ತೈವಾನ್​ನಲ್ಲಿ ಚೀನಾ ಸಮರಭ್ಯಾಸ: ಅಮೆರಿಕಾ ಮತ್ತು ಜಪಾನ್​ಗೆ ಸಂದೇಶ ರವಾನೆ | China

ಬೀಜಿಂಗ್: ಯುನೈಟೆಡ್ ಸ್ಟೇಟ್ಸ್ (ಯುಎಸ್) ಮತ್ತು ಅದರ ಮಿತ್ರರಾಷ್ಟ್ರಗಳಿಗೆ ಸ್ಪಷ್ಟ ಸಂದೇಶವೆಂದು ಪರಿಗಣಿಸಬಹುದಾದ ರೀತಿಯಲ್ಲಿ, ಚೀನಾ (China) ತೈವಾನ್ ಸುತ್ತಲೂ ಲೈವ್-ಫೈರ್ ಮಿಲಿಟರಿ ಕವಾಯತು ಪ್ರಾರಂಭಿಸಿದೆ. ಈ ಮೂಲಕ ತೈವಾನ್​ ಯಾವಾಗಲೂ ಚೀನಾದ ಪ್ರದೇಶವೆಂದು ಪಶ್ಚಿಮದ ದೇಶಗಳಿಗೆ ಸ್ಪಷ್ಟ ಪಡಿಸಿದೆ. ಸೋಮವಾರ (ಡಿ.29) ಚೀನೀ ಪೀಪಲ್ಸ್ ಲಿಬರೇಶನ್ ಆರ್ಮಿ (ಪಿಎಲ್‌ಎ) ಈಸ್ಟರ್ನ್ ಥಿಯೇಟರ್ ಕಮಾಂಡ್ ತೈವಾನ್ ಜಲಸಂಧಿಯ ಮಧ್ಯ ಪ್ರದೇಶಗಳಲ್ಲಿ ಜಲ ಮತ್ತು ವಾಯುಪ್ರದೇಶದಲ್ಲಿ ಕವಾಯತುಗಳನ್ನು ನಡೆಸಲು ದೀರ್ಘ-ಶ್ರೇಣಿಯ ರಾಕೆಟ್​ಗಳೊಂದಿಗೆ ಫೈಟರ್‌ಗಳು, ಬಾಂಬರ್‌ಗಳು ಮತ್ತು ಮಾನವರಹಿತ ವೈಮಾನಿಕ ವಾಹನಗಳನ್ನು ಬಳಸುತ್ತಿದೆ ಎಂದು ವರದಿಯಾಗಿದೆ.

ಯುಎಸ್ ತೈವಾನ್‌ಗೆ 11 ಬಿಲಿಯನ್ ಡಾಲರ್​ ಮೌಲ್ಯದ ಶಸ್ತ್ರಾಸ್ತ್ರ ಪ್ಯಾಕೇಜ್ ಅನ್ನು ಅನುಮೋದಿಸಿದೆ. ಇದು ತೈವಾನ್‌ಗೆ ಯುಎಸ್‌ನ ಅತಿದೊಡ್ಡ ಶಸ್ತ್ರಾಸ್ತ್ರ ಮಾರಾಟವಾಗಿದೆ. ಇದರ ಬೆನ್ನಲ್ಲೇ ಚೀನಾ ಈ ಮಿಲಿಟರಿ ಕವಾಯತ್​ನ್ನು ನಡೆಸಿದೆ ಎಂದು ಹೇಳಲಾಗುತ್ತಿದೆ. ತನ್ನ ರಾಷ್ಟ್ರೀಯ ಸಾರ್ವಭೌಮತ್ವ, ಭದ್ರತೆ ಮತ್ತು ಪ್ರಾದೇಶಿಕ ಸಮಗ್ರತೆಯನ್ನು ರಕ್ಷಿಸಲು ಚೀನಾ ದೃಢ ಮತ್ತು ಬಲವಾದ ಕ್ರಮಗಳನ್ನು ತೆಗೆದುಕೊಳ್ಳುತ್ತದೆ ಎಂದು ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ಗುವೊ ಜಿಯಾಕುನ್ ಡಿಸೆಂಬರ್ 18 ರಂದು ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದರು.

ಈ ಸಮರಾಭ್ಯಾಸವನ್ನು ಜಪಾನ್‌ಗೆ ಸಂದೇಶವೆಂದು ಪರಿಗಣಿಸಲಾಗಿದ್ದು, ಜಪಾನ್ ಪ್ರಧಾನಿ ಸನೇ ತಕೈಚಿ ನವೆಂಬರ್‌ ತಿಂಗಳು ತೈವಾನ್​ಗೆ ಬದುಕುಳಿಯುವ-ಅಪಾಯದ ಪರಿಸ್ಥಿತಿ ಎದುರಾಗಬಹುದು ಹಾಗಾಗಿ ತನ್ನ ರಕ್ಷಣೆ ದೃಷ್ಟಿಯಿಂದ ಅಮೆರಿಕದ ಬೆಂಬಲ ಪಡೆಯುತ್ತಿದೆ ಎಂದು ಹೇಳಿಕೆ ನೀಡಿದ್ದರು.

ಈ ಹೇಳಿಕೆಯಿಂದ ಕೆರಳಿದ ಚೀನಾ, ಜಪಾನ್​ ಪ್ರಧಾನ ಮಂತ್ರಿ ಕೂಡಲೇ ತಮ್ಮ ಹೇಳಿಕೆಯನ್ನು ಹಿಂತೆಗೆದುಕೊಳ್ಳುವಂತೆ ಹೇಳಿತ್ತು. ಹಾಗೆಯೇ ಒಕಿನಾವಾ ದ್ವೀಪವನ್ನು ಮಿಲಿಟರಿಯಾಗಿ ಅಭಿವೃದ್ಧಿಪಡಿಸುವ ಜಪಾನ್‌ನ ಕ್ರಮವನ್ನು ಚೀನಾ ಟೀಕಿಸಿತು,(ಏಜನ್ಸೀಸ್).