ಪ್ರಧಾನಿ ಮೋದಿ ವಿರುದ್ಧದ ಆರೋಪ ಆಧಾರರಹಿತ: 'ಎಪ್ಸ್ಟೀನ್ ಫೈಲ್ಸ್' ವಿವಾದಕ್ಕೆ ತೆರೆ ಎಳೆದ ವಿದೇಶಾಂಗ ಸಚಿವಾಲಯ | Narendra Modi

ನವದೆಹಲಿ: ವಿಶ್ವದಾದ್ಯಂತ ಭಾರಿ ತಲ್ಲಣಕ್ಕೆ ಕಾರಣವಾಗಿರುವ ಎಪ್ಸ್ಟೀನ್ ಫೈಲ್ಸ್‌ನಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ (Narendra Modi) ಯವರ ಹೆಸರು ಸಹ ಇದೆ ಎಂಬ ವದಂತಿಯನ್ನು ವಿದೇಶಾಂಗ ಸಚಿವಾಲಯ ತಿರಸ್ಕರಿಸಿದೆ.

ಜೆಫ್ರಿ ಎಪ್ಸ್ಟೀನ್​ರ ಭೇಟಿಯ ಭಾಗವೆಂದು ಹೇಳಲಾದ ಇಮೇಲ್‌ನಲ್ಲಿ ಉಲ್ಲೇಖಿಸಲಾದ ಪ್ರಧಾನಿ ನರೇಂದ್ರ ಮೋದಿಯವರ 2017 ರ ಇಸ್ರೇಲ್ ಪ್ರವಾಸದ ಉಲ್ಲೇಖಗಳನ್ನು ವಿದೇಶಾಂಗ ಸಚಿವಾಲಯದ ವಕ್ತಾರ ರಣಧೀರ್ ಜೈಸ್ವಾಲ್ ಈ ಹೇಳಿಕೆಗಳನ್ನು ಆಧಾರರಹಿತವೆಂದು ತಳ್ಳಿಹಾಕಿದ್ದಾರೆ. ವರದಿಗಳಿಗೆ ಪ್ರತಿಕ್ರಿಯಿಸಿದ ಅವರು ಈ ವದಂತಿಗಳು ಕೇವಲ ಉಹಾತ್ಮಕವಾಗಿದ್ದು, ಇವುಗಳನ್ನು ಗಂಭೀರವಾಗಿ ಪರಗಣಿಸುವ ಅವಶ್ಯಕತೆಯಿಲ್ಲ ಎಂದು ಹೇಳಿದ್ದಾರೆ.

ಎಪ್ಸ್ಟೀನ್ ಫೈಲ್‌ಗಳಿಂದ ಬಂದಿರುವ ಇಮೇಲ್ ಸಂದೇಶದಲ್ಲಿ ಪ್ರಧಾನಿ ಮತ್ತು ಅವರ ಇಸ್ರೇಲ್ ಭೇಟಿಯ ಉಲ್ಲೇಖವಿದೆ ಎಂಬ ವರದಿಗಳನ್ನು ನಾವು ನೋಡಿದ್ದೇವೆ. ಜುಲೈ 2017 ರಲ್ಲಿ ಪ್ರಧಾನಿಯವರ ಇಸ್ರೇಲ್ ಅಧಿಕೃತ ಭೇಟಿಯನ್ನು, ಶಿಕ್ಷೆಗೊಳಗಾದ ಅಪರಾಧಿಯೊಬ್ಬನ ಜತೆಗೆ ಸಮೀಕರಿಸುವುದು ಸರಿಯಲ್ಲ ಈ ವದಂತಿಗಳನ್ನು ವಿದೇಶಾಂಗ ಸಚಿವಾಲಯ ವಜಾಗೊಳಿಸುತ್ತದೆ ಎಂದು ಹೇಳಿದರು.

ಈ ಹಿಂದೆ, ಎಪ್ಸ್ಟೀನ್ ಎಸ್ಟೇಟ್‌ನಿಂದ ಬಿಡುಗಡೆಯಾದ ದಾಖಲೆಗಳಲ್ಲಿ ಭಾರತದ ಪ್ರಧಾನಿ ಸಹ ವಿಶ್ವದ ಹಲವಾರು ನಾಯಕರಂತೆ ಎಪ್ಸ್ಟೀನ್ ಐಲ್ಯಾಂಡ್​ಗೆ ತೆರಳಿದ್ದಾರೆ. ಹಾಗೆಯೇ ಮೋದಿ ಅವರಿಗೆ ಮತ್ತು ಜೆಫ್ರಿ ಎಪ್ಸ್ಟೀನ್​ಗೆ ನಿಕಟ ಸಂಬಂಧವಿತ್ತು ಎಂಬ ವರದಿಗಳು ಪ್ರಚಾರ ಪಡೆದಿದ್ದವು. ಈ ವದಂತಿಗಳ ಬೆನ್ನಲೆ ಕಾಂಗ್ರೆಸ್​ ಪಕ್ಷವು ಈ ಕುರಿತು ಪ್ರಧಾನಿಯವರಿಗೆ ನಿರಂತರವಾಗಿ ಪ್ರಶ್ನಿಸುತ್ತಿತ್ತು.

ಯುಎಸ್ ನ್ಯಾಯಾಂಗ ಇಲಾಖೆ ಶುಕ್ರವಾರ (ಜ.30) ದಿವಂಗತ ಹಣಕಾಸುದಾರ ಮತ್ತು ಶಿಕ್ಷೆಗೊಳಗಾದ ಲೈಂಗಿಕ ಅಪರಾಧಿ ಜೆಫ್ರಿ ಎಪ್ಸ್ಟೀನ್‌ಗೆ ಸಂಬಂಧಿಸಿದ ತನಿಖಾ ಸಾಮಗ್ರಿಗಳ ದೊಡ್ಡ ಬ್ಯಾಚ್​ನ್ನು ಬಿಡುಗಡೆ ಮಾಡಿತು. ಬಿಡುಗಡೆಯಾದ ತನಿಖಾ ಸಾಮಗ್ರಿಗಳಲ್ಲಿ 30 ಲಕ್ಷಕ್ಕೂ ಹೆಚ್ಚಿನ ಪುಟಗಳ ದಾಖಲೆ, 2,000 ಕ್ಕೂ ಹೆಚ್ಚು ವೀಡಿಯೊಗಳು ಮತ್ತು ಸುಮಾರು 1,80,000 ಚಿತ್ರಗಳನ್ನು ಒಳಗೊಂಡಿದೆ.

ಪತ್ರಿಕಾಗೋಷ್ಠಿಯಲ್ಲಿ ಬಿಡುಗಡೆಯನ್ನು ಘೋಷಿಸಿದ ಡೆಪ್ಯೂಟಿ ಅಟಾರ್ನಿ ಜನರಲ್ ಟಾಡ್ ಬ್ಲಾಂಚೆ, ಬಹಿರಂಗಪಡಿಸುವಿಕೆಯು ಕಳೆದ ವರ್ಷ ಕಾಂಗ್ರೆಸ್ ಅಂಗೀಕರಿಸಿದ ಪಾರದರ್ಶಕತೆಯ ಆದೇಶಕ್ಕೆ ಅನುಗುಣವಾಗಿದೆ ಎಂದು ಹೇಳಿದರು.

ಫೆಡರಲ್ ಲೈಂಗಿಕ ಕಳ್ಳಸಾಗಣೆ ಆರೋಪದ ಮೇಲೆ ಆರೋಪ ಹೊರಿಸಲ್ಪಟ್ಟ ಸುಮಾರು ಒಂದು ತಿಂಗಳ ನಂತರ, ಜೆಫ್ರಿ ಎಪ್ಸ್ಟೀನ್ ಆಗಸ್ಟ್ 2019 ರಲ್ಲಿ ನ್ಯೂಯಾರ್ಕ್ ಜೈಲಿನಲ್ಲಿ ಆತ್ಮಹತ್ಯೆ ಮಾಡಿಕೊಂಡರು. 2008 ರಲ್ಲಿ ವಿವಾದಾತ್ಮಕ ಮನವಿ ಒಪ್ಪಂದದ ನಂತರ ಜೆಫ್ರಿ ಎಪ್ಸ್ಟೀನ್​ನನ್ನು ಫ್ಲೋರಿಡಾದ ಜೈಲಿಗೆ ಕಳುಹಿಸಲಾಗಿತ್ತು,(ಏಜನ್ಸೀಸ್​).