ನೇಪಾಳ ಪ್ರವಾಹಕ್ಕೂ ಮುನ್ನ ಡ್ರೋನ್​ ಕ್ಯಾಮರಾದಲ್ಲಿ ಸೆರೆಯಾಯ್ತು ಮೈಜುಮ್​ ಎನ್ನುವ ಹಿಮನದಿ ಕುಸಿದು ಬೀಳುವ ದೃಶ್ಯ | Nepal Floods

ಕಾಠ್ಮಂಡು: ನೇಪಾಳ ಮತ್ತು ಟಿಬೆಟ್‌ ಗಡಿಯಲ್ಲಿ ಸಂಭವಿಸಿದ ರಣ ಭೀಕರ ಪ್ರವಾಹಕ್ಕೆ 900ಕ್ಕೂ ಹೆಚ್ಚು ಮಂದಿ ದಾರುಣವಾಗಿ ಸಾವಿಗೀಡಾದರೆ, ಸಾವಿರಾರು ಮಂದಿ ನಾಪತ್ತೆಯಾಗಿದ್ದಾರೆ. ಇಂತಹ ಘೋರ ದುರಂತಕ್ಕೆ ಕಾರಣವಾದ ಹಿಮನದಿ ಕುಸಿತದ ನೈಜ ದೃಶ್ಯಗಳು ಇದೀಗ ಡ್ರೋನ್​ ಕ್ಯಾಮರಾದಲ್ಲಿ ಸೆರೆಯಾಗಿರುವುದು ನಿಜಕ್ಕೂ ಅಚ್ಚರಿ ಮೂಡಿಸಿದೆ. 

ಚೀನಾ ಮೂಲದ ಛಾಯಾಗ್ರಾಹಕರೊಬ್ಬರು ಸೆರೆಹಿಡಿದಿರುವ ಈ ವಿಡಿಯೋದಲ್ಲಿ, ಅಕಸ್ಮಾತ್​ ಆಗಿ ಸಮುದ್ರ ಮಟ್ಟದಿಂದ 7,200 ಮೀಟರ್‌ಗೂ ಹೆಚ್ಚು ಎತ್ತರದಲ್ಲಿರುವ ಲಂಗ್‌ಟಾಂಗ್ ಲಿರುಂಗ್ ಶಿಖರದ ಇಳಿಜಾರಿನಿಂದ ಬೃಹತ್ ಹಿಮ ಮತ್ತು ಬಂಡೆಗಳ ಭಾಗ ಹಠಾತ್ತನೆ ಕುಸಿದು ಬೀಳುವ ದೃಶ್ಯ ಕ್ಲಿಯರ್​ ಆಗಿ ರೆಕಾರ್ಡ್​ ಆಗಿದೆ. ರಕ್ಕಸ ಪ್ರವಾಹ ಸೃಷ್ಟಿಯಾಗುವ ಮೊದಲು ಸಂಭವಿಸಿದ ಘಟನೆ ಡ್ರೋನ್​ ಕ್ಯಾಮರಾದಲ್ಲಿ ಸೆರೆಯಾಗಿರುವುದು ನಿಜಕ್ಕೂ ಮೈಜುಮ್ ಎನ್ನುವಂತಿದೆ.  

ಆಗಸ್ಟ್ 26ರಂದು ಸಂಭವಿಸಿದ ಈ ದುರಂತದಲ್ಲಿ, ಸುಮಾರು 1,200 ಮೀಟರ್ ಆಳಕ್ಕೆ ಕಲ್ಲು, ಹಿಮ, ಕೆಸರು ಹಾಗೂ ತ್ಯಾಜ್ಯಗಳ ರಾಶಿ ಅಪ್ಪಳಿಸಿ ಭೋಟೇಕೋಶಿ ಮತ್ತು ತ್ರಿಶೂಲಿ ನದಿಗಳಲ್ಲಿ ಭೀಕರ ಪ್ರವಾಹ ಸೃಷ್ಟಿಸಿತು. ಈ ಭೀಕರ ಪ್ರಕೃತಿ ವಿಕೋಪಕ್ಕೆ ನೇಪಾಳದಲ್ಲಿ 903 ಹಾಗೂ ಟಿಬೆಟ್‌ನಲ್ಲಿ 16 ಸೇರಿದಂತೆ ಒಟ್ಟು 919 ಜನರು ಮೃತಪಟ್ಟಿದ್ದಾರೆ. ಇನ್ನೂ 3,000ಕ್ಕೂ ಹೆಚ್ಚು ಮಂದಿ ನಾಪತ್ತೆಯಾಗಿದ್ದು, ಅವರ ಸುಳಿವಿಗೆ ಶೋಧ ಕಾರ್ಯಾಚರಣೆ ತೀವ್ರಗೊಂಡಿದೆ.