ಮಧ್ಯಸ್ಥಿಕೆ ವಹಿಸಿದ ಪಾಕ್​ಗೆ ಮುಖಭಂಗ: ನಾವು ಬರಲ್ಲ! ಬಲಿಷ್ಠ ಅಮೆರಿಕದ ಮುಖಕ್ಕೆ ಹೊಡೆದಂತೆ ಉತ್ತರಿಸಿದ ಇರಾನ್! Iran

ವಾಲ್ ಸ್ಟ್ರೀಟ್ ಜರ್ನಲ್ (WSJ) ವರದಿಯ ಪ್ರಕಾರ, ಪ್ರಾದೇಶಿಕ ರಾಷ್ಟ್ರಗಳು, ವಿಶೇಷವಾಗಿ ಪಾಕಿಸ್ತಾನವು ಎರಡೂ ದೇಶಗಳ ನಡುವೆ ಕದನ ವಿರಾಮ ಏರ್ಪಡಿಸಲು ನಡೆಸುತ್ತಿದ್ದ ಸಂಧಾನ ಪ್ರಯತ್ನಗಳು ಈಗ ಅಂತಿಮ ಹಂತದಲ್ಲಿ ಕುಸಿದುಬಿದ್ದಿವೆ. ಅಮೆರಿಕದ ನಿಯೋಗವನ್ನು ಭೇಟಿ ಮಾಡಲು ಇರಾನ್ ನಿರಾಕರಿಸಿದ್ದು, ಈ ಮೂಲಕ ರಾಜತಾಂತ್ರಿಕ ಹಾದಿಗಳು ಮುಚ್ಚಲ್ಪಟ್ಟಿವೆ.

ಪಾಕಿಸ್ತಾನವು ಈ ಹಿಂದೆ ಅರ್ಥಪೂರ್ಣ ಚರ್ಚೆಗಳಿಗೆ ಆತಿಥ್ಯ ವಹಿಸಲು ಮತ್ತು ಸುಗಮಗೊಳಿಸಲು ನಮಗೆ ಗೌರವವಿದೆ ಎಂದು ವಿದೇಶಾಂಗ ಸಚಿವ ಇಶಾಕ್ ದಾರ್ ಮೂಲಕ ತಿಳಿಸಿತ್ತು. ಆದರೆ, ಇರಾನ್‌ನ ಇತ್ತೀಚಿನ ನಿಲುವು ಪಾಕಿಸ್ತಾನದ ಈ ಆಸೆಯನ್ನು ತಣ್ಣಗಾಗಿಸಿದೆ.

ಮುಂಬೈನಲ್ಲಿರುವ ಇರಾನ್ ರಾಯಭಾರ ಕಚೇರಿಯ ಮೂಲಕ ವಿದೇಶಾಂಗ ಸಚಿವಾಲಯದ ವಕ್ತಾರ ಇಸ್ಮಾಯಿಲ್ ಬಘೈ ನೀಡಿರುವ ಹೇಳಿಕೆಗಳು ಸಂಚಲನ ಸೃಷ್ಟಿಸಿವೆ.

ನೇರ ಮಾತುಕತೆ ಇಲ್ಲ: ಅಮೆರಿಕದೊಂದಿಗೆ ಯಾವುದೇ ನೇರ ಮಾತುಕತೆಗಳು ನಡೆಯುತ್ತಿಲ್ಲ. ಮಧ್ಯವರ್ತಿಗಳ ಮೂಲಕ ಕೇವಲ ಅತಿಯಾದ ಮತ್ತು ಅವಾಸ್ತವಿಕ ಬೇಡಿಕೆಗಳನ್ನು ತಲುಪಿಸಲಾಗುತ್ತಿದೆ.

15 ಅಂಶಗಳ ಪ್ರಸ್ತಾವನೆ: ಟ್ರಂಪ್ ಆಡಳಿತವು ಇರಾನ್ ಮುಂದೆ 15 ಅಂಶಗಳ ಪ್ರಸ್ತಾವನೆಯನ್ನು ಇಟ್ಟಿತ್ತು. ಆದರೆ ಇರಾನ್ ಇದನ್ನು ಅಹಂಕಾರಿ ಎಂದು ಕರೆದು ತಿರಸ್ಕರಿಸಿದೆ.

ಯುದ್ಧದ ಮೂಲದ ಪ್ರಶ್ನೆ: ಯುದ್ಧ ನಿಲ್ಲಿಸುವ ಕರೆಯನ್ನು ನಾವು ಸ್ವಾಗತಿಸುತ್ತೇವೆ, ಆದರೆ ಈ ಯುದ್ಧವನ್ನು ಯಾರು ಪ್ರಾರಂಭಿಸಿದರು ಎಂಬುದನ್ನು ಜಗತ್ತು ನೆನಪಿಟ್ಟುಕೊಳ್ಳಬೇಕು ಎಂದು ಬಘೈ ಗುಡುಗಿದ್ದಾರೆ.

ಕುತೂಹಲಕಾರಿ ವಿಷಯವೆಂದರೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ನಾವು ಇರಾನ್ ಜೊತೆಗಿನ ಚರ್ಚೆಯಲ್ಲಿ ಉತ್ತಮ ಪ್ರಗತಿ ಸಾಧಿಸುತ್ತಿದ್ದೇವೆ ಎಂದು ಇತ್ತೀಚೆಗೆ ಸೂಚಿಸಿದ್ದರು. ಆದರೆ ಇರಾನ್ ಈ ಹೇಳಿಕೆಯನ್ನು ಸಂಪೂರ್ಣವಾಗಿ ಸುಳ್ಳು ಎಂದು ತಳ್ಳಿಹಾಕಿದೆ. ಪಾಕಿಸ್ತಾನದ ವೇದಿಕೆಗಳು ಅವರಿಗಿರಲಿ, ನಾವು ಅದರಲ್ಲಿ ಭಾಗವಹಿಸಿಲ್ಲ ಎಂದು ಇರಾನ್ ಸ್ಪಷ್ಟಪಡಿಸಿದೆ.

ಇರಾನ್ ಕೇವಲ ಬೇಡಿಕೆಗಳನ್ನು ತಿರಸ್ಕರಿಸಿದ್ದಷ್ಟೇ ಅಲ್ಲದೆ, ತನ್ನ ಉನ್ನತ ಅಧಿಕಾರಿಯ ಪತ್ನಿಯ ಹತ್ಯೆಯ ವಿಷಯದಲ್ಲಿ ಅಮೆರಿಕವನ್ನು ಜಾಗತಿಕ ವೇದಿಕೆಯಲ್ಲಿ ಪ್ರಶ್ನಿಸಿದೆ. ಜಗತ್ತು ನ್ಯಾಯ ತೀರ್ಮಾನಿಸಲಿ ಎಂದು ಹೇಳುವ ಮೂಲಕ ಇರಾನ್ ಭಾವನಾತ್ಮಕ ಮತ್ತು ರಾಜಕೀಯ ಒತ್ತಡವನ್ನು ಹೇರಲು ಪ್ರಯತ್ನಿಸುತ್ತಿದೆ.

ದಶಕಗಳಿಂದ ಅಮೆರಿಕ ಮತ್ತು ಇರಾನ್ ನಡುವೆ ಸೇತುವೆಯಾಗಲು ಪ್ರಯತ್ನಿಸುತ್ತಿರುವ ಪಾಕಿಸ್ತಾನಕ್ಕೆ ಇದು ದೊಡ್ಡ ರಾಜತಾಂತ್ರಿಕ ಸೋಲು ಎನ್ನಲಾಗುತ್ತಿದೆ. ಇಸ್ಲಾಮಾಬಾದ್ ಈ ಮಾತುಕತೆಗಳ ಮೂಲಕ ತನ್ನ ಪ್ರಾದೇಶಿಕ ಪ್ರಭಾವವನ್ನು ಹೆಚ್ಚಿಸಿಕೊಳ್ಳುವ ಗುರಿ ಹೊಂದಿತ್ತು. ಆದರೆ ಇರಾನ್‌ನ ಕಠಿಣ ನಿಲುವು ಪಾಕಿಸ್ತಾನದ ಪ್ರಸ್ತಾಪವನ್ನು ಅತಂತ್ರ ಸ್ಥಿತಿಗೆ ತಳ್ಳಿದೆ.

ಈ ವಿದ್ಯಮಾನವು ಮಧ್ಯಪ್ರಾಚ್ಯದಲ್ಲಿ ಮತ್ತೊಂದು ಸುತ್ತಿನ ಸಂಘರ್ಷಕ್ಕೆ ನಾಂದಿ ಹಾಡುತ್ತದೆಯೇ ಎಂಬ ಭೀತಿ ಶುರುವಾಗಿದೆ. ಅಮೆರಿಕ ವಿಧಿಸಿರುವ ಆರ್ಥಿಕ ನಿರ್ಬಂಧಗಳು ಮತ್ತು ಇರಾನ್‌ನ ಪರಮಾಣು ಕಾರ್ಯಕ್ರಮದ ನಡುವಿನ ಈ ಹಗ್ಗಜಗ್ಗಾಟ ಈಗ ಮಾತುಕತೆ ಅಸಾಧ್ಯ ಎಂಬ ಹಂತಕ್ಕೆ ಬಂದು ನಿಂತಿದೆ. ಇರಾನ್‌ನ ಅಲ್ಲ ಎಂಬ ನಿರ್ಧಾರವು ಜಾಗತಿಕ ತೈಲ ಮಾರುಕಟ್ಟೆ ಮತ್ತು ಭದ್ರತೆಯ ಮೇಲೆ ತೀವ್ರ ಪರಿಣಾಮ ಬೀರುವ ಸಾಧ್ಯತೆಯಿದೆ,(ಏಜೆನ್ಸೀಸ್).