ಬಿಲಿಯನ್ ಡಾಲರ್ ಬೂದಿ! ಇರಾನ್ ಕ್ಷಿಪಣಿ ಮಳೆಗೆ ಅಮೆರಿಕದ ಸೇನಾ ನೆಲೆಗಳು ಉಡೀಸ್; ಮುಚ್ಚಿಡಲಾಗದ ಹಾನಿ, ರಿಪೇರಿಗೆ ಬೇಕು ಸಾವಿರಾರು ಕೋಟಿ! US Military Bases Damage

ಎನ್‌ಬಿಸಿ ನ್ಯೂಸ್ ವರದಿಯ ಪ್ರಕಾರ, ಮಧ್ಯಪ್ರಾಚ್ಯದ ಏಳು ದೇಶಗಳಲ್ಲಿ ಹರಡಿರುವ ಅಮೆರಿಕದ ಮಿಲಿಟರಿ ನೆಲೆಗಳ ಮೇಲೆ ಇರಾನ್ ಅಕ್ಷರಶಃ ವಿನಾಶಕಾರಿ ದಾಳಿ ನಡೆಸಿದೆ. ಈ ಹಾನಿಯ ಪ್ರಮಾಣವನ್ನು ಈವರೆಗೆ ಸಾರ್ವಜನಿಕವಾಗಿ ಒಪ್ಪಿಕೊಂಡಿದ್ದಕ್ಕಿಂತಲೂ ಹಲವು ಪಟ್ಟು ಹೆಚ್ಚಿದೆ ಎಂದು ಹೇಳಲಾಗುತ್ತಿದೆ.

ವಿನಾಶದ ವ್ಯಾಪ್ತಿ: ಕಮಾಂಡ್ ಪ್ರಧಾನ ಕಛೇರಿಗಳು, ವಿಮಾನ ಹ್ಯಾಂಗರ್‌ಗಳು, ಬೃಹತ್ ಗೋದಾಮುಗಳು ಮತ್ತು ಅತ್ಯಾಧುನಿಕ ಉಪಗ್ರಹ ಸಂವಹನ ವ್ಯವಸ್ಥೆಗಳು ಇರಾನ್‌ನ ನಿಖರ ದಾಳಿಗೆ ತುತ್ತಾಗಿವೆ.

ಕಣ್ಗಾವಲು ವ್ಯವಸ್ಥೆ ಧ್ವಂಸ: ಯುದ್ಧದ ವೇಳೆ ಕಣ್ಗಾವಲು ನಡೆಸಲು ಬೇಕಾದ ಹೈ-ಎಂಡ್ ರೇಡಾರ್ ವ್ಯವಸ್ಥೆಗಳು ಮತ್ತು ರನ್‌ವೇಗಳು ಜಖಂಗೊಂಡಿದ್ದು, ಅಮೆರಿಕದ ಮಿಲಿಟರಿ ಮೂವ್‌ಮೆಂಟ್‌ಗೆ ಅಡ್ಡಿಯುಂಟಾಗಿದೆ.

ಅತ್ಯಾಧುನಿಕ ವೈಮಾನಿಕ ರಕ್ಷಣಾ ವ್ಯವಸ್ಥೆಗಳನ್ನು ಹೊಂದಿರುವ ಅಮೆರಿಕಕ್ಕೆ ಇರಾನ್ ಅನಿರೀಕ್ಷಿತ ಪೆಟ್ಟು ನೀಡಿದೆ. ಇರಾನ್‌ನ ದಶಕಗಳಷ್ಟು ಹಳೆಯದಾದ F-5 ಫೈಟರ್ ಜೆಟ್ ಒಂದು ಅಮೆರಿಕದ ಶಕ್ತಿಶಾಲಿ ಡಿಫೆನ್ಸ್ ಸಿಸ್ಟಮ್‌ಗಳನ್ನು ವಂಚಿಸಿ ದಾಳಿ ನಡೆಸಿರುವುದು ಈಗ ಪೆಂಟಗನ್‌ಗೆ ತಲೆನೋವಾಗಿ ಪರಿಣಾಮಿಸಿದೆ. ಅಮೆರಿಕದ ರಕ್ಷಣಾ ತಂತ್ರಜ್ಞಾನದ ದಕ್ಷತೆಯ ಬಗ್ಗೆಯೂ ಇದು ದೊಡ್ಡ ಪ್ರಶ್ನೆಯನ್ನು ಹುಟ್ಟುಹಾಕಿದೆ.

ತನ್ನ ಸೇನಾ ನೆಲೆಗಳಿಗೆ ಉಂಟಾಗಿರುವ ಹಾನಿಯ ಬಗ್ಗೆ ಅಮೆರಿಕದ ರಕ್ಷಣಾ ಇಲಾಖೆ ಮತ್ತು ಯುಎಸ್ ಸೆಂಟ್ರಲ್ ಕಮಾಂಡ್ ಸದ್ಯಕ್ಕೆ ಮೌನ ವಹಿಸಿವೆ. ಆದರೆ, ಈ ಮೌನವು ದೇಶದ ಒಳಗೆ ರಾಜಕೀಯ ಕಿಚ್ಚು ಹಚ್ಚಿದೆ.

ನಾವು ವಾರಗಳಿಂದ ಪ್ರಶ್ನೆ ಮಾಡುತ್ತಿದ್ದೇವೆ, ಆದರೆ ಪೆಂಟಗನ್ ಸಣ್ಣ ಮಾಹಿತಿಯನ್ನೂ ನೀಡುತ್ತಿಲ್ಲ. ಇಷ್ಟೊಂದು ದೊಡ್ಡ ಮಟ್ಟದ ಬಜೆಟ್ ಕೇಳುತ್ತಿರುವಾಗ, ದೇಶದ ಜನರಿಗೆ ಈ ನಷ್ಟದ ಬಗ್ಗೆ ತಿಳಿಯುವ ಹಕ್ಕಿದೆ ಎಂದು ರಿಪಬ್ಲಿಕನ್ ಪಕ್ಷದ ಶಾಸಕರು ಕಿಡಿಕಾರಿದ್ದಾರೆ.

ಧ್ವಂಸಗೊಂಡಿರುವ ನೆಲೆಗಳನ್ನು ಮರುನಿರ್ಮಾಣ ಮಾಡಲು ಸಾವಿರಾರು ಕೋಟಿ ಡಾಲರ್ (ಬಿಲಿಯನ್ ಡಾಲರ್) ವೆಚ್ಚವಾಗಲಿದೆ ಎಂದು ಅಂದಾಜಿಸಲಾಗಿದೆ. ಒಂದು ವರದಿಯ ಪ್ರಕಾರ, ಯುದ್ಧದ ಆರಂಭಿಕ ಹಂತದಲ್ಲೇ ಅಮೆರಿಕ ಪ್ರತಿ ವಾರ ಸಾವಿರಾರು ಕೋಟಿ ರೂಪಾಯಿಗಳನ್ನು ವ್ಯಯಿಸುತ್ತಿದೆ. ಇದು ಅಮೆರಿಕದ ಆರ್ಥಿಕತೆಯ ಮೇಲೆ ದೊಡ್ಡ ಹೊರೆಯಾಗುವ ಲಕ್ಷಣಗಳು ಕಾಣಿಸುತ್ತಿವೆ.

ಈ ವಿನಾಶದ ನಂತರ ಅಮೆರಿಕದ ಮಿಲಿಟರಿ ವಲಯದಲ್ಲಿ ಹೊಸ ಚರ್ಚೆ ಆರಂಭವಾಗಿದೆ. ಇರಾನ್‌ನಂತಹ ಬಲಿಷ್ಠ ವೈರಿಯ ಅತ್ಯಂತ ಸಮೀಪದಲ್ಲಿ ಅಮೆರಿಕದ ಸೇನಾ ನೆಲೆಗಳನ್ನು ಮುಂದುವರಿಸುವುದು ಸಾಧ್ಯವೇ ಎಂಬ ಪ್ರಶ್ನೆ ಎದ್ದಿದೆ. ಈ ನೆಲೆಗಳ ರಕ್ಷಣೆಗಾಗಿ ಇನ್ನೂ ಎಷ್ಟು ಕೋಟಿ ಹಣ ಸುರಿಯಬೇಕು ಎಂಬ ಚರ್ಚೆ ಈಗ ಗಂಭೀರ ಸ್ವರೂಪ ಪಡೆದುಕೊಂಡಿದೆ.

ಪಶ್ಚಿಮ ಏಷ್ಯಾದ ಈ ಮಹಾಯುದ್ಧವು ಕೇವಲ ಎರಡು ದೇಶಗಳ ನಡುವಿನ ಸಂಘರ್ಷವಾಗಿ ಉಳಿಯದೆ, ಜಾಗತಿಕ ಮಾರುಕಟ್ಟೆ ಮತ್ತು ಮಿಲಿಟರಿ ಶಕ್ತಿ ಪ್ರದರ್ಶನದ ಕಣವಾಗಿ ಮಾರ್ಪಟ್ಟಿದೆ,(ಏಜೆನ್ಸೀಸ್).