ಕೆನಡಾ ಮೇಲೆ ಅಮೆರಿಕ ಕಣ್ಣು: 51ನೇ ರಾಜ್ಯವನ್ನಾಗಿ ಮಾಡ್ತಾರಾ ಟ್ರಂಪ್? ಬೆದರಿಕೆಯ ಹಿಂದಿನ ಅಸಲಿ ಸತ್ಯ ಇಲ್ಲಿದೆ | Donald Trump

ಕೆನಡಾ: ವೆನೆಜುವೆಲಾ ಮಾಜಿ ಅಧ್ಯಕ್ಷ ನಿಕೋಲಸ್ ಮಡುರೊ ಅಪಹರಣ ನಂತರ ಮಿಲಿಟರಿ ಕಾರ್ಯಾಚರಣೆ ಮೂಲಕ ಗ್ರೀನ್‌ಲ್ಯಾಂಡ್​ನ್ನು ವಶಪಡಿಸಿಕೊಳ್ಳುವುದಾಗಿ ಟ್ರಂಪ್​ ಹೇಳಿಕೆ ನೀಡಿದ್ದರು. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಅವರ ಇತ್ತೀಚಿನ ಕ್ರಮಗಳಿಂದಾಗಿ ಕೆನಡಾದಲ್ಲಿ ಸಹ ಭಯದ ವಾತಾವರಣ ನಿರ್ಮಾಣವಾಗುತ್ತಿದೆ. ಕೆನಡಾವನ್ನು 51 ನೇ ರಾಜ್ಯವನ್ನಾಗಿ ಮಾಡುವ ಬಗ್ಗೆ ಟ್ರಂಪ್ ಅವರ ಹಿಂದಿನ ಹೇಳಿಕೆಗಳು ಈಗ ಮತ್ತೆ ಚರ್ಚೆಗೆ ಬರುತ್ತಿವೆ.

ಕೆನಡಾದ ಶೈಕ್ಷಣಿಕ ತಜ್ಞರಾದ ಥಾಮಸ್ ಹೋಮರ್-ಡಿಕ್ಸನ್, ನಾವು ಅಮೆರಿಕ ಲೆಕ್ಕಾಚಾರವನ್ನು ಬುಡಮೇಲೆ ಮಾಡಿ, ನಮ್ಮ ಮೇಲಿನ ದಾಳಿ ಅವರಿಗೆ ಅಗಾಧವಾದ ದುಬಾರಿ ದಾಳಿಯನ್ನಾಗಿ ಪರಿವರ್ತಿಸಲು ಸಿದ್ಧರಾಗಬೇಕೆಂದು ಎಚ್ಚರಿಸಿದ್ದಾರೆ. ಕೆನಡಾದ ಅಂಕಣಕಾರರೊಬ್ಬರು, ಕೆನಡಾ ಮೇಲೆ ಟ್ರಂಪ್ ಮಿಲಿಟರಿ ಅಥವಾ ಆರ್ಥಿಕ ದಬ್ಬಾಳಿಕೆಯನ್ನು ನಡೆಸುವ ಸಾಧ್ಯತೆಯನ್ನು ಕೆನಡಿಯನ್ನರು ಎದುರಿಸಬೇಕಾಗುತ್ತದೆ ಎಂದು ಬರೆದಿದ್ದಾರೆ.  

ಟ್ರಂಪ್​ ಗ್ರೀನ್‌ಲ್ಯಾಂಡ್​ಗೆ ನೀಡಿದ ಎಚ್ಚರಿಕೆ ಬೆನ್ನಲ್ಲೆ ಕೆನಡಾದ ಆತಂಕವು ಹೆಚ್ಚುತ್ತಿದ್ದು, ಈ ಎರಡೂ ದೇಶಗಳು  ಪ್ರಜಾಪ್ರಭುತ್ವ ಆಡಳಿತದ ಜತೆಗೆ ನ್ಯಾಟೋ ಸದಸ್ಯರು ಹೌದು. ಭದ್ರತೆ ಮತ್ತು ಗಡಿ ಸಮಸ್ಯೆಗಳ ಕುರಿತು ಕೆನಡಾದ ಮಾಜಿ ಸರ್ಕಾರಿ ಸಲಹೆಗಾರ ವೆಸ್ಲಿ ವಾರ್ಕ್, ಇತ್ತೀಚಿನ ಯುಎಸ್ ಕ್ರಮಗಳು ಕೆನಡಾಗೆ ಅಂತಿಮ ಎಚ್ಚರಿಕೆಯ ಕರೆ ಎಂದು ತಿಳಿದುಕೊಂಡು ಕಾರ್ಯನಿರ್ವಹಿಸಬೇಕು ಎಂದು ಹೇಳಿದರು.

ಟ್ರಂಪ್ ಅವರನ್ನು ಎದುರಿಸುವುದಾಗಿ ಭರವಸೆ ನೀಡಿ ಅಧಿಕಾರಕ್ಕೆ ಬಂದ ಪ್ರಧಾನಿ ಮಾರ್ಕ್ ಕಾರ್ನಿ, ಅಂದಿನಿಂದ ಹೆಚ್ಚು ಎಚ್ಚರಿಕೆಯ ರಾಜತಾಂತ್ರಿಕ ವಿಧಾನವನ್ನು ಅಳವಡಿಸಿಕೊಂಡಿದ್ದಾರೆ. ಅವರ ಸರ್ಕಾರವು ಅಮೆರಿಕದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಿ, ಚೀನಾದೊಂದಿಗೆ ವ್ಯಾಪಾರ ಸಂಬಂಧಗಳನ್ನು ಹೆಚ್ಚಿಸಿಕೊಂಡಿದೆ.

ಗ್ರೀನ್‌ಲ್ಯಾಂಡ್ ಮತ್ತು ಡೆನ್ಮಾರ್ಕ್‌ನ ಸಾರ್ವಭೌಮತ್ವವನ್ನು ಅಮೆರಿಕ ಮತ್ತು ಟ್ರಂಪ್​ ಗೌರವಿಸಬೇಕು ಎಂದು ಕಾರ್ನಿ ಇತ್ತೀಚೆಗೆ ಹೇಳಿದ್ದರು.

ಕೆನಡಾ ವಿರುದ್ಧ ಯುಎಸ್ ಮಿಲಿಟರಿ ಕ್ರಮ ಕೈಗೊಳ್ಳುವುದು ಅಸಂಭವ, ಆದರೆ ಆರ್ಥಿಕ ಒತ್ತಡವನ್ನು ಹೇರುವ ಸಾಧ್ಯತೆ ಅಧಿಕವಾಗಿದೆ ಎಂದು ತಜ್ಞರು ಎಚ್ಚರಿಕೆ ನೀಡುತ್ತಿದ್ದಾರೆ. ಮಾಜಿ ಕೆನಡಾದ ರಾಷ್ಟ್ರೀಯ ಭದ್ರತಾ ವಿಶ್ಲೇಷಕಿ ಸ್ಟೆಫನಿ ಕಾರ್ವಿನ್, ವಿಶೇಷವಾಗಿ ವೆನೆಜುವೆಲಾದ ತೈಲ ಸಂಪನ್ಮೂಲಗಳ ಮೇಲೆ ನಿಯಂತ್ರಣವನ್ನು ಸಾಧಿಸಿದ, ಕೆನಡಾದ ಆರ್ಥಿಕತೆಯನ್ನು ದುರ್ಬಲಗೊಳಿಸಲು ವಾಷಿಂಗ್ಟನ್ ಸಿದ್ಧಗೊಳ್ಳುತ್ತಿದೆ ಎಂದು ಹೇಳಿದರು.

ಪ್ರಸ್ತುತ ಕೆನಡಾ ತನ್ನ ರಫ್ತಿನ ಸುಮಾರು 70% ಅನ್ನು ಯುಎಸ್‌ಗೆ ಕಳುಹಿಸುತ್ತದೆ. ಒಪ್ಪಂದದ ಅಡಿಯಲ್ಲಿ ಸರಿಸುಮಾರು 85% ದ್ವಿಪಕ್ಷೀಯ ವ್ಯಾಪಾರ ಸುಂಕ ರಹಿತವಾಗಿದೆ. ಪರಿಶೀಲನೆಯ ಸಮಯದಲ್ಲಿ ಸುಂಕ ವಿನಾಯಿತಿಗಳನ್ನು ತೆಗೆದುಹಾಕುವ ಬೆದರಿಕೆ ಕೂಡ ಕೆನಡಾದ ಆರ್ಥಿಕತೆಗೆ ತೀವ್ರ ಪರಿಣಾಮಗಳನ್ನು ಬೀರಬಹುದು ಎಂದು ವಿಶ್ಲೇಷಕರು ಎಚ್ಚರಿಸಿದ್ದಾರೆ,(ಏಜನ್ಸೀಸ್).