ಸಬ್‌ವೇ ಹಳಿಯ ಮೇಲೆ ನಗುತ್ತಾ ಕುಳಿತಿದ್ದ ಜೋಡಿ; ಕ್ಷಣದಲ್ಲೇ ರೈಲು ಹರಿದು ದುರಂತ! ಭಾರತೀಯ ಯುವತಿ ಸೇರಿ ಇಬ್ಬರು ಸಾವು Subway Tragedy

ನ್ಯೂಯಾರ್ಕ್​: ಸಬ್​​ ವೇ ಟ್ರ್ಯಾಕ್ (Subway Tragedy)​ ಮೇಲೆ ಕುಳಿತಿದ್ದ ಭಾರತ ಮೂಲದ ಯುವತಿ ಹಾಗೂ ಆಕೆಯ ನೇಪಾಳಿ-ಅಮೆರಿಕನ್​ ಮೂಲದ ಗೆಳೆಯನ ಮೇಲೆ ರೈಲು ಹರಿದ ಪರಿಣಾಮ ಇಬ್ಬರು ಸ್ಥಳದಲ್ಲೇ ಮೃತಪಟ್ಟಿರುವುದಾಗಿ ನ್ಯೂಯಾರ್ಕ್​ ಮಾಧ್ಯಮಗಳು ವರದಿ ಮಾಡಿವೆ. 

ವರದಿ ಪ್ರಕಾರ, ಈ ಘಟನೆಯು ಲೋವರ್ ಮ್ಯಾನ್‌ಹ್ಯಾಟನ್ ಸಬ್​ ವೇ ನಿಲ್ದಾಣದಲ್ಲಿ ನಡೆದಿದ್ದು, ಮೃತ ದುರ್ದೈವಿಗಳನ್ನು ನ್ಯೂಜೆರ್ಸಿಯ ಡೇಟನ್‌ನ ಮಲೈಕಾ ಚಿತ್ರೆ (24) ಮತ್ತು ನ್ಯೂಜೆರ್ಸಿಯ ಸೈರೆವಿಲ್ಲೆಯ ನವಮ್ ಕೌಲ್ (24) ಎಂದು ಗುರುತಿಸಲಾಗಿದೆ.

ಇವರಿಬ್ಬರ ಮೇಲೆ ಸಬ್​​ಬೌಂಡ್​ನ ನಾಲ್ಕನೇ ನಂಬರ್​ ರೈಲು ಬೆಳ್ಳಿಗ್ಗೆ ಸುಮಾರು 3.15 ರ ಸಮಯಕ್ಕೆ ಹರಿದಿದೆ ಎಂದು ನ್ಯೂಯಾರ್ಕ್​ ಪೊಲೀಸ್​ ಇಲಾಖೆ ಮಾಹಿತಿ ಹಂಚಿಕೊಂಡಿದೆ. 

ಈ ಭೀಕರ ಘಟನೆಯನ್ನು ಸಬ್​ ವೇನಲ್ಲಿದ್ದ ಮತ್ತೊಬ್ಬ ಪ್ರಯಾಣಿಕರು ತಮ್ಮ ಮೊಬೈಲ್​ನಲ್ಲಿ ಸೆರೆಹಿಡಿದ್ದಿದ್ದಾರೆ. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ಕತ್​ ವೈರಲ್​ ಆಗುತ್ತಿದೆ. ವಿಡಿಯೋನಲ್ಲಿ ಮಲೈಕಾ ಚಿತ್ರೆ ಮತ್ತು ನವಮ್ ಕೌಲ್ ನಗುತ್ತಲೇ ಸಬ್​ ವೇ ಹಳಿಯ ಮೇಲೆ ಕುಳಿತಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ. ಆದರೆ ಇದು ಹುಚ್ಚಾಟವೋ ಅಥವಾ ಆತ್ಮಹತ್ಯೆಯೋ ಎಂದು ತನಿಖೆ ನಂತರವೇ ತಿಳಿದು ಬರಬೇಕಿದೆ.

ಘಟನೆ ಬಳಿಕ ಟ್ರೇನ್​ ಆಪರೇಟರ್​ನನ್ನು ವಿಚಾರಣೆ ನಡೆಸಿದಾಗ, ನಾನು ಎಂದಿನಂತೆ ರೈಲನ್ನು ಏರಿ ಆಪರೇಟ್​ ಮಾಡುತ್ತಿದ್ದೆ. ರೈಲಿನ ಹಳಿ ಮೇಲೆ ಒಬ್ಬ ಯುವಕ ಹಾಗೂ ಯುವತಿ ಕುಳಿತಿರುವುದು ನನಗೆ ಕಾಣಿಸಿತು. ಅವರು ಅಲ್ಲಿ ಅವರು ನಗುತ್ತಾ, ಪರಸ್ಪರ ತಮಾಷೆ ಮಾಡಿಕೊಳ್ಳುತ್ತಾ ಕುಳಿತ್ತಿದ್ದರು. ಇದನ್ನು ನೋಡಿದ ಕೂಡಲೇ ನಾನು ರೈಲಿನ ವೇಗವನ್ನು ಕಡಿಮೆ ಮಾಡಿದೆ ಹಾಗೂ ಎಮರ್ಜೆನ್ಸಿ ಬ್ರೇಕ್​ಅನ್ನು ಪ್ರಯೋಗ ಮಾಡಿದ್ದೆ. ಆದರೆ ಅಷ್ಟರಾಗಲೇ ರೈಲು ಅವರ ಮೇಲೆ ಹರಿದು ಹೋಗಿತ್ತೆಂದು ಹೇಳಿಕೆ ನೀಡಿದ್ದಾರೆ. 

ಈ ಘಟನೆ ದಾಖಲಾಗುತ್ತಿದ್ದಂತೆ ನ್ಯೂಯಾರ್ಕ್​ ಪೊಲೀಸರು ಕಾರ್ಯಪ್ರವರ್ತರಾಗಿದ್ದಾರೆ. ಮಾಹಿತಿ ಪ್ರಕಾರ, ಗುಪ್ತಚರ ಪೊಲೀಸರು ಕೆಲ ಮಾಹಿತಿಗಳನ್ನು ಕಲೆಹಾಕಿದ್ದಾರೆ. ಮೃತಪಟ್ಟ ಇಬ್ಬರೂ ರಟ್ಗರ್ಸ್ ವಿಶ್ವವಿದ್ಯಾಲಯದ ಮಾಜಿ ವಿದ್ಯಾರ್ಥಿಗಳಾಗಿದ್ದು, ಇಬ್ಬರೂ ಒಂದೇ ವರ್ಷ ತೇರ್ಗಡೆಯಾಗಿದ್ದಾರೆಂದು ತಿಳಿದು ಬಂದಿದೆ. ಮಲೈಕಾ ಚಿತ್ರೆ ಈಕೆ, ಅಕಾಡಿಯಾ ಫಾರ್ಮಾಸ್ಯುಟಿಕಲ್ಸ್‌ನಲ್ಲಿ ಕಾರ್ಯಾಚರಣೆ ತಜ್ಞಯಾಗಿ ಕೆಲಸ ಮಾಡುತ್ತಿದ್ದರೆ, ನವಮ್ ಕೌಲ್ ಬ್ಲೂಮ್‌ಬರ್ಗ್‌ನಲ್ಲಿ ಹಣಕಾಸು ದತ್ತಾಂಶ ವಿಶ್ಲೇಷಕನಾಗಿ ಕೆಲಸ ಮಾಡುತ್ತಿದ್ದನೆಂದು ಪತ್ತೆಹಚ್ಚಲಾಗಿದೆ.

ಆದರೆ, ಇವರ ಬಳಿ ಯಾವುದೇ ಸೂಸೈಡ್​ ನೋಟ್​ ದೊರೆತಿಲ್ಲ. ಹೀಗಾಗಿ ಇವರು ಮಾದಕ ಪದಾರ್ಥಗಳನ್ನು ಸೇವಿಸಿದ್ದರು? ಅಥವಾ ಇವರು ಮಾಧಕ ವ್ಯಸನಿಗಳಾಗಿರಬಹುದು ಎನ್ನುವ ಅನುಮಾನ ಗುಪ್ತಚರ ಅಧಿಕಾರಿಗಳಲ್ಲಿ ಮೂಡಿದೆ. ಹೀಗಾಗಿ ಪ್ರಕರಣವನ್ನು ಎಲ್ಲಾ ಆಯಾಮಗಳಲ್ಲಿ ತನಿಖೆ ನಡೆಸಲಾಗುತ್ತಿದೆ ಎಂದು ಹೇಳಿಕೆ ನೀಡಿದ್ದಾರೆ, (ಏಜೆನ್ಸೀಸ್).