ಆ ಖಾತೆಯಲ್ಲಿದ್ದ ವಿಡಿಯೋಗಳಲ್ಲಿ ಯುವತಿಯು ತನ್ನ ಫಾರ್ಮ್‌ಹೌಸ್‌ಗೆ ಬರುವಂತೆ ಪುರುಷರನ್ನು ಆಹ್ವಾನಿಸುವುದಲ್ಲದೆ, ಅವರಿಗೆ ವಾಸಿಸಲು ಸೂರು ಹಾಗೂ ಆರ್ಥಿಕ ನೆರವು ನೀಡುವುದಾಗಿ ಭರವಸೆ ನೀಡಿದ್ದಳು. ತನ್ನ ಕಷ್ಟದ ಸಮಯದಲ್ಲಿ ಈಕೆಯು ಜೀವನದಲ್ಲಿ ಹೊಸ ಆರಂಭ ಮಾಡಲು ಸಹಾಯ ಮಾಡಬಹುದು ಎಂದು ಗಾಢವಾಗಿ ನಂಬಿದ ಮಾರ್ಟಿನ್ಸ್, ಆಕೆಯನ್ನೇ ಮದುವೆಯಾಗಲು ನಿರ್ಧರಿಸಿದರು. ಕೊನೆಗೆ ಆಕೆಯ ಭೇಟಿಗಾಗಿ ಅಕ್ಟೋಬರ್ 9 ರಂದು ತಮ್ಮ ಕೈಯಲ್ಲಿದ್ದ ಎಲ್ಲಾ ವಸ್ತುಗಳನ್ನು ಮಾರಿ ಪ್ರಯಾಣಕ್ಕೆ ಹಣ ಹೊಂದಿಸಿಕೊಂಡು ಹೊರಟರು.
ಬ್ರೆಜಿಲ್‌ನ ಆಗ್ನೇಯ ಭಾಗದಲ್ಲಿರುವ ಮಿನಾಸ್ ಗೆರೈಸ್ ರಾಜ್ಯದ ರಾಜಧಾನಿ ಬೆಲೋ ಹೊರಿಜಾಂಟೆ ನಗರ ತಲುಪಲು ಮಾರ್ಟಿನ್ಸ್ ಒಂದು ದಿನಕ್ಕಿಂತ ಹೆಚ್ಚು ಕಾಲ ಬಸ್‌ನಲ್ಲಿ ಪ್ರಯಾಣಿಸಿ ಅಕ್ಟೋಬರ್ 11 ರಂದು ಅಲ್ಲಿಗೆ ತಲುಪಿದರು. ಆದರೆ ಆಕೆಯನ್ನು ಭೇಟಿಯಾಗುವ ಅವರ ಕನಸು ಕ್ಷಣಾರ್ಧದಲ್ಲೇ ನುಚ್ಚುನೂರಾಯಿತು. ಕೈಯಲ್ಲಿ ಆಕೆಯ ಫೋಟೋ ಹಿಡಿದು ನಗರದಾದ್ಯಂತ ಹುಡುಕಾಡಿದರೂ ಯಾರೊಬ್ಬರಿಗೂ ಆಕೆಯ ಸುಳಿವು ಸಿಗಲಿಲ್ಲ, ಕೊನೆಗೆ ಸ್ಥಳೀಯ ರೇಡಿಯೋ ಸ್ಟೇಷನ್‌ಗೆ ತೆರಳಿದಾಗ ಆಕೆಯ ಅಸ್ತಿತ್ವವೇ ಇಲ್ಲ ಎಂಬ ಕಹಿ ಸತ್ಯ ಅವರಿಗೆ ಗೊತ್ತಾಯಿತು.
ಆ ಮಹಿಳೆಯು ಸಂಪೂರ್ಣವಾಗಿ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದಿಂದ ಸೃಷ್ಟಿಸಲ್ಪಟ್ಟ ನಕಲಿ ವ್ಯಕ್ತಿ ಎಂಬುದು ತಿಳಿದು ಮಾರ್ಟಿನ್ಸ್ ತೀವ್ರ ಆಘಾತಕ್ಕೊಳಗಾದರು. "ಇದು ಕೇವಲ ದುಃಖ, ನಿರಾಶೆ ಮತ್ತು ಖಿನ್ನತೆಯನ್ನು ಮಾತ್ರ ತರುತ್ತದೆ. ಅನೇಕ ಜನರು ಸಂಬಂಧವನ್ನು ಹುಡುಕಲು ಬಯಸುತ್ತಾರೆ, ಹಾಗಾಗಿ ನಾನು ಬಂದೆ" ಎಂದು ಅವರು ಸ್ಥಳೀಯ ಮಾಧ್ಯಮಗಳ ಬಳಿ ತಮ್ಮ ಅಳಲನ್ನು ತೋಡಿಕೊಂಡಿದ್ದಾರೆ.
