ಸಾಗರದ ಆಳದಲ್ಲಿ ಅಮೆರಿಕದ ಅಟ್ಯಾಕ್, ಕೆರಳಿದ ಟೆಹ್ರಾನ್! ಇರಾನ್ ವಿದೇಶಾಂಗ ಸಚಿವನ ಆ ಪೋಸ್ಟ್ ಇಡೀ ಜಗತ್ತನ್ನೇ ನಡುಗಿಸುತ್ತಿರುವುದೇಕೆ..? Seyed Abbas Araghchi

ಈ ಬಗ್ಗೆ ಎಕ್ಸ್​ನಲ್ಲಿ ಪೋಸ್ಟ್​ ಮಾಡಿರುವ ಅರಾಗ್ಚಿ, ಇರಾನ್‌ನ ತೀರದಿಂದ 2,000 ಮೈಲಿಗಳ ದೂರದಲ್ಲಿ ಅಮೆರಿಕವು ಸಮುದ್ರದ ಮೇಲೆ ಘೋರ ಕೃತ್ಯ ಎಸಗಿದೆ. ನನ್ನ ಮಾತುಗಳನ್ನು ನೆನಪಿಡಿ. ಅಮೆರಿಕವು ತಾನು ಹಾಕಿಕೊಟ್ಟ ಈ ಕೆಟ್ಟ ಮಾದರಿಗಾಗಿ ಅತ್ಯಂತ ಕಹಿಯಾಗಿ ಪಶ್ಚಾತ್ತಾಪ ಪಡಲಿದೆ ಎಂದು ಎಚ್ಚರಿಸಿದ್ದಾರೆ. ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷ ಈಗ ಪರ್ಷಿಯನ್ ಗಲ್ಫ್ ದಾಟಿ ಹಿಂದೂ ಮಹಾಸಾಗರದ ಆಳಕ್ಕೆ ಇಳಿದಿರುವುದಕ್ಕೆ ಇದು ಸ್ಪಷ್ಟ ಪುರಾವೆಯಾಗಿದೆ.

ಇತ್ತೀಚಿನ ವರದಿಗಳ ಪ್ರಕಾರ, ಇರಾನ್ ಯುದ್ಧನೌಕೆ ಮುಳುಗಿದ ಸ್ಥಳದಲ್ಲಿ ಶ್ರೀಲಂಕಾ ನೌಕಾಪಡೆಯು ಭೀಕರ ಕಾರ್ಯಾಚರಣೆ ನಡೆಸುತ್ತಿದೆ.

ದುರಂತದ ಆಯಾಮ: ಇಲ್ಲಿಯವರೆಗೆ ಸಮುದ್ರದಿಂದ 87 ನಾವಿಕರ ಮೃತದೇಹಗಳನ್ನು ಹೊರತೆಗೆಯಲಾಗಿದೆ.

ರಕ್ಷಣೆ: ಕೇವಲ 32 ಮಂದಿಯನ್ನು ಮಾತ್ರ ಜೀವಂತವಾಗಿ ರಕ್ಷಿಸಲು ಸಾಧ್ಯವಾಗಿದೆ.

ಘಟನೆಯ ಹಿನ್ನೆಲೆ: ಭಾರತದ ವಿಶಾಖಪಟ್ಟಣಂನಲ್ಲಿ ನಡೆದ ಮಿಲನ್' ಬಹುಪಕ್ಷೀಯ ನೌಕಾ ವ್ಯಾಯಾಮದಲ್ಲಿ ಪಾಲ್ಗೊಂಡು ಹಿಂದಿರುಗುತ್ತಿದ್ದಾಗ, ಅಂತಾರಾಷ್ಟ್ರೀಯ ಜಲಪ್ರದೇಶದಲ್ಲಿ ಅಮೆರಿಕದ ಟಾರ್ಪಿಡೋ ಈ ನೌಕೆಯನ್ನು ಗುರಿಯಾಗಿಸಿಕೊಂಡಿತ್ತು.

ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಈ ದಾಳಿಯನ್ನು ಅಧಿಕೃತವಾಗಿ ಖಚಿತಪಡಿಸಿದ್ದಾರೆ. ಅಂತಾರಾಷ್ಟ್ರೀಯ ಜಲಪ್ರದೇಶದಲ್ಲಿ ಸುರಕ್ಷಿತವಾಗಿದ್ದೇವೆ ಎಂದು ಭಾವಿಸಿದ್ದ ಇರಾನ್ ನೌಕೆಯನ್ನು ಅಮೆರಿಕದ ಟಾರ್ಪಿಡೋ ಮುಳುಗಿಸಿದೆ ಎಂದು ತಿಳಿಸಿದ್ದಾರೆ. ಅಷ್ಟೇ ಅಲ್ಲದೆ, ಇರಾನ್ ಫ್ರಿಗೇಟ್ ಸಮುದ್ರದಲ್ಲಿ ಮುಳುಗುತ್ತಿರುವ ಕಿರು ವಿಡಿಯೋವನ್ನು ಅಮೆರಿಕ ಬಿಡುಗಡೆ ಮಾಡಿದ್ದು, ಇರಾನ್‌ನ ನೌಕಾ ಶಕ್ತಿಗೆ ದೊಡ್ಡ ಅವಮಾನ ಮಾಡಿದಂತಾಗಿದೆ.

ಶನಿವಾರ ಆರಂಭವಾದ ಈ ಸಂಘರ್ಷ ಈಗ ಇಡೀ ಪಶ್ಚಿಮ ಏಷ್ಯಾವನ್ನು ಆಪೋಷನ ತೆಗೆದುಕೊಳ್ಳುತ್ತಿದೆ.

ಇರಾನ್‌ನಲ್ಲಿ ಸಾವು: ಯುದ್ಧ ಆರಂಭವಾದ ಕೇವಲ ಐದು ದಿನಗಳಲ್ಲಿ ಇರಾನ್‌ನಲ್ಲಿ 1,000ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ.

ವಲಸೆ: ಇರಾನ್ ರಾಜಧಾನಿ ಟೆಹ್ರಾನ್‌ನಿಂದ ಕೇವಲ ಎರಡೇ ದಿನಗಳಲ್ಲಿ 1 ಲಕ್ಷಕ್ಕೂ ಹೆಚ್ಚು ಜನರು ಜೀವಭಯದಿಂದ ಪಲಾಯನ ಮಾಡಿದ್ದಾರೆ ಎಂದು ವಿಶ್ವಸಂಸ್ಥೆ ವರದಿ ಮಾಡಿದೆ.

ಪ್ರಾದೇಶಿಕ ನಷ್ಟ: ಲೆಬನಾನ್‌ನಲ್ಲಿ 50ಕ್ಕೂ ಹೆಚ್ಚು ಮಂದಿ ಮತ್ತು ಇಸ್ರೇಲ್‌ನಲ್ಲಿ ಸುಮಾರು 12 ಮಂದಿ ಸಾವನ್ನಪ್ಪಿದ್ದಾರೆ.

ಭಾರತದ ಆಯೋಜನೆಯಲ್ಲಿ ನಡೆದ ನೌಕಾ ವ್ಯಾಯಾಮ ಮುಗಿಸಿ ಹೋಗುತ್ತಿದ್ದ ನೌಕೆಯ ಮೇಲಿನ ಈ ದಾಳಿ, ಹಿಂದೂ ಮಹಾಸಾಗರದ ಕಡಲ ಭದ್ರತೆಯ ಮೇಲೆ ದೊಡ್ಡ ಪ್ರಶ್ನಾರ್ಥಕ ಚಿಹ್ನೆ ಮೂಡಿಸಿದೆ. ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್‌ನ ನಾಯಕತ್ವ, ಕ್ಷಿಪಣಿ ತಾಣಗಳು ಮತ್ತು ಪರಮಾಣು ಕೇಂದ್ರಗಳನ್ನು ಗುರಿಯಾಗಿಸಿಕೊಂಡು ಈ ಸಮರ ಸಾರಿವೆ. ಇರಾನ್‌ನ ಆಡಳಿತವನ್ನು ಉರುಳಿಸುವುದೇ ಈ ಯುದ್ಧದ ಗುರಿ ಎಂಬ ಸೂಚನೆಯನ್ನು ಅಮೆರಿಕ ನೀಡಿದೆ,(ಏಜೆನ್ಸೀಸ್).