ಫ್ಲೋರಿಡಾದ ರೆಸ್ಟೋರೆಂಟ್​ನಲ್ಲಿ ವಿಚಿತ್ರ ಆಫರ್​​; ಜೀವಂತ ಅಥವಾ ಸತ್ತ ಹೆಬ್ಬಾವು ತಂದು ಕೊಟ್ರೆ...ದೊಡ್ಡ ಪಿಜ್ಜಾ ಫ್ರೀ, ಕಾರಣ ಏನು?.. Python

ನ್ಯೂಯಾರ್ಕ್​ನ ಖಾಸಗಿ ಮಾಧ್ಯಮಗಳು ವರದಿ ಮಾಡಿರುವ ಪ್ರಕಾರ, ಫ್ಲೋರಿಡಾದ ಎವರ್‌ಗ್ಲೇಡ್ಸ್ ಸಿಟಿಯಲ್ಲಿರುವ ರೆಸ್ಟೋರೆಂಟ್ ಮಾಲೀಕ ಡಸ್ಟಿನ್ ಕ್ರಮ್ ಎಂಬುವವರೇ ಈ ವಿಚಿತ್ರ ಆಫರ್​ ಕೊಡುತ್ತಿರುವ ಆಸಾಮಿ ಎಂದು ಗುರುತಿಸಲಾಗಿದೆ. ಸತ್ತ ಅಥವಾ ಜೀವಂತವಾಗಿರುವ ಬರ್ಮೀಸ್ ಹೆಬ್ಬಾವನ್ನು ರೆಸ್ಟೋರೆಂಟ್​ ಮಾಲೀಕರಿಗೆ ತಂದು ಕೊಟ್ಟರೆ ವಿಶೇಷವಾದ ದೊಡ್ಡ ಪಿಜ್ಜಾವನ್ನು ಉಚಿತವಾಗಿ ತಿನ್ನಬಹುದಾಗಿದೆ ಎಂದು ಹೇಳಲಾಗಿದೆ.

ದಶಕದ ಕಾಲದಿಂದಲೂ ಫ್ಲೋರಿಡಾದಲ್ಲಿರುವ ಹೆಬ್ಬಾವುಗಳು ಇಲ್ಲಿನ ಪ್ರಮುಖ ಸಮಸ್ಯೆಯಾಗಿ ಮಾರ್ಪಟ್ಟಿವೆ. 1970 ರ ದಶಕದಲ್ಲಿ ಆಗ್ನೇಯ ಏಷ್ಯಾದಿಂದ ಫ್ಲೋರಿಡಾಗೆ ಈ ಹೆಬ್ಬಾವು ಬಂದಿವೆ ಎನ್ನಲಾಗಿದೆ. ಫ್ಲೋರಿಡಾದಲ್ಲಿ 300,000 ವರೆಗೆ ಹೆಬ್ಬಾವು ಇರಬಹುದೆಂದು ತಜ್ಞರು ಅಂದಾಜಿಸಿದ್ದಾರೆ.

ಹೆಣ್ಣು ಬರ್ಮೀಸ್ ಹೆಬ್ಬಾವುಗಳು ಒಮ್ಮೆಗೆ 70 ಮೊಟ್ಟೆಗಳನ್ನು ಇಡಬಲ್ಲವು, ಇದು ಅವುಗಳ ಜನಸಂಖ್ಯೆಯ ಬೆಳವಣಿಗೆಗೆ ಉತ್ತೇಜನ ನೀಡುತ್ತದೆ. ಅವು 20 ಅಡಿಗಳಿಗಿಂತ ಹೆಚ್ಚು ಉದ್ದಕ್ಕೆ ಬೆಳೆಯಬಹುದು. ಸಂತಾನೋತ್ಪತ್ತಿ ಹೆಚ್ಚಿಸಿಕೊಂಡು ತನ್ನ ವಂಶವನ್ನು ವೃದ್ಧಿ ಮಾಡಿಕೊಳ್ಳುವ ಈ ಹೆಬ್ಬಾವುಗಳು ಇಲ್ಲಿನ ಪ್ರಾಣಿಗಳನ್ನು ತಿಂದು ಮುಗಿಸುತ್ತವೆ. ಇದರಿಂದಾಗಿ ನೈಸರ್ಗಿಕ ಸಮತೋಲನವನ್ನು ಅಡ್ಡಿಯಾಗುತ್ತಿದೆ ಎನ್ನುವುದು ಪರಿಸರ ತಜ್ಞರ ಅಳಲು.

ಹೀಗಾಗಿ ರೆಸ್ಟೋರೆಂಟ್ ಮಾಲೀಕ ಡಸ್ಟಿನ್ ಕ್ರಮ್ ಆಕ್ರಮಣಕಾರಿ ಜಾತಿಯ ಹೆಬ್ಬಾವನ್ನು ಹಿಡಿದುಕೊಟ್ಟವರಿಗೆ ಬಹುಮಾನವನ್ನು ನೀಡುತ್ತಿದ್ದಾರೆ. ಅಷ್ಟೇ ಅಲ್ಲದೇ ಪರೋಕ್ಷವಾಗಿ ಫ್ಲೋರಿಡಾದಲ್ಲಿ ಹೆಚ್ಚುತ್ತಿರುವ ಹೆಬ್ಬಾವುಗಳ ಸಮಸ್ಯೆಯನ್ನು ನಿಭಾಯಿಸಲು ಪ್ರಯತ್ನಿಸುವ ವಿಭಿನ್ನ ಮಾರ್ಗವಾಗಿದೆ.

ಕೆಲವರಿಗೆ ಹಿಡಿದ ಹೆಬ್ಬಾವು ಏನು ಮಾಡೋದು ಅಂತಲೇ ತಿಳಿಯೋದಿಲ್ಲ. ಹೀಗಾಗಿ ಅವನ್ನು ಕಾಡಿಗೆ ಬಿಟ್ಟು ಬಿಡುತ್ತಾರೆ. ಅದು ಮತ್ತೆ ಜನರಿಗೆ ಹಾಗೂ ಪ್ರಕೃತಿಯಲ್ಲಿ ಸಮತೋಲನ ಕಾಪಾಡಿಕೊಳ್ಳಲು ಕಷ್ಟವಾಗುತ್ತದೆ. ಹೀಗಾಗಿ ಈ ಆಫರ್​ ಅನ್ನು ಜಾರಿ ಮಾಡಿದ್ದೇನೆ. ಬಹಳಷ್ಟು ಜನಕ್ಕೆ ಗೊತ್ತೇ ಇಲ್ಲ. ಹೆಬ್ಬಾವಿನ ಪ್ರತಿ ಭಾಗವೂ ಒಂದೊಂದು ವಿಚಾರಕ್ಕೆ ಬಳಕೆಯಾಗುತ್ತದೆ.

ಬರ್ಮಿನ್​ ತಳಿಯ ಹೆಬ್ಬಾವಿನ ಕೊಬ್ಬನ್ನು ಚರ್ಮದ ಎಣ್ಣೆ ಅಥವಾ ಕ್ರೀಮ್​ ಹಾಗೂ ಸೋಪ್​ಗಳನ್ನು ತಯಾರಿ ಮಾಡಲು ಬಳಕೆ ಮಾಡಿಕೊಳ್ಳಬಹುದು. ಅದರ ಮೂಳೆಗಳನ್ನು ಆಭರಣ ಮಾಡಬಹುದು. ಪಿಜ್ಜಾಗೆ ಹೆಬ್ಬಾವಿನ ಮಾಂಸವನ್ನು ಹಾಕಿ ತಯಾರಿ ಮಾಡಬಹುದು ಎನ್ನುವುದನ್ನು ಡಸ್ಟಿನ್​ ಕ್ರಮ್​ ವಿವರಿಸಿದರು.

ಕಾನೂನು ಬದ್ಧವಾಗಿ ಹೆಬ್ಬಾವಿನ ಮಾಂಸ ಮಾರಾಟ ಮಾಡೋದು ತಪ್ಪು ಹೀಗಾಗಿ ಹೆಬ್ಬಾವಿನ ಮಾಂಸದಿಂದ ತಯಾರಾದ ಪಿಜ್ಜಾ ತಯಾರಿಸಿ ಉಚಿತವಾಗಿ ನೀಡಲಾಗುತ್ತಿದೆ. ಇದರ ರುಚಿ ಕೊಂಚ ಬೇರೆ ರೀತಿ ಇರುತ್ತದೆ. ಆದರೆ ರುಚಿಕರವಾಗಿರವುದು ಗ್ಯಾರಂಟಿ ಎಂದಿದ್ದಾರೆ,(ಏಜೆನ್ಸೀಸ್).