ಇರಾನ್ ಜನತೆಗೆ ಸ್ವಾತಂತ್ರ್ಯ ನೀಡಲು ಅಮೆರಿಕ ಸಿದ್ಧ: ಖಮೇನಿ ಆಡಳಿತಕ್ಕೆ ಟ್ರಂಪ್ ಎಚ್ಚರಿಕೆ! | America

ಇರಾನ್‌ನಲ್ಲಿ ಸುಮಾರು ಎರಡು ವಾರಗಳಿಂದ ನಡೆಯುತ್ತಿರುವ ಹಿಂಸಾತ್ಮಕ ಪ್ರತಿಭಟನೆಗಳ ಹಿನ್ನೆಲೆಯಲ್ಲಿ ಟ್ರಂಪ್ ತಮ್ಮ 'ಟ್ರೂತ್ ಸೋಶಿಯಲ್' ಖಾತೆಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. "ಇರಾನ್ ಹಿಂದೆಂದೂ ಕಾಣದ ರೀತಿಯಲ್ಲಿ ಸ್ವಾತಂತ್ರ್ಯಕ್ಕಾಗಿ ಎದುರು ನೋಡುತ್ತಿದೆ. ಅಮೆರಿಕಾ ಸಹಾಯ ಮಾಡಲು ಸಿದ್ಧವಾಗಿ ನಿಂತಿದೆ!" ಎಂದು ಅವರು ಬರೆದಿದ್ದಾರೆ. ಅಷ್ಟೇ ಅಲ್ಲದೆ, ಇರಾನ್ ಸರ್ಕಾರವು ಪ್ರತಿಭಟನಾಕಾರರ ಮೇಲೆ ಗುಂಡಿನ ದಾಳಿ ನಡೆಸಿದರೆ ಅಥವಾ ಅವರನ್ನು ಕೊಂದರೆ, ಅಮೆರಿಕಾ ಸುಮ್ಮನೆ ಕುಳಿತುಕೊಳ್ಳುವುದಿಲ್ಲ ಮತ್ತು ಇರಾನ್ ಮೇಲೆ ಬಲವಾದ ದಾಳಿ ನಡೆಸಲಾಗುವುದು ಎಂದು ಎಚ್ಚರಿಸಿದ್ದಾರೆ.

ಇರಾನ್‌ನಲ್ಲಿ ಹಣದುಬ್ಬರ ಗಗನಕ್ಕೇರಿದ್ದು, ದಿನಬಳಕೆಯ ವಸ್ತುಗಳ ಬೆಲೆ ಏರಿಕೆ ಮತ್ತು ಆರ್ಥಿಕ ಕುಸಿತದಿಂದಾಗಿ ಡಿಸೆಂಬರ್ 28 ರಿಂದ ಪ್ರತಿಭಟನೆಗಳು ಆರಂಭವಾದವು. ಆರಂಭದಲ್ಲಿ ಆರ್ಥಿಕ ಕಾರಣಗಳಿಗಾಗಿ ಶುರುವಾದ ಈ ಮುಷ್ಕರ, ಈಗ ಖಮೇನಿ ನೇತೃತ್ವದ ಧಾರ್ಮಿಕ ಆಡಳಿತದ ಅಂತ್ಯಕ್ಕೆ ಮತ್ತು ಸರ್ವಾಧಿಕಾರದಿಂದ ಮುಕ್ತಿಗೆ ಒತ್ತಾಯಿಸುವ ರಾಜಕೀಯ ಹೋರಾಟವಾಗಿ ಮಾರ್ಪಟ್ಟಿದೆ.

ಸಾವು-ನೋವು: ವರದಿಗಳ ಪ್ರಕಾರ, ಭದ್ರತಾ ಪಡೆಗಳು ನಡೆಸಿದ ಗುಂಡಿನ ದಾಳಿಯಲ್ಲಿ ಇದುವರೆಗೆ 200ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ. ಪರಿಸ್ಥಿತಿಯನ್ನು ಹತೋಟಿಗೆ ತರಲು ಇರಾನ್ ಸರ್ಕಾರ ದೇಶಾದ್ಯಂತ ಇಂಟರ್ನೆಟ್ ಸ್ಥಗಿತಗೊಳಿಸಿದೆ.

ಟ್ರಂಪ್ ಅವರ ಹೇಳಿಕೆಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಇರಾನ್‌ನ ಸರ್ವೋಚ್ಚ ನಾಯಕ ಅಲಿ ಖಮೇನಿ, "ಟ್ರಂಪ್ ಮೊದಲು ತಮ್ಮ ದೇಶದ ಸಮಸ್ಯೆಗಳ ಬಗ್ಗೆ ಗಮನಹರಿಸಲಿ. ಇರಾನ್‌ನ ಆಂತರಿಕ ವಿಷಯಗಳಲ್ಲಿ ಹಸ್ತಕ್ಷೇಪ ಮಾಡುವುದನ್ನು ನಿಲ್ಲಿಸಲಿ" ಎಂದು ಕಿಡಿಕಾರಿದ್ದಾರೆ. ಪ್ರತಿಭಟನಾಕಾರರನ್ನು 'ಗಲಭೆಕೋರರು' ಮತ್ತು 'ಅಮೆರಿಕಾದ ಏಜೆಂಟ್‌ಗಳು' ಎಂದು ಕರೆದಿರುವ ಅವರು, ಇರಾನ್ ಎಂದಿಗೂ ವಿದೇಶಿ ಒತ್ತಡಕ್ಕೆ ಬಗ್ಗುವುದಿಲ್ಲ ಎಂದು ಹೇಳಿದ್ದಾರೆ.

ಇರಾನ್‌ನ ಗಡಿಪಾರಾದ ರಾಜಕುಮಾರ ರೇಜಾ ಪಹ್ಲವಿ ಅವರು ಅಮೆರಿಕಾ ಅಧ್ಯಕ್ಷರಿಂದ ತುರ್ತು ಹಸ್ತಕ್ಷೇಪವನ್ನು ಕೋರಿದ್ದಾರೆ. ಅಮೆರಿಕಾ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ ಕೂಡ "ಅಮೆರಿಕಾವು ಇರಾನ್‌ನ ಧೈರ್ಯಶಾಲಿ ಜನರ ಪರವಾಗಿ ನಿಂತಿದೆ" ಎಂದು ಹೇಳಿದ್ದಾರೆ. ಇರಾನ್‌ನಲ್ಲಿ ಹರಡುತ್ತಿರುವ ಈ ಅಶಾಂತಿ ಮತ್ತು ಅಮೆರಿಕಾದ ಕಠಿಣ ನಿಲುವು ಜಾಗತಿಕ ರಾಜಕೀಯದಲ್ಲಿ ಸಂಚಲನ ಮೂಡಿಸಿದೆ,(ಏಜೆನ್ಸೀಸ್​)