ಡ್ಯುರಾಂಡ್ ಲೈನ್ ದಾಟಿದ ಅಫ್ಘಾನ್ ಪಡೆ! ಪಾಕ್ ಸೇನೆಯ ಚೆಕ್‌ಪೋಸ್ಟ್‌ಗಳ ಮೇಲೆ ಈಗ ತಾಲಿಬಾನ್ ಬಾವುಟ..? AfghanistanVsPakistan

ಅಫ್ಘಾನ್ ಅಧಿಕಾರಿಗಳು ನೀಡಿರುವ ಅಧಿಕೃತ ಮಾಹಿತಿಯ ಪ್ರಕಾರ, ಕಂದಹಾರ್ ಪ್ರಾಂತ್ಯದ ಗಡಿ ಭಾಗದಲ್ಲಿ ನಡೆದ ಭೀಕರ ಕಾಳಗದಲ್ಲಿ ಪಾಕಿಸ್ತಾನದ ಸೈನ್ಯಕ್ಕೆ ಭಾರಿ ಹಿನ್ನಡೆಯಾಗಿದೆ.

ಸ್ಪಿನ್ ಬೋಲ್ಡಾಕ್ ವಲಯ: ಅಫ್ಘಾನ್ ಪಡೆಗಳು ಪಾಕಿಸ್ತಾನದ ಆಡಳಿತಕ್ಕೆ ಒಳಪಟ್ಟಿದ್ದ ಸ್ಪಿನ್ ಬೋಲ್ಡಾಕ್ ಜಿಲ್ಲೆಯ ಮೂರು ಪ್ರಮುಖ ಸೇನಾ ನೆಲೆಗಳನ್ನು ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಂಡಿವೆ.

ಅಲಿ-ಶೇರ್ ಜಿಲ್ಲೆ: ಇದೇ ವೇಳೆ ಅಲಿ-ಶೇರ್ ಜಿಲ್ಲೆಯ ಎರಡು ಪ್ರಮುಖ ಮಿಲಿಟರಿ ಪೋಸ್ಟ್‌ಗಳನ್ನು ಅಫ್ಘಾನ್ ಪಡೆಗಳು ವಶಪಡಿಸಿಕೊಂಡಿವೆ.

ಈ ಮಿಂಚಿನ ದಾಳಿಯಿಂದಾಗಿ ಪಾಕಿಸ್ತಾನದ ಸೈನಿಕರು ತಮ್ಮ ಪೋಸ್ಟ್‌ಗಳನ್ನು ಬಿಟ್ಟು ಪಲಾಯನ ಮಾಡಿದ್ದಾರೆ ಎಂದು ವರದಿಗಳು ತಿಳಿಸಿವೆ.

ಕಳೆದ ಕೆಲವು ದಿನಗಳಿಂದ ಪಾಕಿಸ್ತಾನವು ಅಫ್ಘಾನಿಸ್ತಾನದ ಗಡಿ ಗ್ರಾಮಗಳ ಮೇಲೆ ವೈಮಾನಿಕ ದಾಳಿ ನಡೆಸಿತ್ತು. ಈ ದಾಳಿಯಲ್ಲಿ ಹಲವಾರು ಅಫ್ಘಾನ್ ನಾಗರಿಕರು ಸಾವನ್ನಪ್ಪಿದ್ದರು. ಇದಕ್ಕೆ ಪ್ರತಿಯಾಗಿ ನಾವು ಸುಮ್ಮನೆ ಕೂರುವುದಿಲ್ಲ ಎಂದು ಎಚ್ಚರಿಕೆ ನೀಡಿದ್ದ ಅಫ್ಘಾನ್ ಆಡಳಿತ, ಈಗ ನೇರವಾಗಿ ಪಾಕ್ ಗಡಿಯೊಳಗೆ ನುಗ್ಗಿ ತನ್ನ ಶೌರ್ಯ ಪ್ರದರ್ಶಿಸಿದೆ. ಅಫ್ಘಾನ್ ನಡೆಸಿದ ಈ ಸರ್ಜಿಕಲ್ ಸ್ಟ್ರೈಕ್ ಮಾದರಿಯ ದಾಳಿಯಿಂದ ಪಾಕಿಸ್ತಾನದ ರಕ್ಷಣಾ ವ್ಯವಸ್ಥೆ ಸಂಪೂರ್ಣವಾಗಿ ಹಳಿ ತಪ್ಪಿದೆ.

ಬ್ರಿಟಿಷರ ಕಾಲದ 'ಡ್ಯುರಾಂಡ್ ಲೈನ್' ಗಡಿಯನ್ನು ಅಫ್ಘಾನಿಸ್ತಾನ ಎಂದಿಗೂ ಒಪ್ಪಿಕೊಂಡಿಲ್ಲ. ಈಗ ಈ ಗಡಿ ರೇಖೆಯ ಉದ್ದಕ್ಕೂ ಉಭಯ ದೇಶಗಳ ನಡುವೆ ಭಾರೀ ಪ್ರಮಾಣದ ಗುಂಡಿನ ಚಕಮಕಿ ನಡೆಯುತ್ತಿದೆ. ಎರಡೂ ಕಡೆಯಿಂದ ಭಾರೀ ಶಸ್ತ್ರಾಸ್ತ್ರಗಳು ಮತ್ತು ಫಿರಂಗಿಗಳನ್ನು ಬಳಸಲಾಗುತ್ತಿದೆ. ಗಡಿ ಭಾಗದ ಸಾವಿರಾರು ನಿವಾಸಿಗಳು ತಮ್ಮ ಮನೆಗಳನ್ನು ಬಿಟ್ಟು ಸುರಕ್ಷಿತ ಸ್ಥಳಗಳಿಗೆ ಓಡುತ್ತಿದ್ದಾರೆ.

ವಿಶ್ವದಾದ್ಯಂತ ಭಯೋತ್ಪಾದನೆಯನ್ನು ಪೋಷಿಸುತ್ತಿದೆ ಎಂಬ ಆರೋಪ ಹೊತ್ತಿರುವ ಪಾಕಿಸ್ತಾನಕ್ಕೆ, ಈಗ ತನ್ನದೇ ನೆರೆಯ ದೇಶದಿಂದ ಎದುರಾಗಿರುವ ಈ ಸವಾಲು ನುಂಗಲಾರದ ತುತ್ತಾಗಿದೆ. ಒಂದು ಕಡೆ ಆರ್ಥಿಕ ಕುಸಿತ, ಇನ್ನೊಂದು ಕಡೆ ಅಫ್ಘಾನ್ ಸೈನ್ಯದ ಅಟ್ಯಾಕ್, ಪಾಕಿಸ್ತಾನ ಈಗ ಇಕ್ಕಟ್ಟಿಗೆ ಸಿಲುಕಿದೆ. ಅಫ್ಘಾನ್ ಸೈನ್ಯವು ವಶಪಡಿಸಿಕೊಂಡಿರುವ ಪೋಸ್ಟ್‌ಗಳನ್ನು ಮರಳಿ ಪಡೆಯಲು ಪಾಕ್ ಸೇನೆ ವಿಫಲವಾಗಿರುವುದು ಅದರ ದೌರ್ಬಲ್ಯವನ್ನು ಎತ್ತಿ ತೋರಿಸುತ್ತಿದೆ.

ಈ ಯುದ್ಧವು ಕೇವಲ ಎರಡು ದೇಶಗಳ ನಡುವೆ ನಿಲ್ಲದೆ, ಇಡೀ ದಕ್ಷಿಣ ಏಷ್ಯಾದ ಮೇಲೆ ಪರಿಣಾಮ ಬೀರಬಹುದು. ಈ ಸಂಘರ್ಷದಲ್ಲಿ ತಾಲಿಬಾನ್ ಆಡಳಿತದ ಪಾತ್ರವೇನು ಮತ್ತು ಅಂತಾರಾಷ್ಟ್ರೀಯ ಸಮುದಾಯ ಇದನ್ನು ಹೇಗೆ ಎದುರಿಸಲಿದೆ ಎಂಬುದು ಕುತೂಹಲ ಮೂಡಿಸಿದೆ. ಒಂದು ವೇಳೆ ಸಂಘರ್ಷ ಮುಂದುವರಿದರೆ, ಪಾಕಿಸ್ತಾನದೊಳಗೆ ನಾಗರಿಕ ದಂಗೆ ಏಳುವ ಸಾಧ್ಯತೆಯನ್ನೂ ತಜ್ಞರು ತಳ್ಳಿಹಾಕುವಂತಿಲ್ಲ,(ಏಜೆನ್ಸೀಸ್).