ನನ್ನ ಮೇಲೆ ದಾಳಿಯಾದರೆ ಇರಾನ್ ಎಂಬ ದೇಶವೇ ಇರಲ್ಲ : ಡೊನಾಲ್ಡ್ ಟ್ರಂಪ್ ಎಚ್ಚರಿಕೆ! | Donald Trump

'ನ್ಯೂಸ್ ನೇಷನ್' ವಾಹಿನಿಯ 'ಕೇಟೀ ಪಾವ್ಲಿಚ್ ಟುನೈಟ್ ಶೋ'ಗೆ ನೀಡಿದ ಸಂದರ್ಶನದಲ್ಲಿ ಮಂಗಳವಾರ ಮಾತನಾಡಿದ ಟ್ರಂಪ್, ಇರಾನ್ ಕುರಿತು ಇದುವರೆಗಿನ ಅತ್ಯಂತ ಕಠಿಣ ನಿಲುವನ್ನು ಪ್ರದರ್ಶಿಸಿದರು. "ನನಗೆ ಸ್ಪಷ್ಟ ಸೂಚನೆಗಳಿವೆ. ನನಗೆ ಏನಾದರೂ ಸಂಭವಿಸಿದರೆ, ಅಮೆರಿಕವು ಇರಾನ್ ಅನ್ನು ಭೂಮಿಯ ಮೇಲಿನಿಂದ ಅಳಿಸಿಹಾಕಲಿದೆ. ನನ್ನ ಜೀವಕ್ಕೆ ಸ್ವಲ್ಪವಾದರೂ ಹಾನಿ ಮಾಡಲು ಪ್ರಯತ್ನಿಸಿದರೆ, ಇರಾನ್ ಸಂಪೂರ್ಣ ನಾಶವಾಗಲಿದೆ ಎಂದು ನಾನು ನನ್ನ ಸಲಹೆಗಾರರಿಗೆ ಈಗಾಗಲೇ ಆದೇಶ ನೀಡಿದ್ದೇನೆ" ಎಂದು ಅವರು ಗುಡುಗಿದ್ದಾರೆ.

ಈ ವಿವಾದಕ್ಕೆ ಮುಖ್ಯ ಕಾರಣ ಇರಾನ್‌ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರ ಬಗ್ಗೆ ಟ್ರಂಪ್ ನೀಡಿದ ಹೇಳಿಕೆ. ಖಮೇನಿ ಅವರನ್ನು 'ಅನಾರೋಗ್ಯ ಪೀಡಿತ' ಎಂದು ಕರೆದ ಟ್ರಂಪ್, ಅವರು ದೇಶವನ್ನು ಸರಿಯಾಗಿ ನಡೆಸುತ್ತಿಲ್ಲ ಮತ್ತು ಜನರನ್ನು ಕೊಲ್ಲುವುದನ್ನು ನಿಲ್ಲಿಸಬೇಕು ಎಂದು ಟೀಕಿಸಿದ್ದರು. ಇರಾನ್‌ಗೆ ಈಗ ಹೊಸ ನಾಯಕತ್ವದ ಅಗತ್ಯವಿದೆ ಎಂದು ಅವರು ಪ್ರತಿಪಾದಿಸಿದ್ದರು.

ಟ್ರಂಪ್ ಅವರ ಹೇಳಿಕೆಗೆ ಇರಾನ್ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದೆ. ಇರಾನ್ ಸಶಸ್ತ್ರ ಪಡೆಗಳ ವಕ್ತಾರ ಜನರಲ್ ಅಬೋಲ್‌ಫಜಲ್ ಶೇಕಾರ್ಚಿ ಮಾತನಾಡಿ, "ನಮ್ಮ ನಾಯಕನ ವಿರುದ್ಧ ಆಕ್ರಮಣಕಾರಿ ಕೈ ಎತ್ತಿದರೆ, ನಾವು ಆ ಕೈಯನ್ನು ಕತ್ತರಿಸುವುದಲ್ಲದೆ, ಅವರ ಜಗತ್ತಿಗೇ ಬೆಂಕಿ ಹಾಕುತ್ತೇವೆ" ಎಂದು ಎಚ್ಚರಿಸಿದ್ದಾರೆ. ಟ್ರಂಪ್ ತಮ್ಮ ಮಿತಿಯಲ್ಲಿ ಇರಬೇಕು ಎಂದು ಇರಾನ್ ಎಚ್ಚರಿಸಿದೆ.

ಹೆಚ್ಚಿದ ಆತಂಕ: ವಾಷಿಂಗ್ಟನ್ ಮತ್ತು ಟೆಹ್ರಾನ್ ನಡುವೆ ನಡೆಯುತ್ತಿರುವ ಈ ತೀವ್ರ ಮಾತಿನ ಚಕಮಕಿ ಜಾಗತಿಕ ಮಟ್ಟದಲ್ಲಿ ಆತಂಕ ಮೂಡಿಸಿದೆ. ಇರಾನ್‌ನಲ್ಲಿ ನಡೆಯುತ್ತಿರುವ ಆಂತರಿಕ ಅಶಾಂತಿ ಮತ್ತು ಅಮೆರಿಕದ ವಿಧಿಸಿರುವ ಆರ್ಥಿಕ ನಿರ್ಬಂಧಗಳ ನಡುವೆ ಈ 'ಹತ್ಯೆ ಸಂಚಿನ' ಆರೋಪಗಳು ಉಭಯ ದೇಶಗಳನ್ನು ಯುದ್ಧದ ಅಂಚಿಗೆ ತಂದು ನಿಲ್ಲಿಸಿವೆ,(ಏಜೆನ್ಸೀಸ್​).