"ಮನೆ ಬಾಗಿಲಿಗೇ ಬಂತು ಯುದ್ಧದ ಬಿಸಿ!"
ರೆಜೈ ತಮ್ಮ ಪೋಸ್ಟ್‌ನಲ್ಲಿ, "ನಮ್ಮ ಜತೆ ಯುದ್ಧಕ್ಕೆ ಬಂದಿದ್ದ ಟ್ರಂಪ್ಗೆ ಇರಾನಿಯನ್ನರು ಯುದ್ಧಭೂಮಿಯಲ್ಲಿ ಹಾಗೂ ಹೊರ್ಮುಜ್ ಜಲಸಂಧಿಯಲ್ಲಿ ಸೋಲುಣಿಸಿದ್ದಾರೆ. ಅತ್ತ ವಾಷಿಂಗ್ಟನ್ ರಾಜಕೀಯದಲ್ಲೂ ಅವರಿಗೆ ಹಿನ್ನಡೆಯಾಗಿದೆ. ಆದರೆ ನಮ್ಮೊಂದಿಗಿನ ಯುದ್ಧದ ದುಬಾರಿ ಬಿಲ್ ಕಟ್ಟಿ ಕೈಸುಟ್ಟುಕೊಂಡಿದ್ದು ಮಾತ್ರ ಅಮೆರಿಕದ ಸಾಮಾನ್ಯ ಜನರು" ಎಂದು ಬರೆದುಕೊಂಡಿದ್ದಾರೆ.
ಅಷ್ಟಕ್ಕೇ ನಿಲ್ಲದ ಅವರು, "ಇರಾನ್ ವಿರುದ್ಧ ಯುದ್ಧಕ್ಕೆ ಇಳಿಯುವ ಯಾವುದೇ ದೇಶವಾಗಲಿ, ಕೇವಲ ರಣರಂಗದಲ್ಲಷ್ಟೇ ಅಲ್ಲ, ತಮ್ಮ ಸ್ವಂತ ಮನೆ ಬಾಗಿಲಿಗೆ ಬಂದು ಮುಟ್ಟುವ ನಷ್ಟಕ್ಕೂ ಬೆಲೆ ತೆರಬೇಕಾಗುತ್ತದೆ" ಎಂದು ಖಡಕ್ ಎಚ್ಚರಿಕೆ ನೀಡಿದ್ದಾರೆ.
ಟ್ರಂಪ್ ಸೋಲಿಗೆ ಕಾರಣವಾಯ್ತಾ ಇರಾನ್ ಸಂಘರ್ಷ?
ಅಮೆರಿಕ ಚುನಾವಣೆಯಲ್ಲಿ ರಿಪಬ್ಲಿಕನ್ನರ ಹಿನ್ನಡೆಗೆ ಇರಾನ್ ಯುದ್ಧವೇ ಪ್ರಮುಖ ಕಾರಣ ಎಂಬ ಮಾತುಗಳು ಬಲವಾಗಿ ಕೇಳಿಬರುತ್ತಿವೆ. ಕಳೆದ ಎಂಟು ತಿಂಗಳ ಹಿಂದೆ ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಜಂಟಿ ದಾಳಿಯ ನಂತರ ಮಧ್ಯಪ್ರಾಚ್ಯದಲ್ಲಿ ಪರಿಸ್ಥಿತಿ ಉದ್ವಿಗ್ನಗೊಂಡಿತ್ತು. ವಿಶ್ವದ ಪ್ರಮುಖ ತೈಲ ಮಾರ್ಗವಾದ ಹೊರ್ಮುಜ್ ಜಲಸಂಧಿಯ ಮೇಲೆ ಇರಾನ್ ಹೇರಿದ ನಿರ್ಬಂಧಗಳು ಇಡೀ ಜಾಗತಿಕ ಮಾರುಕಟ್ಟೆಯನ್ನು ತಲ್ಲಳಗೊಳಿಸಿದ್ದವು.
ಇದರ ನೇರ ಪರಿಣಾಮ ಅಮೆರಿಕದ ಜನಸಾಮಾನ್ಯರ ಮೇಲೆ ಬಿತ್ತು. ಪೆಟ್ರೋಲ್-ಡೀಸೆಲ್ ದರಗಳು ಗಗನಕ್ಕೇರಿ, ಅಗತ್ಯ ವಸ್ತುಗಳ ಬೆಲೆ ಏರಿಕೆಯಾಗಿ ಜೀವನ ವೆಚ್ಚ ವಿಪರೀತ ಹೆಚ್ಚಾಯಿತು. ಚುನಾವಣೆಯಲ್ಲಿ ಮತದಾರರು ಆಡಳಿತಾರೂಢ ರಿಪಬ್ಲಿಕನ್ ಪಕ್ಷದ ವಿರುದ್ಧ ಮತ ಚಲಾಯಿಸಲು ಈ ಹಣದುಬ್ಬರವೇ ಮುಖ್ಯ ಅಸ್ತ್ರವಾಯಿತು ಎನ್ನಲಾಗುತ್ತಿದೆ.
