಡಲಾಯಿತು. ಸರ್ಗೋಧಾ ಮೇಲೆ ದಾಳಿ ಮಾಡಬೇಕೆ ಎಂದು ಮುಖ್ಯಸ್ಥರು ನನ್ನನ್ನು ಕೇಳಿದ್ದರು. ನಾನು ಮುಂದುವರಿಯಿರಿ ಎಂದು ಹೇಳಿ, ದಯವಿಟ್ಟು ಇನ್ನೂ ಎರಡು ಗುರಿಗಳನ್ನು ಗುರುತಿಸಿ ಎಂದು ತಿಳಿಸಿದೆ. ಅವರು ಗುರುತಿಸಿದ್ದ ಗುರಿಗಳಲ್ಲಿ ಸ್ಕಾರ್ಡು ಕೂಡ ಒಂದಾಗಿತ್ತು. ಆದರೆ ಸ್ವಲ್ಪ ಸಮಯದ ನಂತರ ಸ್ಕಾರ್ಡುವಿನಲ್ಲಿ ಹವಾಮಾನವು ಹದಗೆಟ್ಟಿತು, ಮತ್ತು ಅವರು ಭೋಲಾರಿಗೆ ಬದಲಾಯಿಸಬೇಕಾಯಿತು ಎಂದು ಜನರಲ್ ಚೌಹಾಣ್ ತಿಳಿಸಿದರು.

ಪಾಕಿಸ್ತಾನದ ದಾಳಿಗಳು ನಿಜಕ್ಕೂ ಯಶಸ್ವಿಯಾಗಿದ್ದವೋ ಇಲ್ಲವೋ ಎಂಬುದು ಸ್ವತಃ ಪಾಕಿಸ್ತಾನಕ್ಕೇ ಗೊತ್ತಿರಲಿಲ್ಲ ಎಂದು ಜನರಲ್ ಚೌಹಾಣ್ ತಿಳಿಸಿದರು. ತಮ್ಮ ದಾಳಿಯಿಂದ ಎಲ್ಲಿಯಾದರೂ ಹಾನಿಯಾಗಿದೆಯಾ ಎಂಬುದಕ್ಕೆ ಸಾಕ್ಷಿ ಹುಡುಕಲು ಪಾಕಿಸ್ತಾನವು ಮೇ 10 ರಿಂದ ಮೇ 12 ರವರೆಗೆ ಉಪಗ್ರಹದ ಫೋಟೋಗಳನ್ನು ಪಡೆಯಲು ಹತಾಶೆಯಿಂದ ತುಂಬಾ ಪ್ರಯತ್ನಪಟ್ಟಿತ್ತು ಎಂದು ಅವರು ಹೇಳಿದರು.

ಅಮೆರಿಕ ಮತ್ತು ಚೀನಾ ಕಂಪನಿಗಳೆರಡರಿಂದಲೂ ವಾಣಿಜ್ಯ ಉಪಗ್ರಹ ಚಿತ್ರಗಳು ಲಭ್ಯವಿದ್ದರೂ, ಪಾಕಿಸ್ತಾನವು ತನ್ನ ದಾಳಿಗಳು ಗುರಿಯನ್ನು ತಲುಪಿವೆ ಎಂಬುದಕ್ಕೆ ಸಾಕ್ಷಿ ಹುಡುಕಲು ಮಾಡಿದ ಎಲ್ಲ ಪ್ರಯತ್ನಗಳೂ ವಿಫಲವಾದವು. ಪಾಕಿಸ್ತಾನವು ಚೀನಾದ ವಿವಿಧ ಉಪಗ್ರಹ ಮೂಲಗಳನ್ನೂ ಬಳಸಿಕೊಂಡು ನೋಡಿತು, ಆದರೆ ತನ್ನ ದಾಳಿಗಳು ಯಶಸ್ವಿಯಾಗಿವೆ ಎಂಬುದಕ್ಕೆ ಯಾವುದೇ ಸಾಕ್ಷ್ಯ ಸಿಗಲಿಲ್ಲ. ಏಕೆಂದರೆ, ಪಾಕಿಸ್ತಾನದ ಯಾವೊಂದು ದಾಳಿಯೂ ಸರಿಯಾದ ಗುರಿಯನ್ನು ತಲುಪಿರಲಿಲ್ಲ ಎಂದು ಚೌಹಾಣ್ ಸ್ಪಷ್ಟಪಡಿಸಿದರು.

ಆಪರೇಷನ್ ಸಿಂಧೂರ ಕಾರ್ಯಾಚರಣೆ ಯಶಸ್ಸಿಗೆ ಕಾರಣಗಳನ್ನು ವಿವರಿಸುತ್ತಾ ಜನರಲ್ ಚೌಹಾಣ್ ಪ್ರಮುಖ ಅಂಶಗಳನ್ನು ತಿಳಿಸಿದ್ದಾರೆ. ಭಾರತೀಯ ಸೇನೆ, ನೌಕಾಪಡೆ ಮತ್ತು ವಾಯುಪಡೆಯ ನಡುವಿನ ಅತ್ಯುತ್ತಮ ಸಮನ್ವಯ, ರಣರಂಗದ ಸ್ಪಷ್ಟ ಮಾಹಿತಿ ಮತ್ತು ಮೂರೂ ಪಡೆಗಳ ಉತ್ತಮ ನೆಟ್‌ವರ್ಕ್ ವ್ಯವಸ್ಥೆಯಿಂದಾಗಿ ಭಾರತಕ್ಕೆ ಸಂಪೂರ್ಣ ಮೇಲುಗೈ ಸಿಕ್ಕಿತು. ಈ ಬಾರಿ ಮೂರೂ ಪಡೆಗಳು ಮೊದಲ ದಿನದಿಂದಲೂ ಒಮ್ಮತದಿಂದ ಏಕೀಕೃತ ಯೋಜನೆಯಲ್ಲಿ ಕೆಲಸ ಮಾಡಿದವು. ಜೊತೆಗೆ, ರಾಜಕೀಯ ನಾಯಕತ್ವದಿಂದ ಸಿಕ್ಕ ಸ್ಪಷ್ಟ ನಿರ್ದೇಶನಗಳು ಮತ್ತು ಕಾರ್ಯಾಚರಣೆಗೆ ನೀಡಿದ ಮುಕ್ತ ಸ್ವಾತಂತ್ರ್ಯವೇ ಈ ಐತಿಹಾಸಿಕ ವಿಜಯಕ್ಕೆ ಪ್ರಮುಖ ಕಾರಣ ಎಂದು ಅವರು ಹೇಳಿದರು(ಏಜೆನ್ಸೀಸ್​).