ಅದಿರ್ ಅಬ್ಬರ; ಇತಿಹಾಸದಲ್ಲೇ ಮೊದಲ ಬಾರಿಗೆ ಎಫ್-35 ಹೊಡೆತಕ್ಕೆ ಸಿಲುಕಿ ಭಸ್ಮವಾಯ್ತಾ ಇರಾನ್ ಯುದ್ಧ ವಿಮಾನ? F35I Adir

ಬುಧವಾರ ಮುಂಜಾನೆ ಇರಾನ್ ರಾಜಧಾನಿ ಟೆಹ್ರಾನ್‌ನಲ್ಲಿ ಭಾರಿ ಸ್ಫೋಟದ ಶಬ್ದಗಳು ಕೇಳಿಬಂದಿವೆ. ಇಸ್ರೇಲ್‌ನ ವೈಮಾನಿಕ ದಾಳಿ ಮತ್ತು ಇರಾನ್‌ನ ಕ್ಷಿಪಣಿ ಪ್ರತಿರೋಧದ ನಡುವೆ ಇಡೀ ನಗರವು ಯುದ್ಧಭೂಮಿಯಂತಾಗಿದೆ. ಇತ್ತ ಇಸ್ರೇಲ್‌ನ ಜೆರುಸಲೇಂ ಸಮೀಪವೂ ಇರಾನ್ ಕ್ಷಿಪಣಿಗಳನ್ನು ತಡೆಯಲು ಇಸ್ರೇಲ್‌ನ ವಾಯು ರಕ್ಷಣಾ ವ್ಯವಸ್ಥೆಗಳು ಸಕ್ರಿಯವಾಗಿದ್ದು, ಆಕಾಶದಲ್ಲೇ ಕ್ಷಿಪಣಿಗಳು ಸ್ಫೋಟಗೊಳ್ಳುತ್ತಿವೆ.

F-35I ಅದಿರ್: ಇದು ಇಸ್ರೇಲ್‌ಗಾಗಿ ಅಮೆರಿಕದ ಲಾಕ್‌ಹೀಡ್ ಮಾರ್ಟಿನ್ ಕಂಪನಿ ಸಿದ್ಧಪಡಿಸಿದ ವಿಶೇಷ ಆವೃತ್ತಿಯಾಗಿದೆ. ಇದರ ಅತಿದೊಡ್ಡ ವಿಶೇಷತೆ ಎಂದರೆ ಸ್ಟೆಲ್ತ್ ತಂತ್ರಜ್ಞಾನ. ಇದು ಶತ್ರುಗಳ ರಾಡಾರ್‌ಗೆ ಪತ್ತೆಯಾಗದಂತೆ ಹಾರಾಟ ನಡೆಸಬಲ್ಲದು. ತನ್ನ ವಿಶಿಷ್ಟ ಆಕಾರ ಮತ್ತು ಒಳಗಿನ ಶಸ್ತ್ರಾಸ್ತ್ರ ಸಂಗ್ರಹಣಾ ವ್ಯವಸ್ಥೆಯಿಂದಾಗಿ ಇದು ವಿಶ್ವದ ಅತ್ಯಂತ ಸುಧಾರಿತ ಯುದ್ಧ ವಿಮಾನ ಎನಿಸಿಕೊಂಡಿದೆ.

YAK-130: ಇರಾನ್‌ನ ಈ ವಿಮಾನವು ರಷ್ಯಾ ಮತ್ತು ಇಟಲಿ ಜಂಟಿಯಾಗಿ ಅಭಿವೃದ್ಧಿಪಡಿಸಿದ ತರಬೇತಿ ಹಾಗೂ ಲಘು ಯುದ್ಧ ವಿಮಾನವಾಗಿದೆ. ಇದನ್ನು ಮುಖ್ಯವಾಗಿ ಪೈಲಟ್‌ಗಳ ತರಬೇತಿಗೆ ಬಳಸಲಾಗುತ್ತದೆಯಾದರೂ, ಯುದ್ಧದ ಸಮಯದಲ್ಲಿ ಶಸ್ತ್ರಾಸ್ತ್ರಗಳನ್ನು ಹೊತ್ತೊಯ್ಯುವ ಸಾಮರ್ಥ್ಯವನ್ನೂ ಇದು ಹೊಂದಿದೆ.

ಕಳೆದ ವಾರಾಂತ್ಯದಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ ನಡೆಸಿದ ದಾಳಿಯಲ್ಲಿ ಸುಪ್ರೀಂ ಲೀಡರ್ ಅಲಿ ಖಮೇನಿ ಸಾವನ್ನಪ್ಪಿದ ನಂತರ ಯುದ್ಧದ ತೀವ್ರತೆ ಹೆಚ್ಚಾಗಿದೆ. ವರದಿಗಳ ಪ್ರಕಾರ, ಈವರೆಗೆ ಇರಾನ್‌ನಲ್ಲಿ ಸುಮಾರು 800 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಈ ಯುದ್ಧವು ಒಂದು ತಿಂಗಳು ಅಥವಾ ಅದಕ್ಕಿಂತ ಹೆಚ್ಚು ಕಾಲ ಮುಂದುವರಿಯಬಹುದು ಎಂದು ಎಚ್ಚರಿಸಿದ್ದಾರೆ.

ಇರಾನ್ ಪರವಾಗಿ ಯುದ್ಧಕ್ಕೆ ಧುಮುಕಿರುವ ಹೆಜ್ಬೊಲ್ಲಾ ಸಂಘಟನೆಯನ್ನು ಹತ್ತಿಕ್ಕಲು ಇಸ್ರೇಲ್ ಈಗ ಲೆಬನಾನ್ ಮೇಲೂ ದಾಳಿ ನಡೆಸುತ್ತಿದೆ. ಲೆಬನಾನ್‌ನ ಬಾಲ್ಬೆಕ್ ನಗರದ ವಸತಿ ಕಟ್ಟಡದ ಮೇಲೆ ಇಸ್ರೇಲ್ ನಡೆಸಿದ ದಾಳಿಯಲ್ಲಿ ನಾಲ್ವರು ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ. ಅಲ್ಲದೆ, ಟೆಹ್ರಾನ್‌ನಲ್ಲಿರುವ ಇರಾನ್‌ನ ಬಸಿಜ್ ಪಡೆಗಳು ಮತ್ತು ಆಂತರಿಕ ಭದ್ರತಾ ಘಟಕಗಳ ಕಮಾಂಡ್ ಸೆಂಟರ್‌ಗಳನ್ನು ಐಡಿಎಫ್ ಗುರಿಯಾಗಿಸಿಕೊಂಡು ಧ್ವಂಸಗೊಳಿಸಿದೆ.

ಇರಾನ್ ಸರ್ಕಾರವು ದೇಶದ ಮೇಲೆ ಹಿಡಿತ ಸಾಧಿಸಲು ಬಳಸುತ್ತಿದ್ದ ಕ್ಷಿಪಣಿ ಲಾಂಚರ್‌ಗಳು ಮತ್ತು ಮಿಲಿಟರಿ ವ್ಯವಸ್ಥೆಗಳನ್ನು ಇಸ್ರೇಲ್ ವ್ಯವಸ್ಥಿತವಾಗಿ ನಾಶಪಡಿಸುತ್ತಿದೆ. ಇರಾನ್‌ನ ಆಡಳಿತ ವ್ಯವಸ್ಥೆಯನ್ನು ಬುಡಮೇಲು ಮಾಡುವುದೇ ಈ ದಾಳಿಯ ಮುಖ್ಯ ಉದ್ದೇಶ ಎಂದು ಇಸ್ರೇಲ್ ಸೇನೆ ಸ್ಪಷ್ಟಪಡಿಸಿದೆ,(ಏಜೆನ್ಸೀಸ್).