ನೆರೆರಾಷ್ಟ್ರಗಳ ನಡುವೆ ಕೋಲ್ಡ್ ವಾರ್! ಪಾಕಿಸ್ತಾನದ ಡಬಲ್ ಗೇಮ್ ಬಯಲು ಮಾಡಿದ ಇರಾನ್: ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್ ವಿರುದ್ಧ ನೇರ ವಾಗ್ದಾಳಿ! Iran slams Asim Munir

ಇತ್ತೀಚೆಗೆ ಇರಾನ್‌ನ ದೂರದರ್ಶನದಲ್ಲಿ ನಡೆದ ಚರ್ಚೆಯೊಂದರಲ್ಲಿ, ಪಾಕಿಸ್ತಾನದ ಮಧ್ಯಸ್ಥಿಕೆಯು ಕೇವಲ ಒಂದು ನಾಟಕ ಎಂದು ಇರಾನ್ ವಿಶ್ಲೇಷಕರು ಬಣ್ಣಿಸಿದ್ದಾರೆ. ಇರಾನ್ ಪ್ರಕಾರ, ಅಮೆರಿಕದೊಂದಿಗೆ ಮಾತುಕತೆ ನಡೆಸಲು ಇರಾನ್ ಒಂದು ಔಪಚಾರಿಕ ಪ್ರಸ್ತಾವನೆಯನ್ನು ಪಾಕಿಸ್ತಾನದ ಮೂಲಕ ವಾಷಿಂಗ್ಟನ್‌ಗೆ ರವಾನಿಸಿತ್ತು. ಆದರೆ, ಪಾಕ್​ ಇರಾನ್‌ನ ಹಿತಾಸಕ್ತಿಯನ್ನು ಕಾಪಾಡುವ ಬದಲು ಅಮೆರಿಕದ ಪರವಾಗಿ ಕೆಲಸ ಮಾಡುತ್ತಿದೆ ಎಂಬುದು ಟೆಹ್ರಾನ್‌ ವಾದವಾಗಿದೆ.

ಪಾಕಿಸ್ತಾನದ ಆಡಳಿತದಲ್ಲಿ ಸೇನೆಯೇ ಅಂತಿಮ ನಿರ್ಧಾರ ಕೈಗೊಳ್ಳುವ ಶಕ್ತಿ ಎಂಬುದು ಜಗತ್ತಿಗೇ ತಿಳಿದಿದೆ. ಇದನ್ನು ಮನಗಂಡ ಇರಾನ್ ಮಾಧ್ಯಮಗಳು, ಪಾಕಿಸ್ತಾನದ ಈ ಯು-ಟರ್ನ್ ನೀತಿಗೆ ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್ ಅವರೇ ಕಾರಣ ಎಂದು ನೇರವಾಗಿ ಬೆರಳು ಮಾಡಿ ತೋರಿಸಿವೆ. ಪಾಕಿಸ್ತಾನವು ಅಮೆರಿಕದ ಆರ್ಥಿಕ ಸಹಾಯ ಮತ್ತು ಬೆಂಬಲಕ್ಕಾಗಿ ಇರಾನ್‌ನ ಚೌಕಾಶಿ ಸಾಮರ್ಥ್ಯವನ್ನು ಕುಂದಿಸುತ್ತಿದೆ ಎಂದು ತೇಹ್ರಾನ್ ವಾದಿಸುತ್ತಿದೆ.

ಅತ್ತ ಅಮೆರಿಕ ಮತ್ತು ಇರಾನ್ ನಡುವಿನ ಮಾತುಕತೆಗಳು ಸಂಪೂರ್ಣವಾಗಿ ಹಳಿ ತಪ್ಪಿವೆ. ಅಮೆರಿಕವು ಇತ್ತೀಚೆಗೆ ಕದನ ವಿರಾಮವನ್ನು ಅನಿರ್ದಿಷ್ಟಾವಧಿಯವರೆಗೆ ವಿಸ್ತರಿಸಿದ್ದರೂ, ಇರಾನ್‌ನ ಬಂದರುಗಳ ಮೇಲೆ ಹೇರಲಾಗಿರುವ ನೌಕಾ ದಿಗ್ಬಂಧನವನ್ನು ಮಾತ್ರ ತೆರವುಗೊಳಿಸಿಲ್ಲ. ಇರಾನ್ ಇದನ್ನು ಯುದ್ಧದ ಘೋಷಣೆ ಎಂದು ಕರೆದಿದೆ.

ಪಾಕಿಸ್ತಾನವು ಈಗಾಗಲೇ ಆರ್ಥಿಕ ಬಿಕ್ಕಟ್ಟಿನಲ್ಲಿ ಸಿಲುಕಿದ್ದು, ಅಮೆರಿಕದ ಮೇಲೆ ಅತಿಯಾಗಿ ಅವಲಂಬಿತವಾಗಿದೆ. ಇನ್ನೊಂದೆಡೆ ಸೌದಿ ಅರೇಬಿಯಾ ಮತ್ತು ಇರಾನ್ ನಡುವಿನ ಬಾಂಧವ್ಯ ಸುಧಾರಿಸುತ್ತಿರುವಾಗ, ಪಾಕ್​ ಇರಾನ್‌ನಿಂದ ದೂರ ಸರಿಯುತ್ತಿರುವುದು ಆಶ್ಚರ್ಯಕರವಾಗಿದೆ. ಇರಾನ್ ಮತ್ತು ಅಮೆರಿಕ ನಡುವೆ ಸಮಾಧಾನ ತರಬೇಕಿದ್ದ ಸೇತುವೆಯಾಗಬೇಕಿದ್ದ ಪಾಕಿಸ್ತಾನ, ಈಗ ತಾನೇ ಒಂದು ಅಡಚಣೆಯಾಗಿ ಪರಿಣಮಿಸಿದೆಯೇ ಎಂಬ ಪ್ರಶ್ನೆ ಎದ್ದಿದೆ.

ಇರಾನ್ ಮಾಧ್ಯಮಗಳ ಈ ಬಹಿರಂಗ ದಾಳಿಯು ಪಾಕಿಸ್ತಾನದ ವಿದೇಶಾಂಗ ನೀತಿಯ ವಿಫಲತೆಯನ್ನು ಸೂಚಿಸುತ್ತದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಅಸಿಮ್ ಮುನೀರ್ ಅವರ ನಾಯಕತ್ವದಲ್ಲಿ ಪಾಕಿಸ್ತಾನ ಸೇನೆಯು ಅಮೆರಿಕಕ್ಕೆ ಅತಿ ಹತ್ತಿರವಾಗುತ್ತಿರುವುದು ಇರಾನ್‌ನ ಆತಂಕಕ್ಕೆ ಮುಖ್ಯ ಕಾರಣವಾಗಿದೆ.

ಒಂದು ವೇಳೆ ಪಾಕಿಸ್ತಾನವು ತನ್ನ ನಿಲುವನ್ನು ಸ್ಪಷ್ಟಪಡಿಸದಿದ್ದರೆ ಅಥವಾ ಇರಾನ್‌ನ ವಿಶ್ವಾಸವನ್ನು ಮರಳಿ ಗಳಿಸದಿದ್ದರೆ, ಅಫ್ಘಾನಿಸ್ತಾನದ ಗಡಿಯಂತೆ ಇರಾನ್ ಗಡಿಯಲ್ಲೂ ಪಾಕಿಸ್ತಾನಕ್ಕೆ ಭದ್ರತಾ ಸವಾಲುಗಳು ಎದುರಾಗಬಹುದು. ಅತ್ತ ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಭೀತಿ ಇರುವಾಗಲೇ, ಇರಾನ್ ಮತ್ತು ಪಾಕಿಸ್ತಾನದ ನಡುವಿನ ಈ ವಾಗ್ವಾದವು ಇಡೀ ಏಷ್ಯಾ ಖಂಡದ ಭದ್ರತೆಯ ಮೇಲೆ ಪ್ರಭಾವ ಬೀರುವ ಸಾಧ್ಯತೆ ಇದೆ,(ಏಜೆನ್ಸೀಸ್).