ನ್ಯೂಯಾರ್ಕ್‌ನ ಎಂಪೈರ್ ಸ್ಟೇಟ್ ಕಟ್ಟಡದ ತುತ್ತತುದಿಯಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡ ರಷ್ಯಾ ದಂಪತಿ ಬಂಧನ! Empire State Proposal

ನೆಲದಿಂದ ಸುಮಾರು 1,454 ಅಡಿ ಎತ್ತರವಿರುವ ಎಂಪೈರ್ ಸ್ಟೇಟ್ ಕಟ್ಟಡದ ಕಿರಿದಾದ ಗೋಪುರದ ಸೂಜಿಯ ತುದಿಗೆ ಇಬ್ಬರೂ ಯಾವುದೇ ಲೈಫ್‌ಲೈನ್ ಅಥವಾ ಸುರಕ್ಷತಾ ಹಗ್ಗಗಳಿಲ್ಲದೆ ಹತ್ತಿದ್ದಾರೆ. ಆ ಕಿರಿದಾದ ಜಾಗದಲ್ಲೇ ಮೊಣಕಾಲೂರಿ ಕುಳಿತು ಏಂಜೆಲ್​ಗೆ ಉಂಗುರವನ್ನು ನೀಡುವ ಮೂಲಕ ಪ್ರಪೋಸ್​ ಮಾಡಿದ್ದಾರೆ. ಏಂಜೆಲಾ ಕೂಡ ತಕ್ಷಣವೇ ಪ್ರಸ್ತಾಪವನ್ನು ಒಪ್ಪಿಕೊಂಡಿದ್ದು, ಇಬ್ಬರೂ ಪರಸ್ಪರ ಚುಂಬಿಸಿ ಸಂಭ್ರಮಿಸಿದ್ದಾರೆ.

ಪ್ರೀತಿಯ ಶಕ್ತಿಯು ಅಧಿಕಾರದ ಪ್ರೀತಿಯನ್ನು ಸೋಲಿಸಿದಾಗ ಜಗತ್ತಿಗೆ ಶಾಂತಿ ತಿಳಿಯುತ್ತದೆ ಎಂದು ಬರೆದಿರುವ ಬ್ಯಾನರ್​ ಅನ್ನು ದಂಪತಿ ಬಿಚ್ಚಿ ಪ್ರದರ್ಶಿಸಿದರು. ಆದಾಗ್ಯೂ,  ಈ ಸಂದೇಶದ ಹಿಂದೆ ಒಂದು ಆಸಕ್ತಿದಾಯಕ ಇತಿಹಾಸವಿದೆ. ಜಗತ್ತಿನಾದ್ಯಂತ ಈ ಪ್ರಸಿದ್ಧ ಸಾಲನ್ನು ರಾಕ್ ಗಿಟಾರ್ ದಂತಕಥೆ ಜಿಮಿ ಹೆಂಡ್ರಿಕ್ಸ್ (Jimi Hendrix) ಹೇಳಿದ್ದು ಎಂದು ವ್ಯಾಪಕವಾಗಿ ತಪ್ಪಾಗಿ ನಂಬಲಾಗಿದೆ. ಆದರೆ, ವಾಸ್ತವದಲ್ಲಿ ಈ ಆಳವಾದ ಚಿಂತನೆಯನ್ನು 19ನೇ ಶತಮಾನದ ಬ್ರಿಟಿಷ್ ರಾಜಕಾರಣಿ ವಿಲಿಯಂ ಗ್ಲ್ಯಾಡ್‌ಸ್ಟೋನ್ (ಅವರು ಮಾತನಾಡಿದ್ದರು. ದಂಪತಿಗಳು ಅದರ ಸ್ವಲ್ಪ ಮಾರ್ಪಡಿಸಿದ ಆವೃತ್ತಿಯನ್ನೇ ತಮ್ಮ ಬ್ಯಾನರ್‌ನಲ್ಲಿ ಬಳಸಿದ್ದರು.

ನಿಶ್ಚಿತಾರ್ಥದ ಪ್ರಕ್ರಿಯೆ ಮುಗಿಸಿ ಕೆಳಗಿಳಿದು ಬಂದ ತಕ್ಷಣವೇ ಪೊಲೀಸರು ಅವರನ್ನು ವಶಕ್ಕೆ ಪಡೆದರು. ಬಿಬಿಸಿ ವರದಿಯ ಪ್ರಕಾರ, ದಂಪತಿಗಳ ಮೇಲೆ ಕಾನೂನುಬಾಹಿರ ಪ್ರವೇಶ, ಸಾರ್ವಜನಿಕರನ್ನು ಅಪಾಯಕ್ಕೆ ಸಿಲುಕಿಸುವುದು, ಅಪರಾಧ ಕೃತ್ಯ, ಅಕ್ರಮ ಅತಿಕ್ರಮಣ  ಮತ್ತು ಸಾರ್ವಜನಿಕ ಶಾಂತಿ ಭಂಗ ಸೇರಿದಂತೆ ಹಲವು ಗಂಭೀರ ಪ್ರಕರಣಗಳನ್ನು ದಾಖಲಿಸಲಾಗಿದೆ.

ನ್ಯೂಯಾರ್ಕ್ ಪೊಲೀಸ್ ಕಮಿಷನರ್ ಜೆಸ್ಸಿಕಾ ಟಿಶ್ ಅವರು ತಮ್ಮ ಅಧಿಕೃತ ಸಾಮಾಜಿಕ ಮಾಧ್ಯಮದಲ್ಲಿ ಬಾಡಿಕಾಮ್ ಫೂಟೇಜ್ ಅನ್ನು ಹಂಚಿಕೊಳ್ಳುತ್ತಾ, "ನಮ್ಮ ತುರ್ತು ಸೇವಾ ಘಟಕದ ಕೆಲಸದ ಒಂದು ತುಣುಕು" ಎಂದು ಬರೆದುಕೊಂಡಿದ್ದಾರೆ. ಇನ್ನು ಈ ಕುರಿತು ಪ್ರತಿಕ್ರಿಯಿಸಿರುವ ಎಂಪೈರ್ ಸ್ಟೇಟ್ ಕಟ್ಟಡದ ವಕ್ತಾರರು, ಈ ಘಟನೆಯಿಂದ ಕಟ್ಟಡದ ನಿವಾಸಿಗಳಿಗೆ, ಸಂದರ್ಶಕರಿಗೆ ಅಥವಾ ವೀಕ್ಷಣಾ ಗ್ಯಾಲರಿಯಲ್ಲಿ ಇದ್ದ ಜನರಿಗೆ ಯಾವುದೇ ಪ್ರಾಣಾಪಾಯ ಉಂಟಾಗಿಲ್ಲ ಎಂದು ಸ್ಪಷ್ಟಣೆ ನೀಡಿದ್ದಾರೆ.

ಮೂಲತಃ ರಷ್ಯಾದ ಮಾಸ್ಕೋದವರಾದ ಇವಾನ್ ಮತ್ತು ಏಂಜೆಲಾ ಪ್ರಸ್ತುತ ನ್ಯೂಜೆರ್ಸಿಯ ಈಸ್ಟ್ ಆರೆಂಜ್‌ನಲ್ಲಿ ವಾಸಿಸುತ್ತಿದ್ದಾರೆ. ಇವರ ಅಪಾಯಕಾರಿ ಗಗನಚುಂಬಿ ಸಾಹಸಗಳು ಮತ್ತು ಪ್ರೇಮಕಥೆಯನ್ನೇ ಆಧಾರವಾಗಿಟ್ಟುಕೊಂಡು "ಸ್ಕೈವಾಕರ್ಸ್: ಎ ಲವ್ ಸ್ಟೋರಿ"  ಎಂಬ ಹೆಸರಿನ ಸಾಕ್ಷ್ಯಚಿತ್ರವನ್ನು ತಯಾರಿಸಲಾಗಿದ್ದು, ಇದು 2024 ರಲ್ಲಿ ನೆಟ್‌ಫ್ಲಿಕ್ಸ್‌ನಲ್ಲಿ  ಬಿಡುಗಡೆಯಾಗಿ ಜಾಗತಿಕವಾಗಿ ಸದ್ದು ಮಾಡಿತ್ತು (ಏಜೆನ್ಸೀಸ್​).