ಆ್ಯಶಸ್ ಸರಣಿ ಆಸೀಸ್ ಪಾಲು: ಇಂಗ್ಲೆಂಡ್ ವಿರುದ್ಧ 4-1 ಅಂತರದ ಭರ್ಜರಿ ಜಯ ಸಾಧಿಸಿದ ಆಸ್ಟ್ರೇಲಿಯಾ | Australia win

ಇಂಗ್ಲೆಂಡ್‌ನ ಯುವ ತಾರೆ ಜಾಕೋಬ್ ಬೆಥೆಲ್ ಅವರ ಅದ್ಭುತ ಶತಕದ ಹೊರತಾಗಿಯೂ, ಆಸ್ಟ್ರೇಲಿಯಾ 5ನೇ ದಿನದಂದು 160 ರನ್‌ಗಳನ್ನು ಬೆನ್ನಟ್ಟಿ ಜಯಗಳಿಸಿತು.

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಇಂಗ್ಲೆಂಡ್ 384 ರನ್ ಗಳಿಸಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿತು. ಜೋ ರೂಟ್ ಅತ್ಯುತ್ತಮ ಶತಕ ಮತ್ತು ಹ್ಯಾರಿ ಬ್ರೂಕ್ 84 ರನ್​ಗಳಿಸಿ ಭರ್ಜರಿ160 ರನ್​ಗಳ ಜತೆಯಾಟವಾಡಿದರು. ಅದರೆ, ಆಸ್ಟ್ರೇಲಿಯಾ ಪ್ರಥಮ ಇನ್ನಿಂಗ್ಸ್​ನಲ್ಲಿ 567 ರನ್ ಗಳಿಸಿತು. ಕಾಂಗರೂಗಳ ಪರವಾಗಿ ಟ್ರಾವಿಸ್ ಹೆಡ್ ಕೇವಲ 166 ಎಸೆತಗಳಲ್ಲಿ 163 ರನ್ ಗಳಿಸಿ ಭರ್ಜರಿ ಇನ್ನಿಂಗ್ಸ್ ಆಡಿದರು. ಆದರೆ ಆಲ್ ರೌಂಡರ್ ಬ್ಯೂ ವೆಬ್‌ಸ್ಟರ್ 71 ರನ್ ಗಳಿಸಿ ಆತಿಥೇಯರಿಗೆ 183 ರನ್ ಮುನ್ನಡೆ ತಂದುಕೊಟ್ಟರು.

ಇಂಗ್ಲೆಂಡ್‌ನ ಎರಡನೇ ಇನ್ನಿಂಗ್ಸ್ 219/5 ಕ್ಕೆ ಕುಸಿಯುವಂತೆ ಕಾಣುತ್ತಿತ್ತು. ಆದರೆ 22 ವರ್ಷದ ಜಾಕೋಬ್ ಬೆಥೆಲ್ ತಮ್ಮ ಜೀವನದ ಇನ್ನಿಂಗ್ಸ್ ಆಡಿ ಅದ್ಭುತ 154 ರನ್ ಗಳಿಸಿದರು. ಇಂಗ್ಲೆಂಡ್ ಅನ್ನು 342 ಕ್ಕೆ ಮುನ್ನಡೆಸಿದರು. ಅಲ್ಲದೆ, ಆಸ್ಟ್ರೇಲಿಯಾಕ್ಕೆ 160 ರನ್‌ಗಳ ಗುರಿಯನ್ನು ನೀಡಿದರು. ಆಸೀಸ್​ ಪರ ಮಿಚೆಲ್ ಸ್ಟಾರ್ಕ್ ಅಂತಿಮವಾಗಿ 3 ವಿಕೆಟ್​ ಕಬಳಿಸಿದರು.

ಗುರಿ ಬೆನ್ನಟ್ಟಿದ ಆಸ್ಟ್ರೇಲಿಯಾದ ಪರವಾಗಿ ಟ್ರಾವಿಸ್ ಹೆಡ್ (29) ಮತ್ತು ಜೇಕ್ ವೆದರಾಲ್ಡ್ (34) 62 ರನ್‌ಗಳ ಜೊತೆಯಾಟವಾಡಿದರು. ಅದರೆ, ಇಂಗ್ಲೆಂಡ್‌ನ ಜೋಶ್ ಟಂಗ್ 3 ವಿಕೆಟ್​ ಕಬಳಿಸಿ ದಿಢೀರ್ ಕುಸಿತಕ್ಕೆ ಕಾರಣರಾದರು. ನಂತರ ಬಂದ ಮಾರ್ನಸ್ ಲ್ಯಾಬುಶೇನ್ 37 ರನ್‌ಗಳಿಗೆ ರನೌಟ್ ಆದಾಗ, ಆಸ್ಟ್ರೇಲಿಯಾ 121-5 ಸ್ಕೋರ್‌ಗಳಲ್ಲಿ ಇನ್ನೂ 39 ರನ್‌ಗಳ ಕೊರತೆಯಿಂದ ಸಂಕಷ್ಟದಲ್ಲಿತ್ತು. ವಿಕೆಟ್​ಕೀಪರ್​ ಅಲೆಕ್ಸ್ ಕ್ಯಾರಿ (16 ) ಮತ್ತು ಕ್ಯಾಮರೂನ್ ಗ್ರೀನ್ (22 ) ರನ್​ಗಳಿಸಿ ತಂಡದ ಗೆಲುವಿನ ದಡ ಸೇರಿಸಿದರು.

ಅನುಭವಿ ಆರಂಭಿಕ ಆಟಗಾರ ಉಸ್ಮಾನ್ ಖವಾಜಾ ತಮ್ಮ ಕೊನೆಯ ಟೆಸ್ಟ್ ಪಂದ್ಯವನ್ನು ಆಡುವುದರೊಂದಿಗೆ ಸಿಡ್ನಿ ಟೆಸ್ಟ್ ಕ್ರಿಕೆಟ್​ಗೆ ವಿದಾಯ ಹೇಳಿದರು. ಕೊನೆಯ ಬಾರಿಗೆ ಬ್ಯಾಟಿಂಗ್ ಮಾಡಲು ಹೊರಟಾಗ, ಇಂಗ್ಲೆಂಡ್ ತಂಡ ಮತ್ತು ಅಂಪೈರ್‌ಗಳು ಆಸ್ಟ್ರೇಲಿಯಾದ ಅತ್ಯಂತ ಸ್ಥಿರ ಆಧುನಿಕ ಬ್ಯಾಟ್ಸ್‌ಮನ್‌ಗಳಲ್ಲಿ ಒಬ್ಬರನ್ನು ಗೌರವಿಸಲು ಗಾರ್ಡ್ ಆಫ್ ಆನರ್ ಅನ್ನು ರಚಿಸಿದರು,(ಏಜೆನ್ಸೀಸ್).