ದೊಡ್ಡಣ್ಣನ ದೊಡ್ಡ ಸಾಲ!

ವಿಶ್ವದ ಆರ್ಥಿಕತೆ, ರಾಜಕೀಯ ಮತ್ತು ಮಿಲಿಟರಿ ಶಕ್ತಿಯನ್ನು ತನ್ನ ಬೆರಳ ತುದಿಯಲ್ಲಿ ನಿಯಂತ್ರಿಸುವ ಅಮೆರಿಕ, ಇಂದು ಜಗತ್ತಿನಲ್ಲಿ ಅತಿ ದೊಡ್ಡ ಸಾಲಗಾರ ದೇಶ ಎಂಬ ಹಣೆಪಟ್ಟಿ ಹಚ್ಚಿಕೊಂಡಿದೆ. ಅಮೆರಿಕದ ಹಣಕಾಸು ಇಲಾಖೆಯ ಅಧಿಕೃತ ಅಂಕಿಅಂಶಗಳ ಪ್ರಕಾರ, ದೇಶದ ಒಟ್ಟು ರಾಷ್ಟ್ರೀಯ ಸಾಲ ಭಾರಿ ವೇಗದಲ್ಲಿ ಏರುತ್ತಾ ಸದ್ಯ 40,000,000,000,000 ಡಾಲರ್​ (40 ಟ್ರಿಲಿಯನ್​) ಗಡಿಯನ್ನು ತಲುಪಿದೆ.

ಇದನ್ನು ಭಾರತೀಯ ರೂಪಾಯಿ ಮೌಲ್ಯಕ್ಕೆ ಲೆಕ್ಕ ಹಾಕಿದರೆ, ಸುಮಾರು 3,828.71 ಲಕ್ಷ ಕೋಟಿ ರೂ. ಆಗುತ್ತದೆ. ಅಮೆರಿಕದ ಇತಿಹಾಸವನ್ನು ಗಮನಿಸಿದರೆ, ಕೇವಲ ಒಂದು ದಶಕದ ಹಿಂದೆ, ಅಂದರೆ 2016ರಲ್ಲಿ ದೇಶದ ಒಟ್ಟು ಸಾಲ 19.9 ಟ್ರಿಲಿಯನ್​ ಡಾಲರ್​ ಇತ್ತು. ಆದರೆ ಡೊನಾಲ್ಡ್​ ಟ್ರಂಪ್​ ಮತ್ತು ಜೋ ಬೈಡನ್​ ಅವರ ಆಡಳಿತಾವಧಿಯಲ್ಲಿ ಜಾರಿಗೆ ಬಂದ ತರಹೇವಾರಿ ಆರ್ಥಿಕ ನೀತಿಗಳಿಂದಾಗಿ ಈ ಸಾಲದ ಮೊತ್ತ ಕೇವಲ 10 ವರ್ಷಗಳಲ್ಲಿ ದುಪ್ಪಟ್ಟಾಗಿದೆ. ಇದು ಜಾಗತಿಕ ಮಾರುಕಟ್ಟೆಯಲ್ಲಿ ತಲ್ಲಣ ಮೂಡಿಸಿದೆ.

ಅಮೆರಿಕದ ಆರ್ಥಿಕತೆ ಈ ಮಟ್ಟದ ದಿಢೀರ್​ ಕುಸಿತ ಕಾಣಲು ಮತ್ತು ಸಾಲದ ಗ್ರಾಫ್​ ರಾಕೆಟ್​ ವೇಗದಲ್ಲಿ ಏರಲು ಮುಖ್ಯವಾಗಿ ನಾಲ್ಕು ಆಂತರಿಕ ಹಾಗೂ ಬಾಹ್ಯ ರಾಜತಾಂತ್ರಿಕ ಕಾರಣಗಳನ್ನು ಗುರುತಿಸಲಾಗಿದೆ.

ಕೋವಿಡ್​ನ ಆರ್ಥಿಕ ಹೊಡೆತ: ಕರೊನಾ ವೈರಸ್​ ಜಗತ್ತನ್ನು ಕಾಡಿದ ಸಮಯದಲ್ಲಿ ಅಮೆರಿಕ ತನ್ನ ನಾಗರಿಕರಿಗೆ ಮತ್ತು ಉದ್ಯಮಗಳಿಗೆ ನೆರವಾಗಲು ಭಾರಿ ಪ್ರಮಾಣದ ಆರ್ಥಿಕ ಉತ್ತೇಜನ ಪ್ಯಾಕೇಜ್​ಗಳನ್ನು ಘೋಷಿಸಿತು. ಉಚಿತ ಸವಲತ್ತುಗಳು ಮತ್ತು ನಿರುದ್ಯೋಗ ಭತ್ಯೆಗಳಿಗಾಗಿ ಬಿಡುಗಡೆ ಮಾಡಿದ ಬಿಲಿಯನ್​ಗಟ್ಟಲೆ ಡಾಲರ್​ ಹಣ ಸರ್ಕಾರದ ಖಜಾನೆಗೆ ದೊಡ್ಡ ಹೊರೆಯಾಯಿತು.

ಅತಿರೇಕದ ತೆರಿಗೆ ಕಡಿತ ನೀತಿಗಳು: ಕಾರ್ಪೊರೇಟ್​ ವಲಯವನ್ನು ಓಲೈಸಲು ಮತ್ತು ಆರ್ಥಿಕ ವೃದ್ಧಿಗಾಗಿ ಜಾರಿಗೆ ತಂದ ಭಾರಿ ಪ್ರಮಾಣದ ವೈಯಕ್ತಿಕ ಹಾಗೂ ಸಾಂಸ್ಥಿಕ ತೆರಿಗೆ ಕಡಿತಗಳು ಸರ್ಕಾರದ ಆದಾಯದ ಮೂಲವನ್ನೇ ಒಣಗಿಸಿದವು. ಆದಾಯ ಕುಸಿದಾಗ ಕೊರತೆಯನ್ನು ತುಂಬಲು ದೇಶ ಸಾಲದ ಮೊರೆ ಹೋಗಬೇಕಾಯಿತು.

ಜಾಗತಿಕ ಯುದ್ಧ, ಮಿಲಿಟರಿ ವೆಚ್ಚಗಳು: ಯೂಕ್ರೇನ್​-ರಷ್ಯಾ ಸಂಘರ್ಷ, ಇಸ್ರೇಲ್​-ಹಮಾಸ್​ ಕದನ ಹಾಗೂ ಇರಾನ್​ ಸಂಬಂಧಿತ ಜಾಗತಿಕ ರಣಾ ವಿದ್ಯಮಾನಗಳಲ್ಲಿ ಅಮೆರಿಕ ನಿರಂತರವಾಗಿ ಭಾಗಿಯಾಗುತ್ತಿದೆ. ಮಿಲಿಟರಿ ಶಸ್ತ್ರಾಸ್ತ್ರ ಸರಬರಾಜು ಮತ್ತು ರಣಾ ವಲಯಕ್ಕಾಗಿ ಕೋಟ್ಯಂತರ ಡಾಲರ್​ ಹಣವನ್ನು ನಿರಂತರವಾಗಿ ವ್ಯಯಿಸುತ್ತಿರುವುದು ಸಾಲದ ಪ್ರಮಾಣವನ್ನು ಮತ್ತಷ್ಟು ಹೆಚ್ಚಿಸಿದೆ.

ಸುಪ್ರೀಂ ಕೋರ್ಟ್​ ಆದೇಶ, ರಾಜಕೀಯ ಬಿಕ್ಕಟ್ಟು: ಅಧ್ಯಕ್ಷ ಜೋ ಬೈಡನ್​ ನೇತೃತ್ವದ ಸರ್ಕಾರದ ಕೆಲವು ಮಹತ್ವಾಕಾಂಕ್ಷಿ ತೆರಿಗೆ ಮತ್ತು ಸಾಲ ಮನ್ನಾ ಯೋಜನೆಗಳನ್ನು ಅಲ್ಲಿನ ಸುಪ್ರೀಂ ಕೋರ್ಟ್​ ಕಾನೂನುಬಾಹಿರ ಎಂದು ರದ್ದುಗೊಳಿಸಿತು. ಇದರಿಂದಾಗಿ ಅಮೆರಿಕ ಸರ್ಕಾರಕ್ಕೆ ಅನಿವಾರ್ಯವಾಗಿ ಸುಮಾರು 100 ಬಿಲಿಯನ್​ ಡಾಲರ್​ ಆದಾಯದ ಮರುಪಾವತಿ ನಷ್ಟ ಉಂಟಾಯಿತು.

ವಿಶ್ವ ಆರ್ಥಿಕ ವೇದಿಕೆಯ ವರದಿಗಳ ಪ್ರಕಾರ, ಅತಿ ಹೆಚ್ಚು ರಾಷ್ಟ್ರೀಯ ಸಾಲ ಹೊಂದಿರುವ ಮೊದಲ ಐದು ದೇಶಗಳ ವಿವರ ಹೀಗಿದೆ.

ಅಮೆರಿಕದ ಸಂವಿಧಾನ ಮತ್ತು ಕಾಂಗ್ರೆಸ್​ನ ನಿಯಮಗಳ ಪ್ರಕಾರ, ದೇಶವು ಗರಿಷ್ಠ 41.1 ಟ್ರಿಲಿಯನ್​ ಡಾಲರ್​ವರೆಗೆ ಮಾತ್ರ ಸಾಲ ಮಾಡಲು ಅವಕಾಶವಿದೆ. ಆದರೆ ಪ್ರಸ್ತುತ ವೇಗವನ್ನು ಗಮನಿಸಿದರೆ, ಕೇವಲ ಇತ್ತೀಚಿನ 5 ತಿಂಗಳ ಅವಧಿಯಲ್ಲೇ 1 ಟ್ರಿಲಿಯನ್​ ಡಾಲರ್​ ಸಾಲ ಹೊಸದಾಗಿ ಸೇರ್ಪಡೆಯಾಗಿದೆ. ಅಂದರೆ ಪ್ರತಿ ತಿಂಗಳು ಸರಾಸರಿ 200 ಬಿಲಿಯನ್​ ಡಾಲರ್​ ಸಾಲ ಹೆಚ್ಚಾಗುತ್ತಿದೆ. ಒಂದು ವೇಳೆ ಅಮೆರಿಕದ ಸಾಲದ ಪ್ರಮಾಣ 41.1 ಟ್ರಿಲಿಯನ್​ ಡಾಲರ್​ ದಾಟಿದರೆ ಮತ್ತು ಅಲ್ಲಿನ ಸಂಸತ್ತು ಸಾಲದ ಮಿತಿಯನ್ನು ಮತ್ತಷ್ಟು ಹೆಚ್ಚಿಸಲು ಒಪ್ಪಿಗೆ ನೀಡದಿದ್ದರೆ, ದೇಶದಲ್ಲಿ ಗವರ್ನಮೆಂಟ್​ ಶಟ್​ಡೌನ್​ ಅಂದರೆ "ಸರ್ಕಾರಿ ವ್ಯವಸ್ಥೆ ಸ್ಥಗಿತ' ಉಂಟಾಗಲಿದೆ. ಇದರಿಂದ ಸರ್ಕಾರಿ ನೌಕರರಿಗೆ ವೇತನ ನೀಡಲು, ಮಿಲಿಟರಿ ವೆಚ್ಚ ಭರಿಸಲು ಮತ್ತು ಜಾಗತಿಕ ಸಾಲದ ಮೇಲಿನ ಬಡ್ಡಿಯನ್ನು ಕಟ್ಟಲು ಹಣವಿಲ್ಲದೆ ಅಮೆರಿಕ ದಿವಾಳಿಯಾಗುವ ಭೀತಿ ಎದುರಾಗಲಿದೆ.

ಅಮೆರಿಕದ ಆತಂಕಕಾರಿ ಪರಿಸ್ಥಿತಿಗೆ ಹೋಲಿಸಿದರೆ ಭಾರತದ ಆರ್ಥಿಕ ಸ್ಥಿತಿ ಸಾಕಷ್ಟು ಸ್ಥಿರ, ಸುರಕ್ಷಿತ ಹಾಗೂ ಸಂಪೂರ್ಣ ನಿಯಂತ್ರಣದಲ್ಲಿದೆ. ಪ್ರಸ್ತುತ ಭಾರತದ ಒಟ್ಟು ರಾಷ್ಟ್ರೀಯ ಸಾಲದ ಪ್ರಮಾಣ ಸುಮಾರು 3 ಟ್ರಿಲಿಯನ್​ ಡಾಲರ್​ (ಅಂದಾಜು 250 ಲಕ್ಷ ಕೋಟಿ ರೂ.) ಆಸುಪಾಸಿನಲ್ಲಿದೆ. ಭಾರತಕ್ಕೆ ಪ್ರಮುಖ ಅನುಕೂಲಕರ ಅಂಶ ಏನೆಂದರೆ, ನಮ್ಮ ಸಾಲ ಮತ್ತು ಜಿಡಿಪಿ ಅನುಪಾತ ಸದ್ಯ ಶೇ. 81ರಿಂದ 83ರಷ್ಟಿದೆ. ಅಭಿವೃದ್ಧಿ ಹೊಂದುತ್ತಿರುವ ಮತ್ತು ಉದಯೋನ್ಮುಖ ಆರ್ಥಿಕತೆಗಳನ್ನು ಹೊಂದಿರುವ ದೇಶಗಳಿಗೆ ಹೋಲಿಸಿದರೆ ಭಾರತ ಸುರಕ್ಷಿತ ವಲಯದಲ್ಲಿದೆ. ಭಾರತದ ಆರ್ಥಿಕ ನೀತಿಗಳು, ಬಲಿಷ್ಠ ದೇಶೀಯ ಮಾರುಕಟ್ಟೆ ಹಾಗೂ ಆರ್​ಬಿಐ ತೆಗೆದುಕೊಳ್ಳುತ್ತಿರುವ ಮುನ್ನೆಚ್ಚರಿಕಾ ಕ್ರಮಗಳು ದೇಶವನ್ನು ಯಾವುದೇ ದೊಡ್ಡ ಜಾಗತಿಕ ಆರ್ಥಿಕ ಹಿಂಜರಿತದಿಂದ ರಕ್ಷಿಸುವ ಸಾಮರ್ಥ್ಯ ಹೊಂದಿವೆ. ಆದರೂ ಅಮೆರಿಕದ ಡಾಲರ್​ ಮೌಲ್ಯ ಏರುಪೇರಾದರೆ ಅದು ಭಾರತೀಯ ರೂಪಾಯಿ ಮತ್ತು ಷೇರು ಮಾರುಕಟ್ಟೆಯ ಮೇಲೆ ಅಲ್ಪಾವಧಿಯ ಪ್ರಭಾವ ಬೀರುವ ಸಾಧ್ಯತೆ ಇದೆ.