ಡಿಗ್ರಿ ಇಲ್ಲದ ಇಂಜಿನಿಯರ್! ಬಾಂಗ್ಲಾ ಪ್ರಧಾನಿ ಈಗ ಇಂಟರ್ನೆಟ್‌ನ ಹೊಸ ಟ್ರೋಲ್ ಸ್ಟಾರ್ ಆಗಿದ್ದೇಕೆ..? Tarique Rahman

ಫೆಬ್ರವರಿ 12 ರಂದು ನಡೆದ ಬಾಂಗ್ಲಾದೇಶದ ಸಾರ್ವತ್ರಿಕ ಚುನಾವಣೆಯಲ್ಲಿ ತಾರಿಕ್ ರಹಮಾನ್ ನೇತೃತ್ವದ ಬಾಂಗ್ಲಾದೇಶ ನ್ಯಾಷನಲಿಸ್ಟ್ ಪಾರ್ಟಿ (BNP) 297 ಸ್ಥಾನಗಳಲ್ಲಿ 209 ಸ್ಥಾನಗಳನ್ನು ಗೆದ್ದು ಭರ್ಜರಿ ಜಯ ದಾಖಲಿಸಿದೆ. ಆದರೆ, ಈ ಗೆಲುವು ನೈಸರ್ಗಿಕವಲ್ಲ, ಬದಲಿಗೆ ಫಲಿತಾಂಶವನ್ನು ತಿರುಚಲಾಗಿದೆ ಎಂದು ವಿರೋಧ ಪಕ್ಷಗಳು ಆರೋಪಿಸಿವೆ.

ನ್ಯಾಷನಲ್ ಸಿಟಿಜನ್ ಪಾರ್ಟಿ ನಾಯಕ ನಾಸಿರುದ್ದೀನ್ ಪಟ್ವಾರಿ ಅವರು ಫೇಸ್‌ಬುಕ್‌ನಲ್ಲಿ, ಅಭಿನಂದನೆಗಳು ಇಂಜಿನಿಯರ್ ತಾರಿಕ್ ರಹಮಾನ್ ಅವರೇ ಎಂದು ಕರೆದಿದ್ದಾರೆ. 13ನೇ ಬ್ಯಾಚ್‌ನ ರಾಷ್ಟ್ರೀಯ ಚುನಾವಣಾ ಇಂಜಿನಿಯರಿಂಗ್‌ನಲ್ಲಿ ಯಶಸ್ವಿಯಾದ ನಿಮಗೆ ಶುಭಾಶಯಗಳು ಎಂದು ಬರೆದುಕೊಂಡಿದ್ದರು. ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆಯೇ, ಸೋಶಿಯಲ್ ಮೀಡಿಯಾದಲ್ಲಿ ತಾರಿಕ್ ರಹಮಾನ್ ಅವರು ಹೆಲ್ಮೆಟ್ ಮತ್ತು ಸೇಫ್ಟಿ ಜಾಕೆಟ್ ಧರಿಸಿರುವ AI ಚಿತ್ರಗಳು ಮತ್ತು ಮೀಮ್‌ಗಳ ಪ್ರವಾಹವೇ ಹರಿದುಬಂದಿದೆ.

ತಾರಿಕ್ ರಹಮಾನ್ ಅವರ ಚುನಾವಣಾ ಪ್ರಮಾಣಪತ್ರದ ಪ್ರಕಾರ, ಅವರ ಔಪಚಾರಿಕ ಶಿಕ್ಷಣವು ಹೈಯರ್ ಸೆಕೆಂಡರಿ ಹಂತಕ್ಕೆ ಮುಕ್ತಾಯಗೊಂಡಿದೆ. ಯಾವುದೇ ಇಂಜಿನಿಯರಿಂಗ್ ಪದವಿ ಇಲ್ಲದಿದ್ದರೂ, ಚುನಾವಣಾ ಫಲಿತಾಂಶವನ್ನು ತಮಗನುಕೂಲವಾಗುವಂತೆ ಡಿಸೈನ್ ಮಾಡಿದ್ದಾರೆ ಎಂಬ ಕಾರಣಕ್ಕೆ ನೆಟ್ಟಿಗರು ಲಂಡನ್‌ನಿಂದ ಬಂದ ಇಂಜಿನಿಯರ್ ಎಂದು ಕಾಲೆಳೆಯುತ್ತಿದ್ದಾರೆ.

ವಿದ್ಯಾಭ್ಯಾಸದ ಅರ್ಹತೆ ಇಲ್ಲದಿದ್ದರೂ ಇಂಜಿನಿಯರ್ ಆದ ವ್ಯಕ್ತಿ ಈತ ಎಂದು ಬಳಕೆದಾರರೊಬ್ಬರು ಲೇವಡಿ ಮಾಡಿದ್ದಾರೆ.

ಜಮಾತ್-ಎ-ಇಸ್ಲಾಮಿ ಸೇರಿದಂತೆ ಹಲವು ವಿರೋಧ ಪಕ್ಷಗಳು, ಚುನಾವಣಾ ಆಯೋಗವು ಫಲಿತಾಂಶವನ್ನು ಬದಲಾಯಿಸಿದೆ ಎಂದು ಆರೋಪಿಸಿವೆ. ಮತದಾನ ಮುಗಿದ ನಂತರ ಫಲಿತಾಂಶಗಳನ್ನು ತಿರುಚಲಾಗಿದೆ ಎಂಬುದಕ್ಕೆ ನಮ್ಮ ಬಳಿ ಪುರಾವೆಗಳಿವೆ ಎಂದು ಎನ್‌ಸಿಪಿ ವಕ್ತಾರ ಆಸಿಫ್ ಮಹಮೂದ್ ಹೇಳಿದ್ದಾರೆ.

ಆದರೆ, ಈ ಎಲ್ಲಾ ಟ್ರೋಲ್ ಮತ್ತು ಆರೋಪಗಳನ್ನು ಪ್ರಧಾನಿ ತಾರಿಕ್ ರಹಮಾನ್ ತಳ್ಳಿಹಾಕಿದ್ದಾರೆ. ನಮ್ಮ ಇಂಜಿನಿಯರಿಂಗ್ ಏನಿದ್ದರೂ ಜನರ ಮನಸ್ಸು ಗೆಲ್ಲುವುದಾಗಿತ್ತು. ಅದರಲ್ಲಿ ನಾವು ಯಶಸ್ವಿಯಾಗಿದ್ದೇವೆ ಎಂದು ಅವರು ಸುದ್ದಿಗೋಷ್ಠಿಯಲ್ಲಿ ತಿರುಗೇಟು ನೀಡಿದ್ದಾರೆ,(ಏಜೆನ್ಸೀಸ್).