ಐಫೋನ್ ಬಂದ್ಮೇಲೆ ಪ್ರಪಂಚದಲ್ಲಿ ಮಕ್ಕಳು ಹುಟ್ಟೋದು ಕಮ್ಮಿ ಆಯ್ತಾ? ಸಂಶೋಧನೆಯಲ್ಲಿ ಹೊರಬಿತ್ತು ಶಾಕಿಂಗ್ ಸಂಗತಿ! Birth Rates

Birth Rates : ಜನಸಂಖ್ಯೆ ವಿಚಾರದಲ್ಲಿ 2023ರಲ್ಲೇ ನೆರೆಯ ಚೀನಾವನ್ನು ಹಿಂದಿಕ್ಕಿರುವ ಭಾರತ ವಿಶ್ವದಲ್ಲೇ ಮೊದಲ ಸ್ಥಾನದಲ್ಲಿದೆ. ಮಾನವ ಸಂಪನ್ಮೂಲ ವಿಚಾರದಲ್ಲಿ ಎಲ್ಲರಿಗಿಂತ ಮುಂದಿರುವ ಭಾರತಕ್ಕೆ ಇದೀಗ ಆಘಾತಕಾರಿ ವರದಿಯೊಂದು ಬಂದಿದೆ. ಅದೇನೆಂದರೆ, ದೇಶದಲ್ಲಿ ಪ್ರಸ್ತುತ ಒಟ್ಟು ಫಲವತ್ತತೆ ದರವು ಜನಸಂಖ್ಯೆಯ ಸ್ಥಿರತೆಯನ್ನು ಕಾಯ್ದುಕೊಳ್ಳಲು ಅಗತ್ಯವಿರುವ ಕನಿಷ್ಠ ಮಟ್ಟಕ್ಕಿಂತಲೂ ಕೆಳಕ್ಕೆ ಕುಸಿದಿದೆ. ದೇಶದ ಜನಸಂಖ್ಯಾ ಬೆಳವಣಿಗೆಯ ವೇಗವು ದಾಖಲೆ ಮಟ್ಟದಲ್ಲಿ ಕುಸಿಯುತ್ತಿರುವುದನ್ನು ಈ ಆಘಾತಕಾರಿ ವರದಿ ಬಹಿರಂಗಪಡಿಸಿದ್ದು, ಭವಿಷ್ಯದ ಭಾರತದ ಸಾಮಾಜಿಕ ಮತ್ತು ಆರ್ಥಿಕ ಚಿತ್ರಣವನ್ನೇ ಬದಲಿಸುವ ಮುನ್ಸೂಚನೆ ನೀಡುತ್ತಿದೆ. ಈ ವರದಿ ಇದೀಗ ಜಾಗತಿಕ ಮಟ್ಟದಲ್ಲಿ ತೀವ್ರ ಕುತೂಹಲ ಹಾಗೂ ಚರ್ಚೆಗೆ ಕಾರಣವಾಗಿದೆ.

ಒಂದೆಡೆ ಜನರ ಜೀವನಮಟ್ಟ ಸುಧಾರಿಸುತ್ತಿದ್ದರೆ, ಇನ್ನೊಂದೆಡೆ ಅನೇಕ ಪ್ರದೇಶಗಳಲ್ಲಿ ಜನನ ಪ್ರಮಾಣ ಕುಸಿಯುತ್ತಿದೆ. ಮಕ್ಕಳನ್ನು ಬೆಳೆಸಲು ತಗಲುವ ಭಾರಿ ವೆಚ್ಚ ಹಾಗೂ ಹೆಚ್ಚುತ್ತಿರುವ ನಗರೀಕರಣದ ಕಾರಣದಿಂದಾಗಿ ಶೇ. 70ರಷ್ಟು ಜನ, ಜಂಟಿ ಕುಟುಂಬಗಳಿಂದ ವಿಭಕ್ತ ಕುಟುಂಬಗಳತ್ತ ಮುಖ ಮಾಡಿರುವುದು ಪಾಲಕರಲ್ಲಿ ಮಕ್ಕಳ ಪಾಲನೆಯ ಒತ್ತಡವನ್ನು ಹೆಚ್ಚಿಸಿದೆ. ಇದರಿಂದಾಗಿ ಹಲವು ದಂಪತಿ ಮಕ್ಕಳೇ ಬೇಡ ಎಂಬ ನಿರ್ಧಾರಕ್ಕೆ ಬರುತ್ತಿದ್ದಾರೆ. 

ಇವೆಲ್ಲದರ ನಡುವೆ ಸಂಶೋಧಕರು ಮತ್ತೊಂದು ಅತ್ಯಂತ ವಿಚಿತ್ರವಾದ ಸಂಗತಿಯನ್ನು ಪತ್ತೆಹಚ್ಚಿದ್ದಾರೆ. ಅದೇನೆಂದರೆ, 2007ರಿಂದೀಚೆಗೆ ಜಗತ್ತಿನಾದ್ಯಂತ ವಿಭಿನ್ನ ಆರ್ಥಿಕ ಮತ್ತು ಸಾಮಾಜಿಕ ಪರಿಸ್ಥಿತಿಗಳಿದ್ದಾಗಲೂ ಜಾಗತಿಕ ಜನನ ಪ್ರಮಾಣ ನಿರಂತರವಾಗಿ ಕುಸಿಯುತ್ತಲೇ ಸಾಗಿದೆ. ಈ ಜಾಗತಿಕ ಕುಸಿತಕ್ಕೆ ಅದೇ ವರ್ಷ (2007) ಮಾರುಕಟ್ಟೆಗೆ ಲಗ್ಗೆ ಇಟ್ಟ 'ಐಫೋನ್' (iPhone) ಮತ್ತು ಸ್ಮಾರ್ಟ್‌ಫೋನ್‌ಗಳ ಅತಿಯಾದ ಬಳಕೆಯೇ ಪ್ರಮುಖ ಕಾರಣವಿರಬಹುದು ಎಂದು ಸಂಶೋಧಕರು ಕುತೂಹಲಕಾರಿ ತೀರ್ಮಾನಕ್ಕೆ ಬಂದಿದ್ದಾರೆ.

'ನ್ಯಾಷನಲ್ ಬ್ಯೂರೋ ಆಫ್ ಎಕನಾಮಿಕ್ ರಿಸರ್ಚ್' ಪ್ರಕಟಿಸಿರುವ ಅಧ್ಯಯನದ ಪ್ರಕಾರ, ಅಮೆರಿಕದಲ್ಲಿ 1980 ರಿಂದ 2007 ರವರೆಗೆ ಪ್ರತಿ 1,000 ಮಹಿಳೆಯರಿಗೆ ಜನನ ಪ್ರಮಾಣವು 65 ರಿಂದ 70 ರಷ್ಟರಲ್ಲೇ ಸ್ಥಿರವಾಗಿತ್ತು, ಆದರೆ 2007ರ ನಂತರ ಇದು ತೀವ್ರವಾಗಿ ಕುಸಿಯಲಾರಂಭಿಸಿ, 2024ರ ವೇಳೆಗೆ ಕೇವಲ 54ಕ್ಕೆ ಬಂದು ತಲುಪಿದೆ, ಅಂದರೆ ಕೇವಲ 17 ವರ್ಷಗಳಲ್ಲಿ ಶೇ. 22ರಷ್ಟು ದಾಖಲೆ ಇಳಿಕೆ ಕಂಡಿದೆ. ವಿಶೇಷವೆಂದರೆ, ಜಗತ್ತಿಗೆ 'ಐಫೋನ್' ಪರಿಚಯವಾಗಿದ್ದೂ ಸಹ ಇದೇ 2007ರಲ್ಲಿ. ಹೀಗಾಗಿ, ಜನಸಂಖ್ಯಾ ಕುಸಿತದ ಹಿಂದೆ ಐಫೋನ್‌ನಂತಹ ಸ್ಮಾರ್ಟ್‌ಫೋನ್‌ಗಳ ಪ್ರಭಾವ ಇರಬಹುದು ಎಂದು ಸಂಶೋಧಕರು ಬಲವಾಗಿ ಶಂಕಿಸಿದ್ದಾರೆ. ಆದರೆ ಇದೊಂದೇ ಅಂತಿಮ ಕಾರಣವಲ್ಲ ಎಂದು ಸ್ಪಷ್ಟಪಡಿಸಿರುವ ಸಂಶೋಧರು, 2008ರಲ್ಲಿ ಎದುರಾದ ಜಾಗತಿಕ ಆರ್ಥಿಕ ಹಿಂಜರಿತವೂ ಸಹ ಜನರ ಜೀವನದ ಮೇಲೆ ನೆಗಿಟಿವ್​ ಪರಿಣಾಮವನ್ನು ಬೀರಿ ಜನನ ಪ್ರಮಾಣ ಇಳಿಕೆಗೆ ಮತ್ತೊಂದು ಪ್ರಮುಖ ಕಾರಣವಾಗಿದೆ ಎಂದು ವಿಶ್ಲೇಷಿಸಿದ್ದಾರೆ.

ಜೂನ್ 2007ರಲ್ಲಿ ಬಿಡುಗಡೆಯಾದ ದಿನದಿಂದ ಫೆಬ್ರವರಿ 2011ರ ವರೆಗೆ ಅಮೆರಿಕದಲ್ಲಿ ಐಫೋನ್ ಕೇವಲ 'ಎಟಿ ಆಂಡ್ ಟಿ' (AT&T) ನೆಟ್‌ವರ್ಕ್ ಮೂಲಕವಷ್ಟೇ ಲಭ್ಯವಿದ್ದ ಕಾರಣ, ಆಯಾ ಪ್ರದೇಶಗಳಲ್ಲಿ ಎಟಿ ಆಂಡ್ ಟಿ ಬ್ರಾಡ್‌ಬ್ಯಾಂಡ್ ವ್ಯಾಪ್ತಿಯ ಆಧಾರದ ಮೇಲೆಯೇ ಸಂಶೋಧಕರು ತೀವ್ರ ನೆಟ್‌ವರ್ಕ್ ಇದ್ದ ಹಾಗೂ ನೆಟ್‌ವರ್ಕ್ ಇಲ್ಲದ ಪ್ರದೇಶಗಳನ್ನು ಹೋಲಿಸಿ ಈ ಅಧ್ಯಯನ ನಡೆಸಿದ್ದಾರೆ. ಈ ಸಂಶೋಧನೆಯಲ್ಲಿ ಎಟಿ ಆಂಡ್ ಟಿ ನೆಟ್‌ವರ್ಕ್ ಮತ್ತು ಐಫೋನ್ ಬಳಕೆ ಹೆಚ್ಚಿದ್ದ ಪ್ರದೇಶಗಳಲ್ಲಿ 15 ರಿಂದ 19 ವರ್ಷದೊಳಗಿನ ಯುವತಿಯರಲ್ಲಿ ಜನನ ಪ್ರಮಾಣ ಶೇ. 4.5 ರಿಂದ ಶೇ. 8 ರಷ್ಟು ಮತ್ತು 20 ರಿಂದ 24 ವರ್ಷದೊಳಗಿನ ಮಹಿಳೆಯರಲ್ಲಿ ಶೇ. 3.2 ರಿಂದ ಶೇ. 6.6 ರಷ್ಟು ಕುಸಿದಿರುವುದು ಪತ್ತೆಯಾಗಿದೆ. ಈ ಆಘಾತಕಾರಿ ಅಂಕಿ-ಅಂಶಗಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ, 2007 ರಿಂದ 2011ರ ಅವಧಿಯಲ್ಲಿ 15 ರಿಂದ 44 ವರ್ಷದೊಳಗಿನ ಮಹಿಳೆಯರ ಒಟ್ಟಾರೆ ಫಲವತ್ತತೆ ದರದಲ್ಲಾದ ಭಾರಿ ಕುಸಿತಕ್ಕೆ ಶೇ. 33 ರಿಂದ ಬರೋಬ್ಬರಿ ಶೇ. 52 ರಷ್ಟು ಐಫೋನ್ ಬಳಕೆಯೇ ನೇರ ಕಾರಣವಾಗಿದೆ ಎಂದು ಸಂಶೋಧಕರು ಅಂದಾಜಿಸಿದ್ದಾರೆ.

2007 ರಿಂದ 2024ರ ಅವಧಿಯಲ್ಲಿ ವಿವಿಧ ವಯೋಮಾನದ ಮಹಿಳೆಯರ ಜನನ ಪ್ರಮಾಣದಲ್ಲಿ ಭಾರಿ ವ್ಯತ್ಯಾಸಗಳು ಕಂಡುಬಂದಿದ್ದು, 15 ರಿಂದ 19 ವರ್ಷದೊಳಗಿನ ಯುವತಿಯರಲ್ಲಿ ಜನನ ದರ ಶೇ. 70 ರಷ್ಟು ಹಾಗೂ 20 ರಿಂದ 24 ವರ್ಷದವರಲ್ಲಿ ಶೇ. 47 ರಷ್ಟು ದಾಖಲೆ ಮಟ್ಟದ ಕುಸಿತ ಕಂಡಿದೆ, ಆದರೆ ಇದಕ್ಕೆ ತದ್ವಿರುದ್ಧವಾಗಿ 30 ರಿಂದ 34 ವರ್ಷದವರಲ್ಲಿ ಈ ಇಳಿಕೆ ಕೇವಲ ಶೇ. 7 ರಷ್ಟಿದ್ದರೆ, 35 ರಿಂದ 39 ವರ್ಷದ ಪ್ರೌಢ ಮಹಿಳೆಯರಲ್ಲಿ ಜನನ ಪ್ರಮಾಣವು ಶೇ. 14 ರಷ್ಟು ಹೆಚ್ಚಳವಾಗಿದೆ. ಇದೇ ಅವಧಿಯಲ್ಲಿ 'ಎಟಿ ಆಂಡ್ ಟಿ' ನೆಟ್‌ವರ್ಕ್ ವ್ಯಾಪ್ತಿ ಇಲ್ಲದ ಪ್ರದೇಶಗಳಲ್ಲಿ ಹದಿಹರೆಯದವರ ಜನನ ಪ್ರಮಾಣ ಶೇ. 13.8 ರಷ್ಟು ಕುಸಿದರೆ, ಭಾಗಶಃ ನೆಟ್‌ವರ್ಕ್ ಇದ್ದ ಕಡೆ ಶೇ. 18.9 ರಷ್ಟು ಮತ್ತು ಸಂಪೂರ್ಣ ನೆಟ್‌ವರ್ಕ್ ಹೊಂದಿದ್ದ ಅತ್ಯಾಧುನಿಕ ಪ್ರದೇಶಗಳಲ್ಲಿ ಬರೋಬ್ಬರಿ ಶೇ. 26 ರಷ್ಟು ಭಾರಿ ಕುಸಿತ ದಾಖಲಾಗಿರುವುದು ಡಿಜಿಟಲ್ ಕ್ರಾಂತಿಯ ಪ್ರಭಾವವನ್ನು ಸ್ಪಷ್ಟಪಡಿಸುತ್ತದೆ.

ಆದರೆ, ಜನನ ಪ್ರಮಾಣದ ಈ ಇಳಿಕೆಗೆ ಕೇವಲ ಐಫೋನ್ ಎಂಬ ಸಾಧನವೊಂದೇ ನೇರ ಕಾರಣವಲ್ಲ ಎಂದು ಸಂಶೋಧಕರು ವಿಶ್ಲೇಷಿಸಿದ್ದಾರೆ. ಐಫೋನ್ ಸೇರಿದಂತೆ ಇತರೆ ಆಧುನಿಕ ಸ್ಮಾರ್ಟ್‌ಫೋನ್‌ಗಳ ಜನಪ್ರಿಯತೆ ಹೆಚ್ಚಾದಂತೆ, ಜನರು ತಮ್ಮ ಸಂಗಾತಿಗಳೊಂದಿಗೆ ಕಳೆಯುವ ಗುಣಮಟ್ಟದ ಸಮಯ ಗಣನೀಯವಾಗಿ ಕಡಿಮೆಯಾಗಿದ್ದು, ಲೈಂಗಿಕ ಸಂಪರ್ಕದಲ್ಲಿ ಇಳಿಕೆ ಹಾಗೂ ಅಶ್ಲೀಲ ಕಂಟೆಂಟ್‌ಗಳ ವೀಕ್ಷಣೆ ಹೆಚ್ಚಾಗಿರುವುದು ಇದಕ್ಕೆ ಪ್ರಮುಖ ಕಾರಣವಾಗಿದೆ. ಇದರ ಜೊತೆಗೆ, ಸ್ಮಾರ್ಟ್‌ಫೋನ್‌ಗಳ ಮೂಲಕ ಗರ್ಭನಿರೋಧಕ ಸಾಧನಗಳು ಹಾಗೂ ಸುರಕ್ಷಿತ ಗರ್ಭಪಾತದಂತಹ ಸೂಕ್ಷ್ಮ ವಿಷಯಗಳ ಕುರಿತು ನಿಖರ ಮಾಹಿತಿ ಮತ್ತು ಸೇವೆಗಳು ಸುಲಭವಾಗಿ ಲಭ್ಯವಾಗುತ್ತಿರುವುದು ಸಹ ಯುವ ಪೀಳಿಗೆಯಲ್ಲಿ ಜನನ ಪ್ರಮಾಣ ತಗ್ಗಲು ಮತ್ತೊಂದು ಪ್ರಮುಖ ಕಾರಣ ಎಂದು ಸಂಶೋಧಕರು ಬೆರಳು ಮಾಡಿ ತೋರಿಸಿದ್ದಾರೆ.

ಜನನ ಪ್ರಮಾಣದ ಈ ಕುಸಿತವು ಕೇವಲ ಅಮೆರಿಕಕ್ಕೆ ಮಾತ್ರ ಸೀಮಿತವಾಗಿಲ್ಲ, ಬದಲಿಗೆ ಇಡೀ ಜಗತ್ತಿನಾದ್ಯಂತ ಇಂತಹದ್ದೇ ಮಾದರಿಯ ಜಾಗತಿಕ ತಾಂತ್ರಿಕ ಆಘಾತ ಎದುರಾಗುತ್ತಿರುವುದನ್ನು ಜಗತ್ತಿನಾದ್ಯಂತದ ಸಂಶೋಧಕರು ಗುರುತಿಸಿದ್ದು, ಅದರಲ್ಲೂ ಹೈ-ಸ್ಪೀಡ್ ಇಂಟರ್ನೆಟ್ ಸಂಪರ್ಕ ಹೆಚ್ಚಿರುವ ಪ್ರದೇಶಗಳಲ್ಲೇ ಹದಿಹರೆಯದವರ ಜನನ ದರ ಅತ್ಯಂತ ವೇಗವಾಗಿ ಕುಸಿಯುತ್ತಿರುವುದನ್ನು ಅಧ್ಯಯನಗಳು ಸಾಬೀತುಪಡಿಸಿವೆ. ಏಷ್ಯಾದ ಅತ್ಯಂತ ಮುಂದುವರಿದ ಆರ್ಥಿಕ ರಾಷ್ಟ್ರಗಳೂ ಸಹ ಪ್ರಸ್ತುತ ಜನಸಂಖ್ಯಾ ಇಳಿಕೆಯ ಭೀಕರ ಸವಾಲನ್ನು ಎದುರಿಸುತ್ತಿದ್ದು, ಇದೇ ಕಾರಣಕ್ಕೆ ಚೀನಾ 2016ರಲ್ಲೇ ತನ್ನ 'ಒಂದು ಮಗು' ನೀತಿಯನ್ನು ಕೊನೆಗೊಳಿಸಿದೆ ಹಾಗೂ ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ದೇಶಗಳು ಜನನ ಪ್ರಮಾಣ ಹೆಚ್ಚಿಸಲು ಹೆರಿಗೆ ನಂತರದ ಉತ್ತೇಜನಾ ಯೋಜನೆಗಳಿಗಾಗಿ ಕೋಟಿ ಕೋಟಿ ಹಣ ಸುರಿದಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ, ಇನ್ನು ಸಬ್-ಸಹಸ್ರನ್ ಆಫ್ರಿಕಾದಂತಹ ವಿಶ್ವದ ಕೆಲವು ಬಡ ರಾಷ್ಟ್ರಗಳಲ್ಲಿ ಇಂದಿಗೂ ಜನನ ದರ ಹೆಚ್ಚಿದ್ದರೂ, ಭಾರತ ಮತ್ತು ಬ್ರೆಜಿಲ್‌ನಂತಹ ಮಧ್ಯಮ ಆದಾಯದ ಪ್ರಮುಖ ರಾಷ್ಟ್ರಗಳಲ್ಲೂ ಸಹ ಇದೀಗ ಜನನ ಪ್ರಮಾಣವು ಅತ್ಯಂತ ವೇಗವಾಗಿ ಕುಸಿಯಲಾರಂಭಿಸಿದೆ ಎಂದು ಸಂಶೋಧಕರು ಕಳವಳ ವ್ಯಕ್ತಪಡಿಸಿದ್ದಾರೆ, (ಏಜೆನ್ಸೀಸ್​).