ಬಾಂಗ್ಲಾದಲ್ಲಿ ಹಿಂದೂಗಳ ಮೇಲೆ ದಾಳಿ ನಡೆಯಲು ಯೂನಸ್​ನ ಪ್ರಚೋದನೆಯೇ ಕಾರಣ: ಶೇಖ್ ಹಸೀನಾ | Sheikh Hasina

ನವದೆಹಲಿ : ಬಾಂಗ್ಲಾದೇಶದ ಹಿಂದೂಗಳ ಮೇಲಿನ ದಾಳಿಗೆ ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಶೇಖ್ ಹಸೀನಾ (Sheikh Hasina) ಸರ್ಕಾರದ ಮುಖ್ಯಸ್ಥ ಮೊಹಮ್ಮದ್ ಯೂನಸ್ ಅವರನ್ನು ದೂಷಿಸಿದ್ದಾರೆ.

ಹಸೀನಾ ಅವರ ಪ್ರಕಾರ, ಕೆಲವು ಮೂಲಭೂತವಾದಿ ಶಕ್ತಿಗಳು ಬಹಿರಂಗವಾಗಿ ಹಿಂಸಾಚಾರದಲ್ಲಿ ತೊಡಗಿದ್ದು, ಭಾರತೀಯ ರಾಯಭಾರ ಕಚೇರಿ, ಮಾಧ್ಯಮ ಕಚೇರಿಗಳು ಮತ್ತು ಅಲ್ಪಸಂಖ್ಯಾತರ ಮೇಲೆ ದಾಳಿ ಮಾಡುತ್ತಿವೆ. ಯೂನಸ್ ಸರ್ಕಾರ ಈ ವ್ಯಕ್ತಿಗಳನ್ನು ರಕ್ಷಿಸುತ್ತಿದೆ ಮತ್ತು ಶಿಕ್ಷೆಗೊಳಗಾದ ಭಯೋತ್ಪಾದಕರನ್ನು ಬಿಡುಗಡೆ ಮಾಡುತ್ತಿದೆ ಎಂದಿದ್ದಾರೆ. ಮಧ್ಯಂತರ ಸರ್ಕಾರ ಭಾರತದ ವಿರುದ್ಧ ಹೇಳಿಕೆಗಳನ್ನು ನೀಡುತ್ತಿದೆ ಮತ್ತು ಅಲ್ಪಸಂಖ್ಯಾತರನ್ನು ರಕ್ಷಿಸುವಲ್ಲಿ ವಿಫಲವಾಗಿದ್ದು, ಯೂನಸ್ ಸರ್ಕಾರದ ನೀತಿಗಳು ಉಭಯ ದೇಶಗಳ ನಡುವಿನ ಸಂಬಂಧವನ್ನು ಹದಗೆಡಿಸಿವೆ ಎಂದು ಅವರು ಹೇಳಿದರು.

ಬಾಂಗ್ಲಾದೇಶದಲ್ಲಿ ಕಾನೂನು ಸುವ್ಯವಸ್ಥೆ ಸಂಪೂರ್ಣವಾಗಿ ಕುಸಿದಿದೆ ಮತ್ತು ಹಿಂಸಾಚಾರ ಸಾಮಾನ್ಯವಾಗಿದೆ ಎಂದ ಹಸೀನಾ, ಮೂಲಭೂತ ಇಸ್ಲಾಮಿಕ್ ಸಂಘಟನೆಗಳ ಹೆಚ್ಚುತ್ತಿರುವ ಪ್ರಭಾವದ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಹಸೀನಾ ಇದು ಕೇವಲ ಬಾಂಗ್ಲಾದೇಶಕ್ಕೆ ಮಾತ್ರವಲ್ಲದೆ ಇಡೀ ದಕ್ಷಿಣ ಏಷ್ಯಾಕ್ಕೆ ಅಪಾಯವನ್ನುಂಟುಮಾಡುತ್ತವೆ ಎಂದು ಹೇಳಿದರು. ಯೂನಸ್ ಸರ್ಕಾರವು ದೇಶದೊಳಗಿನ ಉಗ್ರಗಾಮಿಗಳಿಗೆ ಅಧಿಕಾರ ನೀಡಿ ಅವರನ್ನು ಪೋಷಿಸುತ್ತಿದ್ದಾರೆ ಎಂದು ಹಸೀನಾ ಆರೋಪಿಸಿದರು.

ಹಸೀನಾ ಅವರು ತಮ್ಮ ದೇಶಕ್ಕೆ ತಕ್ಷಣ ಹಿಂತಿರುಗುವುದಿಲ್ಲ ಎಂದು ಹೇಳಿದ್ದು, ತಮ್ಮ ವಿರುದ್ಧದ ಪ್ರಸ್ತುತ ಕ್ರಮಗಳು ನ್ಯಾಯದಿಂದಲ್ಲ ಬದಲಾಗಿ ರಾಜಕೀಯ ಪ್ರೇರಿತವಾಗಿವೆ ಎಂದು ಹೇಳಿದರು. ಬಾಂಗ್ಲಾದೇಶದಲ್ಲಿ ಸರಿಯಾದ ಸರ್ಕಾರ ರಚನೆಯಾಗುವವರೆಗೆ ಮತ್ತು ನ್ಯಾಯಾಲಯಗಳು ಸ್ವತಂತ್ರವಾಗುವವರೆಗೆ ಅವರ ಮರಳುವಿಕೆ ಅಸಾಧ್ಯ ಎಂದು ಹೇಳಿದರು.

ಶೇಖ್ ಹಸೀನಾ ಅವರು ಬಾಂಗ್ಲಾದೇಶದ ಅಂತರರಾಷ್ಟ್ರೀಯ ಅಪರಾಧ ನ್ಯಾಯಮಂಡಳಿಯ ತೀರ್ಪನ್ನು ಸಂಪೂರ್ಣವಾಗಿ ತಿರಸ್ಕರಿಸಿದ್ದು, ಇದು ನ್ಯಾಯಯುತ ಪ್ರಕ್ರಿಯೆಯಲ್ಲ, ಬದಲಾಗಿ ಮಾನಹಾನಿ ಮಾಡಲು ಮಾಡಿದ ರಾಜಕೀಯ ಪಿತೂರಿ ಎಂದು ಕರೆದರು. ತಮ್ಮ ವಾದವನ್ನು ಮಂಡಿಸಲು ಅವಕಾಶ ನಿರಾಕರಿಸಲಾಯಿತು ಮತ್ತು ಅವರ ಆಯ್ಕೆಯ ವಕೀಲರನ್ನು ನಿರಾಕರಿಸಲಾಯಿತು ಎಂದು ಅವರು ಆರೋಪಿಸಿದ್ದಾರೆ. ಅವಾಮಿ ಲೀಗ್ ಅನ್ನು ನಾಶಮಾಡಲು ನ್ಯಾಯಮಂಡಳಿಯನ್ನು ಬಳಸಲಾಗುತ್ತಿದೆ ಎಂದು ಆರೋಪಿಸಿದರು.

ನನಗೆ ಇದೆಲ್ಲದರ ಹೊರತಾಗಿಯೂ ದೇಶದ ಸಂವಿಧಾನದಲ್ಲಿ ನಂಬಿಕೆಯಿದೆ. ಪ್ರಜಾಪ್ರಭುತ್ವ ಮರಳಿ, ನ್ಯಾಯಾಲಯಗಳು ಸ್ವತಂತ್ರವಾದಾಗ ಮಾತ್ರ ನಿಜವಾದ ನ್ಯಾಯವನ್ನು ಪೂರೈಸಲಾಗುತ್ತದೆ ಎಂದು ಅವರು ಹೇಳಿದರು. ಪ್ರಸ್ತುತ ಇರುವ ಮಧ್ಯಂತರ ಸರ್ಕಾರದ ಜನರಿಂದ ಆಯ್ಕೆಯಾಗಿಲ್ಲದ ಕಾರಣ ಅದಕ್ಕೆ ಯಾವುದೇ ಪ್ರಜಾಪ್ರಭುತ್ವದ ನ್ಯಾಯಸಮ್ಮತತೆ ಇಲ್ಲ, ಈ ಸರ್ಕಾರ ದೇಶವನ್ನು ಅಸ್ಥಿರತೆಯತ್ತ ಕೊಂಡೊಯ್ಯುತ್ತಿದೆ ಎಂದರು.

ಫೆಬ್ರವರಿಯಲ್ಲಿ ನಡೆಯಲಿರುವ ಚುನಾವಣೆಯ ಬಗ್ಗೆ ಮಾತನಾಡಿದ ಹಸೀನಾ, ಅವಾಮಿ ಲೀಗ್​ನ್ನು ನಿಷೇಧಿಸಿ ಚುನಾವಣೆಗಳನ್ನು ನಡೆಸುವುದು ಅನ್ಯಾಯವಾಗಿದ್ದು, ಅವಾಮಿ ಲೀಗ್ ಇಲ್ಲದ ಚುನಾವಣೆ ಕೇವಲ ಪಟ್ಟಾಭಿಷೇಕವಲ್ಲದೆ ಬೇರೇನೂ ಅಲ್ಲ ಎಂದರು,(ಏಜನ್ಸೀಸ್).