ಮತ್ತೆ ಅಮೆರಿಕವೇ ಸುಪ್ರೀಂ: ಶತ್ರು ರಾಷ್ಟ್ರಗಳ ನಿದ್ದೆಗೆಡಿಸಿದ ಟ್ರಂಪ್ ಗೋಲ್ಡನ್ ಏಜ್ ಮಂತ್ರ..! Donald Trump

ಈ ಬಗ್ಗೆ ತಮ್ಮ ಎರಡನೇ ಅವಧಿಯ ಅಧಿಕಾರ ಸ್ವೀಕರಿಸಿದ ನಂತರ ಮೊದಲ ಬಾರಿಗೆ ಕಾಂಗ್ರೆಸ್ ಅನ್ನು ಉದ್ದೇಶಿಸಿ ಭಾಷಣ ಮಾಡಿದ ಟ್ರಂಪ್ ಅಮೆರಿಕದ ಆರ್ಥಿಕತೆಯನ್ನು ಬಣ್ಣಿಸುತ್ತಾ, ನಮ್ಮ ಆರ್ಥಿಕತೆ ಹಿಂದೆಂದಿಗಿಂತಲೂ ವೇಗವಾಗಿ ಪುಟಿದೇಳುತ್ತಿದೆ ಎಂದರು. ಗಡಿ ಭದ್ರತೆಯ ವಿಷಯದಲ್ಲಿ ತಾವು ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿರುವುದಾಗಿ ಪ್ರತಿಪಾದಿಸಿದ ಅಮೆರಿಕ ಅಧ್ಯಕ್ಷ, ಅಮೆರಿಕದ ಗಡಿಗಳು ಈಗ ಸುರಕ್ಷಿತವಾಗಿವೆ ಮತ್ತು ಶತ್ರು ರಾಷ್ಟ್ರಗಳು ಅಮೆರಿಕಕ್ಕೆ ಹೆದರುತ್ತಿವೆ ಎಂದು ಗುಡುಗಿದ್ದಾರೆ.

ಇತ್ತೀಚೆಗಷ್ಟೇ ಅಮೆರಿಕದ ಸುಪ್ರೀಂ ಕೋರ್ಟ್ ಟ್ರಂಪ್ ಅವರ ಜಾಗತಿಕ ಸುಂಕದ ನೀತಿಯನ್ನು ರದ್ದುಗೊಳಿಸಿತ್ತು. ಈ ಬಗ್ಗೆ ಪ್ರತಿಕ್ರಿಯಿಸಿದ ಟ್ರಂಪ್, ಸುಪ್ರೀಂ ಕೋರ್ಟ್‌ನ ತೀರ್ಪು ದುರದೃಷ್ಟಕರ. ಆದರೆ ಹಲವು ದೇಶಗಳು ಮತ್ತು ಕಂಪನಿಗಳು ಈಗಾಗಲೇ ಮಾಡಿಕೊಂಡಿರುವ ಒಪ್ಪಂದಕ್ಕೆ ಬದ್ಧವಾಗಿರಲು ಬಯಸುತ್ತವೆ ಎಂದು ಹೇಳಿದ್ದಾರೆ. ಅಲ್ಲದೆ, ತೀರ್ಪಿನ ಹೊರತಾಗಿಯೂ, ಆಡಳಿತವು 15 ಪ್ರತಿಶತದಷ್ಟು ಹೊಸ ಜಾಗತಿಕ ಸುಂಕಗಳನ್ನು ವಿಧಿಸುವುದಾಗಿ ಘೋಷಿಸಿದೆ, ಇದು ಜಾಗತಿಕ ಮಾರುಕಟ್ಟೆಯಲ್ಲಿ ತಲ್ಲಣ ಸೃಷ್ಟಿಸಿದೆ.

ಅಮೆರಿಕದ ಶಿಕ್ಷಣ ವ್ಯವಸ್ಥೆಯಲ್ಲಿ ಬದಲಾವಣೆ ತರುವುದಾಗಿ ಹೇಳಿದ ಟ್ರಂಪ್​, ನಮ್ಮ ಮಕ್ಕಳು ತಮ್ಮ ದೇಶವನ್ನು ಪ್ರೀತಿಸಲು ಕಲಿಯಬೇಕು, ದ್ವೇಷಿಸುವುದನ್ನಲ್ಲ ಎಂದರು. ಅಲ್ಲದೆ, ಇಂಗ್ಲಿಷ್ ಭಾಷೆಯನ್ನು ಅಮೆರಿಕದ ಅಧಿಕೃತ ಭಾಷೆಯನ್ನಾಗಿ ಮಾಡುವ ಆದೇಶ ಮತ್ತು ಅಮೆರಿಕದ ಹೆಮ್ಮೆಯನ್ನು ಮರುಸ್ಥಾಪಿಸುವ ಕುರಿತು ಮಾತನಾಡಿದ್ದಾರೆ.

ವಿದೇಶಾಂಗ ನೀತಿಯಲ್ಲಿ ಇರಾನ್ ವಿರುದ್ಧ ಕಠಿಣ ನಿಲುವು ತಳೆದ ಟ್ರಂಪ್, ಇರಾನ್ ತನ್ನ ಪರಮಾಣು ಮಹತ್ವಾಕಾಂಕ್ಷೆಯನ್ನು ಮುಂದುವರಿಸುತ್ತಿರುವುದಾಗಿ ಆರೋಪಿಸಿದ್ದಾರೆ. ಇರಾನ್ ಮೇಲಿನ ಸಂಭವನೀಯ ಸೇನಾ ದಾಳಿಯ ಆತಂಕಗಳ ನಡುವೆಯೇ, ಅಮೆರಿಕವು ತನ್ನ ಶಕ್ತಿಯನ್ನು ಪ್ರದರ್ಶಿಸಲು ಸಿದ್ಧವಾಗಿದೆ ಎಂದು ಟ್ರಂಪ್​ ಎಚ್ಚರಿಕೆಯನ್ನು ನೀಡಿದ್ದಾರೆ.

ಕಳೆದ ಒಂದು ವರ್ಷದಲ್ಲಿ ದೇಶವು ಅಭೂತಪೂರ್ವ ಬದಲಾವಣೆಯನ್ನು ಕಂಡಿದೆ ಎಂದು ಪ್ರತಿಪಾದಿಸಿದರೂ, ಇತ್ತೀಚಿನ ಸಮೀಕ್ಷೆಗಳು ಭಿನ್ನವಾದ ಚಿತ್ರಣ ನೀಡುತ್ತಿವೆ. ಹೆಚ್ಚುತ್ತಿರುವ ಜೀವನ ವೆಚ್ಚ, ವಲಸೆ ನೀತಿ ಮತ್ತು ವಿದೇಶಾಂಗ ವ್ಯವಹಾರಗಳ ವಿಚಾರದಲ್ಲಿ ಮತದಾರರು ಅಸಮಾಧಾನ ವ್ಯಕ್ತಪಡಿಸುತ್ತಿರುವುದು ಟ್ರಂಪ್ ಆಡಳಿತಕ್ಕೆ ಸವಾಲಾಗಿ ಪರಿಣಮಿಸಿದೆ,(ಏಜೆನ್ಸೀಸ್).