ಆಸ್ಟ್ರೇಲಿಯನ್ ಓಪನ್ 2026: ಜೋಕೊವಿಚ್ ಸಾಮ್ರಾಜ್ಯ ಪತನ; ಅಲ್ಕರಾಜ್ ಮುಡಿಗೆ ಚೊಚ್ಚಲ ಆಸೀಸ್ ಕಿರೀಟ | Carlos Alcaraz

ರೋಡ್ ಲೇವರ್ ಅರೆನಾದಲ್ಲಿ ನಡೆದ ಭೀಕರ ಹಣಾಹಣಿಯಲ್ಲಿ ಸ್ಪೇನ್‌ನ ಅಲ್ಕರಾಜ್ ಅವರು ಜೋಕೊವಿಚ್ ವಿರುದ್ಧ 2-6, 6-2, 6-3, 7-5 ಸೆಟ್‌ಗಳ ಅಂತರದಲ್ಲಿ ಗೆಲುವು ದಾಖಲಿಸಿದರು.

ಮೊದಲ ಸೆಟ್ (2-6): ಜೋಕೊವಿಚ್ ಆಕ್ರಮಣಕಾರಿ ಆರಂಭ ಪಡೆದರು. ಕೇವಲ 33 ನಿಮಿಷಗಳಲ್ಲಿ ಎರಡು ಬಾರಿ ಅಲ್ಕರಾಜ್ ಸರ್ವ್ ಬ್ರೇಕ್ ಮಾಡುವ ಮೂಲಕ ಸೆಟ್ ಗೆದ್ದರು. ಅಲ್ಕರಾಜ್ ಆರಂಭದಲ್ಲಿ ಸ್ವಲ್ಪ ಒತ್ತಡಕ್ಕೆ ಒಳಗಾದಂತೆ ಕಂಡರು.

ಎರಡನೇ ಸೆಟ್ (6-2): ಅಲ್ಕರಾಜ್ ಅದ್ಭುತವಾಗಿ ಪುಟಿದೆದ್ದರು. ಜೋಕೊವಿಚ್ ಅವರ ಸರ್ವ್ ಅನ್ನು ಎರಡು ಬಾರಿ ಬ್ರೇಕ್ ಮಾಡಿ, ಕೇವಲ 36 ನಿಮಿಷಗಳಲ್ಲಿ ಸೆಟ್ ಅನ್ನು ತಮ್ಮದಾಗಿಸಿಕೊಂಡು ಪಂದ್ಯವನ್ನು 1-1 ಸಮಬಲಕ್ಕೆ ತಂದರು.

ಮೂರನೇ ಸೆಟ್ (6-3): ಈ ಸೆಟ್ ಅತ್ಯಂತ ರೋಚಕ ರ‍್ಯಾಲಿಗಳಿಗೆ ಸಾಕ್ಷಿಯಾಯಿತು. ಅಲ್ಕರಾಜ್ ನಿರ್ಣಾಯಕ ಹಂತದಲ್ಲಿ ಬ್ರೇಕ್ ಪಾಯಿಂಟ್ ಪಡೆದು ಮುನ್ನಡೆ ಸಾಧಿಸಿದರು. ಜೋಕೊವಿಚ್ ನಾಲ್ಕು ಸೆಟ್ ಪಾಯಿಂಟ್‌ಗಳನ್ನು ಉಳಿಸಿದರೂ, ಅಂತಿಮವಾಗಿ ಅಲ್ಕರಾಜ್ ಸೆಟ್ ಗೆದ್ದರು.

ನಾಲ್ಕನೇ ಸೆಟ್ (7-5): ಇಬ್ಬರೂ ಆಟಗಾರರು ಸಮಬಲದ ಹೋರಾಟ ನೀಡಿದರು. ಸ್ಕೋರ್ 5-5 ಸಮಬಲವಿದ್ದಾಗ ಅಲ್ಕರಾಜ್ ತಮ್ಮ ತಾಳ್ಮೆ ಕಳೆದುಕೊಳ್ಳದೆ ಜೋಕೊವಿಚ್ ಸರ್ವ್ ಬ್ರೇಕ್ ಮಾಡಿದರು. ಅಂತಿಮ ಗೇಮ್‌ನಲ್ಲಿ ತಮ್ಮ ಸರ್ವ್ ಉಳಿಸಿಕೊಳ್ಳುವ ಮೂಲಕ ಚಾಂಪಿಯನ್ ಪಟ್ಟಕ್ಕೇರಿದರು.

ಅಲ್ಕರಾಜ್ ಈ ಗೆಲುವಿನ ಮೂಲಕ 1938ರಲ್ಲಿ ಡಾನ್ ಬಡ್ಜ್ ನಿರ್ಮಿಸಿದ್ದ ದಾಖಲೆಯನ್ನು ಅಳಿಸಿ ಹಾಕಿದರು. ಕೇವಲ 22 ವರ್ಷ 272 ದಿನಗಳ ವಯಸ್ಸಿನಲ್ಲಿ ನಾಲ್ಕೂ ಗ್ರ್ಯಾಂಡ್ ಸ್ಲಾಮ್‌ಗಳನ್ನು ಗೆಲ್ಲುವ ಮೂಲಕ ಅಲ್ಕರಾಜ್ ಹೊಸ ಮೈಲಿಗಲ್ಲು ಸ್ಥಾಪಿಸಿದ್ದಾರೆ. ಇದು ಅವರ ಒಟ್ಟಾರೆ 7ನೇ ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿಯಾಗಿದೆ.

ಮೆಲ್ಬೋರ್ನ್ ಪಾರ್ಕ್‌ನಲ್ಲಿ ಈ ಹಿಂದೆ ಹತ್ತು ಬಾರಿ ಫೈನಲ್ ಪ್ರವೇಶಿಸಿ ಹತ್ತೂ ಬಾರಿಯೂ ಪ್ರಶಸ್ತಿ ಗೆದ್ದಿದ್ದ ಜೋಕೊವಿಚ್‌ಗೆ ಇದು ಆಸ್ಟ್ರೇಲಿಯನ್ ಓಪನ್ ಫೈನಲ್‌ನಲ್ಲಿ ಎದುರಾದ ಮೊದಲ ಸೋಲಾಗಿದೆ. 25ನೇ ಗ್ರ್ಯಾಂಡ್ ಸ್ಲಾಮ್ ಗೆದ್ದು ಸಾರ್ವಕಾಲಿಕ ದಾಖಲೆ ಬರೆಯುವ ಜೋಕೊವಿಚ್ ಅವರ ಕನಸನ್ನು ಅಲ್ಕರಾಜ್ ಭಗ್ನಗೊಳಿಸಿದರು. ಪಂದ್ಯದ ಮೊದಲ ಸೆಟ್ ಅನ್ನು 6-2 ರಿಂದ ಗೆದ್ದು ಪ್ರಾಬಲ್ಯ ಮೆರೆದಿದ್ದ 38 ವರ್ಷದ ಜೋಕೊವಿಚ್ ವಿರುದ್ಧ ಅಲ್ಕರಾಜ್ ಅದ್ಭುತವಾಗಿ ಪುಟಿದೆದ್ದರು.

ಗ್ಯಾಲರಿಯಲ್ಲಿ ಕುಳಿತು ಪಂದ್ಯ ವೀಕ್ಷಿಸುತ್ತಿದ್ದ ಸ್ಪ್ಯಾನಿಷ್ ದಿಗ್ಗಜ ರಾಫೆಲ್ ನಡಾಲ್, ಅಲ್ಕರಾಜ್ ಗೆಲ್ಲುತ್ತಿದ್ದಂತೆ ಎದ್ದು ನಿಂತು ಚಪ್ಪಾಳೆ ತಟ್ಟುವ ಮೂಲಕ ಸಂಭ್ರಮಿಸಿದರು. ಪಂದ್ಯಕ್ಕೂ ಮುನ್ನ ಕಾರ್ಲೋಸ್ ಈಗ ತನ್ನ ಉತ್ತುಂಗದಲ್ಲಿದ್ದಾನೆ, ಅವನು ಗೆಲ್ಲುವ ನೆಚ್ಚಿನ ಆಟಗಾರ ಎಂದು ನಡಾಲ್ ಭವಿಷ್ಯ ನುಡಿದಿದ್ದರು, ಅದು ಈಗ ನಿಜವಾಗಿದೆ.

ಮೂರನೇ ಸೆಟ್‌ನಲ್ಲಿ ಮ್ಯಾಜಿಕ್ ಪ್ರದರ್ಶಿಸಿದ ಅಲ್ಕರಾಜ್, ಜೋಕೊವಿಚ್ ಸರ್ವ್ ಅನ್ನು ಬ್ರೇಕ್ ಮಾಡಿ ಮುನ್ನಡೆ ಸಾಧಿಸಿದರು. ನಾಲ್ಕನೇ ಸೆಟ್‌ನಲ್ಲಿ ಜೋಕೊವಿಚ್ ತಿರುಗೇಟು ನೀಡಲು ಪ್ರಯತ್ನಿಸಿದರೂ, ಅಲ್ಕರಾಜ್ ಅವರ ವೇಗ ಮತ್ತು ಚಾಣಾಕ್ಷತನದ ಮುಂದೆ ಸಾಧ್ಯವಾಗಲಿಲ್ಲ. ಪಂದ್ಯವು ಮೂರನೇ ಗಂಟೆಗೆ ಕಾಲಿಟ್ಟಾಗ ಅಲ್ಕರಾಜ್ ನಿರ್ಣಾಯಕ ಬ್ರೇಕ್ ಪಾಯಿಂಟ್ ಪಡೆದು ಪಂದ್ಯವನ್ನು ತಮ್ಮದಾಗಿಸಿಕೊಂಡರು.

ಈ ಗೆಲುವಿನ ಮೂಲಕ ಅಲ್ಕರಾಜ್ ಅವರು ಫ್ರೆಡ್ ಪೆರ್ರಿ, ರಾಡ್ ಲೇವರ್, ರೋಜರ್ ಫೆಡರರ್ ಮತ್ತು ರಾಫೆಲ್ ನಡಾಲ್ ಅವರಂತಹ ದಿಗ್ಗಜರ ಸಾಲಿಗೆ ಸೇರಿದ್ದಾರೆ. ಮೆಲ್ಬೋರ್ನ್ ಅಂಗಳದಲ್ಲಿ ಇಂದು ಹೊಸ ಯುಗವೊಂದು ಆರಂಭವಾಗಿದೆ ಎಂದು ಟೆನಿಸ್ ವಿಶ್ಲೇಷಕರು ಬಣ್ಣಿಸಿದ್ದಾರೆ,(ಏಜೆನ್ಸೀಸ್).