ಬ್ಲ್ಯಾಕ್ ಹಾಕ್ ಪತನ, ಯುದ್ಧ ವಿಮಾನ ಭಸ್ಮ: ಅಮೆರಿಕದ ಅಜೇಯ ಫೈಟರ್ ಜೆಟ್‌ಗಳನ್ನು ಇರಾನ್ ಧ್ವಂಸ ಮಾಡಿದ್ದೇಗೆ? ರೇಡಾರ್‌ಗಳಿಗೂ ಸಿಗದ ಆ ಮಜೀದ್ ರಹಸ್ಯವೇನು? Iran destroy us fighter jets

ಶುಕ್ರವಾರ ಅಮೆರಿಕದ ಹೆಮ್ಮೆಯ F-15E ಸ್ಟ್ರೈಕ್ ಈಗಲ್ ಫೈಟರ್ ಜೆಟ್ ಇರಾನ್‌ನ ಕ್ಷಿಪಣಿಗೆ ಬಲಿಯಾಗಿದೆ. ಇದರ ಬೆನ್ನಲ್ಲೇ, ಪತನಗೊಂಡ ವಿಮಾನದ ಪೈಲಟ್‌ಗಳಿಗಾಗಿ ಹುಡುಕಾಟ ನಡೆಸುತ್ತಿದ್ದ ಎರಡು ಬ್ಲ್ಯಾಕ್ ಹಾಕ್ ಹೆಲಿಕಾಪ್ಟರ್‌ಗಳ ಮೇಲೂ ಇರಾನ್ ದಾಳಿ ನಡೆಸಿದೆ. ಅದೃಷ್ಟವಶಾತ್ ಅವು ಇರಾನ್ ಗಡಿಯಿಂದ ಹೊರಬರುವಲ್ಲಿ ಯಶಸ್ವಿಯಾಗಿವೆ. ಇದೇ ವೇಳೆ, ಕುವೈತ್ ಬಳಿ ಅಮೆರಿಕದ ಮತ್ತೊಂದು A-10 ವಾರ್ಥೋಗ್ ವಿಮಾನ ಕೂಡ ಪತನಗೊಂಡಿದೆ. 2003ರ ಇರಾಕ್ ಆಕ್ರಮಣದ ನಂತರ ಅಮೆರಿಕದ ಯುದ್ಧ ವಿಮಾನಗಳು ಶತ್ರುಗಳ ದಾಳಿಗೆ ಬಲಿಯಾಗುತ್ತಿರುವುದು ಇದೇ ಮೊದಲಾಗಿದೆ.

ಅಮೆರಿಕದ ಬಳಿ ಸ್ಟೆಲ್ತ್ ತಂತ್ರಜ್ಞಾನವಿದ್ದರೆ, ಇರಾನ್ ಬಳಿ ಅದಕ್ಕೆ ಮದ್ದಿನಂತಿರುವ ಮಜೀದ್ ಎಂಬ ರಹಸ್ಯ ಆಯುಧವಿದೆ. ಈ ವ್ಯವಸ್ಥೆಯು ಅಮೆರಿಕದ ಲೆಕ್ಕಾಚಾರಗಳನ್ನು ಹೇಗೆ ತಲೆಕೆಳಗು ಮಾಡಿದೆ ಎಂಬುದು ಇಲ್ಲಿದೆ.

ರೇಡಾರ್ ರಹಿತ ಪತ್ತೆ: ಸಾಮಾನ್ಯವಾಗಿ ಯುದ್ಧ ವಿಮಾನಗಳು ಶತ್ರುಗಳ ರೇಡಾರ್ ಸಿಗ್ನಲ್‌ಗಳನ್ನು ಪತ್ತೆ ಹಚ್ಚಿ ಎಚ್ಚರಗೊಳ್ಳುತ್ತವೆ. ಆದರೆ ಮಜೀದ್ ವ್ಯವಸ್ಥೆಯು ರೇಡಾರ್ ಬಳಸುವುದೇ ಇಲ್ಲ. ಇದು ಇನ್ಫ್ರಾರೆಡ್ ತಂತ್ರಜ್ಞಾನದ ಮೂಲಕ ವಿಮಾನದ ಇಂಜಿನ್‌ನಿಂದ ಹೊರಬರುವ ಶಾಖವನ್ನು ಪತ್ತೆಹಚ್ಚುತ್ತದೆ. ವಿಮಾನಕ್ಕೆ ತಿಳಿಯುವ ಮೊದಲೇ ಕ್ಷಿಪಣಿ ಹಾರಿರುತ್ತದೆ.

F-35 ಗೂ ಕಂಟಕ: ಅಮೆರಿಕದ ಅತ್ಯಂತ ಸುಧಾರಿತ ಸ್ಟೆಲ್ತ್ ವಿಮಾನವಾದ F-35 ಕೂಡ ಈ ಶಾಖ ಪತ್ತೆ ತಂತ್ರಜ್ಞಾನಕ್ಕೆ ಬಲಿಯಾಗುತ್ತಿದೆ. ವಿಮಾನ ಎಷ್ಟು ಶಾಖ ಬಿಡುಗಡೆ ಮಾಡುತ್ತದೆಯೋ, ಮಜೀದ್ ಕ್ಷಿಪಣಿಗೆ ಅದನ್ನು ಪತ್ತೆಹಚ್ಚುವುದು ಅಷ್ಟೇ ಸುಲಭವಾಗಿದೆ.

ಕಡಿಮೆ ಎತ್ತರದ ದಾಳಿ: ಅಮೆರಿಕದ ವಿಮಾನಗಳು ಕಡಿಮೆ ಎತ್ತರದಲ್ಲಿ ಹಾರಾಟ ನಡೆಸುತ್ತಿದ್ದಾಗ, ಇರಾನ್‌ನ ಹೆಗಲ ಮೇಲೆ ಹೊತ್ತು ಹಾರಿಸುವ ಕ್ಷಿಪಣಿಗಳು ಸುಲಭವಾಗಿ ಗುರಿ ತಲುಪಿವೆ.

ಇರಾನ್ ತನ್ನ ಯುದ್ಧ ತಂತ್ರವನ್ನು ಸಂಪೂರ್ಣವಾಗಿ ಬದಲಾಯಿಸಿಕೊಂಡಿದೆ. ಅಮೆರಿಕದ ಗುಪ್ತಚರ ಇಲಾಖೆಯ (CNN ವರದಿ) ಪ್ರಕಾರ, ಇರಾನ್‌ನ ಅರ್ಧದಷ್ಟು ಕ್ಷಿಪಣಿ ಲಾಂಚರ್‌ಗಳು ಇಂದಿಗೂ ಸುರಕ್ಷಿತವಾಗಿವೆ.

ಮಿಸೈಲ್ ಸಿಟಿಗಳು: ಇರಾನ್ ತನ್ನ ಕ್ಷಿಪಣಿಗಳನ್ನು ನೆಲದಡಿಯ ರಹಸ್ಯ ಸುರಂಗಗಳು ಮತ್ತು ಕರಾವಳಿಯ ಗುಡ್ಡಗಾಡು ಪ್ರದೇಶಗಳಲ್ಲಿ ಅಡಗಿಸಿಟ್ಟಿದೆ.

ಚಲಿಸುವ ಲಾಂಚರ್‌ಗಳು: ಇವುಗಳು ಕ್ಷಿಪಣಿ ಹಾರಿಸಿದ ತಕ್ಷಣ ಆ ಸ್ಥಳದಿಂದ ಜಾಗ ಬದಲಾಯಿಸುತ್ತವೆ. ಇದರಿಂದ ಅಮೆರಿಕದ ಡ್ರೋನ್‌ಗಳಿಗೆ ಇವುಗಳನ್ನು ಪತ್ತೆಹಚ್ಚಿ ನಾಶಪಡಿಸುವುದು ಅಸಾಧ್ಯವಾಗಿದೆ.

ರಷ್ಯಾ ಮತ್ತು ಚೀನಾದ ಸಾಥ್: ಇರಾನ್ ರಷ್ಯಾದಿಂದ ಅತ್ಯಾಧುನಿಕ 'ವೆರ್ಬಾ' ಕ್ಷಿಪಣಿಗಳನ್ನು ಮತ್ತು ಚೀನಾದ HQ-9B ಲಾಂಗ್ ರೇಂಜ್ ಸಿಸ್ಟಮ್‌ಗಳನ್ನು ಪಡೆದುಕೊಂಡಿದೆ ಎಂಬ ವರದಿಗಳಿವೆ. ಇದು ಇರಾನ್‌ನ ಆಕಾಶವನ್ನು ಶತ್ರುಗಳಿಗೆ ಡೆತ್ ಟ್ರ್ಯಾಪ್ ಆಗಿ ಮಾರ್ಪಡಿಸಿದೆ.

ಮಾರ್ಚ್ 24ರಂದು ಟ್ರಂಪ್, ನಮ್ಮ ವಿಮಾನಗಳು ಇರಾನ್ ಮೇಲೆ ಹಾರಾಡುತ್ತಿವೆ, ಅವರು ಏನೂ ಮಾಡಲು ಸಾಧ್ಯವಿಲ್ಲ ಎಂದು ಹೇಳಿದ್ದರು. ಆದರೆ ಕೇವಲ ಒಂದು ವಾರದಲ್ಲಿ ಇರಾನ್ ಇಡೀ ಚಿತ್ರಣವನ್ನೇ ಬದಲಿಸಿದೆ. ತೈಲ ಮಾರುಕಟ್ಟೆ ಮತ್ತು ಜಾಗತಿಕ ರಾಜತಾಂತ್ರಿಕತೆಯ ಮೇಲೆ ಇದು ತೀವ್ರ ಪರಿಣಾಮ ಬೀರಲಿದೆ. ಅಮೆರಿಕದ ವಾಯು ಶ್ರೇಷ್ಠತೆ ಈಗ ಪ್ರಶ್ನಾರ್ಹವಾಗಿದೆ.

ಇರಾನ್‌ನ ವಾಯು ರಕ್ಷಣಾ ವ್ಯವಸ್ಥೆ ದುರ್ಬಲವಾಗಿದೆ ಎಂಬ ಅಮೆರಿಕದ ಊಹೆ ತಪ್ಪಾಗಿದೆ. ತನ್ನಲ್ಲಿರುವ ಸೀಮಿತ ಸಂಪನ್ಮೂಲಗಳನ್ನು ಬಳಸಿಕೊಂಡು, ಅತ್ಯಾಧುನಿಕ ತಂತ್ರಜ್ಞಾನದ ಮೂಲಕ ಅಮೆರಿಕಕ್ಕೆ ಅನಿರೀಕ್ಷಿತ ಪೆಟ್ಟು ನೀಡುವಲ್ಲಿ ಇರಾನ್ ಯಶಸ್ವಿಯಾಗಿದೆ. ಯುದ್ಧವು ಎರಡನೇ ತಿಂಗಳಿಗೆ ಕಾಲಿಡುತ್ತಿದ್ದು, ಮುಂದಿನ ದಿನಗಳಲ್ಲಿ ಆಕಾಶದಲ್ಲಿ ಮತ್ತಷ್ಟು ಭೀಕರ ಕಾಳಗ ನಡೆಯುವ ಮುನ್ಸೂಚನೆ ಲಭ್ಯವಾಗಿದೆ,(ಏಜೆನ್ಸೀಸ್).